Chapter 98

bhīṣma uvāca |
jāmadagnyena rāmeṇa piturvadhamamṛṣyatā |
kruddhena ca mahābhāge haihayādhipatirhataḥ |
śatāni daśa bāhūnāṃ nikṛttānyarjunasya vai || 1 ||
[Analyze grammar]

punaśca dhanurādāya mahāstrāṇi pramuñcatā |
nirdagdhaṃ kṣatramasakṛdrathena jayatā mahīm || 2 ||
[Analyze grammar]

evamuccāvacairastrairbhārgaveṇa mahātmanā |
triḥsaptakṛtvaḥ pṛthivī kṛtā niḥkṣatriyā purā || 3 ||
[Analyze grammar]

tataḥ saṃbhūya sarvābhiḥ kṣatriyābhiḥ samantataḥ |
utpāditānyapatyāni brāhmaṇairniyatātmabhiḥ || 4 ||
[Analyze grammar]

pāṇigrāhasya tanaya iti vedeṣu niścitam |
dharmaṃ manasi saṃsthāpya brāhmaṇāṃstāḥ samabhyayuḥ |
loke'pyācarito dṛṣṭaḥ kṣatriyāṇāṃ punarbhavaḥ || 5 ||
[Analyze grammar]

athotathya iti khyāta āsīddhīmānṛṣiḥ purā |
mamatā nāma tasyāsīdbhāryā paramasaṃmatā || 6 ||
[Analyze grammar]

utathyasya yavīyāṃstu purodhāstridivaukasām |
bṛhaspatirbṛhattejā mamatāṃ so'nvapadyata || 7 ||
[Analyze grammar]

uvāca mamatā taṃ tu devaraṃ vadatāṃ varam |
antarvatnī ahaṃ bhrātrā jyeṣṭhenāramyatāmiti || 8 ||
[Analyze grammar]

ayaṃ ca me mahābhāga kukṣāveva bṛhaspate |
autathyo vedamatraiva ṣaḍaṅgaṃ pratyadhīyata || 9 ||
[Analyze grammar]

amogharetāstvaṃ cāpi nūnaṃ bhavitumarhasi |
tasmādevaṃgate'dya tvamupāramitumarhasi || 10 ||
[Analyze grammar]

evamuktastayā samyagbṛhattejā bṛhaspatiḥ |
kāmātmānaṃ tadātmānaṃ na śaśāka niyacchitum || 11 ||
[Analyze grammar]

saṃbabhūva tataḥ kāmī tayā sārdhamakāmayā |
utsṛjantaṃ tu taṃ retaḥ sa garbhastho'bhyabhāṣata || 12 ||
[Analyze grammar]

bhostāta kanyasa vade dvayornāstyatra saṃbhavaḥ |
amoghaśukraśca bhavānpūrvaṃ cāhamihāgataḥ || 13 ||
[Analyze grammar]

śaśāpa taṃ tataḥ kruddha evamukto bṛhaspatiḥ |
utathyaputraṃ garbhasthaṃ nirbhartsya bhagavānṛṣiḥ || 14 ||
[Analyze grammar]

yasmāttvamīdṛśe kāle sarvabhūtepsite sati |
evamāttha vacastasmāttamo dīrghaṃ pravekṣyasi || 15 ||
[Analyze grammar]

sa vai dīrghatamā nāma śāpādṛṣirajāyata |
bṛhaspaterbṛhatkīrterbṛhaspatirivaujasā || 16 ||
[Analyze grammar]

sa putrāñjanayāmāsa gautamādīnmahāyaśāḥ |
ṛṣerutathyasya tadā saṃtānakulavṛddhaye || 17 ||
[Analyze grammar]

lobhamohābhibhūtāste putrāstaṃ gautamādayaḥ |
kāṣṭhe samudge prakṣipya gaṅgāyāṃ samavāsṛjan || 18 ||
[Analyze grammar]

na syādandhaśca vṛddhaśca bhartavyo'yamiti sma te |
cintayitvā tataḥ krūrāḥ pratijagmuratho gṛhān || 19 ||
[Analyze grammar]

so'nusrotastadā rājanplavamāna ṛṣistataḥ |
jagāma subahūndeśānandhastenoḍupena ha || 20 ||
[Analyze grammar]

taṃ tu rājā balirnāma sarvadharmaviśāradaḥ |
apaśyanmajjanagataḥ srotasābhyāśamāgatam || 21 ||
[Analyze grammar]

jagrāha cainaṃ dharmātmā baliḥ satyaparākramaḥ |
jñātvā cainaṃ sa vavre'tha putrārthaṃ manujarṣabha || 22 ||
[Analyze grammar]

saṃtānārthaṃ mahābhāga bhāryāsu mama mānada |
putrāndharmārthakuśalānutpādayitumarhasi || 23 ||
[Analyze grammar]

evamuktaḥ sa tejasvī taṃ tathetyuktavānṛṣiḥ |
tasmai sa rājā svāṃ bhāryāṃ sudeṣṇāṃ prāhiṇottadā || 24 ||
[Analyze grammar]

andhaṃ vṛddhaṃ ca taṃ matvā na sā devī jagāma ha |
svāṃ tu dhātreyikāṃ tasmai vṛddhāya prāhiṇottadā || 25 ||
[Analyze grammar]

tasyāṃ kākṣīvadādīnsa śūdrayonāvṛṣirvaśī |
janayāmāsa dharmātmā putrānekādaśaiva tu || 26 ||
[Analyze grammar]

kākṣīvadādīnputrāṃstāndṛṣṭvā sarvānadhīyataḥ |
uvāca tamṛṣiṃ rājā mamaita iti vīryavān || 27 ||
[Analyze grammar]

netyuvāca maharṣistaṃ mamaivaita iti bruvan |
śūdrayonau mayā hīme jātāḥ kākṣīvadādayaḥ || 28 ||
[Analyze grammar]

andhaṃ vṛddhaṃ ca māṃ matvā sudeṣṇā mahiṣī tava |
avamanya dadau mūḍhā śūdrāṃ dhātreyikāṃ hi me || 29 ||
[Analyze grammar]

tataḥ prasādayāmāsa punastamṛṣisattamam |
baliḥ sudeṣṇāṃ bhāryāṃ ca tasmai tāṃ prāhiṇotpunaḥ || 30 ||
[Analyze grammar]

tāṃ sa dīrghatamāṅgeṣu spṛṣṭvā devīmathābravīt |
bhaviṣyati kumāraste tejasvī satyavāgiti || 31 ||
[Analyze grammar]

tatrāṅgo nāma rājarṣiḥ sudeṣṇāyāmajāyata |
evamanye maheṣvāsā brāhmaṇaiḥ kṣatriyā bhuvi || 32 ||
[Analyze grammar]

jātāḥ paramadharmajñā vīryavanto mahābalāḥ |
etacchrutvā tvamapyatra mātaḥ kuru yathepsitam || 33 ||
[Analyze grammar]