Chapter 155

brāhmaṇa uvāca |
amarṣī drupado rājā karmasiddhāndvijarṣabhān |
anvicchanparicakrāma brāhmaṇāvasathānbahūn || 1 ||
[Analyze grammar]

putrajanma parīpsanvai śokopahatacetanaḥ |
nāsti śreṣṭhaṃ mamāpatyamiti nityamacintayat || 2 ||
[Analyze grammar]

jātānputrānsa nirvedāddhigbandhūniti cābravīt |
niḥśvāsaparamaścāsīddroṇaṃ praticikīrṣayā || 3 ||
[Analyze grammar]

prabhāvaṃ vinayaṃ śikṣāṃ droṇasya caritāni ca |
kṣātreṇa ca balenāsya cintayannānvapadyata |
pratikartuṃ nṛpaśreṣṭho yatamāno'pi bhārata || 4 ||
[Analyze grammar]

abhitaḥ so'tha kalmāṣīṃ gaṅgākūle paribhraman |
brāhmaṇāvasathaṃ puṇyamāsasāda mahīpatiḥ || 5 ||
[Analyze grammar]

tatra nāsnātakaḥ kaścinna cāsīdavratī dvijaḥ |
tathaiva nāmahābhāgaḥ so'paśyatsaṃśitavratau || 6 ||
[Analyze grammar]

yājopayājau brahmarṣī śāmyantau pṛṣatātmajaḥ |
saṃhitādhyayane yuktau gotrataścāpi kāśyapau || 7 ||
[Analyze grammar]

tāraṇe yuktarūpau tau brāhmaṇāvṛṣisattamau |
sa tāvāmantrayāmāsa sarvakāmairatandritaḥ || 8 ||
[Analyze grammar]

buddhvā tayorbalaṃ buddhiṃ kanīyāṃsamupahvare |
prapede chandayankāmairupayājaṃ dhṛtavratam || 9 ||
[Analyze grammar]

pādaśuśrūṣaṇe yuktaḥ priyavāksarvakāmadaḥ |
arhayitvā yathānyāyamupayājamuvāca saḥ || 10 ||
[Analyze grammar]

yena me karmaṇā brahmanputraḥ syāddroṇamṛtyave |
upayāja kṛte tasmingavāṃ dātāsmi te'rbudam || 11 ||
[Analyze grammar]

yadvā te'nyaddvijaśreṣṭha manasaḥ supriyaṃ bhavet |
sarvaṃ tatte pradātāhaṃ na hi me'styatra saṃśayaḥ || 12 ||
[Analyze grammar]

ityukto nāhamityevaṃ tamṛṣiḥ pratyuvāca ha |
ārādhayiṣyandrupadaḥ sa taṃ paryacaratpunaḥ || 13 ||
[Analyze grammar]

tataḥ saṃvatsarasyānte drupadaṃ sa dvijottamaḥ |
upayājo'bravīdrājankāle madhurayā girā || 14 ||
[Analyze grammar]

jyeṣṭho bhrātā mamāgṛhṇādvicaranvananirjhare |
aparijñātaśaucāyāṃ bhūmau nipatitaṃ phalam || 15 ||
[Analyze grammar]

tadapaśyamahaṃ bhrāturasāṃpratamanuvrajan |
vimarśaṃ saṃkarādāne nāyaṃ kuryātkathaṃcana || 16 ||
[Analyze grammar]

dṛṣṭvā phalasya nāpaśyaddoṣā ye'syānubandhikāḥ |
vivinakti na śaucaṃ yaḥ so'nyatrāpi kathaṃ bhavet || 17 ||
[Analyze grammar]

saṃhitādhyayanaṃ kurvanvasangurukule ca yaḥ |
bhaikṣamucchiṣṭamanyeṣāṃ bhuṅkte cāpi sadā sadā |
kīrtayanguṇamannānāmaghṛṇī ca punaḥ punaḥ || 18 ||
[Analyze grammar]

tamahaṃ phalārthinaṃ manye bhrātaraṃ tarkacakṣuṣā |
taṃ vai gacchasva nṛpate sa tvāṃ saṃyājayiṣyati || 19 ||
[Analyze grammar]

jugupsamāno nṛpatirmanasedaṃ vicintayan |
upayājavacaḥ śrutvā nṛpatiḥ sarvadharmavit |
abhisaṃpūjya pūjārhamṛṣiṃ yājamuvāca ha || 20 ||
[Analyze grammar]

ayutāni dadānyaṣṭau gavāṃ yājaya māṃ vibho |
droṇavairābhisaṃtaptaṃ tvaṃ hlādayitumarhasi || 21 ||
[Analyze grammar]

sa hi brahmavidāṃ śreṣṭho brahmāstre cāpyanuttamaḥ |
tasmāddroṇaḥ parājaiṣīnmāṃ vai sa sakhivigrahe || 22 ||
[Analyze grammar]

kṣatriyo nāsti tulyo'sya pṛthivyāṃ kaścidagraṇīḥ |
kauravācāryamukhyasya bhāradvājasya dhīmataḥ || 23 ||
[Analyze grammar]

droṇasya śarajālāni prāṇidehaharāṇi ca |
ṣaḍaratni dhanuścāsya dṛśyate'pratimaṃ mahat || 24 ||
[Analyze grammar]

sa hi brāhmaṇavegena kṣātraṃ vegamasaṃśayam |
pratihanti maheṣvāso bhāradvājo mahāmanāḥ || 25 ||
[Analyze grammar]

kṣatrocchedāya vihito jāmadagnya ivāsthitaḥ |
tasya hyastrabalaṃ ghoramaprasahyaṃ narairbhuvi || 26 ||
[Analyze grammar]

brāhmamuccārayaṃstejo hutāhutirivānalaḥ |
sametya sa dahatyājau kṣatraṃ brahmapuraḥsaraḥ |
brahmakṣatre ca vihite brahmatejo viśiṣyate || 27 ||
[Analyze grammar]

so'haṃ kṣatrabalāddhīno brahmatejaḥ prapedivān |
droṇādviśiṣṭamāsādya bhavantaṃ brahmavittamam || 28 ||
[Analyze grammar]

droṇāntakamahaṃ putraṃ labheyaṃ yudhi durjayam |
tatkarma kuru me yāja nirvapāmyarbudaṃ gavām || 29 ||
[Analyze grammar]

tathetyuktvā tu taṃ yājo yājyārthamupakalpayat |
gurvartha iti cākāmamupayājamacodayat |
yājo droṇavināśāya pratijajñe tathā ca saḥ || 30 ||
[Analyze grammar]

tatastasya narendrasya upayājo mahātapāḥ |
ācakhyau karma vaitānaṃ tadā putraphalāya vai || 31 ||
[Analyze grammar]

sa ca putro mahāvīryo mahātejā mahābalaḥ |
iṣyate yadvidho rājanbhavitā te tathāvidhaḥ || 32 ||
[Analyze grammar]

bhāradvājasya hantāraṃ so'bhisaṃdhāya bhūmipaḥ |
ājahre tattathā sarvaṃ drupadaḥ karmasiddhaye || 33 ||
[Analyze grammar]

yājastu havanasyānte devīmāhvāpayattadā |
praihi māṃ rājñi pṛṣati mithunaṃ tvāmupasthitam || 34 ||
[Analyze grammar]

devyuvāca |
avaliptaṃ me mukhaṃ brahmanpuṇyāngandhānbibharmi ca |
sutārthenoparuddhāsmi tiṣṭha yāja mama priye || 35 ||
[Analyze grammar]

yāja uvāca |
yājena śrapitaṃ havyamupayājena mantritam |
kathaṃ kāmaṃ na saṃdadhyātsā tvaṃ vipraihi tiṣṭha vā || 36 ||
[Analyze grammar]

brāhmaṇa uvāca |
evamukte tu yājena hute haviṣi saṃskṛte |
uttasthau pāvakāttasmātkumāro devasaṃnibhaḥ || 37 ||
[Analyze grammar]

jvālāvarṇo ghorarūpaḥ kirīṭī varma cottamam |
bibhratsakhaḍgaḥ saśaro dhanuṣmānvinadanmuhuḥ || 38 ||
[Analyze grammar]

so'dhyārohadrathavaraṃ tena ca prayayau tadā |
tataḥ praṇeduḥ pāñcālāḥ prahṛṣṭāḥ sādhu sādhviti || 39 ||
[Analyze grammar]

bhayāpaho rājaputraḥ pāñcālānāṃ yaśaskaraḥ |
rājñaḥ śokāpaho jāta eṣa droṇavadhāya vai |
ityuvāca mahadbhūtamadṛśyaṃ khecaraṃ tadā || 40 ||
[Analyze grammar]

kumārī cāpi pāñcālī vedimadhyātsamutthitā |
subhagā darśanīyāṅgī vedimadhyā manoramā || 41 ||
[Analyze grammar]

śyāmā padmapalāśākṣī nīlakuñcitamūrdhajā |
mānuṣaṃ vigrahaṃ kṛtvā sākṣādamaravarṇinī || 42 ||
[Analyze grammar]

nīlotpalasamo gandho yasyāḥ krośātpravāyati |
yā bibharti paraṃ rūpaṃ yasyā nāstyupamā bhuvi || 43 ||
[Analyze grammar]

tāṃ cāpi jātāṃ suśroṇīṃ vāguvācāśarīriṇī |
sarvayoṣidvarā kṛṣṇā kṣayaṃ kṣatraṃ ninīṣati || 44 ||
[Analyze grammar]

surakāryamiyaṃ kāle kariṣyati sumadhyamā |
asyā hetoḥ kṣatriyāṇāṃ mahadutpatsyate bhayam || 45 ||
[Analyze grammar]

tacchrutvā sarvapāñcālāḥ praṇeduḥ siṃhasaṃghavat |
na caitānharṣasaṃpūrṇāniyaṃ sehe vasuṃdharā || 46 ||
[Analyze grammar]

tau dṛṣṭvā pṛṣatī yājaṃ prapede vai sutārthinī |
na vai madanyāṃ jananīṃ jānīyātāmimāviti || 47 ||
[Analyze grammar]

tathetyuvāca tāṃ yājo rājñaḥ priyacikīrṣayā |
tayośca nāmanī cakrurdvijāḥ saṃpūrṇamānasāḥ || 48 ||
[Analyze grammar]

dhṛṣṭatvādatidhṛṣṇutvāddharmāddyutsaṃbhavādapi |
dhṛṣṭadyumnaḥ kumāro'yaṃ drupadasya bhavatviti || 49 ||
[Analyze grammar]

kṛṣṇetyevābruvankṛṣṇāṃ kṛṣṇābhūtsā hi varṇataḥ |
tathā tanmithunaṃ jajñe drupadasya mahāmakhe || 50 ||
[Analyze grammar]

dhṛṣṭadyumnaṃ tu pāñcālyamānīya svaṃ viveśanam |
upākarodastrahetorbhāradvājaḥ pratāpavān || 51 ||
[Analyze grammar]

amokṣaṇīyaṃ daivaṃ hi bhāvi matvā mahāmatiḥ |
tathā tatkṛtavāndroṇa ātmakīrtyanurakṣaṇāt || 52 ||
[Analyze grammar]