Chapter 99

bhīṣma uvāca |
punarbharatavaṃśasya hetuṃ saṃtānavṛddhaye |
vakṣyāmi niyataṃ mātastanme nigadataḥ śṛṇu || 1 ||
[Analyze grammar]

brāhmaṇo guṇavānkaściddhanenopanimantryatām |
vicitravīryakṣetreṣu yaḥ samutpādayetprajāḥ || 2 ||
[Analyze grammar]

vaiśaṃpāyana uvāca |
tataḥ satyavatī bhīṣmaṃ vācā saṃsajjamānayā |
vihasantīva savrīḍamidaṃ vacanamabravīt || 3 ||
[Analyze grammar]

satyametanmahābāho yathā vadasi bhārata |
viśvāsātte pravakṣyāmi saṃtānāya kulasya ca |
na te śakyamanākhyātumāpaddhīyaṃ tathāvidhā || 4 ||
[Analyze grammar]

tvameva naḥ kule dharmastvaṃ satyaṃ tvaṃ parā gatiḥ |
tasmānniśamya vākyaṃ me kuruṣva yadanantaram || 5 ||
[Analyze grammar]

dharmayuktasya dharmātmanpiturāsīttarī mama |
sā kadācidahaṃ tatra gatā prathamayauvane || 6 ||
[Analyze grammar]

atha dharmabhṛtāṃ śreṣṭhaḥ paramarṣiḥ parāśaraḥ |
ājagāma tarīṃ dhīmāṃstariṣyanyamunāṃ nadīm || 7 ||
[Analyze grammar]

sa tāryamāṇo yamunāṃ māmupetyābravīttadā |
sāntvapūrvaṃ muniśreṣṭhaḥ kāmārto madhuraṃ bahu || 8 ||
[Analyze grammar]

tamahaṃ śāpabhītā ca piturbhītā ca bhārata |
varairasulabhairuktā na pratyākhyātumutsahe || 9 ||
[Analyze grammar]

abhibhūya sa māṃ bālāṃ tejasā vaśamānayat |
tamasā lokamāvṛtya naugatāmeva bhārata || 10 ||
[Analyze grammar]

matsyagandho mahānāsītpurā mama jugupsitaḥ |
tamapāsya śubhaṃ gandhamimaṃ prādātsa me muniḥ || 11 ||
[Analyze grammar]

tato māmāha sa munirgarbhamutsṛjya māmakam |
dvīpe'syā eva saritaḥ kanyaiva tvaṃ bhaviṣyasi || 12 ||
[Analyze grammar]

pārāśaryo mahāyogī sa babhūva mahānṛṣiḥ |
kanyāputro mama purā dvaipāyana iti smṛtaḥ || 13 ||
[Analyze grammar]

yo vyasya vedāṃścaturastapasā bhagavānṛṣiḥ |
loke vyāsatvamāpede kārṣṇyātkṛṣṇatvameva ca || 14 ||
[Analyze grammar]

satyavādī śamaparastapasvī dagdhakilbiṣaḥ |
sa niyukto mayā vyaktaṃ tvayā ca amitadyute |
bhrātuḥ kṣetreṣu kalyāṇamapatyaṃ janayiṣyati || 15 ||
[Analyze grammar]

sa hi māmuktavāṃstatra smareḥ kṛtyeṣu māmiti |
taṃ smariṣye mahābāho yadi bhīṣma tvamicchasi || 16 ||
[Analyze grammar]

tava hyanumate bhīṣma niyataṃ sa mahātapāḥ |
vicitravīryakṣetreṣu putrānutpādayiṣyati || 17 ||
[Analyze grammar]

maharṣeḥ kīrtane tasya bhīṣmaḥ prāñjalirabravīt |
dharmamarthaṃ ca kāmaṃ ca trīnetānyo'nupaśyati || 18 ||
[Analyze grammar]

arthamarthānubandhaṃ ca dharmaṃ dharmānubandhanam |
kāmaṃ kāmānubandhaṃ ca viparītānpṛthakpṛthak |
yo vicintya dhiyā samyagvyavasyati sa buddhimān || 19 ||
[Analyze grammar]

tadidaṃ dharmayuktaṃ ca hitaṃ caiva kulasya naḥ |
uktaṃ bhavatyā yacchreyaḥ paramaṃ rocate mama || 20 ||
[Analyze grammar]

tatastasminpratijñāte bhīṣmeṇa kurunandana |
kṛṣṇadvaipāyanaṃ kālī cintayāmāsa vai munim || 21 ||
[Analyze grammar]

sa vedānvibruvandhīmānmāturvijñāya cintitam |
prādurbabhūvāviditaḥ kṣaṇena kurunandana || 22 ||
[Analyze grammar]

tasmai pūjāṃ tadā dattvā sutāya vidhipūrvakam |
pariṣvajya ca bāhubhyāṃ prasnavairabhiṣicya ca |
mumoca bāṣpaṃ dāśeyī putraṃ dṛṣṭvā cirasya tam || 23 ||
[Analyze grammar]

tāmadbhiḥ pariṣicyārtāṃ maharṣirabhivādya ca |
mātaraṃ pūrvajaḥ putro vyāso vacanamabravīt || 24 ||
[Analyze grammar]

bhavatyā yadabhipretaṃ tadahaṃ kartumāgataḥ |
śādhi māṃ dharmatattvajñe karavāṇi priyaṃ tava || 25 ||
[Analyze grammar]

tasmai pūjāṃ tato'kārṣītpurodhāḥ paramarṣaye |
sa ca tāṃ pratijagrāha vidhivanmantrapūrvakam || 26 ||
[Analyze grammar]

tamāsanagataṃ mātā pṛṣṭvā kuśalamavyayam |
satyavatyabhivīkṣyainamuvācedamanantaram || 27 ||
[Analyze grammar]

mātāpitroḥ prajāyante putrāḥ sādhāraṇāḥ kave |
teṣāṃ pitā yathā svāmī tathā mātā na saṃśayaḥ || 28 ||
[Analyze grammar]

vidhātṛvihitaḥ sa tvaṃ yathā me prathamaḥ sutaḥ |
vicitravīryo brahmarṣe tathā me'varajaḥ sutaḥ || 29 ||
[Analyze grammar]

yathaiva pitṛto bhīṣmastathā tvamapi mātṛtaḥ |
bhrātā vicitravīryasya yathā vā putra manyase || 30 ||
[Analyze grammar]

ayaṃ śāṃtanavaḥ satyaṃ pālayansatyavikramaḥ |
buddhiṃ na kurute'patye tathā rājyānuśāsane || 31 ||
[Analyze grammar]

sa tvaṃ vyapekṣayā bhrātuḥ saṃtānāya kulasya ca |
bhīṣmasya cāsya vacanānniyogācca mamānagha || 32 ||
[Analyze grammar]

anukrośācca bhūtānāṃ sarveṣāṃ rakṣaṇāya ca |
ānṛśaṃsyena yadbrūyāṃ tacchrutvā kartumarhasi || 33 ||
[Analyze grammar]

yavīyasastava bhrāturbhārye surasutopame |
rūpayauvanasaṃpanne putrakāme ca dharmataḥ || 34 ||
[Analyze grammar]

tayorutpādayāpatyaṃ samartho hyasi putraka |
anurūpaṃ kulasyāsya saṃtatyāḥ prasavasya ca || 35 ||
[Analyze grammar]

vyāsa uvāca |
vettha dharmaṃ satyavati paraṃ cāparameva ca |
yathā ca tava dharmajñe dharme praṇihitā matiḥ || 36 ||
[Analyze grammar]

tasmādahaṃ tvanniyogāddharmamuddiśya kāraṇam |
īpsitaṃ te kariṣyāmi dṛṣṭaṃ hyetatpurātanam || 37 ||
[Analyze grammar]

bhrātuḥ putrānpradāsyāmi mitrāvaruṇayoḥ samān |
vrataṃ caretāṃ te devyau nirdiṣṭamiha yanmayā || 38 ||
[Analyze grammar]

saṃvatsaraṃ yathānyāyaṃ tataḥ śuddhe bhaviṣyataḥ |
na hi māmavratopetā upeyātkācidaṅganā || 39 ||
[Analyze grammar]

satyavatyuvāca |
yathā sadyaḥ prapadyeta devī garbhaṃ tathā kuru |
arājakeṣu rāṣṭreṣu nāsti vṛṣṭirna devatāḥ || 40 ||
[Analyze grammar]

kathamarājakaṃ rāṣṭraṃ śakyaṃ dhārayituṃ prabho |
tasmādgarbhaṃ samādhatsva bhīṣmastaṃ vardhayiṣyati || 41 ||
[Analyze grammar]

vyāsa uvāca |
yadi putraḥ pradātavyo mayā kṣipramakālikam |
virūpatāṃ me sahatāmetadasyāḥ paraṃ vratam || 42 ||
[Analyze grammar]

yadi me sahate gandhaṃ rūpaṃ veṣaṃ tathā vapuḥ |
adyaiva garbhaṃ kausalyā viśiṣṭaṃ pratipadyatām || 43 ||
[Analyze grammar]

vaiśaṃpāyana uvāca |
samāgamanamākāṅkṣanniti so'ntarhito muniḥ |
tato'bhigamya sā devī snuṣāṃ rahasi saṃgatām |
dharmyamarthasamāyuktamuvāca vacanaṃ hitam || 44 ||
[Analyze grammar]

kausalye dharmatantraṃ yadbravīmi tvāṃ nibodha me |
bharatānāṃ samucchedo vyaktaṃ madbhāgyasaṃkṣayāt || 45 ||
[Analyze grammar]

vyathitāṃ māṃ ca saṃprekṣya pitṛvaṃśaṃ ca pīḍitam |
bhīṣmo buddhimadānme'tra dharmasya ca vivṛddhaye || 46 ||
[Analyze grammar]

sā ca buddhistavādhīnā putri jñātaṃ mayeti ha |
naṣṭaṃ ca bhārataṃ vaṃśaṃ punareva samuddhara || 47 ||
[Analyze grammar]

putraṃ janaya suśroṇi devarājasamaprabham |
sa hi rājyadhuraṃ gurvīmudvakṣyati kulasya naḥ || 48 ||
[Analyze grammar]

sā dharmato'nunīyaināṃ kathaṃciddharmacāriṇīm |
bhojayāmāsa viprāṃśca devarṣīnatithīṃstathā || 49 ||
[Analyze grammar]