Chapter 91

vaiśaṃpāyana uvāca |
śamayitvā paśūnanyānvidhivaddvijasattamāḥ |
turagaṃ taṃ yathāśāstramālabhanta dvijātayaḥ || 1 ||
[Analyze grammar]

tataḥ saṃjñāpya turagaṃ vidhivadyājakarṣabhāḥ |
upasaṃveśayanrājaṃstatastāṃ drupadātmajām |
kalābhistisṛbhī rājanyathāvidhi manasvinīm || 2 ||
[Analyze grammar]

uddhṛtya tu vapāṃ tasya yathāśāstraṃ dvijarṣabhāḥ |
śrapayāmāsuravyagrāḥ śāstravadbharatarṣabha || 3 ||
[Analyze grammar]

taṃ vapādhūmagandhaṃ tu dharmarājaḥ sahānujaḥ |
upājighradyathānyāyaṃ sarvapāpmāpahaṃ tadā || 4 ||
[Analyze grammar]

śiṣṭānyaṅgāni yānyāsaṃstasyāśvasya narādhipa |
tānyagnau juhuvurdhīrāḥ samastāḥ ṣoḍaśartvijaḥ || 5 ||
[Analyze grammar]

saṃsthāpyaivaṃ tasya rājñastaṃ kratuṃ śakratejasaḥ |
vyāsaḥ saśiṣyo bhagavānvardhayāmāsa taṃ nṛpam || 6 ||
[Analyze grammar]

tato yudhiṣṭhiraḥ prādātsadasyebhyo yathāvidhi |
koṭīsahasraṃ niṣkāṇāṃ vyāsāya tu vasuṃdharām || 7 ||
[Analyze grammar]

pratigṛhya dharāṃ rājanvyāsaḥ satyavatīsutaḥ |
abravīdbharataśreṣṭhaṃ dharmātmānaṃ yudhiṣṭhiram || 8 ||
[Analyze grammar]

pṛthivī bhavatastveṣā saṃnyastā rājasattama |
niṣkrayo dīyatāṃ mahyaṃ brāhmaṇā hi dhanārthinaḥ || 9 ||
[Analyze grammar]

yudhiṣṭhirastu tānviprānpratyuvāca mahāmanāḥ |
bhrātṛbhiḥ sahito dhīmānmadhye rājñāṃ mahātmanām || 10 ||
[Analyze grammar]

aśvamedhe mahāyajñe pṛthivī dakṣiṇā smṛtā |
arjunena jitā seyamṛtvigbhyaḥ prāpitā mayā || 11 ||
[Analyze grammar]

vanaṃ pravekṣye viprendrā vibhajadhvaṃ mahīmimām |
caturdhā pṛthivīṃ kṛtvā cāturhotrapramāṇataḥ || 12 ||
[Analyze grammar]

nāhamādātumicchāmi brahmasvaṃ munisattamāḥ |
idaṃ hi me mataṃ nityaṃ bhrātṝṇāṃ ca mamānaghāḥ || 13 ||
[Analyze grammar]

ityuktavati tasmiṃste bhrātaro draupadī ca sā |
evametaditi prāhustadabhūdromaharṣaṇam || 14 ||
[Analyze grammar]

tato'ntarikṣe vāgāsītsādhu sādhviti bhārata |
tathaiva dvijasaṃghānāṃ śaṃsatāṃ vibabhau svanaḥ || 15 ||
[Analyze grammar]

dvaipāyanastathoktastu punareva yudhiṣṭhiram |
uvāca madhye viprāṇāmidaṃ saṃpūjayanmuniḥ || 16 ||
[Analyze grammar]

dattaiṣā bhavatā mahyaṃ tāṃ te pratidadāmyaham |
hiraṇyaṃ dīyatāmebhyo dvijātibhyo dharāstu te || 17 ||
[Analyze grammar]

tato'bravīdvāsudevo dharmarājaṃ yudhiṣṭhiram |
yathāha bhagavānvyāsastathā tatkartumarhasi || 18 ||
[Analyze grammar]

ityuktaḥ sa kuruśreṣṭhaḥ prītātmā bhrātṛbhiḥ saha |
koṭikoṭikṛtāṃ prādāddakṣiṇāṃ triguṇāṃ kratoḥ || 19 ||
[Analyze grammar]

na kariṣyati talloke kaścidanyo narādhipaḥ |
yatkṛtaṃ kurusiṃhena maruttasyānukurvatā || 20 ||
[Analyze grammar]

pratigṛhya tu taddravyaṃ kṛṣṇadvaipāyanaḥ prabhuḥ |
ṛtvigbhyaḥ pradadau vidvāṃścaturdhā vyabhajaṃśca te || 21 ||
[Analyze grammar]

pṛthivyā niṣkrayaṃ dattvā taddhiraṇyaṃ yudhiṣṭhiraḥ |
dhūtapāpmā jitasvargo mumude bhrātṛbhiḥ saha || 22 ||
[Analyze grammar]

ṛtvijastamaparyantaṃ suvarṇanicayaṃ tadā |
vyabhajanta dvijātibhyo yathotsāhaṃ yathābalam || 23 ||
[Analyze grammar]

yajñavāṭe tu yatkiṃciddhiraṇyamapi bhūṣaṇam |
toraṇāni ca yūpāṃśca ghaṭāḥ pātrīstatheṣṭakāḥ |
yudhiṣṭhirābhyanujñātāḥ sarvaṃ tadvyabhajandvijāḥ || 24 ||
[Analyze grammar]

anantaraṃ brāhmaṇebhyaḥ kṣatriyā jahrire vasu |
tathā viṭśūdrasaṃghāśca tathānye mlecchajātayaḥ |
kālena mahatā jahrustatsuvarṇaṃ tatastataḥ || 25 ||
[Analyze grammar]

tataste brāhmaṇāḥ sarve muditā jagmurālayān |
tarpitā vasunā tena dharmarājñā mahātmanā || 26 ||
[Analyze grammar]

svamaṃśaṃ bhagavānvyāsaḥ kuntyai pādābhivādanāt |
pradadau tasya mahato hiraṇyasya mahādyutiḥ || 27 ||
[Analyze grammar]

śvaśurātprītidāyaṃ taṃ prāpya sā prītamānasā |
cakāra puṇyaṃ loke tu sumahāntaṃ pṛthā tadā || 28 ||
[Analyze grammar]

gatvā tvavabhṛthaṃ rājā vipāpmā bhrātṛbhiḥ saha |
sabhājyamānaḥ śuśubhe mahendro daivatairiva || 29 ||
[Analyze grammar]

pāṇḍavāśca mahīpālaiḥ sametaiḥ saṃvṛtāstadā |
aśobhanta mahārāja grahāstārāgaṇairiva || 30 ||
[Analyze grammar]

rājabhyo'pi tataḥ prādādratnāni vividhāni ca |
gajānaśvānalaṃkārānstriyo vastrāṇi kāñcanam || 31 ||
[Analyze grammar]

taddhanaughamaparyantaṃ pārthaḥ pārthivamaṇḍale |
visṛjañśuśubhe rājā yathā vaiśravaṇastathā || 32 ||
[Analyze grammar]

ānāyya ca tathā vīraṃ rājānaṃ babhruvāhanam |
pradāya vipulaṃ vittaṃ gṛhānprāsthāpayattadā || 33 ||
[Analyze grammar]

duḥśalāyāśca taṃ pautraṃ bālakaṃ pārthivarṣabha |
svarājye pitṛbhirgupte prītyā samabhiṣecayat || 34 ||
[Analyze grammar]

rājñaścaivāpi tānsarvānsuvibhaktānsupūjitān |
prasthāpayāmāsa vaśī kururājo yudhiṣṭhiraḥ || 35 ||
[Analyze grammar]

evaṃ babhūva yajñaḥ sa dharmarājasya dhīmataḥ |
bahvannadhanaratnaughaḥ surāmaireyasāgaraḥ || 36 ||
[Analyze grammar]

sarpiḥpaṅkā hradā yatra bahavaścānnaparvatāḥ |
rasālākardamāḥ kulyā babhūvurbharatarṣabha || 37 ||
[Analyze grammar]

bhakṣyaṣāṇḍavarāgāṇāṃ kriyatāṃ bhujyatāmiti |
paśūnāṃ vadhyatāṃ cāpi nāntastatra sma dṛśyate || 38 ||
[Analyze grammar]

mattonmattapramuditaṃ pragītayuvatījanam |
mṛdaṅgaśaṅkhaśabdaiśca manoramamabhūttadā || 39 ||
[Analyze grammar]

dīyatāṃ bhujyatāṃ ceti divārātramavāritam |
taṃ mahotsavasaṃkāśamatihṛṣṭajanākulam |
kathayanti sma puruṣā nānādeśanivāsinaḥ || 40 ||
[Analyze grammar]

varṣitvā dhanadhārābhiḥ kāmai ratnairdhanaistathā |
vipāpmā bharataśreṣṭhaḥ kṛtārthaḥ prāviśatpuram || 41 ||
[Analyze grammar]