Chapter 92

vaiśaṃpāyana uvāca |
tataḥ pratīpo rājā sa sarvabhūtahite rataḥ |
niṣasāda samā bahvīrgaṅgātīragato japan || 1 ||
[Analyze grammar]

tasya rūpaguṇopetā gaṅgā śrīriva rūpiṇī |
uttīrya salilāttasmāllobhanīyatamākṛtiḥ || 2 ||
[Analyze grammar]

adhīyānasya rājarṣerdivyarūpā manasvinī |
dakṣiṇaṃ śālasaṃkāśamūruṃ bheje śubhānanā || 3 ||
[Analyze grammar]

pratīpastu mahīpālastāmuvāca manasvinīm |
karavāṇi kiṃ te kalyāṇi priyaṃ yatte'bhikāṅkṣitam || 4 ||
[Analyze grammar]

stryuvāca |
tvāmahaṃ kāmaye rājankuruśreṣṭha bhajasva mām |
tyāgaḥ kāmavatīnāṃ hi strīṇāṃ sadbhirvigarhitaḥ || 5 ||
[Analyze grammar]

pratīpa uvāca |
nāhaṃ parastriyaṃ kāmādgaccheyaṃ varavarṇini |
na cāsavarṇāṃ kalyāṇi dharmyaṃ tadviddhi me vratam || 6 ||
[Analyze grammar]

stryuvāca |
nāśreyasyasmi nāgamyā na vaktavyā ca karhicit |
bhaja māṃ bhajamānāṃ tvaṃ rājankanyāṃ varastriyam || 7 ||
[Analyze grammar]

pratīpa uvāca |
mayātivṛttametatte yanmāṃ codayasi priyam |
anyathā pratipannaṃ māṃ nāśayeddharmaviplavaḥ || 8 ||
[Analyze grammar]

prāpya dakṣiṇamūruṃ me tvamāśliṣṭā varāṅgane |
apatyānāṃ snuṣāṇāṃ ca bhīru viddhyetadāsanam || 9 ||
[Analyze grammar]

savyataḥ kāminībhāgastvayā sa ca vivarjitaḥ |
tasmādahaṃ nācariṣye tvayi kāmaṃ varāṅgane || 10 ||
[Analyze grammar]

snuṣā me bhava kalyāṇi putrārthe tvāṃ vṛṇomyaham |
snuṣāpakṣaṃ hi vāmoru tvamāgamya samāśritā || 11 ||
[Analyze grammar]

stryuvāca |
evamapyastu dharmajña saṃyujyeyaṃ sutena te |
tvadbhaktyaiva bhajiṣyāmi prakhyātaṃ bhārataṃ kulam || 12 ||
[Analyze grammar]

pṛthivyāṃ pārthivā ye ca teṣāṃ yūyaṃ parāyaṇam |
guṇā na hi mayā śakyā vaktuṃ varṣaśatairapi |
kulasya ye vaḥ prasthitāstatsādhutvamanuttamam || 13 ||
[Analyze grammar]

sa me nābhijanajñaḥ syādācareyaṃ ca yadvibho |
tatsarvameva putraste na mīmāṃseta karhicit || 14 ||
[Analyze grammar]

evaṃ vasantī putre te vardhayiṣyāmyahaṃ priyam |
putraiḥ puṇyaiḥ priyaiścāpi svargaṃ prāpsyati te sutaḥ || 15 ||
[Analyze grammar]

vaiśaṃpāyana uvāca |
tathetyuktvā tu sā rājaṃstatraivāntaradhīyata |
putrajanma pratīkṣaṃstu sa rājā tadadhārayat || 16 ||
[Analyze grammar]

etasminneva kāle tu pratīpaḥ kṣatriyarṣabhaḥ |
tapastepe sutasyārthe sabhāryaḥ kurunandana || 17 ||
[Analyze grammar]

tayoḥ samabhavatputro vṛddhayoḥ sa mahābhiṣaḥ |
śāntasya jajñe saṃtānastasmādāsītsa śaṃtanuḥ || 18 ||
[Analyze grammar]

saṃsmaraṃścākṣayāṃllokānvijitānsvena karmaṇā |
puṇyakarmakṛdevāsīcchaṃtanuḥ kurusattama || 19 ||
[Analyze grammar]

pratīpaḥ śaṃtanuṃ putraṃ yauvanasthaṃ tato'nvaśāt |
purā māṃ strī samabhyāgācchaṃtano bhūtaye tava || 20 ||
[Analyze grammar]

tvāmāvrajedyadi rahaḥ sā putra varavarṇinī |
kāmayānābhirūpāḍhyā divyā strī putrakāmyayā |
sā tvayā nānuyoktavyā kāsi kasyāsi vāṅgane || 21 ||
[Analyze grammar]

yacca kuryānna tatkāryaṃ praṣṭavyā sā tvayānagha |
manniyogādbhajantīṃ tāṃ bhajethā ityuvāca tam || 22 ||
[Analyze grammar]

evaṃ saṃdiśya tanayaṃ pratīpaḥ śaṃtanuṃ tadā |
sve ca rājye'bhiṣicyainaṃ vanaṃ rājā viveśa ha || 23 ||
[Analyze grammar]

sa rājā śaṃtanurdhīmānkhyātaḥ pṛthvyāṃ dhanurdharaḥ |
babhūva mṛgayāśīlaḥ satataṃ vanagocaraḥ || 24 ||
[Analyze grammar]

sa mṛgānmahiṣāṃścaiva vinighnanrājasattamaḥ |
gaṅgāmanucacāraikaḥ siddhacāraṇasevitām || 25 ||
[Analyze grammar]

sa kadācinmahārāja dadarśa paramastriyam |
jājvalyamānāṃ vapuṣā sākṣātpadmāmiva śriyam || 26 ||
[Analyze grammar]

sarvānavadyāṃ sudatīṃ divyābharaṇabhūṣitām |
sūkṣmāmbaradharāmekāṃ padmodarasamaprabhām || 27 ||
[Analyze grammar]

tāṃ dṛṣṭvā hṛṣṭaromābhūdvismito rūpasaṃpadā |
pibanniva ca netrābhyāṃ nātṛpyata narādhipaḥ || 28 ||
[Analyze grammar]

sā ca dṛṣṭvaiva rājānaṃ vicarantaṃ mahādyutim |
snehādāgatasauhārdā nātṛpyata vilāsinī || 29 ||
[Analyze grammar]

tāmuvāca tato rājā sāntvayañślakṣṇayā girā |
devī vā dānavī vā tvaṃ gandharvī yadi vāpsarāḥ || 30 ||
[Analyze grammar]

yakṣī vā pannagī vāpi mānuṣī vā sumadhyame |
yā vā tvaṃ suragarbhābhe bhāryā me bhava śobhane || 31 ||
[Analyze grammar]

etacchrutvā vaco rājñaḥ sasmitaṃ mṛdu valgu ca |
vasūnāṃ samayaṃ smṛtvā abhyagacchadaninditā || 32 ||
[Analyze grammar]

uvāca caiva rājñaḥ sā hlādayantī mano girā |
bhaviṣyāmi mahīpāla mahiṣī te vaśānugā || 33 ||
[Analyze grammar]

yattu kuryāmahaṃ rājañśubhaṃ vā yadi vāśubham |
na tadvārayitavyāsmi na vaktavyā tathāpriyam || 34 ||
[Analyze grammar]

evaṃ hi vartamāne'haṃ tvayi vatsyāmi pārthiva |
vāritā vipriyaṃ coktā tyajeyaṃ tvāmasaṃśayam || 35 ||
[Analyze grammar]

tatheti rājñā sā tūktā tadā bharatasattama |
praharṣamatulaṃ lebhe prāpya taṃ pārthivottamam || 36 ||
[Analyze grammar]

āsādya śaṃtanustāṃ ca bubhuje kāmato vaśī |
na praṣṭavyeti manvāno na sa tāṃ kiṃcidūcivān || 37 ||
[Analyze grammar]

sa tasyāḥ śīlavṛttena rūpaudāryaguṇena ca |
upacāreṇa ca rahastutoṣa jagatīpatiḥ || 38 ||
[Analyze grammar]

divyarūpā hi sā devī gaṅgā tripathagā nadī |
mānuṣaṃ vigrahaṃ śrīmatkṛtvā sā varavarṇinī || 39 ||
[Analyze grammar]

bhāgyopanatakāmasya bhāryevopasthitābhavat |
śaṃtano rājasiṃhasya devarājasamadyuteḥ || 40 ||
[Analyze grammar]

saṃbhogasnehacāturyairhāvalāsyairmanoharaiḥ |
rājānaṃ ramayāmāsa yathā reme tathaiva saḥ || 41 ||
[Analyze grammar]

sa rājā ratisaktatvāduttamastrīguṇairhṛtaḥ |
saṃvatsarānṛtūnmāsānna bubodha bahūngatān || 42 ||
[Analyze grammar]

ramamāṇastayā sārdhaṃ yathākāmaṃ janeśvaraḥ |
aṣṭāvajanayatputrāṃstasyāmamaravarṇinaḥ || 43 ||
[Analyze grammar]

jātaṃ jātaṃ ca sā putraṃ kṣipatyambhasi bhārata |
prīṇāmi tvāhamityuktvā gaṅgāsrotasyamajjayat || 44 ||
[Analyze grammar]

tasya tanna priyaṃ rājñaḥ śaṃtanorabhavattadā |
na ca tāṃ kiṃcanovāca tyāgādbhīto mahīpatiḥ || 45 ||
[Analyze grammar]

atha tāmaṣṭame putre jāte prahasitāmiva |
uvāca rājā duḥkhārtaḥ parīpsanputramātmanaḥ || 46 ||
[Analyze grammar]

mā vadhīḥ kāsi kasyāsi kiṃ hiṃsasi sutāniti |
putraghni sumahatpāpaṃ mā prāpastiṣṭha garhite || 47 ||
[Analyze grammar]

stryuvāca |
putrakāma na te hanmi putraṃ putravatāṃ vara |
jīrṇastu mama vāso'yaṃ yathā sa samayaḥ kṛtaḥ || 48 ||
[Analyze grammar]

ahaṃ gaṅgā jahnusutā maharṣigaṇasevitā |
devakāryārthasiddhyarthamuṣiṭāhaṃ tvayā saha || 49 ||
[Analyze grammar]

aṣṭeme vasavo devā mahābhāgā mahaujasaḥ |
vasiṣṭhaśāpadoṣeṇa mānuṣatvamupāgatāḥ || 50 ||
[Analyze grammar]

teṣāṃ janayitā nānyastvadṛte bhuvi vidyate |
madvidhā mānuṣī dhātrī na caivāstīha kācana || 51 ||
[Analyze grammar]

tasmāttajjananīhetormānuṣatvamupāgatā |
janayitvā vasūnaṣṭau jitā lokāstvayākṣayāḥ || 52 ||
[Analyze grammar]

devānāṃ samayastveṣa vasūnāṃ saṃśruto mayā |
jātaṃ jātaṃ mokṣayiṣye janmato mānuṣāditi || 53 ||
[Analyze grammar]

tatte śāpādvinirmuktā āpavasya mahātmanaḥ |
svasti te'stu gamiṣyāmi putraṃ pāhi mahāvratam || 54 ||
[Analyze grammar]

eṣa paryāyavāso me vasūnāṃ saṃnidhau kṛtaḥ |
matprasūtaṃ vijānīhi gaṅgādattamimaṃ sutam || 55 ||
[Analyze grammar]