Chapter 57

vaiśaṃpāyana uvāca |
sa mitrasahamāsādya tvabhijñānamayācata |
tasmai dadāvabhijñānaṃ sa cekṣvākuvarastadā || 1 ||
[Analyze grammar]

saudāsa uvāca |
na caivaiṣā gatiḥ kṣemyā na cānyā vidyate gatiḥ |
etanme matamājñāya prayaccha maṇikuṇḍale || 2 ||
[Analyze grammar]

vaiśaṃpāyana uvāca |
ityuktastāmuttaṅkastu bharturvākyamathābravīt |
śrutvā ca sā tataḥ prādāttasmai te maṇikuṇḍale || 3 ||
[Analyze grammar]

avāpya kuṇḍale te tu rājānaṃ punarabravīt |
kimetadguhyavacanaṃ śrotumicchāmi pārthiva || 4 ||
[Analyze grammar]

saudāsa uvāca |
prajā nisargādviprānvai kṣatriyāḥ pūjayanti ha |
viprebhyaścāpi bahavo doṣāḥ prādurbhavanti naḥ || 5 ||
[Analyze grammar]

so'haṃ dvijebhyaḥ praṇato viprāddoṣamavāptavān |
gatimanyāṃ na paśyāmi madayantīsahāyavān |
svargadvārasya gamane sthāne ceha dvijottama || 6 ||
[Analyze grammar]

na hi rājñā viśeṣeṇa viruddhena dvijātibhiḥ |
śakyaṃ nṛloke saṃsthātuṃ pretya vā sukhamedhitum || 7 ||
[Analyze grammar]

tadiṣṭe te mayaivaite datte sve maṇikuṇḍale |
yaḥ kṛtaste'dya samayaḥ saphalaṃ taṃ kuruṣva me || 8 ||
[Analyze grammar]

uttaṅka uvāca |
rājaṃstatheha kartāsmi punareṣyāmi te vaśam |
praśnaṃ tu kaṃcitpraṣṭuṃ tvāṃ vyavasiṣye paraṃtapa || 9 ||
[Analyze grammar]

saudāsa uvāca |
brūhi vipra yathākāmaṃ prativaktāsmi te vacaḥ |
chettāsmi saṃśayaṃ te'dya na me'trāsti vicāraṇā || 10 ||
[Analyze grammar]

uttaṅka uvāca |
prāhurvāksaṃgataṃ mitraṃ dharmanaipuṇyadarśinaḥ |
mitreṣu yaśca viṣamaḥ stena ityeva taṃ viduḥ || 11 ||
[Analyze grammar]

sa bhavānmitratāmadya saṃprāpto mama pārthiva |
sa me buddhiṃ prayacchasva samāṃ buddhimatāṃ vara || 12 ||
[Analyze grammar]

avāptārtho'hamadyeha bhavāṃśca puruṣādakaḥ |
bhavatsakāśamāgantuṃ kṣamaṃ mama na veti vā || 13 ||
[Analyze grammar]

saudāsa uvāca |
kṣamaṃ cediha vaktavyaṃ mayā dvijavarottama |
matsamīpaṃ dvijaśreṣṭha nāgantavyaṃ kathaṃcana || 14 ||
[Analyze grammar]

evaṃ tava prapaśyāmi śreyo bhṛgukulodvaha |
āgacchato hi te vipra bhavenmṛtyurasaṃśayam || 15 ||
[Analyze grammar]

vaiśaṃpāyana uvāca |
ityuktaḥ sa tadā rājñā kṣamaṃ buddhimatā hitam |
samanujñāpya rājānamahalyāṃ prati jagmivān || 16 ||
[Analyze grammar]

gṛhītvā kuṇḍale divye gurupatnyāḥ priyaṃkaraḥ |
javena mahatā prāyādgautamasyāśramaṃ prati || 17 ||
[Analyze grammar]

yathā tayo rakṣaṇaṃ ca madayantyābhibhāṣitam |
tathā te kuṇḍale baddhvā tathā kṛṣṇājine'nayat || 18 ||
[Analyze grammar]

sa kasmiṃścitkṣudhāviṣṭaḥ phalabhārasamanvitam |
bilvaṃ dadarśa kasmiṃścidāruroha kṣudhānvitaḥ || 19 ||
[Analyze grammar]

śākhāsvāsajya tasyaiva kṛṣṇājinamariṃdama |
yasmiṃste kuṇḍale baddhe tadā dvijavareṇa vai || 20 ||
[Analyze grammar]

viśīrṇabandhane tasmingate kṛṣṇājine mahīm |
apaśyadbhujagaḥ kaścitte tatra maṇikuṇḍale || 21 ||
[Analyze grammar]

airāvatakulotpannaḥ śīghro bhūtvā tadā sa vai |
vidaśyāsyena valmīkaṃ viveśātha sa kuṇḍale || 22 ||
[Analyze grammar]

hriyamāṇe tu dṛṣṭvā sa kuṇḍale bhujagena ha |
papāta vṛkṣātsodvego duḥkhātparamakopanaḥ || 23 ||
[Analyze grammar]

sa daṇḍakāṣṭhamādāya valmīkamakhanattadā |
krodhāmarṣābhitaptāṅgastato vai dvijapuṃgavaḥ || 24 ||
[Analyze grammar]

tasya vegamasahyaṃ tamasahantī vasuṃdharā |
daṇḍakāṣṭhābhinunnāṅgī cacāla bhṛśamāturā || 25 ||
[Analyze grammar]

tataḥ khanata evātha viprarṣerdharaṇītalam |
nāgalokasya panthānaṃ kartukāmasya niścayāt || 26 ||
[Analyze grammar]

rathena hariyuktena taṃ deśamupajagmivān |
vajrapāṇirmahātejā dadarśa ca dvijottamam || 27 ||
[Analyze grammar]

sa tu taṃ brāhmaṇo bhūtvā tasya duḥkhena duḥkhitaḥ |
uttaṅkamabravīttāta naitacchakyaṃ tvayeti vai || 28 ||
[Analyze grammar]

ito hi nāgaloko vai yojanāni sahasraśaḥ |
na daṇḍakāṣṭhasādhyaṃ ca manye kāryamidaṃ tava || 29 ||
[Analyze grammar]

uttaṅka uvāca |
nāgaloke yadi brahmanna śakye kuṇḍale mayā |
prāptuṃ prāṇānvimokṣyāmi paśyataste dvijottama || 30 ||
[Analyze grammar]

yadā sa nāśakattasya niścayaṃ kartumanyathā |
vajrapāṇistadā daṇḍaṃ vajrāstreṇa yuyoja ha || 31 ||
[Analyze grammar]

tato vajraprahāraistairdāryamāṇā vasuṃdharā |
nāgalokasya panthānamakarojjanamejaya || 32 ||
[Analyze grammar]

sa tena mārgeṇa tadā nāgalokaṃ viveśa ha |
dadarśa nāgalokaṃ ca yojanāni sahasraśaḥ || 33 ||
[Analyze grammar]

prākāranicayairdivyairmaṇimuktābhyalaṃkṛtaiḥ |
upapannaṃ mahābhāga śātakumbhamayaistathā || 34 ||
[Analyze grammar]

vāpīḥ sphaṭikasopānā nadīśca vimalodakāḥ |
dadarśa vṛkṣāṃśca bahūnnānādvijagaṇāyutān || 35 ||
[Analyze grammar]

tasya lokasya ca dvāraṃ dadarśa sa bhṛgūdvahaḥ |
pañcayojanavistāramāyataṃ śatayojanam || 36 ||
[Analyze grammar]

nāgalokamuttaṅkastu prekṣya dīno'bhavattadā |
nirāśaścābhavattāta kuṇḍalāharaṇe punaḥ || 37 ||
[Analyze grammar]

tatra provāca turagastaṃ kṛṣṇaśvetavāladhiḥ |
tāmrāsyanetraḥ kauravya prajvalanniva tejasā || 38 ||
[Analyze grammar]

dhamasvāpānametanme tatastvaṃ vipra lapsyase |
airāvatasuteneha tavānīte hi kuṇḍale || 39 ||
[Analyze grammar]

mā jugupsāṃ kṛthāḥ putra tvamatrārthe kathaṃcana |
tvayaitaddhi samācīrṇaṃ gautamasyāśrame tadā || 40 ||
[Analyze grammar]

uttaṅka uvāca |
kathaṃ bhavantaṃ jānīyāmupādhyāyāśramaṃ prati |
yanmayā cīrṇapūrvaṃ ca śrotumicchāmi taddhyaham || 41 ||
[Analyze grammar]

aśva uvāca |
gurorguruṃ māṃ jānīhi jvalitaṃ jātavedasam |
tvayā hyahaṃ sadā vatsa gurorarthe'bhipūjitaḥ || 42 ||
[Analyze grammar]

satataṃ pūjito vipra śucinā bhṛgunandana |
tasmācchreyo vidhāsyāmi tavaivaṃ kuru mā ciram || 43 ||
[Analyze grammar]

ityuktaḥ sa tathākārṣīduttaṅkaścitrabhānunā |
ghṛtārciḥ prītimāṃścāpi prajajvāla didhakṣayā || 44 ||
[Analyze grammar]

tato'sya romakūpebhyo dhmāyamānasya bhārata |
ghanaḥ prādurabhūddhūmo nāgalokabhayāvahaḥ || 45 ||
[Analyze grammar]

tena dhūmena sahasā vardhamānena bhārata |
nāgaloke mahārāja na prajñāyata kiṃcana || 46 ||
[Analyze grammar]

hāhākṛtamabhūtsarvamairāvataniveśanam |
vāsukipramukhānāṃ ca nāgānāṃ janamejaya || 47 ||
[Analyze grammar]

na prakāśanta veśmāni dhūmaruddhāni bhārata |
nīhārasaṃvṛtānīva vanāni girayastathā || 48 ||
[Analyze grammar]

te dhūmaraktanayanā vahnitejobhitāpitāḥ |
ājagmurniścayaṃ jñātuṃ bhārgavasyātitejasaḥ || 49 ||
[Analyze grammar]

śrutvā ca niścayaṃ tasya maharṣestigmatejasaḥ |
saṃbhrāntamanasaḥ sarve pūjāṃ cakruryathāvidhi || 50 ||
[Analyze grammar]

sarve prāñjalayo nāgā vṛddhabālapurogamāḥ |
śirobhiḥ praṇipatyocuḥ prasīda bhagavanniti || 51 ||
[Analyze grammar]

prasādya brāhmaṇaṃ te tu pādyamarghyaṃ nivedya ca |
prāyacchankuṇḍale divye pannagāḥ paramārcite || 52 ||
[Analyze grammar]

tataḥ saṃpūjito nāgaistatrottaṅkaḥ pratāpavān |
agniṃ pradakṣiṇaṃ kṛtvā jagāma gurusadma tat || 53 ||
[Analyze grammar]

sa gatvā tvarito rājangautamasya niveśanam |
prāyacchatkuṇḍale divye gurupatnyai tadānagha || 54 ||
[Analyze grammar]

evaṃ mahātmanā tena trīṃllokāñjanamejaya |
parikramyāhṛte divye tataste maṇikuṇḍale || 55 ||
[Analyze grammar]

evaṃprabhāvaḥ sa muniruttaṅko bharatarṣabha |
pareṇa tapasā yukto yanmāṃ tvaṃ paripṛcchasi || 56 ||
[Analyze grammar]