Chapter 38

śṛṅgyuvāca |
yadyetatsāhasaṃ tāta yadi vā duṣkṛtaṃ kṛtam |
priyaṃ vāpyapriyaṃ vā te vāguktā na mṛṣā mayā || 1 ||
[Analyze grammar]

naivānyathedaṃ bhavitā pitareṣa bravīmi te |
nāhaṃ mṛṣā prabravīmi svaireṣvapi kutaḥ śapan || 2 ||
[Analyze grammar]

śamīka uvāca |
jānāmyugraprabhāvaṃ tvāṃ putra satyagiraṃ tathā |
nānṛtaṃ hyuktapūrvaṃ te naitanmithyā bhaviṣyati || 3 ||
[Analyze grammar]

pitrā putro vayaḥstho'pi satataṃ vācya eva tu |
yathā syādguṇasaṃyuktaḥ prāpnuyācca mahadyaśaḥ || 4 ||
[Analyze grammar]

kiṃ punarbāla eva tvaṃ tapasā bhāvitaḥ prabho |
vardhate ca prabhavatāṃ kopo'tīva mahātmanām || 5 ||
[Analyze grammar]

so'haṃ paśyāmi vaktavyaṃ tvayi dharmabhṛtāṃ vara |
putratvaṃ bālatāṃ caiva tavāvekṣya ca sāhasam || 6 ||
[Analyze grammar]

sa tvaṃ śamayuto bhūtvā vanyamāhāramāharan |
cara krodhamimaṃ tyaktvā naivaṃ dharmaṃ prahāsyasi || 7 ||
[Analyze grammar]

krodho hi dharmaṃ harati yatīnāṃ duḥkhasaṃcitam |
tato dharmavihīnānāṃ gatiriṣṭā na vidyate || 8 ||
[Analyze grammar]

śama eva yatīnāṃ hi kṣamiṇāṃ siddhikārakaḥ |
kṣamāvatāmayaṃ lokaḥ paraścaiva kṣamāvatām || 9 ||
[Analyze grammar]

tasmāccarethāḥ satataṃ kṣamāśīlo jitendriyaḥ |
kṣamayā prāpsyase lokānbrahmaṇaḥ samanantarān || 10 ||
[Analyze grammar]

mayā tu śamamāsthāya yacchakyaṃ kartumadya vai |
tatkariṣye'dya tātāhaṃ preṣayiṣye nṛpāya vai || 11 ||
[Analyze grammar]

mama putreṇa śapto'si bālenākṛtabuddhinā |
mamemāṃ dharṣaṇāṃ tvattaḥ prekṣya rājannamarṣiṇā || 12 ||
[Analyze grammar]

sūta uvāca |
evamādiśya śiṣyaṃ sa preṣayāmāsa suvrataḥ |
parikṣite nṛpataye dayāpanno mahātapāḥ || 13 ||
[Analyze grammar]

saṃdiśya kuśalapraśnaṃ kāryavṛttāntameva ca |
śiṣyaṃ gauramukhaṃ nāma śīlavantaṃ samāhitam || 14 ||
[Analyze grammar]

so'bhigamya tataḥ śīghraṃ narendraṃ kuruvardhanam |
viveśa bhavanaṃ rājñaḥ pūrvaṃ dvāḥsthairniveditaḥ || 15 ||
[Analyze grammar]

pūjitaśca narendreṇa dvijo gauramukhastataḥ |
ācakhyau pariviśrānto rājñe sarvamaśeṣataḥ |
śamīkavacanaṃ ghoraṃ yathoktaṃ mantrisaṃnidhau || 16 ||
[Analyze grammar]

śamīko nāma rājendra viṣaye vartate tava |
ṛṣiḥ paramadharmātmā dāntaḥ śānto mahātapāḥ || 17 ||
[Analyze grammar]

tasya tvayā naravyāghra sarpaḥ prāṇairviyojitaḥ |
avasakto dhanuṣkoṭyā skandhe bharatasattama |
kṣāntavāṃstava tatkarma putrastasya na cakṣame || 18 ||
[Analyze grammar]

tena śapto'si rājendra piturajñātamadya vai |
takṣakaḥ saptarātreṇa mṛtyuste vai bhaviṣyati || 19 ||
[Analyze grammar]

tatra rakṣāṃ kuruṣveti punaḥ punarathābravīt |
tadanyathā na śakyaṃ ca kartuṃ kenacidapyuta || 20 ||
[Analyze grammar]

na hi śaknoti saṃyantuṃ putraṃ kopasamanvitam |
tato'haṃ preṣitastena tava rājanhitārthinā || 21 ||
[Analyze grammar]

iti śrutvā vaco ghoraṃ sa rājā kurunandanaḥ |
paryatapyata tatpāpaṃ kṛtvā rājā mahātapāḥ || 22 ||
[Analyze grammar]

taṃ ca maunavratadharaṃ śrutvā munivaraṃ tadā |
bhūya evābhavadrājā śokasaṃtaptamānasaḥ || 23 ||
[Analyze grammar]

anukrośātmatāṃ tasya śamīkasyāvadhārya tu |
paryatapyata bhūyo'pi kṛtvā tatkilbiṣaṃ muneḥ || 24 ||
[Analyze grammar]

na hi mṛtyuṃ tathā rājā śrutvā vai so'nvatapyata |
aśocadamaraprakhyo yathā kṛtveha karma tat || 25 ||
[Analyze grammar]

tatastaṃ preṣayāmāsa rājā gauramukhaṃ tadā |
bhūyaḥ prasādaṃ bhagavānkarotviti mameti vai || 26 ||
[Analyze grammar]

tasmiṃśca gatamātre vai rājā gauramukhe tadā |
mantribhirmantrayāmāsa saha saṃvignamānasaḥ || 27 ||
[Analyze grammar]

niścitya mantribhiścaiva sahito mantratattvavit |
prāsādaṃ kārayāmāsa ekastambhaṃ surakṣitam || 28 ||
[Analyze grammar]

rakṣāṃ ca vidadhe tatra bhiṣajaścauṣadhāni ca |
brāhmaṇānsiddhamantrāṃśca sarvato vai nyaveśayat || 29 ||
[Analyze grammar]

rājakāryāṇi tatrasthaḥ sarvāṇyevākarocca saḥ |
mantribhiḥ saha dharmajñaḥ samantātparirakṣitaḥ || 30 ||
[Analyze grammar]

prāpte tu divase tasminsaptame dvijasattama |
kāśyapo'bhyāgamadvidvāṃstaṃ rājānaṃ cikitsitum || 31 ||
[Analyze grammar]

śrutaṃ hi tena tadabhūdadya taṃ rājasattamam |
takṣakaḥ pannagaśreṣṭho neṣyate yamasādanam || 32 ||
[Analyze grammar]

taṃ daṣṭaṃ pannagendreṇa kariṣye'hamapajvaram |
tatra me'rthaśca dharmaśca bhaviteti vicintayan || 33 ||
[Analyze grammar]

taṃ dadarśa sa nāgendrastakṣakaḥ kāśyapaṃ pathi |
gacchantamekamanasaṃ dvijo bhūtvā vayotigaḥ || 34 ||
[Analyze grammar]

tamabravītpannagendraḥ kāśyapaṃ munipuṃgavam |
kva bhavāṃstvarito yāti kiṃ ca kāryaṃ cikīrṣati || 35 ||
[Analyze grammar]

kāśyapa uvāca |
nṛpaṃ kurukulotpannaṃ parikṣitamariṃdamam |
takṣakaḥ pannagaśreṣṭhastejasādya pradhakṣyati || 36 ||
[Analyze grammar]

taṃ daṣṭaṃ pannagendreṇa tenāgnisamatejasā |
pāṇḍavānāṃ kulakaraṃ rājānamamitaujasam |
gacchāmi saumya tvaritaṃ sadyaḥ kartumapajvaram || 37 ||
[Analyze grammar]

takṣaka uvāca |
ahaṃ sa takṣako brahmaṃstaṃ dhakṣyāmi mahīpatim |
nivartasva na śaktastvaṃ mayā daṣṭaṃ cikitsitum || 38 ||
[Analyze grammar]

kāśyapa uvāca |
ahaṃ taṃ nṛpatiṃ nāga tvayā daṣṭamapajvaram |
kariṣya iti me buddhirvidyābalamupāśritaḥ || 39 ||
[Analyze grammar]