Chapter 4

vaiśaṃpāyana uvāca |
kālī strī pāṇḍurairdantaiḥ praviśya hasatī niśi |
striyaḥ svapneṣu muṣṇantī dvārakāṃ paridhāvati || 1 ||
[Analyze grammar]

alaṃkārāśca chatraṃ ca dhvajāśca kavacāni ca |
hriyamāṇānyadṛśyanta rakṣobhiḥ subhayānakaiḥ || 2 ||
[Analyze grammar]

taccāgnidattaṃ kṛṣṇasya vajranābhamayasmayam |
divamācakrame cakraṃ vṛṣṇīnāṃ paśyatāṃ tadā || 3 ||
[Analyze grammar]

yuktaṃ rathaṃ divyamādityavarṇaṃ; hayāharanpaśyato dārukasya |
te sāgarasyopariṣṭādavarta;nmanojavāścaturo vājimukhyāḥ || 4 ||
[Analyze grammar]

tālaḥ suparṇaśca mahādhvajau tau; supūjitau rāmajanārdanābhyām |
uccairjahrurapsaraso divāniśaṃ; vācaścocurgamyatāṃ tīrthayātrā || 5 ||
[Analyze grammar]

tato jigamiṣantaste vṛṣṇyandhakamahārathāḥ |
sāntaḥpurāstadā tīrthayātrāmaicchannararṣabhāḥ || 6 ||
[Analyze grammar]

tato bhojyaṃ ca bhakṣyaṃ ca peyaṃ cāndhakavṛṣṇayaḥ |
bahu nānāvidhaṃ cakrurmadyaṃ māṃsamanekaśaḥ || 7 ||
[Analyze grammar]

tataḥ sīdhuṣu saktāśca niryayurnagarādbahiḥ |
yānairaśvairgajaiścaiva śrīmantastigmatejasaḥ || 8 ||
[Analyze grammar]

tataḥ prabhāse nyavasanyathoddeśaṃ yathāgṛham |
prabhūtabhakṣyapeyāste sadārā yādavāstadā || 9 ||
[Analyze grammar]

niviṣṭāṃstānniśamyātha samudrānte sa yogavit |
jagāmāmantrya tānvīrānuddhavo'rthaviśāradaḥ || 10 ||
[Analyze grammar]

taṃ prasthitaṃ mahātmānamabhivādya kṛtāñjalim |
jānanvināśaṃ vṛṣṇīnāṃ naicchadvārayituṃ hariḥ || 11 ||
[Analyze grammar]

tataḥ kālaparītāste vṛṣṇyandhakamahārathāḥ |
apaśyannuddhavaṃ yāntaṃ tejasāvṛtya rodasī || 12 ||
[Analyze grammar]

brāhmaṇārtheṣu yatsiddhamannaṃ teṣāṃ mahātmanām |
tadvānarebhyaḥ pradaduḥ surāgandhasamanvitam || 13 ||
[Analyze grammar]

tatastūryaśatākīrṇaṃ naṭanartakasaṃkulam |
prāvartata mahāpānaṃ prabhāse tigmatejasām || 14 ||
[Analyze grammar]

kṛṣṇasya saṃnidhau rāmaḥ sahitaḥ kṛtavarmaṇā |
apibadyuyudhānaśca gado babhrustathaiva ca || 15 ||
[Analyze grammar]

tataḥ pariṣado madhye yuyudhāno madotkaṭaḥ |
abravītkṛtavarmāṇamavahasyāvamanya ca || 16 ||
[Analyze grammar]

kaḥ kṣatriyo manyamānaḥ suptānhanyānmṛtāniva |
na tanmṛṣyanti hārdikya yādavā yattvayā kṛtam || 17 ||
[Analyze grammar]

ityukte yuyudhānena pūjayāmāsa tadvacaḥ |
pradyumno rathināṃ śreṣṭho hārdikyamavamanya ca || 18 ||
[Analyze grammar]

tataḥ paramasaṃkruddhaḥ kṛtavarmā tamabravīt |
nirdiśanniva sāvajñaṃ tadā savyena pāṇinā || 19 ||
[Analyze grammar]

bhūriśravāśchinnabāhuryuddhe prāyagatastvayā |
vadhena sunṛśaṃsena kathaṃ vīreṇa pātitaḥ || 20 ||
[Analyze grammar]

iti tasya vacaḥ śrutvā keśavaḥ paravīrahā |
tiryaksaroṣayā dṛṣṭyā vīkṣāṃ cakre sa manyumān || 21 ||
[Analyze grammar]

maṇiḥ syamantakaścaiva yaḥ sa satrājito'bhavat |
tāṃ kathāṃ smārayāmāsa sātyakirmadhusūdanam || 22 ||
[Analyze grammar]

tacchrutvā keśavasyāṅkamagamadrudatī tadā |
satyabhāmā prakupitā kopayantī janārdanam || 23 ||
[Analyze grammar]

tata utthāya sakrodhaḥ sātyakirvākyamabravīt |
pañcānāṃ draupadeyānāṃ dhṛṣṭadyumnaśikhaṇḍinoḥ || 24 ||
[Analyze grammar]

eṣa gacchāmi padavīṃ satyena ca tathā śape |
sauptike ye ca nihatāḥ suptānena durātmanā || 25 ||
[Analyze grammar]

droṇaputrasahāyena pāpena kṛtavarmaṇā |
samāptamāyurasyādya yaśaścāpi sumadhyame || 26 ||
[Analyze grammar]

itīdamuktvā khaḍgena keśavasya samīpataḥ |
abhidrutya śiraḥ kruddhaściccheda kṛtavarmaṇaḥ || 27 ||
[Analyze grammar]

tathānyānapi nighnantaṃ yuyudhānaṃ samantataḥ |
abhyadhāvaddhṛṣīkeśo vinivārayiṣustadā || 28 ||
[Analyze grammar]

ekībhūtāstataḥ sarve kālaparyāyacoditāḥ |
bhojāndhakā mahārāja śaineyaṃ paryavārayan || 29 ||
[Analyze grammar]

tāndṛṣṭvā patatastūrṇamabhikruddhāñjanārdanaḥ |
na cukrodha mahātejā jānankālasya paryayam || 30 ||
[Analyze grammar]

te tu pānamadāviṣṭāścoditāścaiva manyunā |
yuyudhānamathābhyaghnannucchiṣṭairbhājanaistadā || 31 ||
[Analyze grammar]

hanyamāne tu śaineye kruddho rukmiṇinandanaḥ |
tadantaramupādhāvanmokṣayiṣyañśineḥ sutam || 32 ||
[Analyze grammar]

sa bhojaiḥ saha saṃyuktaḥ sātyakiścāndhakaiḥ saha |
bahutvānnihatau tatra ubhau kṛṣṇasya paśyataḥ || 33 ||
[Analyze grammar]

hataṃ dṛṣṭvā tu śaineyaṃ putraṃ ca yadunandanaḥ |
erakāṇāṃ tadā muṣṭiṃ kopājjagrāha keśavaḥ || 34 ||
[Analyze grammar]

tadabhūnmusalaṃ ghoraṃ vajrakalpamayomayam |
jaghāna tena kṛṣṇastānye'sya pramukhato'bhavan || 35 ||
[Analyze grammar]

tato'ndhakāśca bhojāśca śaineyā vṛṣṇayastathā |
jaghnuranyonyamākrande musalaiḥ kālacoditāḥ || 36 ||
[Analyze grammar]

yasteṣāmerakāṃ kaścijjagrāha ruṣito nṛpa |
vajrabhūteva sā rājannadṛśyata tadā vibho || 37 ||
[Analyze grammar]

tṛṇaṃ ca musalībhūtamapi tatra vyadṛśyata |
brahmadaṇḍakṛtaṃ sarvamiti tadviddhi pārthiva || 38 ||
[Analyze grammar]

āvidhyāvidhya te rājanprakṣipanti sma yattṛṇam |
tadvajrabhūtaṃ musalaṃ vyadṛśyata tadā dṛḍham || 39 ||
[Analyze grammar]

avadhītpitaraṃ putraḥ pitā putraṃ ca bhārata |
mattāḥ paripatanti sma pothayantaḥ parasparam || 40 ||
[Analyze grammar]

pataṃgā iva cāgnau te nyapatankukurāndhakāḥ |
nāsītpalāyane buddhirvadhyamānasya kasyacit || 41 ||
[Analyze grammar]

taṃ tu paśyanmahābāhurjānankālasya paryayam |
musalaṃ samavaṣṭabhya tasthau sa madhusūdanaḥ || 42 ||
[Analyze grammar]

sāmbaṃ ca nihataṃ dṛṣṭvā cārudeṣṇaṃ ca mādhavaḥ |
pradyumnaṃ cāniruddhaṃ ca tataścukrodha bhārata || 43 ||
[Analyze grammar]

gadaṃ vīkṣya śayānaṃ ca bhṛśaṃ kopasamanvitaḥ |
sa niḥśeṣaṃ tadā cakre śārṅgacakragadādharaḥ || 44 ||
[Analyze grammar]

taṃ nighnantaṃ mahātejā babhruḥ parapuraṃjayaḥ |
dārukaścaiva dāśārhamūcaturyannibodha tat || 45 ||
[Analyze grammar]

bhagavansaṃhṛtaṃ sarvaṃ tvayā bhūyiṣṭhamacyuta |
rāmasya padamanviccha tatra gacchāma yatra saḥ || 46 ||
[Analyze grammar]