Chapter 43

sūta uvāca |
vāsukistvabravīdvākyaṃ jaratkārumṛṣiṃ tadā |
sanāmā tava kanyeyaṃ svasā me tapasānvitā || 1 ||
[Analyze grammar]

bhariṣyāmi ca te bhāryāṃ pratīcchemāṃ dvijottama |
rakṣaṇaṃ ca kariṣye'syāḥ sarvaśaktyā tapodhana || 2 ||
[Analyze grammar]

pratiśrute tu nāgena bhariṣye bhaginīmiti |
jaratkārustadā veśma bhujagasya jagāma ha || 3 ||
[Analyze grammar]

tatra mantravidāṃ śreṣṭhastapovṛddho mahāvrataḥ |
jagrāha pāṇiṃ dharmātmā vidhimantrapuraskṛtam || 4 ||
[Analyze grammar]

tato vāsagṛhaṃ śubhraṃ pannagendrasya saṃmatam |
jagāma bhāryāmādāya stūyamāno maharṣibhiḥ || 5 ||
[Analyze grammar]

śayanaṃ tatra vai kḷptaṃ spardhyāstaraṇasaṃvṛtam |
tatra bhāryāsahāyaḥ sa jaratkāruruvāsa ha || 6 ||
[Analyze grammar]

sa tatra samayaṃ cakre bhāryayā saha sattamaḥ |
vipriyaṃ me na kartavyaṃ na ca vācyaṃ kadācana || 7 ||
[Analyze grammar]

tyajeyamapriye hi tvāṃ kṛte vāsaṃ ca te gṛhe |
etadgṛhāṇa vacanaṃ mayā yatsamudīritam || 8 ||
[Analyze grammar]

tataḥ paramasaṃvignā svasā nāgapatestu sā |
atiduḥkhānvitā vācaṃ tamuvācaivamastviti || 9 ||
[Analyze grammar]

tathaiva sā ca bhartāraṃ duḥkhaśīlamupācarat |
upāyaiḥ śvetakākīyaiḥ priyakāmā yaśasvinī || 10 ||
[Analyze grammar]

ṛtukāle tataḥ snātā kadācidvāsukeḥ svasā |
bhartāraṃ taṃ yathānyāyamupatasthe mahāmunim || 11 ||
[Analyze grammar]

tatra tasyāḥ samabhavadgarbho jvalanasaṃnibhaḥ |
atīva tapasā yukto vaiśvānarasamadyutiḥ |
śuklapakṣe yathā somo vyavardhata tathaiva saḥ || 12 ||
[Analyze grammar]

tataḥ katipayāhasya jaratkārurmahātapāḥ |
utsaṅge'syāḥ śiraḥ kṛtvā suṣvāpa parikhinnavat || 13 ||
[Analyze grammar]

tasmiṃśca supte viprendre savitāstamiyādgirim |
ahnaḥ parikṣaye brahmaṃstataḥ sācintayattadā |
vāsukerbhaginī bhītā dharmalopānmanasvinī || 14 ||
[Analyze grammar]

kiṃ nu me sukṛtaṃ bhūyādbharturutthāpanaṃ na vā |
duḥkhaśīlo hi dharmātmā kathaṃ nāsyāparādhnuyām || 15 ||
[Analyze grammar]

kopo vā dharmaśīlasya dharmalopo'tha vā punaḥ |
dharmalopo garīyānvai syādatretyakaronmanaḥ || 16 ||
[Analyze grammar]

utthāpayiṣye yadyenaṃ dhruvaṃ kopaṃ kariṣyati |
dharmalopo bhavedasya saṃdhyātikramaṇe dhruvam || 17 ||
[Analyze grammar]

iti niścitya manasā jaratkārurbhujaṃgamā |
tamṛṣiṃ dīptatapasaṃ śayānamanalopamam |
uvācedaṃ vacaḥ ślakṣṇaṃ tato madhurabhāṣiṇī || 18 ||
[Analyze grammar]

uttiṣṭha tvaṃ mahābhāga sūryo'stamupagacchati |
saṃdhyāmupāssva bhagavannapaḥ spṛṣṭvā yatavrataḥ || 19 ||
[Analyze grammar]

prāduṣkṛtāgnihotro'yaṃ muhūrto ramyadāruṇaḥ |
saṃdhyā pravartate ceyaṃ paścimāyāṃ diśi prabho || 20 ||
[Analyze grammar]

evamuktaḥ sa bhagavāñjaratkārurmahātapāḥ |
bhāryāṃ prasphuramāṇoṣṭha idaṃ vacanamabravīt || 21 ||
[Analyze grammar]

avamānaḥ prayukto'yaṃ tvayā mama bhujaṃgame |
samīpe te na vatsyāmi gamiṣyāmi yathāgatam || 22 ||
[Analyze grammar]

na hi tejo'sti vāmoru mayi supte vibhāvasoḥ |
astaṃ gantuṃ yathākālamiti me hṛdi vartate || 23 ||
[Analyze grammar]

na cāpyavamatasyeha vastuṃ roceta kasyacit |
kiṃ punardharmaśīlasya mama vā madvidhasya vā || 24 ||
[Analyze grammar]

evamuktā jaratkārurbhartrā hṛdayakampanam |
abravīdbhaginī tatra vāsukeḥ saṃniveśane || 25 ||
[Analyze grammar]

nāvamānātkṛtavatī tavāhaṃ pratibodhanam |
dharmalopo na te vipra syādityetatkṛtaṃ mayā || 26 ||
[Analyze grammar]

uvāca bhāryāmityukto jaratkārurmahātapāḥ |
ṛṣiḥ kopasamāviṣṭastyaktukāmo bhujaṃgamām || 27 ||
[Analyze grammar]

na me vāganṛtaṃ prāha gamiṣye'haṃ bhujaṃgame |
samayo hyeṣa me pūrvaṃ tvayā saha mithaḥ kṛtaḥ || 28 ||
[Analyze grammar]

sukhamasmyuṣito bhadre brūyāstvaṃ bhrātaraṃ śubhe |
ito mayi gate bhīru gataḥ sa bhagavāniti |
tvaṃ cāpi mayi niṣkrānte na śokaṃ kartumarhasi || 29 ||
[Analyze grammar]

ityuktā sānavadyāṅgī pratyuvāca patiṃ tadā |
jaratkāruṃ jaratkāruścintāśokaparāyaṇā || 30 ||
[Analyze grammar]

bāṣpagadgadayā vācā mukhena pariśuṣyatā |
kṛtāñjalirvarārohā paryaśrunayanā tataḥ |
dhairyamālambya vāmorūrhṛdayena pravepatā || 31 ||
[Analyze grammar]

na māmarhasi dharmajña parityaktumanāgasam |
dharme sthitāṃ sthito dharme sadā priyahite ratām || 32 ||
[Analyze grammar]

pradāne kāraṇaṃ yacca mama tubhyaṃ dvijottama |
tadalabdhavatīṃ mandāṃ kiṃ māṃ vakṣyati vāsukiḥ || 33 ||
[Analyze grammar]

mātṛśāpābhibhūtānāṃ jñātīnāṃ mama sattama |
apatyamīpṣitaṃ tvattastacca tāvanna dṛśyate || 34 ||
[Analyze grammar]

tvatto hyapatyalābhena jñātīnāṃ me śivaṃ bhavet |
saṃprayogo bhavennāyaṃ mama moghastvayā dvija || 35 ||
[Analyze grammar]

jñātīnāṃ hitamicchantī bhagavaṃstvāṃ prasādaye |
imamavyaktarūpaṃ me garbhamādhāya sattama |
kathaṃ tyaktvā mahātmā sangantumicchasyanāgasam || 36 ||
[Analyze grammar]

evamuktastu sa munirbhāryāṃ vacanamabravīt |
yadyuktamanurūpaṃ ca jaratkārustapodhanaḥ || 37 ||
[Analyze grammar]

astyeṣa garbhaḥ subhage tava vaiśvānaropamaḥ |
ṛṣiḥ paramadharmātmā vedavedāṅgapāragaḥ || 38 ||
[Analyze grammar]

evamuktvā sa dharmātmā jaratkārurmahānṛṣiḥ |
ugrāya tapase bhūyo jagāma kṛtaniścayaḥ || 39 ||
[Analyze grammar]