Chapter 119

vaiśaṃpāyana uvāca |
tataḥ kṣattā ca rājā ca bhīṣmaśca saha bandhubhiḥ |
daduḥ śrāddhaṃ tadā pāṇḍoḥ svadhāmṛtamayaṃ tadā || 1 ||
[Analyze grammar]

kurūṃśca vipramukhyāṃśca bhojayitvā sahasraśaḥ |
ratnaughāndvijamukhyebhyo dattvā grāmavarānapi || 2 ||
[Analyze grammar]

kṛtaśaucāṃstatastāṃstu pāṇḍavānbharatarṣabhān |
ādāya viviśuḥ paurāḥ puraṃ vāraṇasāhvayam || 3 ||
[Analyze grammar]

satataṃ smānvatapyanta tameva bharatarṣabham |
paurajānapadāḥ sarve mṛtaṃ svamiva bāndhavam || 4 ||
[Analyze grammar]

śrāddhāvasāne tu tadā dṛṣṭvā taṃ duḥkhitaṃ janam |
saṃmūḍhāṃ duḥkhaśokārtāṃ vyāso mātaramabravīt || 5 ||
[Analyze grammar]

atikrāntasukhāḥ kālāḥ pratyupasthitadāruṇāḥ |
śvaḥ śvaḥ pāpīyadivasāḥ pṛthivī gatayauvanā || 6 ||
[Analyze grammar]

bahumāyāsamākīrṇo nānādoṣasamākulaḥ |
luptadharmakriyācāro ghoraḥ kālo bhaviṣyati || 7 ||
[Analyze grammar]

gaccha tvaṃ tyāgamāsthāya yuktā vasa tapovane |
mā drakṣyasi kulasyāsya ghoraṃ saṃkṣayamātmanaḥ || 8 ||
[Analyze grammar]

tatheti samanujñāya sā praviśyābravītsnuṣām |
ambike tava putrasya durnayātkila bhāratāḥ |
sānubandhā vinaṅkṣyanti pautrāścaiveti naḥ śrutam || 9 ||
[Analyze grammar]

tatkausalyāmimāmārtāṃ putraśokābhipīḍitām |
vanamādāya bhadraṃ te gacchāvo yadi manyase || 10 ||
[Analyze grammar]

tathetyukte ambikayā bhīṣmamāmantrya suvratā |
vanaṃ yayau satyavatī snuṣābhyāṃ saha bhārata || 11 ||
[Analyze grammar]

tāḥ sughoraṃ tapaḥ kṛtvā devyo bharatasattama |
dehaṃ tyaktvā mahārāja gatimiṣṭāṃ yayustadā || 12 ||
[Analyze grammar]

avāpnuvanta vedoktānsaṃskārānpāṇḍavāstadā |
avardhanta ca bhogāṃste bhuñjānāḥ pitṛveśmani || 13 ||
[Analyze grammar]

dhārtarāṣṭraiśca sahitāḥ krīḍantaḥ pitṛveśmani |
bālakrīḍāsu sarvāsu viśiṣṭāḥ pāṇḍavābhavan || 14 ||
[Analyze grammar]

jave lakṣyābhiharaṇe bhojye pāṃsuvikarṣaṇe |
dhārtarāṣṭrānbhīmasenaḥ sarvānsa parimardati || 15 ||
[Analyze grammar]

harṣādetānkrīḍamānāngṛhya kākanilīyane |
śiraḥsu ca nigṛhyainānyodhayāmāsa pāṇḍavaḥ || 16 ||
[Analyze grammar]

śatamekottaraṃ teṣāṃ kumārāṇāṃ mahaujasām |
eka eva vimṛdnāti nātikṛcchrādvṛkodaraḥ || 17 ||
[Analyze grammar]

pādeṣu ca nigṛhyainānvinihatya balādbalī |
cakarṣa krośato bhūmau ghṛṣṭajānuśirokṣikān || 18 ||
[Analyze grammar]

daśa bālāñjale krīḍanbhujābhyāṃ parigṛhya saḥ |
āste sma salile magnaḥ pramṛtāṃśca vimuñcati || 19 ||
[Analyze grammar]

phalāni vṛkṣamāruhya pracinvanti ca te yadā |
tadā pādaprahāreṇa bhīmaḥ kampayate drumam || 20 ||
[Analyze grammar]

prahāravegābhihatāddrumādvyāghūrṇitāstataḥ |
saphalāḥ prapatanti sma drutaṃ srastāḥ kumārakāḥ || 21 ||
[Analyze grammar]

na te niyuddhe na jave na yogyāsu kadācana |
kumārā uttaraṃ cakruḥ spardhamānā vṛkodaram || 22 ||
[Analyze grammar]

evaṃ sa dhārtarāṣṭrāṇāṃ spardhamāno vṛkodaraḥ |
apriye'tiṣṭhadatyantaṃ bālyānna drohacetasā || 23 ||
[Analyze grammar]

tato balamatikhyātaṃ dhārtarāṣṭraḥ pratāpavān |
bhīmasenasya tajjñātvā duṣṭabhāvamadarśayat || 24 ||
[Analyze grammar]

tasya dharmādapetasya pāpāni paripaśyataḥ |
mohādaiśvaryalobhācca pāpā matirajāyata || 25 ||
[Analyze grammar]

ayaṃ balavatāṃ śreṣṭhaḥ kuntīputro vṛkodaraḥ |
madhyamaḥ pāṇḍuputrāṇāṃ nikṛtyā saṃnihanyatām || 26 ||
[Analyze grammar]

atha tasmādavarajaṃ jyeṣṭhaṃ caiva yudhiṣṭhiram |
prasahya bandhane baddhvā praśāsiṣye vasuṃdharām || 27 ||
[Analyze grammar]

evaṃ sa niścayaṃ pāpaḥ kṛtvā duryodhanastadā |
nityamevāntaraprekṣī bhīmasyāsīnmahātmanaḥ || 28 ||
[Analyze grammar]

tato jalavihārārthaṃ kārayāmāsa bhārata |
celakambalaveśmāni vicitrāṇi mahānti ca || 29 ||
[Analyze grammar]

pramāṇakoṭyāmuddeśaṃ sthalaṃ kiṃcidupetya ca |
krīḍāvasāne sarve te śucivastrāḥ svalaṃkṛtāḥ |
sarvakāmasamṛddhaṃ tadannaṃ bubhujire śanaiḥ || 30 ||
[Analyze grammar]

divasānte pariśrāntā vihṛtya ca kurūdvahāḥ |
vihārāvasatheṣveva vīrā vāsamarocayan || 31 ||
[Analyze grammar]

khinnastu balavānbhīmo vyāyāmābhyadhikastadā |
vāhayitvā kumārāṃstāñjalakrīḍāgatānvibhuḥ |
pramāṇakoṭyāṃ vāsārthī suṣvāpāruhya tatsthalam || 32 ||
[Analyze grammar]

śītaṃ vāsaṃ samāsādya śrānto madavimohitaḥ |
niśceṣṭaḥ pāṇḍavo rājansuṣvāpa mṛtakalpavat || 33 ||
[Analyze grammar]

tato baddhvā latāpāśairbhīmaṃ duryodhanaḥ śanaiḥ |
gambhīraṃ bhīmavegaṃ ca sthalājjalamapātayat || 34 ||
[Analyze grammar]

tataḥ prabuddhaḥ kaunteyaḥ sarvaṃ saṃchidya bandhanam |
udatiṣṭhajjalādbhūyo bhīmaḥ praharatāṃ varaḥ || 35 ||
[Analyze grammar]

suptaṃ cāpi punaḥ sarpaistīkṣṇadaṃṣṭrairmahāviṣaiḥ |
kupitairdaṃśayāmāsa sarveṣvevāṅgamarmasu || 36 ||
[Analyze grammar]

daṃṣṭrāśca daṃṣṭriṇāṃ teṣāṃ marmasvapi nipātitāḥ |
tvacaṃ naivāsya bibhiduḥ sāratvātpṛthuvakṣasaḥ || 37 ||
[Analyze grammar]

pratibuddhastu bhīmastānsarvānsarpānapothayat |
sārathiṃ cāsya dayitamapahastena jaghnivān || 38 ||
[Analyze grammar]

bhojane bhīmasenasya punaḥ prākṣepayadviṣam |
kālakūṭaṃ navaṃ tīkṣṇaṃ saṃbhṛtaṃ lomaharṣaṇam || 39 ||
[Analyze grammar]

vaiśyāputrastadācaṣṭa pārthānāṃ hitakāmyayā |
taccāpi bhuktvājarayadavikāro vṛkodaraḥ || 40 ||
[Analyze grammar]

vikāraṃ na hyajanayatsutīkṣṇamapi tadviṣam |
bhīmasaṃhanano bhīmastadapyajarayattataḥ || 41 ||
[Analyze grammar]

evaṃ duryodhanaḥ karṇaḥ śakuniścāpi saubalaḥ |
anekairabhyupāyaistāñjighāṃsanti sma pāṇḍavān || 42 ||
[Analyze grammar]

pāṇḍavāścāpi tatsarvaṃ pratyajānannariṃdamāḥ |
udbhāvanamakurvanto vidurasya mate sthitāḥ || 43 ||
[Analyze grammar]