Chapter 70

vaiśaṃpāyana uvāca |
prajāpatestu dakṣasya manorvaivasvatasya ca |
bharatasya kuroḥ pūrorajamīḍhasya cānvaye || 1 ||
[Analyze grammar]

yādavānāmimaṃ vaṃśaṃ pauravāṇāṃ ca sarvaśaḥ |
tathaiva bhāratānāṃ ca puṇyaṃ svastyayanaṃ mahat |
dhanyaṃ yaśasyamāyuṣyaṃ kīrtayiṣyāmi te'nagha || 2 ||
[Analyze grammar]

tejobhiruditāḥ sarve maharṣisamatejasaḥ |
daśa pracetasaḥ putrāḥ santaḥ pūrvajanāḥ smṛtāḥ |
meghajenāgninā ye te pūrvaṃ dagdhā mahaujasaḥ || 3 ||
[Analyze grammar]

tebhyaḥ prācetaso jajñe dakṣo dakṣādimāḥ prajāḥ |
saṃbhūtāḥ puruṣavyāghra sa hi lokapitāmahaḥ || 4 ||
[Analyze grammar]

vīriṇyā saha saṃgamya dakṣaḥ prācetaso muniḥ |
ātmatulyānajanayatsahasraṃ saṃśitavratān || 5 ||
[Analyze grammar]

sahasrasaṃkhyānsamitānsutāndakṣasya nāradaḥ |
mokṣamadhyāpayāmāsa sāṃkhyajñānamanuttamam || 6 ||
[Analyze grammar]

tataḥ pañcāśataṃ kanyāḥ putrikā abhisaṃdadhe |
prajāpatiḥ prajā dakṣaḥ sisṛkṣurjanamejaya || 7 ||
[Analyze grammar]

dadau sa daśa dharmāya kaśyapāya trayodaśa |
kālasya nayane yuktāḥ saptaviṃśatimindave || 8 ||
[Analyze grammar]

trayodaśānāṃ patnīnāṃ yā tu dākṣāyaṇī varā |
mārīcaḥ kaśyapastasyāmādityānsamajījanat |
indrādīnvīryasaṃpannānvivasvantamathāpi ca || 9 ||
[Analyze grammar]

vivasvataḥ suto jajñe yamo vaivasvataḥ prabhuḥ |
mārtaṇḍaśca yamasyāpi putro rājannajāyata || 10 ||
[Analyze grammar]

mārtaṇḍasya manurdhīmānajāyata sutaḥ prabhuḥ |
manorvaṃśo mānavānāṃ tato'yaṃ prathito'bhavat |
brahmakṣatrādayastasmānmanorjātāstu mānavāḥ || 11 ||
[Analyze grammar]

tatrābhavattadā rājanbrahma kṣatreṇa saṃgatam |
brāhmaṇā mānavāsteṣāṃ sāṅgaṃ vedamadīdharan || 12 ||
[Analyze grammar]

venaṃ dhṛṣṇuṃ nariṣyantaṃ nābhāgekṣvākumeva ca |
karūṣamatha śaryātiṃ tathaivātrāṣṭamīmilām || 13 ||
[Analyze grammar]

pṛṣadhranavamānāhuḥ kṣatradharmaparāyaṇān |
nābhāgāriṣṭadaśamānmanoḥ putrānmahābalān || 14 ||
[Analyze grammar]

pañcāśataṃ manoḥ putrāstathaivānye'bhavankṣitau |
anyonyabhedātte sarve vineśuriti naḥ śrutam || 15 ||
[Analyze grammar]

purūravāstato vidvānilāyāṃ samapadyata |
sā vai tasyābhavanmātā pitā ceti hi naḥ śrutam || 16 ||
[Analyze grammar]

trayodaśa samudrasya dvīpānaśnanpurūravāḥ |
amānuṣairvṛtaḥ sattvairmānuṣaḥ sanmahāyaśāḥ || 17 ||
[Analyze grammar]

vipraiḥ sa vigrahaṃ cakre vīryonmattaḥ purūravāḥ |
jahāra ca sa viprāṇāṃ ratnānyutkrośatāmapi || 18 ||
[Analyze grammar]

sanatkumārastaṃ rājanbrahmalokādupetya ha |
anudarśayāṃ tataścakre pratyagṛhṇānna cāpyasau || 19 ||
[Analyze grammar]

tato maharṣibhiḥ kruddhaiḥ śaptaḥ sadyo vyanaśyata |
lobhānvito madabalānnaṣṭasaṃjño narādhipaḥ || 20 ||
[Analyze grammar]

sa hi gandharvalokastha urvaśyā sahito virāṭ |
ānināya kriyārthe'gnīnyathāvadvihitāṃstridhā || 21 ||
[Analyze grammar]

ṣaṭputrā jajñire'thailādāyurdhīmānamāvasuḥ |
dṛḍhāyuśca vanāyuśca śrutāyuścorvaśīsutāḥ || 22 ||
[Analyze grammar]

nahuṣaṃ vṛddhaśarmāṇaṃ rajiṃ rambhamanenasam |
svarbhānavīsutānetānāyoḥ putrānpracakṣate || 23 ||
[Analyze grammar]

āyuṣo nahuṣaḥ putro dhīmānsatyaparākramaḥ |
rājyaṃ śaśāsa sumahaddharmeṇa pṛthivīpatiḥ || 24 ||
[Analyze grammar]

pitṝndevānṛṣīnviprāngandharvoragarākṣasān |
nahuṣaḥ pālayāmāsa brahmakṣatramatho viśaḥ || 25 ||
[Analyze grammar]

sa hatvā dasyusaṃghātānṛṣīnkaramadāpayat |
paśuvaccaiva tānpṛṣṭhe vāhayāmāsa vīryavān || 26 ||
[Analyze grammar]

kārayāmāsa cendratvamabhibhūya divaukasaḥ |
tejasā tapasā caiva vikrameṇaujasā tathā || 27 ||
[Analyze grammar]

yatiṃ yayātiṃ saṃyātimāyātiṃ pāñcamuddhavam |
nahuṣo janayāmāsa ṣaṭputrānpriyavāsasi || 28 ||
[Analyze grammar]

yayātirnāhuṣaḥ samrāḍāsītsatyaparākramaḥ |
sa pālayāmāsa mahīmīje ca vividhaiḥ savaiḥ || 29 ||
[Analyze grammar]

atiśaktyā pitṝnarcandevāṃśca prayataḥ sadā |
anvagṛhṇātprajāḥ sarvā yayātiraparājitaḥ || 30 ||
[Analyze grammar]

tasya putrā maheṣvāsāḥ sarvaiḥ samuditā guṇaiḥ |
devayānyāṃ mahārāja śarmiṣṭhāyāṃ ca jajñire || 31 ||
[Analyze grammar]

devayānyāmajāyetāṃ yadusturvasureva ca |
druhyuścānuśca pūruśca śarmiṣṭhāyāṃ prajajñire || 32 ||
[Analyze grammar]

sa śāśvatīḥ samā rājanprajā dharmeṇa pālayan |
jarāmārchanmahāghorāṃ nāhuṣo rūpanāśinīm || 33 ||
[Analyze grammar]

jarābhibhūtaḥ putrānsa rājā vacanamabravīt |
yaduṃ pūruṃ turvasuṃ ca druhyuṃ cānuṃ ca bhārata || 34 ||
[Analyze grammar]

yauvanena carankāmānyuvā yuvatibhiḥ saha |
vihartumahamicchāmi sāhyaṃ kuruta putrakāḥ || 35 ||
[Analyze grammar]

taṃ putro devayāneyaḥ pūrvajo yadurabravīt |
kiṃ kāryaṃ bhavataḥ kāryamasmābhiryauvanena ca || 36 ||
[Analyze grammar]

yayātirabravīttaṃ vai jarā me pratigṛhyatām |
yauvanena tvadīyena careyaṃ viṣayānaham || 37 ||
[Analyze grammar]

yajato dīrghasatrairme śāpāccośanaso muneḥ |
kāmārthaḥ parihīṇo me tapye'haṃ tena putrakāḥ || 38 ||
[Analyze grammar]

māmakena śarīreṇa rājyamekaḥ praśāstu vaḥ |
ahaṃ tanvābhinavayā yuvā kāmānavāpnuyām || 39 ||
[Analyze grammar]

na te tasya pratyagṛhṇanyaduprabhṛtayo jarām |
tamabravīttataḥ pūruḥ kanīyānsatyavikramaḥ || 40 ||
[Analyze grammar]

rājaṃścarābhinavayā tanvā yauvanagocaraḥ |
ahaṃ jarāṃ samāsthāya rājye sthāsyāmi te''jñayā || 41 ||
[Analyze grammar]

evamuktaḥ sa rājarṣistapovīryasamāśrayāt |
saṃcārayāmāsa jarāṃ tadā putre mahātmani || 42 ||
[Analyze grammar]

pauraveṇātha vayasā rājā yauvanamāsthitaḥ |
yāyātenāpi vayasā rājyaṃ pūrurakārayat || 43 ||
[Analyze grammar]

tato varṣasahasrānte yayātiraparājitaḥ |
atṛpta eva kāmānāṃ pūruṃ putramuvāca ha || 44 ||
[Analyze grammar]

tvayā dāyādavānasmi tvaṃ me vaṃśakaraḥ sutaḥ |
pauravo vaṃśa iti te khyātiṃ loke gamiṣyati || 45 ||
[Analyze grammar]

tataḥ sa nṛpaśārdūlaḥ pūruṃ rājye'bhiṣicya ca |
kālena mahatā paścātkāladharmamupeyivān || 46 ||
[Analyze grammar]