Chapter 1

janamejaya uvāca |
evaṃ vṛṣṇyandhakakule śrutvā mausalamāhavam |
pāṇḍavāḥ kimakurvanta tathā kṛṣṇe divaṃ gate || 1 ||
[Analyze grammar]

vaiśaṃpāyana uvāca |
śrutvaiva kauravo rājā vṛṣṇīnāṃ kadanaṃ mahat |
prasthāne matimādhāya vākyamarjunamabravīt || 2 ||
[Analyze grammar]

kālaḥ pacati bhūtāni sarvāṇyeva mahāmate |
karmanyāsamahaṃ manye tvamapi draṣṭumarhasi || 3 ||
[Analyze grammar]

ityuktaḥ sa tu kaunteyaḥ kālaḥ kāla iti bruvan |
anvapadyata tadvākyaṃ bhrāturjyeṣṭhasya vīryavān || 4 ||
[Analyze grammar]

arjunasya mataṃ jñātvā bhīmaseno yamau tathā |
anvapadyanta tadvākyaṃ yaduktaṃ savyasācinā || 5 ||
[Analyze grammar]

tato yuyutsumānāyya pravrajandharmakāmyayā |
rājyaṃ paridadau sarvaṃ vaiśyāputre yudhiṣṭhiraḥ || 6 ||
[Analyze grammar]

abhiṣicya svarājye tu taṃ rājānaṃ parikṣitam |
duḥkhārtaścābravīdrājā subhadrāṃ pāṇḍavāgrajaḥ || 7 ||
[Analyze grammar]

eṣa putrasya te putraḥ kururājo bhaviṣyati |
yadūnāṃ pariśeṣaśca vajro rājā kṛtaśca ha || 8 ||
[Analyze grammar]

parikṣiddhāstinapure śakraprasthe tu yādavaḥ |
vajro rājā tvayā rakṣyo mā cādharme manaḥ kṛthāḥ || 9 ||
[Analyze grammar]

ityuktvā dharmarājaḥ sa vāsudevasya dhīmataḥ |
mātulasya ca vṛddhasya rāmādīnāṃ tathaiva ca || 10 ||
[Analyze grammar]

bhrātṛbhiḥ saha dharmātmā kṛtvodakamatandritaḥ |
śrāddhānyuddiśya sarveṣāṃ cakāra vidhivattadā || 11 ||
[Analyze grammar]

dadau ratnāni vāsāṃsi grāmānaśvānrathānapi |
striyaśca dvijamukhyebhyo gavāṃ śatasahasraśaḥ || 12 ||
[Analyze grammar]

kṛpamabhyarcya ca gurumarthamānapuraskṛtam |
śiṣyaṃ parikṣitaṃ tasmai dadau bharatasattamaḥ || 13 ||
[Analyze grammar]

tatastu prakṛtīḥ sarvāḥ samānāyya yudhiṣṭhiraḥ |
sarvamācaṣṭa rājarṣiścikīrṣitamathātmanaḥ || 14 ||
[Analyze grammar]

te śrutvaiva vacastasya paurajānapadā janāḥ |
bhṛśamudvignamanaso nābhyanandanta tadvacaḥ || 15 ||
[Analyze grammar]

naivaṃ kartavyamiti te tadocuste narādhipam |
na ca rājā tathākārṣītkālaparyāyadharmavit || 16 ||
[Analyze grammar]

tato'numānya dharmātmā paurajānapadaṃ janam |
gamanāya matiṃ cakre bhrātaraścāsya te tadā || 17 ||
[Analyze grammar]

tataḥ sa rājā kauravyo dharmaputro yudhiṣṭhiraḥ |
utsṛjyābharaṇānyaṅgājjagṛhe valkalānyuta || 18 ||
[Analyze grammar]

bhīmārjunau yamau caiva draupadī ca yaśasvinī |
tathaiva sarve jagṛhurvalkalāni janādhipa || 19 ||
[Analyze grammar]

vidhivatkārayitveṣṭiṃ naiṣṭhikīṃ bharatarṣabha |
samutsṛjyāpsu sarve'gnīnpratasthurnarapuṃgavāḥ || 20 ||
[Analyze grammar]

tataḥ praruruduḥ sarvāḥ striyo dṛṣṭvā nararṣabhān |
prasthitāndraupadīṣaṣṭhānpurā dyūtajitānyathā || 21 ||
[Analyze grammar]

harṣo'bhavacca sarveṣāṃ bhrātṝṇāṃ gamanaṃ prati |
yudhiṣṭhiramataṃ jñātvā vṛṣṇikṣayamavekṣya ca || 22 ||
[Analyze grammar]

bhrātaraḥ pañca kṛṣṇā ca ṣaṣṭhī śvā caiva saptamaḥ |
ātmanā saptamo rājā niryayau gajasāhvayāt |
paurairanugato dūraṃ sarvairantaḥpuraistathā || 23 ||
[Analyze grammar]

na cainamaśakatkaścinnivartasveti bhāṣitum |
nyavartanta tataḥ sarve narā nagaravāsinaḥ || 24 ||
[Analyze grammar]

kṛpaprabhṛtayaścaiva yuyutsuṃ paryavārayan |
viveśa gaṅgāṃ kauravya ulūpī bhujagātmajā || 25 ||
[Analyze grammar]

citrāṅgadā yayau cāpi maṇipūrapuraṃ prati |
śiṣṭāḥ parikṣitaṃ tvanyā mātaraḥ paryavārayan || 26 ||
[Analyze grammar]

pāṇḍavāśca mahātmāno draupadī ca yaśasvinī |
kṛtopavāsāḥ kauravya prayayuḥ prāṅmukhāstataḥ || 27 ||
[Analyze grammar]

yogayuktā mahātmānastyāgadharmamupeyuṣaḥ |
abhijagmurbahūndeśānsaritaḥ parvatāṃstathā || 28 ||
[Analyze grammar]

yudhiṣṭhiro yayāvagre bhīmastu tadanantaram |
arjunastasya cānveva yamau caiva yathākramam || 29 ||
[Analyze grammar]

pṛṣṭhatastu varārohā śyāmā padmadalekṣaṇā |
draupadī yoṣitāṃ śreṣṭhā yayau bharatasattama || 30 ||
[Analyze grammar]

śvā caivānuyayāvekaḥ pāṇḍavānprasthitānvane |
krameṇa te yayurvīrā lauhityaṃ salilārṇavam || 31 ||
[Analyze grammar]

gāṇḍīvaṃ ca dhanurdivyaṃ na mumoca dhanaṃjayaḥ |
ratnalobhānmahārāja tau cākṣayyau maheṣudhī || 32 ||
[Analyze grammar]

agniṃ te dadṛśustatra sthitaṃ śailamivāgrataḥ |
mārgamāvṛtya tiṣṭhantaṃ sākṣātpuruṣavigraham || 33 ||
[Analyze grammar]

tato devaḥ sa saptārciḥ pāṇḍavānidamabravīt |
bho bho pāṇḍusutā vīrāḥ pāvakaṃ māṃ vibodhata || 34 ||
[Analyze grammar]

yudhiṣṭhira mahābāho bhīmasena paraṃtapa |
arjunāśvisutau vīrau nibodhata vaco mama || 35 ||
[Analyze grammar]

ahamagniḥ kuruśreṣṭhā mayā dagdhaṃ ca khāṇḍavam |
arjunasya prabhāveṇa tathā nārāyaṇasya ca || 36 ||
[Analyze grammar]

ayaṃ vaḥ phalguno bhrātā gāṇḍīvaṃ paramāyudham |
parityajya vanaṃ yātu nānenārtho'sti kaścana || 37 ||
[Analyze grammar]

cakraratnaṃ tu yatkṛṣṇe sthitamāsīnmahātmani |
gataṃ tacca punarhaste kālenaiṣyati tasya ha || 38 ||
[Analyze grammar]

varuṇādāhṛtaṃ pūrvaṃ mayaitatpārthakāraṇāt |
gāṇḍīvaṃ kārmukaśreṣṭhaṃ varuṇāyaiva dīyatām || 39 ||
[Analyze grammar]

tataste bhrātaraḥ sarve dhanaṃjayamacodayan |
sa jale prākṣipattattu tathākṣayyau maheṣudhī || 40 ||
[Analyze grammar]

tato'gnirbharataśreṣṭha tatraivāntaradhīyata |
yayuśca pāṇḍavā vīrāstataste dakṣiṇāmukhāḥ || 41 ||
[Analyze grammar]

tataste tūttareṇaiva tīreṇa lavaṇāmbhasaḥ |
jagmurbharataśārdūla diśaṃ dakṣiṇapaścimam || 42 ||
[Analyze grammar]

tataḥ punaḥ samāvṛttāḥ paścimāṃ diśameva te |
dadṛśurdvārakāṃ cāpi sāgareṇa pariplutām || 43 ||
[Analyze grammar]

udīcīṃ punarāvṛttya yayurbharatasattamāḥ |
prādakṣiṇyaṃ cikīrṣantaḥ pṛthivyā yogadharmiṇaḥ || 44 ||
[Analyze grammar]