Chapter 126

vaiśaṃpāyana uvāca |
datte'vakāśe puruṣairvismayotphullalocanaiḥ |
viveśa raṅgaṃ vistīrṇaṃ karṇaḥ parapuraṃjayaḥ || 1 ||
[Analyze grammar]

sahajaṃ kavacaṃ bibhratkuṇḍaloddyotitānanaḥ |
sadhanurbaddhanistriṃśaḥ pādacārīva parvataḥ || 2 ||
[Analyze grammar]

kanyāgarbhaḥ pṛthuyaśāḥ pṛthāyāḥ pṛthulocanaḥ |
tīkṣṇāṃśorbhāskarasyāṃśaḥ karṇo'rigaṇasūdanaḥ || 3 ||
[Analyze grammar]

siṃharṣabhagajendrāṇāṃ tulyavīryaparākramaḥ |
dīptikāntidyutiguṇaiḥ sūryendujvalanopamaḥ || 4 ||
[Analyze grammar]

prāṃśuḥ kanakatālābhaḥ siṃhasaṃhanano yuvā |
asaṃkhyeyaguṇaḥ śrīmānbhāskarasyātmasaṃbhavaḥ || 5 ||
[Analyze grammar]

sa nirīkṣya mahābāhuḥ sarvato raṅgamaṇḍalam |
praṇāmaṃ droṇakṛpayornātyādṛtamivākarot || 6 ||
[Analyze grammar]

sa sāmājajanaḥ sarvo niścalaḥ sthiralocanaḥ |
ko'yamityāgatakṣobhaḥ kautūhalaparo'bhavat || 7 ||
[Analyze grammar]

so'bravīnmeghadhīreṇa svareṇa vadatāṃ varaḥ |
bhrātā bhrātaramajñātaṃ sāvitraḥ pākaśāsanim || 8 ||
[Analyze grammar]

pārtha yatte kṛtaṃ karma viśeṣavadahaṃ tataḥ |
kariṣye paśyatāṃ nṝṇāṃ mātmanā vismayaṃ gamaḥ || 9 ||
[Analyze grammar]

asamāpte tatastasya vacane vadatāṃ vara |
yantrotkṣipta iva kṣipramuttasthau sarvato janaḥ || 10 ||
[Analyze grammar]

prītiśca puruṣavyāghra duryodhanamathāspṛśat |
hrīśca krodhaśca bībhatsuṃ kṣaṇenānvaviśacca ha || 11 ||
[Analyze grammar]

tato droṇābhyanujñātaḥ karṇaḥ priyaraṇaḥ sadā |
yatkṛtaṃ tatra pārthena taccakāra mahābalaḥ || 12 ||
[Analyze grammar]

atha duryodhanastatra bhrātṛbhiḥ saha bhārata |
karṇaṃ pariṣvajya mudā tato vacanamabravīt || 13 ||
[Analyze grammar]

svāgataṃ te mahābāho diṣṭyā prāpto'si mānada |
ahaṃ ca kururājyaṃ ca yatheṣṭamupabhujyatām || 14 ||
[Analyze grammar]

karṇa uvāca |
kṛtaṃ sarveṇa me'nyena sakhitvaṃ ca tvayā vṛṇe |
dvandvayuddhaṃ ca pārthena kartumicchāmi bhārata || 15 ||
[Analyze grammar]

duryodhana uvāca |
bhuṅkṣva bhogānmayā sārdhaṃ bandhūnāṃ priyakṛdbhava |
durhṛdāṃ kuru sarveṣāṃ mūrdhni pādamariṃdama || 16 ||
[Analyze grammar]

vaiśaṃpāyana uvāca |
tataḥ kṣiptamivātmānaṃ matvā pārtho'bhyabhāṣata |
karṇaṃ bhrātṛsamūhasya madhye'calamiva sthitam || 17 ||
[Analyze grammar]

anāhūtopasṛptānāmanāhūtopajalpinām |
ye lokāstānhataḥ karṇa mayā tvaṃ pratipatsyase || 18 ||
[Analyze grammar]

karṇa uvāca |
raṅgo'yaṃ sarvasāmānyaḥ kimatra tava phalguna |
vīryaśreṣṭhāśca rājanyā balaṃ dharmo'nuvartate || 19 ||
[Analyze grammar]

kiṃ kṣepairdurbalāśvāsaiḥ śaraiḥ kathaya bhārata |
guroḥ samakṣaṃ yāvatte harāmyadya śiraḥ śaraiḥ || 20 ||
[Analyze grammar]

vaiśaṃpāyana uvāca |
tato droṇābhyanujñātaḥ pārthaḥ parapuraṃjayaḥ |
bhrātṛbhistvarayāśliṣṭo raṇāyopajagāma tam || 21 ||
[Analyze grammar]

tato duryodhanenāpi sabhrātrā samarodyataḥ |
pariṣvaktaḥ sthitaḥ karṇaḥ pragṛhya saśaraṃ dhanuḥ || 22 ||
[Analyze grammar]

tataḥ savidyutstanitaiḥ sendrāyudhapurojavaiḥ |
āvṛtaṃ gaganaṃ meghairbalākāpaṅktihāsibhiḥ || 23 ||
[Analyze grammar]

tataḥ snehāddharihayaṃ dṛṣṭvā raṅgāvalokinam |
bhāskaro'pyanayannāśaṃ samīpopagatānghanān || 24 ||
[Analyze grammar]

meghacchāyopagūḍhastu tato'dṛśyata pāṇḍavaḥ |
sūryātapaparikṣiptaḥ karṇo'pi samadṛśyata || 25 ||
[Analyze grammar]

dhārtarāṣṭrā yataḥ karṇastasmindeśe vyavasthitāḥ |
bhāradvājaḥ kṛpo bhīṣmo yataḥ pārthastato'bhavan || 26 ||
[Analyze grammar]

dvidhā raṅgaḥ samabhavatstrīṇāṃ dvaidhamajāyata |
kuntibhojasutā mohaṃ vijñātārthā jagāma ha || 27 ||
[Analyze grammar]

tāṃ tathā mohasaṃpannāṃ viduraḥ sarvadharmavit |
kuntīmāśvāsayāmāsa prokṣyādbhiścandanokṣitaiḥ || 28 ||
[Analyze grammar]

tataḥ pratyāgataprāṇā tāvubhāvapi daṃśitau |
putrau dṛṣṭvā susaṃtaptā nānvapadyata kiṃcana || 29 ||
[Analyze grammar]

tāvudyatamahācāpau kṛpaḥ śāradvato'bravīt |
dvandvayuddhasamācāre kuśalaḥ sarvadharmavit || 30 ||
[Analyze grammar]

ayaṃ pṛthāyāstanayaḥ kanīyānpāṇḍunandanaḥ |
kauravo bhavatā sārdhaṃ dvandvayuddhaṃ kariṣyati || 31 ||
[Analyze grammar]

tvamapyevaṃ mahābāho mātaraṃ pitaraṃ kulam |
kathayasva narendrāṇāṃ yeṣāṃ tvaṃ kulavardhanaḥ |
tato viditvā pārthastvāṃ pratiyotsyati vā na vā || 32 ||
[Analyze grammar]

evamuktasya karṇasya vrīḍāvanatamānanam |
babhau varṣāmbubhiḥ klinnaṃ padmamāgalitaṃ yathā || 33 ||
[Analyze grammar]

duryodhana uvāca |
ācārya trividhā yonī rājñāṃ śāstraviniścaye |
tatkulīnaśca śūraśca senāṃ yaśca prakarṣati || 34 ||
[Analyze grammar]

yadyayaṃ phalguno yuddhe nārājñā yoddhumicchati |
tasmādeṣo'ṅgaviṣaye mayā rājye'bhiṣicyate || 35 ||
[Analyze grammar]

vaiśaṃpāyana uvāca |
tatastasminkṣaṇe karṇaḥ salājakusumairghaṭaiḥ |
kāñcanaiḥ kāñcane pīṭhe mantravidbhirmahārathaḥ |
abhiṣikto'ṅgarājye sa śriyā yukto mahābalaḥ || 36 ||
[Analyze grammar]

sacchatravālavyajano jayaśabdāntareṇa ca |
uvāca kauravaṃ rājā rājānaṃ taṃ vṛṣastadā || 37 ||
[Analyze grammar]

asya rājyapradānasya sadṛśaṃ kiṃ dadāni te |
prabrūhi rājaśārdūla kartā hyasmi tathā nṛpa |
atyantaṃ sakhyamicchāmītyāha taṃ sa suyodhanaḥ || 38 ||
[Analyze grammar]

evamuktastataḥ karṇastatheti pratyabhāṣata |
harṣāccobhau samāśliṣya parāṃ mudamavāpatuḥ || 39 ||
[Analyze grammar]