Chapter 60

vaiśaṃpāyana uvāca |
kathayanneva tu tadā vāsudevaḥ pratāpavān |
mahābhāratayuddhaṃ tatkathānte pituragrataḥ || 1 ||
[Analyze grammar]

abhimanyorvadhaṃ vīraḥ so'tyakrāmata bhārata |
apriyaṃ vasudevasya mā bhūditi mahāmanāḥ || 2 ||
[Analyze grammar]

mā dauhitravadhaṃ śrutvā vasudevo mahātyayam |
duḥkhaśokābhisaṃtapto bhavediti mahāmatiḥ || 3 ||
[Analyze grammar]

subhadrā tu tamutkrāntamātmajasya vadhaṃ raṇe |
ācakṣva kṛṣṇa saubhadravadhamityapatadbhuvi || 4 ||
[Analyze grammar]

tāmapaśyannipatitāṃ vasudevaḥ kṣitau tadā |
dṛṣṭvaiva ca papātorvyāṃ so'pi duḥkhena mūrchitaḥ || 5 ||
[Analyze grammar]

tataḥ sa dauhitravadhādduḥkhaśokasamanvitaḥ |
vasudevo mahārāja kṛṣṇaṃ vākyamathābravīt || 6 ||
[Analyze grammar]

nanu tvaṃ puṇḍarīkākṣa satyavāgbhuvi viśrutaḥ |
yaddauhitravadhaṃ me'dya na khyāpayasi śatruhan || 7 ||
[Analyze grammar]

tadbhāgineyanidhanaṃ tattvenācakṣva me vibho |
sadṛśākṣastava kathaṃ śatrubhirnihato raṇe || 8 ||
[Analyze grammar]

durmaraṃ bata vārṣṇeya kāle'prāpte nṛbhiḥ sadā |
yatra me hṛdayaṃ duḥkhācchatadhā na vidīryate || 9 ||
[Analyze grammar]

kimabravīttvā saṃgrāme subhadrāṃ mātaraṃ prati |
māṃ cāpi puṇḍarīkākṣa capalākṣaḥ priyo mama || 10 ||
[Analyze grammar]

āhavaṃ pṛṣṭhataḥ kṛtvā kaccinna nihataḥ paraiḥ |
kaccinmukhaṃ na govinda tenājau vikṛtaṃ kṛtam || 11 ||
[Analyze grammar]

sa hi kṛṣṇa mahātejāḥ ślāghanniva mamāgrataḥ |
bālabhāvena vijayamātmano'kathayatprabhuḥ || 12 ||
[Analyze grammar]

kaccinna vikṛto bālo droṇakarṇakṛpādibhiḥ |
dharaṇyāṃ nihataḥ śete tanmamācakṣva keśava || 13 ||
[Analyze grammar]

sa hi droṇaṃ ca bhīṣmaṃ ca karṇaṃ ca rathināṃ varam |
spardhate sma raṇe nityaṃ duhituḥ putrako mama || 14 ||
[Analyze grammar]

evaṃvidhaṃ bahu tadā vilapantaṃ suduḥkhitam |
pitaraṃ duḥkhitataro govindo vākyamabravīt || 15 ||
[Analyze grammar]

na tena vikṛtaṃ vaktraṃ kṛtaṃ saṃgrāmamūrdhani |
na pṛṣṭhataḥ kṛtaścāpi saṃgrāmastena dustaraḥ || 16 ||
[Analyze grammar]

nihatya pṛthivīpālānsahasraśatasaṃghaśaḥ |
khedito droṇakarṇābhyāṃ dauḥśāsanivaśaṃ gataḥ || 17 ||
[Analyze grammar]

eko hyekena satataṃ yudhyamāno yadi prabho |
na sa śakyeta saṃgrāme nihantumapi vajriṇā || 18 ||
[Analyze grammar]

samāhūte tu saṃgrāme pārthe saṃśaptakaistadā |
paryavāryata saṃkruddhaiḥ sa droṇādibhirāhave || 19 ||
[Analyze grammar]

tataḥ śatrukṣayaṃ kṛtvā sumahāntaṃ raṇe pituḥ |
dauhitrastava vārṣṇeya dauḥśāsanivaśaṃ gataḥ || 20 ||
[Analyze grammar]

nūnaṃ ca sa gataḥ svargaṃ jahi śokaṃ mahāmate |
na hi vyasanamāsādya sīdante sannarāḥ kvacit || 21 ||
[Analyze grammar]

droṇakarṇaprabhṛtayo yena pratisamāsitāḥ |
raṇe mahendrapratimāḥ sa kathaṃ nāpnuyāddivam || 22 ||
[Analyze grammar]

sa śokaṃ jahi durdharṣa mā ca manyuvaśaṃ gamaḥ |
śastrapūtāṃ hi sa gatiṃ gataḥ parapuraṃjayaḥ || 23 ||
[Analyze grammar]

tasmiṃstu nihate vīre subhadreyaṃ svasā mama |
duḥkhārtātho pṛthāṃ prāpya kurarīva nanāda ha || 24 ||
[Analyze grammar]

draupadīṃ ca samāsādya paryapṛcchata duḥkhitā |
ārye kva dārakāḥ sarve draṣṭumicchāmi tānaham || 25 ||
[Analyze grammar]

asyāstu vacanaṃ śrutvā sarvāstāḥ kuruyoṣitaḥ |
bhujābhyāṃ parigṛhyaināṃ cukruśuḥ paramārtavat || 26 ||
[Analyze grammar]

uttarāṃ cābravīdbhadrā bhadre bhartā kva te gataḥ |
kṣipramāgamanaṃ mahyaṃ tasmai tvaṃ vedayasva ha || 27 ||
[Analyze grammar]

nanu nāma sa vairāṭi śrutvā mama giraṃ purā |
bhavanānniṣpatatyāśu kasmānnābhyeti te patiḥ || 28 ||
[Analyze grammar]

abhimanyo kuśalino mātulāste mahārathāḥ |
kuśalaṃ cābruvansarve tvāṃ yuyutsumihāgatam || 29 ||
[Analyze grammar]

ācakṣva me'dya saṃgrāmaṃ yathāpūrvamariṃdama |
kasmādeva vilapatīṃ nādyeha pratibhāṣase || 30 ||
[Analyze grammar]

evamādi tu vārṣṇeyyāstadasyāḥ paridevitam |
śrutvā pṛthā suduḥkhārtā śanairvākyamathābravīt || 31 ||
[Analyze grammar]

subhadre vāsudevena tathā sātyakinā raṇe |
pitrā ca pālito bālaḥ sa hataḥ kāladharmaṇā || 32 ||
[Analyze grammar]

īdṛśo martyadharmo'yaṃ mā śuco yadunandini |
putro hi tava durdharṣaḥ saṃprāptaḥ paramāṃ gatim || 33 ||
[Analyze grammar]

kule mahati jātāsi kṣatriyāṇāṃ mahātmanām |
mā śucaścapalākṣaṃ tvaṃ puṇḍarīkanibhekṣaṇe || 34 ||
[Analyze grammar]

uttarāṃ tvamavekṣasva garbhiṇīṃ mā śucaḥ śubhe |
putrameṣā hi tasyāśu janayiṣyati bhāminī || 35 ||
[Analyze grammar]

evamāśvāsayitvaināṃ kuntī yadukulodvaha |
vihāya śokaṃ durdharṣaṃ śrāddhamasya hyakalpayat || 36 ||
[Analyze grammar]

samanujñāpya dharmajñā rājānaṃ bhīmameva ca |
yamau yamopamau caiva dadau dānānyanekaśaḥ || 37 ||
[Analyze grammar]

tataḥ pradāya bahvīrgā brāhmaṇebhyo yadūdvaha |
samahṛṣyata vārṣṇeyī vairāṭīṃ cābravīdidam || 38 ||
[Analyze grammar]

vairāṭi neha saṃtāpastvayā kāryo yaśasvini |
bhartāraṃ prati suśroṇi garbhasthaṃ rakṣa me śiśum || 39 ||
[Analyze grammar]

evamuktvā tataḥ kuntī virarāma mahādyute |
tāmanujñāpya caivemāṃ subhadrāṃ samupānayam || 40 ||
[Analyze grammar]

evaṃ sa nidhanaṃ prāpto dauhitrastava mādhava |
saṃtāpaṃ jahi durdharṣa mā ca śoke manaḥ kṛthāḥ || 41 ||
[Analyze grammar]