Chapter 69

śakuntalovāca |
rājansarṣapamātrāṇi paracchidrāṇi paśyasi |
ātmano bilvamātrāṇi paśyannapi na paśyasi || 1 ||
[Analyze grammar]

menakā tridaśeṣveva tridaśāścānu menakām |
mamaivodricyate janma duḥṣanta tava janmataḥ || 2 ||
[Analyze grammar]

kṣitāvaṭasi rājaṃstvamantarikṣe carāmyaham |
āvayorantaraṃ paśya merusarṣapayoriva || 3 ||
[Analyze grammar]

mahendrasya kuberasya yamasya varuṇasya ca |
bhavanānyanusaṃyāmi prabhāvaṃ paśya me nṛpa || 4 ||
[Analyze grammar]

satyaścāpi pravādo'yaṃ yaṃ pravakṣyāmi te'nagha |
nidarśanārthaṃ na dveṣāttacchrutvā kṣantumarhasi || 5 ||
[Analyze grammar]

virūpo yāvadādarśe nātmanaḥ paśyate mukham |
manyate tāvadātmānamanyebhyo rūpavattaram || 6 ||
[Analyze grammar]

yadā tu mukhamādarśe vikṛtaṃ so'bhivīkṣate |
tadetaraṃ vijānāti ātmānaṃ netaraṃ janam || 7 ||
[Analyze grammar]

atīva rūpasaṃpanno na kiṃcidavamanyate |
atīva jalpandurvāco bhavatīha viheṭhakaḥ || 8 ||
[Analyze grammar]

mūrkho hi jalpatāṃ puṃsāṃ śrutvā vācaḥ śubhāśubhāḥ |
aśubhaṃ vākyamādatte purīṣamiva sūkaraḥ || 9 ||
[Analyze grammar]

prājñastu jalpatāṃ puṃsāṃ śrutvā vācaḥ śubhāśubhāḥ |
guṇavadvākyamādatte haṃsaḥ kṣīramivāmbhasaḥ || 10 ||
[Analyze grammar]

anyānparivadansādhuryathā hi paritapyate |
tathā parivadannanyāṃstuṣṭo bhavati durjanaḥ || 11 ||
[Analyze grammar]

abhivādya yathā vṛddhānsanto gacchanti nirvṛtim |
evaṃ sajjanamākruśya mūrkho bhavati nirvṛtaḥ || 12 ||
[Analyze grammar]

sukhaṃ jīvantyadoṣajñā mūrkhā doṣānudarśinaḥ |
yatra vācyāḥ paraiḥ santaḥ parānāhustathāvidhān || 13 ||
[Analyze grammar]

ato hāsyataraṃ loke kiṃcidanyanna vidyate |
yatra durjana ityāha durjanaḥ sajjanaṃ svayam || 14 ||
[Analyze grammar]

satyadharmacyutātpuṃsaḥ kruddhādāśīviṣādiva |
anāstiko'pyudvijate janaḥ kiṃ punarāstikaḥ || 15 ||
[Analyze grammar]

svayamutpādya vai putraṃ sadṛśaṃ yo'vamanyate |
tasya devāḥ śriyaṃ ghnanti na ca lokānupāśnute || 16 ||
[Analyze grammar]

kulavaṃśapratiṣṭhāṃ hi pitaraḥ putramabruvan |
uttamaṃ sarvadharmāṇāṃ tasmātputraṃ na saṃtyajet || 17 ||
[Analyze grammar]

svapatnīprabhavānpañca labdhānkrītānvivardhitān |
kṛtānanyāsu cotpannānputrānvai manurabravīt || 18 ||
[Analyze grammar]

dharmakīrtyāvahā nṝṇāṃ manasaḥ prītivardhanāḥ |
trāyante narakājjātāḥ putrā dharmaplavāḥ pitṝn || 19 ||
[Analyze grammar]

sa tvaṃ nṛpatiśārdūla na putraṃ tyaktumarhasi |
ātmānaṃ satyadharmau ca pālayāno mahīpate |
narendrasiṃha kapaṭaṃ na voḍhuṃ tvamihārhasi || 20 ||
[Analyze grammar]

varaṃ kūpaśatādvāpī varaṃ vāpīśatātkratuḥ |
varaṃ kratuśatātputraḥ satyaṃ putraśatādvaram || 21 ||
[Analyze grammar]

aśvamedhasahasraṃ ca satyaṃ ca tulayā dhṛtam |
aśvamedhasahasrāddhi satyameva viśiṣyate || 22 ||
[Analyze grammar]

sarvavedādhigamanaṃ sarvatīrthāvagāhanam |
satyaṃ ca vadato rājansamaṃ vā syānna vā samam || 23 ||
[Analyze grammar]

nāsti satyātparo dharmo na satyādvidyate param |
na hi tīvrataraṃ kiṃcidanṛtādiha vidyate || 24 ||
[Analyze grammar]

rājansatyaṃ paraṃ brahma satyaṃ ca samayaḥ paraḥ |
mā tyākṣīḥ samayaṃ rājansatyaṃ saṃgatamastu te || 25 ||
[Analyze grammar]

anṛte cetprasaṅgaste śraddadhāsi na cetsvayam |
ātmano hanta gacchāmi tvādṛśe nāsti saṃgatam || 26 ||
[Analyze grammar]

ṛte'pi tvayi duḥṣanta śailarājāvataṃsakām |
caturantāmimāmurvīṃ putro me pālayiṣyati || 27 ||
[Analyze grammar]

vaiśaṃpāyana uvāca |
etāvaduktvā vacanaṃ prātiṣṭhata śakuntalā |
athāntarikṣe duḥṣantaṃ vāguvācāśarīriṇī |
ṛtvikpurohitācāryairmantribhiścāvṛtaṃ tadā || 28 ||
[Analyze grammar]

bhastrā mātā pituḥ putro yena jātaḥ sa eva saḥ |
bharasva putraṃ duḥṣanta māvamaṃsthāḥ śakuntalām || 29 ||
[Analyze grammar]

retodhāḥ putra unnayati naradeva yamakṣayāt |
tvaṃ cāsya dhātā garbhasya satyamāha śakuntalā || 30 ||
[Analyze grammar]

jāyā janayate putramātmano'ṅgaṃ dvidhā kṛtam |
tasmādbharasva duḥṣanta putraṃ śākuntalaṃ nṛpa || 31 ||
[Analyze grammar]

abhūtireṣā kastyajyājjīvañjīvantamātmajam |
śākuntalaṃ mahātmānaṃ dauḥṣantiṃ bhara paurava || 32 ||
[Analyze grammar]

bhartavyo'yaṃ tvayā yasmādasmākaṃ vacanādapi |
tasmādbhavatvayaṃ nāmnā bharato nāma te sutaḥ || 33 ||
[Analyze grammar]

tacchrutvā pauravo rājā vyāhṛtaṃ vai divaukasām |
purohitamamātyāṃśca saṃprahṛṣṭo'bravīdidam || 34 ||
[Analyze grammar]

śṛṇvantvetadbhavanto'sya devadūtasya bhāṣitam |
ahamapyevamevainaṃ jānāmi svayamātmajam || 35 ||
[Analyze grammar]

yadyahaṃ vacanādeva gṛhṇīyāmimamātmajam |
bhaveddhi śaṅkā lokasya naivaṃ śuddho bhavedayam || 36 ||
[Analyze grammar]

taṃ viśodhya tadā rājā devadūtena bhārata |
hṛṣṭaḥ pramuditaścāpi pratijagrāha taṃ sutam || 37 ||
[Analyze grammar]

mūrdhni cainamupāghrāya sasnehaṃ pariṣasvaje |
sabhājyamāno vipraiśca stūyamānaśca bandibhiḥ |
sa mudaṃ paramāṃ lebhe putrasaṃsparśajāṃ nṛpaḥ || 38 ||
[Analyze grammar]

tāṃ caiva bhāryāṃ dharmajñaḥ pūjayāmāsa dharmataḥ |
abravīccaiva tāṃ rājā sāntvapūrvamidaṃ vacaḥ || 39 ||
[Analyze grammar]

kṛto lokaparokṣo'yaṃ saṃbandho vai tvayā saha |
tasmādetanmayā devi tvacchuddhyarthaṃ vicāritam || 40 ||
[Analyze grammar]

manyate caiva lokaste strībhāvānmayi saṃgatam |
putraścāyaṃ vṛto rājye mayā tasmādvicāritam || 41 ||
[Analyze grammar]

yacca kopitayātyarthaṃ tvayokto'smyapriyaṃ priye |
praṇayinyā viśālākṣi tatkṣāntaṃ te mayā śubhe || 42 ||
[Analyze grammar]

tāmevamuktvā rājarṣirduḥṣanto mahiṣīṃ priyām |
vāsobhirannapānaiśca pūjayāmāsa bhārata || 43 ||
[Analyze grammar]

duḥṣantaśca tato rājā putraṃ śākuntalaṃ tadā |
bharataṃ nāmataḥ kṛtvā yauvarājye'bhyaṣecayat || 44 ||
[Analyze grammar]

tasya tatprathitaṃ cakraṃ prāvartata mahātmanaḥ |
bhāsvaraṃ divyamajitaṃ lokasaṃnādanaṃ mahat || 45 ||
[Analyze grammar]

sa vijitya mahīpālāṃścakāra vaśavartinaḥ |
cacāra ca satāṃ dharmaṃ prāpa cānuttamaṃ yaśaḥ || 46 ||
[Analyze grammar]

sa rājā cakravartyāsītsārvabhaumaḥ pratāpavān |
īje ca bahubhiryajñairyathā śakro marutpatiḥ || 47 ||
[Analyze grammar]

yājayāmāsa taṃ kaṇvo dakṣavadbhūridakṣiṇam |
śrīmāngovitataṃ nāma vājimedhamavāpa saḥ |
yasminsahasraṃ padmānāṃ kaṇvāya bharato dadau || 48 ||
[Analyze grammar]

bharatādbhāratī kīrtiryenedaṃ bhārataṃ kulam |
apare ye ca pūrve ca bhāratā iti viśrutāḥ || 49 ||
[Analyze grammar]

bharatasyānvavāye hi devakalpā mahaujasaḥ |
babhūvurbrahmakalpāśca bahavo rājasattamāḥ || 50 ||
[Analyze grammar]

yeṣāmaparimeyāni nāmadheyāni sarvaśaḥ |
teṣāṃ tu te yathāmukhyaṃ kīrtayiṣyāmi bhārata |
mahābhāgāndevakalpānsatyārjavaparāyaṇān || 51 ||
[Analyze grammar]