Chapter 109

janamejaya uvāca |
kathito dhārtarāṣṭrāṇāmārṣaḥ saṃbhava uttamaḥ |
amānuṣo mānuṣāṇāṃ bhavatā brahmavittama || 1 ||
[Analyze grammar]

nāmadheyāni cāpyeṣāṃ kathyamānāni bhāgaśaḥ |
tvattaḥ śrutāni me brahmanpāṇḍavānāṃ tu kīrtaya || 2 ||
[Analyze grammar]

te hi sarve mahātmāno devarājaparākramāḥ |
tvayaivāṃśāvataraṇe devabhāgāḥ prakīrtitāḥ || 3 ||
[Analyze grammar]

tasmādicchāmyahaṃ śrotumatimānuṣakarmaṇām |
teṣāmājananaṃ sarvaṃ vaiśaṃpāyana kīrtaya || 4 ||
[Analyze grammar]

vaiśaṃpāyana uvāca |
rājā pāṇḍurmahāraṇye mṛgavyālaniṣevite |
vane maithunakālasthaṃ dadarśa mṛgayūthapam || 5 ||
[Analyze grammar]

tatastāṃ ca mṛgīṃ taṃ ca rukmapuṅkhaiḥ supatribhiḥ |
nirbibheda śaraistīkṣṇaiḥ pāṇḍuḥ pañcabhirāśugaiḥ || 6 ||
[Analyze grammar]

sa ca rājanmahātejā ṛṣiputrastapodhanaḥ |
bhāryayā saha tejasvī mṛgarūpeṇa saṃgataḥ || 7 ||
[Analyze grammar]

saṃsaktastu tayā mṛgyā mānuṣīmīrayangiram |
kṣaṇena patito bhūmau vilalāpākulendriyaḥ || 8 ||
[Analyze grammar]

mṛga uvāca |
kāmamanyuparītāpi buddhyaṅgarahitāpi ca |
varjayanti nṛśaṃsāni pāpeṣvabhiratā narāḥ || 9 ||
[Analyze grammar]

na vidhiṃ grasate prajñā prajñāṃ tu grasate vidhiḥ |
vidhiparyāgatānarthānprajñā na pratipadyate || 10 ||
[Analyze grammar]

śaśvaddharmātmanāṃ mukhye kule jātasya bhārata |
kāmalobhābhibhūtasya kathaṃ te calitā matiḥ || 11 ||
[Analyze grammar]

pāṇḍuruvāca |
śatrūṇāṃ yā vadhe vṛttiḥ sā mṛgāṇāṃ vadhe smṛtā |
rājñāṃ mṛga na māṃ mohāttvaṃ garhayitumarhasi || 12 ||
[Analyze grammar]

acchadmanāmāyayā ca mṛgāṇāṃ vadha iṣyate |
sa eva dharmo rājñāṃ tu tadvidvānkiṃ nu garhase || 13 ||
[Analyze grammar]

agastyaḥ satramāsīnaścacāra mṛgayāmṛṣiḥ |
āraṇyānsarvadaivatyānmṛgānprokṣya mahāvane || 14 ||
[Analyze grammar]

pramāṇadṛṣṭadharmeṇa kathamasmānvigarhase |
agastyasyābhicāreṇa yuṣmākaṃ vai vapā hutā || 15 ||
[Analyze grammar]

mṛga uvāca |
na ripūnvai samuddiśya vimuñcanti purā śarān |
randhra eṣāṃ viśeṣeṇa vadhakālaḥ praśasyate || 16 ||
[Analyze grammar]

pāṇḍuruvāca |
pramattamapramattaṃ vā vivṛtaṃ ghnanti caujasā |
upāyairiṣubhistīkṣṇaiḥ kasmānmṛga vigarhase || 17 ||
[Analyze grammar]

mṛga uvāca |
nāhaṃ ghnantaṃ mṛgānrājanvigarhe ātmakāraṇāt |
maithunaṃ tu pratīkṣyaṃ me syāttvayehānṛśaṃsataḥ || 18 ||
[Analyze grammar]

sarvabhūtahite kāle sarvabhūtepsite tathā |
ko hi vidvānmṛgaṃ hanyāccarantaṃ maithunaṃ vane |
puruṣārthaphalaṃ kāntaṃ yattvayā vitathaṃ kṛtam || 19 ||
[Analyze grammar]

pauravāṇāmṛṣīṇāṃ ca teṣāmakliṣṭakarmaṇām |
vaṃśe jātasya kauravya nānurūpamidaṃ tava || 20 ||
[Analyze grammar]

nṛśaṃsaṃ karma sumahatsarvalokavigarhitam |
asvargyamayaśasyaṃ ca adharmiṣṭhaṃ ca bhārata || 21 ||
[Analyze grammar]

strībhogānāṃ viśeṣajñaḥ śāstradharmārthatattvavit |
nārhastvaṃ surasaṃkāśa kartumasvargyamīdṛśam || 22 ||
[Analyze grammar]

tvayā nṛśaṃsakartāraḥ pāpācārāśca mānavāḥ |
nigrāhyāḥ pārthivaśreṣṭha trivargaparivarjitāḥ || 23 ||
[Analyze grammar]

kiṃ kṛtaṃ te naraśreṣṭha nighnato māmanāgasam |
muniṃ mūlaphalāhāraṃ mṛgaveṣadharaṃ nṛpa |
vasamānamaraṇyeṣu nityaṃ śamaparāyaṇam || 24 ||
[Analyze grammar]

tvayāhaṃ hiṃsito yasmāttasmāttvāmapyasaṃśayam |
dvayornṛśaṃsakartāramavaśaṃ kāmamohitam |
jīvitāntakaro bhāva evamevāgamiṣyati || 25 ||
[Analyze grammar]

ahaṃ hi kiṃdamo nāma tapasāpratimo muniḥ |
vyapatrapanmanuṣyāṇāṃ mṛgyāṃ maithunamācaram || 26 ||
[Analyze grammar]

mṛgo bhūtvā mṛgaiḥ sārdhaṃ carāmi gahane vane |
na tu te brahmahatyeyaṃ bhaviṣyatyavijānataḥ |
mṛgarūpadharaṃ hatvā māmevaṃ kāmamohitam || 27 ||
[Analyze grammar]

asya tu tvaṃ phalaṃ mūḍha prāpsyasīdṛśameva hi |
priyayā saha saṃvāsaṃ prāpya kāmavimohitaḥ |
tvamapyasyāmavasthāyāṃ pretalokaṃ gamiṣyasi || 28 ||
[Analyze grammar]

antakāle ca saṃvāsaṃ yayā gantāsi kāntayā |
pretarājavaśaṃ prāptaṃ sarvabhūtaduratyayam |
bhaktyā matimatāṃ śreṣṭha saiva tvāmanuyāsyati || 29 ||
[Analyze grammar]

vartamānaḥ sukhe duḥkhaṃ yathāhaṃ prāpitastvayā |
tathā sukhaṃ tvāṃ saṃprāptaṃ duḥkhamabhyāgamiṣyati || 30 ||
[Analyze grammar]

vaiśaṃpāyana uvāca |
evamuktvā suduḥkhārto jīvitātsa vyayujyata |
mṛgaḥ pāṇḍuśca śokārtaḥ kṣaṇena samapadyata || 31 ||
[Analyze grammar]