Chapter 26

sūta uvāca |
spṛṣṭamātrā tu padbhyāṃ sā garuḍena balīyasā |
abhajyata taroḥ śākhā bhagnāṃ caināmadhārayat || 1 ||
[Analyze grammar]

tāṃ bhagnāṃ sa mahāśākhāṃ smayansamavalokayan |
athātra lambato'paśyadvālakhilyānadhomukhān || 2 ||
[Analyze grammar]

sa tadvināśasaṃtrāsādanupatya khagādhipaḥ |
śākhāmāsyena jagrāha teṣāmevānvavekṣayā |
śanaiḥ paryapatatpakṣī parvatānpraviśātayan || 3 ||
[Analyze grammar]

evaṃ so'bhyapataddeśānbahūnsagajakacchapaḥ |
dayārthaṃ vālakhilyānāṃ na ca sthānamavindata || 4 ||
[Analyze grammar]

sa gatvā parvataśreṣṭhaṃ gandhamādanamavyayam |
dadarśa kaśyapaṃ tatra pitaraṃ tapasi sthitam || 5 ||
[Analyze grammar]

dadarśa taṃ pitā cāpi divyarūpaṃ vihaṃgamam |
tejovīryabalopetaṃ manomārutaraṃhasam || 6 ||
[Analyze grammar]

śailaśṛṅgapratīkāśaṃ brahmadaṇḍamivodyatam |
acintyamanabhijñeyaṃ sarvabhūtabhayaṃkaram || 7 ||
[Analyze grammar]

māyāvīryadharaṃ sākṣādagnimiddhamivodyatam |
apradhṛṣyamajeyaṃ ca devadānavarākṣasaiḥ || 8 ||
[Analyze grammar]

bhettāraṃ giriśṛṅgāṇāṃ nadījalaviśoṣaṇam |
lokasaṃloḍanaṃ ghoraṃ kṛtāntasamadarśanam || 9 ||
[Analyze grammar]

tamāgatamabhiprekṣya bhagavānkaśyapastadā |
viditvā cāsya saṃkalpamidaṃ vacanamabravīt || 10 ||
[Analyze grammar]

putra mā sāhasaṃ kārṣīrmā sadyo lapsyase vyathām |
mā tvā daheyuḥ saṃkruddhā vālakhilyā marīcipāḥ || 11 ||
[Analyze grammar]

prasādayāmāsa sa tānkaśyapaḥ putrakāraṇāt |
vālakhilyāṃstapaḥsiddhānidamuddiśya kāraṇam || 12 ||
[Analyze grammar]

prajāhitārthamārambho garuḍasya tapodhanāḥ |
cikīrṣati mahatkarma tadanujñātumarhatha || 13 ||
[Analyze grammar]

evamuktā bhagavatā munayaste samabhyayuḥ |
muktvā śākhāṃ giriṃ puṇyaṃ himavantaṃ taporthinaḥ || 14 ||
[Analyze grammar]

tatasteṣvapayāteṣu pitaraṃ vinatātmajaḥ |
śākhāvyākṣiptavadanaḥ paryapṛcchata kaśyapam || 15 ||
[Analyze grammar]

bhagavankva vimuñcāmi taruśākhāmimāmaham |
varjitaṃ brāhmaṇairdeśamākhyātu bhagavānmama || 16 ||
[Analyze grammar]

tato niṣpuruṣaṃ śailaṃ himasaṃruddhakandaram |
agamyaṃ manasāpyanyaistasyācakhyau sa kaśyapaḥ || 17 ||
[Analyze grammar]

taṃ parvatamahākukṣimāviśya manasā khagaḥ |
javenābhyapatattārkṣyaḥ saśākhāgajakacchapaḥ || 18 ||
[Analyze grammar]

na tāṃ vadhraḥ pariṇahecchatacarmā mahānaṇuḥ |
śākhino mahatīṃ śākhāṃ yāṃ pragṛhya yayau khagaḥ || 19 ||
[Analyze grammar]

tataḥ sa śatasāhasraṃ yojanāntaramāgataḥ |
kālena nātimahatā garuḍaḥ patatāṃ varaḥ || 20 ||
[Analyze grammar]

sa taṃ gatvā kṣaṇenaiva parvataṃ vacanātpituḥ |
amuñcanmahatīṃ śākhāṃ sasvanāṃ tatra khecaraḥ || 21 ||
[Analyze grammar]

pakṣānilahataścāsya prākampata sa śailarāṭ |
mumoca puṣpavarṣaṃ ca samāgalitapādapaḥ || 22 ||
[Analyze grammar]

śṛṅgāṇi ca vyaśīryanta girestasya samantataḥ |
maṇikāñcanacitrāṇi śobhayanti mahāgirim || 23 ||
[Analyze grammar]

śākhino bahavaścāpi śākhayābhihatāstayā |
kāñcanaiḥ kusumairbhānti vidyutvanta ivāmbudāḥ || 24 ||
[Analyze grammar]

te hemavikacā bhūyo yuktāḥ parvatadhātubhiḥ |
vyarājañśākhinastatra sūryāṃśupratirañjitāḥ || 25 ||
[Analyze grammar]

tatastasya gireḥ śṛṅgamāsthāya sa khagottamaḥ |
bhakṣayāmāsa garuḍastāvubhau gajakacchapau || 26 ||
[Analyze grammar]

tataḥ parvatakūṭāgrādutpapāta manojavaḥ |
prāvartantātha devānāmutpātā bhayavedinaḥ || 27 ||
[Analyze grammar]

indrasya vajraṃ dayitaṃ prajajvāla vyathānvitam |
sadhūmā cāpatatsārcirdivolkā nabhasaścyutā || 28 ||
[Analyze grammar]

tathā vasūnāṃ rudrāṇāmādityānāṃ ca sarvaśaḥ |
sādhyānāṃ marutāṃ caiva ye cānye devatāgaṇāḥ |
svaṃ svaṃ praharaṇaṃ teṣāṃ parasparamupādravat || 29 ||
[Analyze grammar]

abhūtapūrvaṃ saṃgrāme tadā devāsure'pi ca |
vavurvātāḥ sanirghātāḥ peturulkāḥ samantataḥ || 30 ||
[Analyze grammar]

nirabhramapi cākāśaṃ prajagarja mahāsvanam |
devānāmapi yo devaḥ so'pyavarṣadasṛktadā || 31 ||
[Analyze grammar]

mamlurmālyāni devānāṃ śemustejāṃsi caiva hi |
utpātameghā raudrāśca vavarṣuḥ śoṇitaṃ bahu |
rajāṃsi mukuṭānyeṣāmutthitāni vyadharṣayan || 32 ||
[Analyze grammar]

tatastrāsasamudvignaḥ saha devaiḥ śatakratuḥ |
utpātāndāruṇānpaśyannityuvāca bṛhaspatim || 33 ||
[Analyze grammar]

kimarthaṃ bhagavanghorā mahotpātāḥ samutthitāḥ |
na ca śatruṃ prapaśyāmi yudhi yo naḥ pradharṣayet || 34 ||
[Analyze grammar]

bṛhaspatiruvāca |
tavāparādhāddevendra pramādācca śatakrato |
tapasā vālakhilyānāṃ bhūtamutpannamadbhutam || 35 ||
[Analyze grammar]

kaśyapasya muneḥ putro vinatāyāśca khecaraḥ |
hartuṃ somamanuprāpto balavānkāmarūpavān || 36 ||
[Analyze grammar]

samartho balināṃ śreṣṭho hartuṃ somaṃ vihaṃgamaḥ |
sarvaṃ saṃbhāvayāmyasminnasādhyamapi sādhayet || 37 ||
[Analyze grammar]

sūta uvāca |
śrutvaitadvacanaṃ śakraḥ provācāmṛtarakṣiṇaḥ |
mahāvīryabalaḥ pakṣī hartuṃ somamihodyataḥ || 38 ||
[Analyze grammar]

yuṣmānsaṃbodhayāmyeṣa yathā sa na haredbalāt |
atulaṃ hi balaṃ tasya bṛhaspatiruvāca me || 39 ||
[Analyze grammar]

tacchrutvā vibudhā vākyaṃ vismitā yatnamāsthitāḥ |
parivāryāmṛtaṃ tasthurvajrī cendraḥ śatakratuḥ || 40 ||
[Analyze grammar]

dhārayanto mahārhāṇi kavacāni manasvinaḥ |
kāñcanāni vicitrāṇi vaiḍūryavikṛtāni ca || 41 ||
[Analyze grammar]

vividhāni ca śastrāṇi ghorarūpāṇyanekaśaḥ |
śitatīkṣṇāgradhārāṇi samudyamya sahasraśaḥ || 42 ||
[Analyze grammar]

savisphuliṅgajvālāni sadhūmāni ca sarvaśaḥ |
cakrāṇi parighāṃścaiva triśūlāni paraśvadhān || 43 ||
[Analyze grammar]

śaktīśca vividhāstīkṣṇāḥ karavālāṃśca nirmalān |
svadeharūpāṇyādāya gadāścograpradarśanāḥ || 44 ||
[Analyze grammar]

taiḥ śastrairbhānumadbhiste divyābharaṇabhūṣitāḥ |
bhānumantaḥ suragaṇāstasthurvigatakalmaṣāḥ || 45 ||
[Analyze grammar]

anupamabalavīryatejaso dhṛtamanasaḥ parirakṣaṇe'mṛtasya |
asurapuravidāraṇāḥ surā jvalanasamiddhavapuḥprakāśinaḥ || 46 ||
[Analyze grammar]

iti samaravaraṃ surāsthitaṃ parighasahasraśataiḥ samākulam |
vigalitamiva cāmbarāntare tapanamarīcivibhāsitaṃ babhau || 47 ||
[Analyze grammar]