Chapter 57

vaiśaṃpāyana uvāca |
rājoparicaro nāma dharmanityo mahīpatiḥ |
babhūva mṛgayāṃ gantuṃ sa kadāciddhṛtavrataḥ || 1 ||
[Analyze grammar]

sa cediviṣayaṃ ramyaṃ vasuḥ pauravanandanaḥ |
indropadeśājjagrāha grahaṇīyaṃ mahīpatiḥ || 2 ||
[Analyze grammar]

tamāśrame nyastaśastraṃ nivasantaṃ taporatim |
devaḥ sākṣātsvayaṃ vajrī samupāyānmahīpatim || 3 ||
[Analyze grammar]

indratvamarho rājāyaṃ tapasetyanucintya vai |
taṃ sāntvena nṛpaṃ sākṣāttapasaḥ saṃnyavartayat || 4 ||
[Analyze grammar]

indra uvāca |
na saṃkīryeta dharmo'yaṃ pṛthivyāṃ pṛthivīpate |
taṃ pāhi dharmo hi dhṛtaḥ kṛtsnaṃ dhārayate jagat || 5 ||
[Analyze grammar]

lokyaṃ dharmaṃ pālaya tvaṃ nityayuktaḥ samāhitaḥ |
dharmayuktastato lokānpuṇyānāpsyasi śāśvatān || 6 ||
[Analyze grammar]

diviṣṭhasya bhuviṣṭhastvaṃ sakhā bhūtvā mama priyaḥ |
ūdhaḥ pṛthivyā yo deśastamāvasa narādhipa || 7 ||
[Analyze grammar]

paśavyaścaiva puṇyaśca susthiro dhanadhānyavān |
svārakṣyaścaiva saumyaśca bhogyairbhūmiguṇairyutaḥ || 8 ||
[Analyze grammar]

atyanyāneṣa deśo hi dhanaratnādibhiryutaḥ |
vasupūrṇā ca vasudhā vasa cediṣu cedipa || 9 ||
[Analyze grammar]

dharmaśīlā janapadāḥ susaṃtoṣāśca sādhavaḥ |
na ca mithyāpralāpo'tra svaireṣvapi kuto'nyathā || 10 ||
[Analyze grammar]

na ca pitrā vibhajyante narā guruhite ratāḥ |
yuñjate dhuri no gāśca kṛśāḥ saṃdhukṣayanti ca || 11 ||
[Analyze grammar]

sarve varṇāḥ svadharmasthāḥ sadā cediṣu mānada |
na te'styaviditaṃ kiṃcittriṣu lokeṣu yadbhavet || 12 ||
[Analyze grammar]

devopabhogyaṃ divyaṃ ca ākāśe sphāṭikaṃ mahat |
ākāśagaṃ tvāṃ maddattaṃ vimānamupapatsyate || 13 ||
[Analyze grammar]

tvamekaḥ sarvamartyeṣu vimānavaramāsthitaḥ |
cariṣyasyuparistho vai devo vigrahavāniva || 14 ||
[Analyze grammar]

dadāmi te vaijayantīṃ mālāmamlānapaṅkajām |
dhārayiṣyati saṃgrāme yā tvāṃ śastrairavikṣatam || 15 ||
[Analyze grammar]

lakṣaṇaṃ caitadeveha bhavitā te narādhipa |
indramāleti vikhyātaṃ dhanyamapratimaṃ mahat || 16 ||
[Analyze grammar]

vaiśaṃpāyana uvāca |
yaṣṭiṃ ca vaiṇavīṃ tasmai dadau vṛtraniṣūdanaḥ |
iṣṭapradānamuddiśya śiṣṭānāṃ paripālinīm || 17 ||
[Analyze grammar]

tasyāḥ śakrasya pūjārthaṃ bhūmau bhūmipatistadā |
praveśaṃ kārayāmāsa gate saṃvatsare tadā || 18 ||
[Analyze grammar]

tataḥ prabhṛti cādyāpi yaṣṭyāḥ kṣitipasattamaiḥ |
praveśaḥ kriyate rājanyathā tena pravartitaḥ || 19 ||
[Analyze grammar]

aparedyustathā cāsyāḥ kriyate ucchrayo nṛpaiḥ |
alaṃkṛtāyāḥ piṭakairgandhairmālyaiśca bhūṣaṇaiḥ |
mālyadāmaparikṣiptā vidhivatkriyate'pi ca || 20 ||
[Analyze grammar]

bhagavānpūjyate cātra hāsyarūpeṇa śaṃkaraḥ |
svayameva gṛhītena vasoḥ prītyā mahātmanaḥ || 21 ||
[Analyze grammar]

etāṃ pūjāṃ mahendrastu dṛṣṭvā deva kṛtāṃ śubhām |
vasunā rājamukhyena prītimānabravīdvibhuḥ || 22 ||
[Analyze grammar]

ye pūjayiṣyanti narā rājānaśca mahaṃ mama |
kārayiṣyanti ca mudā yathā cedipatirnṛpaḥ || 23 ||
[Analyze grammar]

teṣāṃ śrīrvijayaścaiva sarāṣṭrāṇāṃ bhaviṣyati |
tathā sphīto janapado muditaśca bhaviṣyati || 24 ||
[Analyze grammar]

evaṃ mahātmanā tena mahendreṇa narādhipa |
vasuḥ prītyā maghavatā mahārājo'bhisatkṛtaḥ || 25 ||
[Analyze grammar]

utsavaṃ kārayiṣyanti sadā śakrasya ye narāḥ |
bhūmidānādibhirdānairyathā pūtā bhavanti vai |
varadānamahāyajñaistathā śakrotsavena te || 26 ||
[Analyze grammar]

saṃpūjito maghavatā vasuścedipatistadā |
pālayāmāsa dharmeṇa cedisthaḥ pṛthivīmimām |
indraprītyā bhūmipatiścakārendramahaṃ vasuḥ || 27 ||
[Analyze grammar]

putrāścāsya mahāvīryāḥ pañcāsannamitaujasaḥ |
nānārājyeṣu ca sutānsa samrāḍabhyaṣecayat || 28 ||
[Analyze grammar]

mahāratho magadharāḍviśruto yo bṛhadrathaḥ |
pratyagrahaḥ kuśāmbaśca yamāhurmaṇivāhanam |
macchillaśca yaduścaiva rājanyaścāparājitaḥ || 29 ||
[Analyze grammar]

ete tasya sutā rājanrājarṣerbhūritejasaḥ |
nyaveśayannāmabhiḥ svaiste deśāṃśca purāṇi ca |
vāsavāḥ pañca rājānaḥ pṛthagvaṃśāśca śāśvatāḥ || 30 ||
[Analyze grammar]

vasantamindraprāsāde ākāśe sphāṭike ca tam |
upatasthurmahātmānaṃ gandharvāpsaraso nṛpam |
rājoparicaretyevaṃ nāma tasyātha viśrutam || 31 ||
[Analyze grammar]

puropavāhinīṃ tasya nadīṃ śuktimatīṃ giriḥ |
arautsīccetanāyuktaḥ kāmātkolāhalaḥ kila || 32 ||
[Analyze grammar]

giriṃ kolāhalaṃ taṃ tu padā vasuratāḍayat |
niścakrāma nadī tena prahāravivareṇa sā || 33 ||
[Analyze grammar]

tasyāṃ nadyāmajanayanmithunaṃ parvataḥ svayam |
tasmādvimokṣaṇātprītā nadī rājñe nyavedayat || 34 ||
[Analyze grammar]

yaḥ pumānabhavattatra taṃ sa rājarṣisattamaḥ |
vasurvasupradaścakre senāpatimariṃdamam |
cakāra patnīṃ kanyāṃ tu dayitāṃ girikāṃ nṛpaḥ || 35 ||
[Analyze grammar]

vasoḥ patnī tu girikā kāmātkāle nyavedayat |
ṛtukālamanuprāptaṃ snātā puṃsavane śuciḥ || 36 ||
[Analyze grammar]

tadahaḥ pitaraścainamūcurjahi mṛgāniti |
taṃ rājasattamaṃ prītāstadā matimatāṃ varam || 37 ||
[Analyze grammar]

sa pitṝṇāṃ niyogaṃ tamavyatikramya pārthivaḥ |
cacāra mṛgayāṃ kāmī girikāmeva saṃsmaran |
atīva rūpasaṃpannāṃ sākṣācchriyamivāparām || 38 ||
[Analyze grammar]

tasya retaḥ pracaskanda carato rucire vane |
skannamātraṃ ca tadreto vṛkṣapatreṇa bhūmipaḥ || 39 ||
[Analyze grammar]

pratijagrāha mithyā me na skandedreta ityuta |
ṛtuśca tasyāḥ patnyā me na moghaḥ syāditi prabhuḥ || 40 ||
[Analyze grammar]

saṃcintyaivaṃ tadā rājā vicārya ca punaḥ punaḥ |
amoghatvaṃ ca vijñāya retaso rājasattamaḥ || 41 ||
[Analyze grammar]

śukraprasthāpane kālaṃ mahiṣyāḥ prasamīkṣya saḥ |
abhimantryātha tacchukramārāttiṣṭhantamāśugam |
sūkṣmadharmārthatattvajño jñātvā śyenaṃ tato'bravīt || 42 ||
[Analyze grammar]

matpriyārthamidaṃ saumya śukraṃ mama gṛhaṃ naya |
girikāyāḥ prayacchāśu tasyā hyārtavamadya vai || 43 ||
[Analyze grammar]

gṛhītvā tattadā śyenastūrṇamutpatya vegavān |
javaṃ paramamāsthāya pradudrāva vihaṃgamaḥ || 44 ||
[Analyze grammar]

tamapaśyadathāyāntaṃ śyenaṃ śyenastathāparaḥ |
abhyadravacca taṃ sadyo dṛṣṭvaivāmiṣaśaṅkayā || 45 ||
[Analyze grammar]

tuṇḍayuddhamathākāśe tāvubhau saṃpracakratuḥ |
yudhyatorapatadretastaccāpi yamunāmbhasi || 46 ||
[Analyze grammar]

tatrādriketi vikhyātā brahmaśāpādvarāpsarāḥ |
mīnabhāvamanuprāptā babhūva yamunācarī || 47 ||
[Analyze grammar]

śyenapādaparibhraṣṭaṃ tadvīryamatha vāsavam |
jagrāha tarasopetya sādrikā matsyarūpiṇī || 48 ||
[Analyze grammar]

kadācidatha matsīṃ tāṃ babandhurmatsyajīvinaḥ |
māse ca daśame prāpte tadā bharatasattama |
ujjahrurudarāttasyāḥ strīpumāṃsaṃ ca mānuṣam || 49 ||
[Analyze grammar]

āścaryabhūtaṃ matvā tadrājñaste pratyavedayan |
kāye matsyā imau rājansaṃbhūtau mānuṣāviti || 50 ||
[Analyze grammar]

tayoḥ pumāṃsaṃ jagrāha rājoparicarastadā |
sa matsyo nāma rājāsīddhārmikaḥ satyasaṃgaraḥ || 51 ||
[Analyze grammar]

sāpsarā muktaśāpā ca kṣaṇena samapadyata |
puroktā yā bhagavatā tiryagyonigatā śubhe |
mānuṣau janayitvā tvaṃ śāpamokṣamavāpsyasi || 52 ||
[Analyze grammar]

tataḥ sā janayitvā tau viśastā matsyaghātinā |
saṃtyajya matsyarūpaṃ sā divyaṃ rūpamavāpya ca |
siddharṣicāraṇapathaṃ jagāmātha varāpsarāḥ || 53 ||
[Analyze grammar]

yā kanyā duhitā tasyā matsyā matsyasagandhinī |
rājñā dattātha dāśāya iyaṃ tava bhavatviti |
rūpasattvasamāyuktā sarvaiḥ samuditā guṇaiḥ || 54 ||
[Analyze grammar]

sā tu satyavatī nāma matsyaghātyabhisaṃśrayāt |
āsīnmatsyasagandhaiva kaṃcitkālaṃ śucismitā || 55 ||
[Analyze grammar]

śuśrūṣārthaṃ piturnāvaṃ tāṃ tu vāhayatīṃ jale |
tīrthayātrāṃ parikrāmannapaśyadvai parāśaraḥ || 56 ||
[Analyze grammar]

atīva rūpasaṃpannāṃ siddhānāmapi kāṅkṣitām |
dṛṣṭvaiva ca sa tāṃ dhīmāṃścakame cārudarśanām |
vidvāṃstāṃ vāsavīṃ kanyāṃ kāryavānmunipuṃgavaḥ || 57 ||
[Analyze grammar]

sābravītpaśya bhagavanpārāvāre ṛṣīnsthitān |
āvayordṛśyatorebhiḥ kathaṃ nu syātsamāgamaḥ || 58 ||
[Analyze grammar]

evaṃ tayokto bhagavānnīhāramasṛjatprabhuḥ |
yena deśaḥ sa sarvastu tamobhūta ivābhavat || 59 ||
[Analyze grammar]

dṛṣṭvā sṛṣṭaṃ tu nīhāraṃ tatastaṃ paramarṣiṇā |
vismitā cābravītkanyā vrīḍitā ca manasvinī || 60 ||
[Analyze grammar]

viddhi māṃ bhagavankanyāṃ sadā pitṛvaśānugām |
tvatsaṃyogācca duṣyeta kanyābhāvo mamānagha || 61 ||
[Analyze grammar]

kanyātve dūṣite cāpi kathaṃ śakṣye dvijottama |
gantuṃ gṛhaṃ gṛhe cāhaṃ dhīmanna sthātumutsahe |
etatsaṃcintya bhagavanvidhatsva yadanantaram || 62 ||
[Analyze grammar]

evamuktavatīṃ tāṃ tu prītimānṛṣisattamaḥ |
uvāca matpriyaṃ kṛtvā kanyaiva tvaṃ bhaviṣyasi || 63 ||
[Analyze grammar]

vṛṇīṣva ca varaṃ bhīru yaṃ tvamicchasi bhāmini |
vṛthā hi na prasādo me bhūtapūrvaḥ śucismite || 64 ||
[Analyze grammar]

evamuktā varaṃ vavre gātrasaugandhyamuttamam |
sa cāsyai bhagavānprādānmanasaḥ kāṅkṣitaṃ prabhuḥ || 65 ||
[Analyze grammar]

tato labdhavarā prītā strībhāvaguṇabhūṣitā |
jagāma saha saṃsargamṛṣiṇādbhutakarmaṇā || 66 ||
[Analyze grammar]

tena gandhavatītyeva nāmāsyāḥ prathitaṃ bhuvi |
tasyāstu yojanādgandhamājighranti narā bhuvi || 67 ||
[Analyze grammar]

tato yojanagandheti tasyā nāma pariśrutam |
parāśaro'pi bhagavāñjagāma svaṃ niveśanam || 68 ||
[Analyze grammar]

iti satyavatī hṛṣṭā labdhvā varamanuttamam |
parāśareṇa saṃyuktā sadyo garbhaṃ suṣāva sā |
jajñe ca yamunādvīpe pārāśaryaḥ sa vīryavān || 69 ||
[Analyze grammar]

sa mātaramupasthāya tapasyeva mano dadhe |
smṛto'haṃ darśayiṣyāmi kṛtyeṣviti ca so'bravīt || 70 ||
[Analyze grammar]

evaṃ dvaipāyano jajñe satyavatyāṃ parāśarāt |
dvīpe nyastaḥ sa yadbālastasmāddvaipāyano'bhavat || 71 ||
[Analyze grammar]

pādāpasāriṇaṃ dharmaṃ vidvānsa tu yuge yuge |
āyuḥ śaktiṃ ca martyānāṃ yugānugamavekṣya ca || 72 ||
[Analyze grammar]

brahmaṇo brāhmaṇānāṃ ca tathānugrahakāmyayā |
vivyāsa vedānyasmācca tasmādvyāsa iti smṛtaḥ || 73 ||
[Analyze grammar]

vedānadhyāpayāmāsa mahābhāratapañcamān |
sumantuṃ jaiminiṃ pailaṃ śukaṃ caiva svamātmajam || 74 ||
[Analyze grammar]

prabhurvariṣṭho varado vaiśaṃpāyanameva ca |
saṃhitāstaiḥ pṛthaktvena bhāratasya prakāśitāḥ || 75 ||
[Analyze grammar]

tathā bhīṣmaḥ śāṃtanavo gaṅgāyāmamitadyutiḥ |
vasuvīryātsamabhavanmahāvīryo mahāyaśāḥ || 76 ||
[Analyze grammar]

śūle protaḥ purāṇarṣiracoraścoraśaṅkayā |
aṇīmāṇḍavya iti vai vikhyātaḥ sumahāyaśāḥ || 77 ||
[Analyze grammar]

sa dharmamāhūya purā maharṣiridamuktavān |
iṣīkayā mayā bālyādekā viddhā śakuntikā || 78 ||
[Analyze grammar]

tatkilbiṣaṃ smare dharma nānyatpāpamahaṃ smare |
tanme sahasrasamitaṃ kasmānnehājayattapaḥ || 79 ||
[Analyze grammar]

garīyānbrāhmaṇavadhaḥ sarvabhūtavadhādyataḥ |
tasmāttvaṃ kilbiṣādasmācchūdrayonau janiṣyasi || 80 ||
[Analyze grammar]

tena śāpena dharmo'pi śūdrayonāvajāyata |
vidvānvidurarūpeṇa dhārmī tanurakilbiṣī || 81 ||
[Analyze grammar]

saṃjayo munikalpastu jajñe sūto gavalgaṇāt |
sūryācca kuntikanyāyāṃ jajñe karṇo mahārathaḥ |
sahajaṃ kavacaṃ bibhratkuṇḍaloddyotitānanaḥ || 82 ||
[Analyze grammar]

anugrahārthaṃ lokānāṃ viṣṇurlokanamaskṛtaḥ |
vasudevāttu devakyāṃ prādurbhūto mahāyaśāḥ || 83 ||
[Analyze grammar]

anādinidhano devaḥ sa kartā jagataḥ prabhuḥ |
avyaktamakṣaraṃ brahma pradhānaṃ nirguṇātmakam || 84 ||
[Analyze grammar]

ātmānamavyayaṃ caiva prakṛtiṃ prabhavaṃ param |
puruṣaṃ viśvakarmāṇaṃ sattvayogaṃ dhruvākṣaram || 85 ||
[Analyze grammar]

anantamacalaṃ devaṃ haṃsaṃ nārāyaṇaṃ prabhum |
dhātāramajaraṃ nityaṃ tamāhuḥ paramavyayam || 86 ||
[Analyze grammar]

puruṣaḥ sa vibhuḥ kartā sarvabhūtapitāmahaḥ |
dharmasaṃvardhanārthāya prajajñe'ndhakavṛṣṇiṣu || 87 ||
[Analyze grammar]

astrajñau tu mahāvīryau sarvaśastraviśāradau |
sātyakiḥ kṛtavarmā ca nārāyaṇamanuvratau |
satyakāddhṛdikāccaiva jajñāte'straviśāradau || 88 ||
[Analyze grammar]

bharadvājasya ca skannaṃ droṇyāṃ śukramavardhata |
maharṣerugratapasastasmāddroṇo vyajāyata || 89 ||
[Analyze grammar]

gautamānmithunaṃ jajñe śarastambāccharadvataḥ |
aśvatthāmnaśca jananī kṛpaścaiva mahābalaḥ |
aśvatthāmā tato jajñe droṇādastrabhṛtāṃ varaḥ || 90 ||
[Analyze grammar]

tathaiva dhṛṣṭadyumno'pi sākṣādagnisamadyutiḥ |
vaitāne karmaṇi tate pāvakātsamajāyata |
vīro droṇavināśāya dhanuṣā saha vīryavān || 91 ||
[Analyze grammar]

tathaiva vedyāṃ kṛṣṇāpi jajñe tejasvinī śubhā |
vibhrājamānā vapuṣā bibhratī rūpamuttamam || 92 ||
[Analyze grammar]

prahrādaśiṣyo nagnajitsubalaścābhavattataḥ |
tasya prajā dharmahantrī jajñe devaprakopanāt || 93 ||
[Analyze grammar]

gāndhārarājaputro'bhūcchakuniḥ saubalastathā |
duryodhanasya mātā ca jajñāte'rthavidāvubhau || 94 ||
[Analyze grammar]

kṛṣṇadvaipāyanājjajñe dhṛtarāṣṭro janeśvaraḥ |
kṣetre vicitravīryasya pāṇḍuścaiva mahābalaḥ || 95 ||
[Analyze grammar]

pāṇḍostu jajñire pañca putrā devasamāḥ pṛthak |
dvayoḥ striyorguṇajyeṣṭhasteṣāmāsīdyudhiṣṭhiraḥ || 96 ||
[Analyze grammar]

dharmādyudhiṣṭhiro jajñe mārutāttu vṛkodaraḥ |
indrāddhanaṃjayaḥ śrīmānsarvaśastrabhṛtāṃ varaḥ || 97 ||
[Analyze grammar]

jajñāte rūpasaṃpannāvaśvibhyāṃ tu yamāvubhau |
nakulaḥ sahadevaśca guruśuśrūṣaṇe ratau || 98 ||
[Analyze grammar]

tathā putraśataṃ jajñe dhṛtarāṣṭrasya dhīmataḥ |
duryodhanaprabhṛtayo yuyutsuḥ karaṇastathā || 99 ||
[Analyze grammar]

abhimanyuḥ subhadrāyāmarjunādabhyajāyata |
svasrīyo vāsudevasya pautraḥ pāṇḍormahātmanaḥ || 100 ||
[Analyze grammar]

pāṇḍavebhyo'pi pañcabhyaḥ kṛṣṇāyāṃ pañca jajñire |
kumārā rūpasaṃpannāḥ sarvaśastraviśāradāḥ || 101 ||
[Analyze grammar]

prativindhyo yudhiṣṭhirātsutasomo vṛkodarāt |
arjunācchrutakīrtistu śatānīkastu nākuliḥ || 102 ||
[Analyze grammar]

tathaiva sahadevācca śrutasenaḥ pratāpavān |
hiḍimbāyāṃ ca bhīmena vane jajñe ghaṭotkacaḥ || 103 ||
[Analyze grammar]

śikhaṇḍī drupadājjajñe kanyā putratvamāgatā |
yāṃ yakṣaḥ puruṣaṃ cakre sthūṇaḥ priyacikīrṣayā || 104 ||
[Analyze grammar]

kurūṇāṃ vigrahe tasminsamāgacchanbahūnyatha |
rājñāṃ śatasahasrāṇi yotsyamānāni saṃyuge || 105 ||
[Analyze grammar]

teṣāmaparimeyāni nāmadheyāni sarvaśaḥ |
na śakyaṃ parisaṃkhyātuṃ varṣāṇāmayutairapi |
ete tu kīrtitā mukhyā yairākhyānamidaṃ tatam || 106 ||
[Analyze grammar]