Chapter 51

vaiśaṃpāyana uvāca |
tato'bhyacodayatkṛṣṇo yujyatāmiti dārukam |
muhūrtādiva cācaṣṭa yuktamityeva dārukaḥ || 1 ||
[Analyze grammar]

tathaiva cānuyātrāṇi codayāmāsa pāṇḍavaḥ |
sajjayadhvaṃ prayāsyāmo nagaraṃ gajasāhvayam || 2 ||
[Analyze grammar]

ityuktāḥ sainikāste tu sajjībhūtā viśāṃ pate |
ācakhyuḥ sajjamityeva pārthāyāmitatejase || 3 ||
[Analyze grammar]

tatastau rathamāsthāya prayātau kṛṣṇapāṇḍavau |
vikurvāṇau kathāścitrāḥ prīyamāṇau viśāṃ pate || 4 ||
[Analyze grammar]

rathasthaṃ tu mahātejā vāsudevaṃ dhanaṃjayaḥ |
punarevābravīdvākyamidaṃ bharatasattama || 5 ||
[Analyze grammar]

tvatprasādājjayaḥ prāpto rājñā vṛṣṇikulodvaha |
nihatāḥ śatravaścāpi prāptaṃ rājyamakaṇṭakam || 6 ||
[Analyze grammar]

nāthavantaśca bhavatā pāṇḍavā madhusūdana |
bhavantaṃ plavamāsādya tīrṇāḥ sma kurusāgaram || 7 ||
[Analyze grammar]

viśvakarmannamaste'stu viśvātmanviśvasaṃbhava |
yathāhaṃ tvā vijānāmi yathā cāhaṃ bhavanmanāḥ || 8 ||
[Analyze grammar]

tvattejaḥsaṃbhavo nityaṃ hutāśo madhusūdana |
ratiḥ krīḍāmayī tubhyaṃ māyā te rodasī vibho || 9 ||
[Analyze grammar]

tvayi sarvamidaṃ viśvaṃ yadidaṃ sthāṇujaṅgamam |
tvaṃ hi sarvaṃ vikuruṣe bhūtagrāmaṃ sanātanam || 10 ||
[Analyze grammar]

pṛthivīṃ cāntarikṣaṃ ca tathā sthāvarajaṅgamam |
hasitaṃ te'malā jyotsnā ṛtavaścendriyānvayāḥ || 11 ||
[Analyze grammar]

prāṇo vāyuḥ satatagaḥ krodho mṛtyuḥ sanātanaḥ |
prasāde cāpi padmā śrīrnityaṃ tvayi mahāmate || 12 ||
[Analyze grammar]

ratistuṣṭirdhṛtiḥ kṣāntistvayi cedaṃ carācaram |
tvameveha yugānteṣu nidhanaṃ procyase'nagha || 13 ||
[Analyze grammar]

sudīrgheṇāpi kālena na te śakyā guṇā mayā |
ātmā ca paramo vaktuṃ namaste nalinekṣaṇa || 14 ||
[Analyze grammar]

vidito me'si durdharṣa nāradāddevalāttathā |
kṛṣṇadvaipāyanāccaiva tathā kurupitāmahāt || 15 ||
[Analyze grammar]

tvayi sarvaṃ samāsaktaṃ tvamevaiko janeśvaraḥ |
yaccānugrahasaṃyuktametaduktaṃ tvayānagha || 16 ||
[Analyze grammar]

etatsarvamahaṃ samyagācariṣye janārdana |
idaṃ cādbhutamatyarthaṃ kṛtamasmatpriyepsayā || 17 ||
[Analyze grammar]

yatpāpo nihataḥ saṃkhye kauravyo dhṛtarāṣṭrajaḥ |
tvayā dagdhaṃ hi tatsainyaṃ mayā vijitamāhave || 18 ||
[Analyze grammar]

bhavatā tatkṛtaṃ karma yenāvāpto jayo mayā |
duryodhanasya saṃgrāme tava buddhiparākramaiḥ || 19 ||
[Analyze grammar]

karṇasya ca vadhopāyo yathāvatsaṃpradarśitaḥ |
saindhavasya ca pāpasya bhūriśravasa eva ca || 20 ||
[Analyze grammar]

ahaṃ ca prīyamāṇena tvayā devakinandana |
yaduktastatkariṣyāmi na hi me'tra vicāraṇā || 21 ||
[Analyze grammar]

rājānaṃ ca samāsādya dharmātmānaṃ yudhiṣṭhiram |
codayiṣyāmi dharmajña gamanārthaṃ tavānagha || 22 ||
[Analyze grammar]

rucitaṃ hi mamaitatte dvārakāgamanaṃ prabho |
acirāccaiva dṛṣṭā tvaṃ mātulaṃ madhusūdana |
baladevaṃ ca durdharṣaṃ tathānyānvṛṣṇipuṃgavān || 23 ||
[Analyze grammar]

evaṃ saṃbhāṣamāṇau tau prāptau vāraṇasāhvayam |
tathā viviśatuścobhau saṃprahṛṣṭanarākulam || 24 ||
[Analyze grammar]

tau gatvā dhṛtarāṣṭrasya gṛhaṃ śakragṛhopamam |
dadṛśāte mahārāja dhṛtarāṣṭraṃ janeśvaram || 25 ||
[Analyze grammar]

viduraṃ ca mahābuddhiṃ rājānaṃ ca yudhiṣṭhiram |
bhīmasenaṃ ca durdharṣaṃ mādrīputrau ca pāṇḍavau |
dhṛtarāṣṭramupāsīnaṃ yuyutsuṃ cāparājitam || 26 ||
[Analyze grammar]

gāndhārīṃ ca mahāprājñāṃ pṛthāṃ kṛṣṇāṃ ca bhāminīm |
subhadrādyāśca tāḥ sarvā bharatānāṃ striyastathā |
dadṛśāte sthitāḥ sarvā gāndhārīṃ parivārya vai || 27 ||
[Analyze grammar]

tataḥ sametya rājānaṃ dhṛtarāṣṭramariṃdamau |
nivedya nāmadheye sve tasya pādāvagṛhṇatām || 28 ||
[Analyze grammar]

gāndhāryāśca pṛthāyāśca dharmarājñastathaiva ca |
bhīmasya ca mahātmānau tathā pādāvagṛhṇatām || 29 ||
[Analyze grammar]

kṣattāraṃ cāpi saṃpūjya pṛṣṭvā kuśalamavyayam |
taiḥ sārdhaṃ nṛpatiṃ vṛddhaṃ tatastaṃ paryupāsatām || 30 ||
[Analyze grammar]

tato niśi mahārāja dhṛtarāṣṭraḥ kurūdvahān |
janārdanaṃ ca medhāvī vyasarjayata vai gṛhān || 31 ||
[Analyze grammar]

te'nujñātā nṛpatinā yayuḥ svaṃ svaṃ niveśanam |
dhanaṃjayagṛhāneva yayau kṛṣṇastu vīryavān || 32 ||
[Analyze grammar]

tatrārcito yathānyāyaṃ sarvakāmairupasthitaḥ |
kṛṣṇaḥ suṣvāpa medhāvī dhanaṃjayasahāyavān || 33 ||
[Analyze grammar]

prabhātāyāṃ tu śarvaryāṃ kṛtapūrvāhṇikakriyau |
dharmarājasya bhavanaṃ jagmatuḥ paramārcitau |
yatrāste sa sahāmātyo dharmarājo mahāmanāḥ || 34 ||
[Analyze grammar]

tatastau tatpraviśyātha dadṛśāte mahābalau |
dharmarājānamāsīnaṃ devarājamivāśvinau || 35 ||
[Analyze grammar]

tau samāsādya rājānaṃ vārṣṇeyakurupuṃgavau |
niṣīdaturanujñātau prīyamāṇena tena vai || 36 ||
[Analyze grammar]

tataḥ sa rājā medhāvī vivakṣū prekṣya tāvubhau |
provāca vadatāṃ śreṣṭho vacanaṃ rājasattamaḥ || 37 ||
[Analyze grammar]

vivakṣū hi yuvāṃ manye vīrau yadukurūdvahau |
brūta kartāsmi sarvaṃ vāṃ na cirānmā vicāryatām || 38 ||
[Analyze grammar]

ityukte phalgunastatra dharmarājānamabravīt |
vinītavadupāgamya vākyaṃ vākyaviśāradaḥ || 39 ||
[Analyze grammar]

ayaṃ ciroṣito rājanvāsudevaḥ pratāpavān |
bhavantaṃ samanujñāpya pitaraṃ draṣṭumicchati || 40 ||
[Analyze grammar]

sa gacchedabhyanujñāto bhavatā yadi manyase |
ānartanagarīṃ vīrastadanujñātumarhasi || 41 ||
[Analyze grammar]

yudhiṣṭhira uvāca |
puṇḍarīkākṣa bhadraṃ te gaccha tvaṃ madhusūdana |
purīṃ dvāravatīmadya draṣṭuṃ śūrasutaṃ prabhum || 42 ||
[Analyze grammar]

rocate me mahābāho gamanaṃ tava keśava |
mātulaściradṛṣṭo me tvayā devī ca devakī || 43 ||
[Analyze grammar]

mātulaṃ vasudevaṃ tvaṃ baladevaṃ ca mādhava |
pūjayethā mahāprājña madvākyena yathārhataḥ || 44 ||
[Analyze grammar]

smarethāścāpi māṃ nityaṃ bhīmaṃ ca balināṃ varam |
phalgunaṃ nakulaṃ caiva sahadevaṃ ca mādhava || 45 ||
[Analyze grammar]

ānartānavalokya tvaṃ pitaraṃ ca mahābhuja |
vṛṣṇīṃśca punarāgaccherhayamedhe mamānagha || 46 ||
[Analyze grammar]

sa gaccha ratnānyādāya vividhāni vasūni ca |
yaccāpyanyanmanojñaṃ te tadapyādatsva sātvata || 47 ||
[Analyze grammar]

iyaṃ hi vasudhā sarvā prasādāttava mādhava |
asmānupagatā vīra nihatāścāpi śatravaḥ || 48 ||
[Analyze grammar]

evaṃ bruvati kauravye dharmarāje yudhiṣṭhire |
vāsudevo varaḥ puṃsāmidaṃ vacanamabravīt || 49 ||
[Analyze grammar]

tavaiva ratnāni dhanaṃ ca kevalamdharā ca kṛtsnā tu mahābhujādya vai |
yadasti cānyaddraviṇaṃ gṛheṣu me tvameva tasyeśvara nityamīśvaraḥ || 50 ||
[Analyze grammar]

tathetyathoktaḥ pratipūjitastadā gadāgrajo dharmasutena vīryavān |
pitṛṣvasāmabhyavadadyathāvidhi saṃpūjitaścāpyagamatpradakṣiṇam || 51 ||
[Analyze grammar]

tayā sa samyakpratinanditastadā tathaiva sarvairvidurādibhistataḥ |
viniryayau nāgapurādgadāgrajo rathena divyena caturyujā hariḥ || 52 ||
[Analyze grammar]

rathaṃ subhadrāmadhiropya bhāminīṃ yudhiṣṭhirasyānumate janārdanaḥ |
pitṛṣvasāyāśca tathā mahābhujo viniryayau paurajanābhisaṃvṛtaḥ || 53 ||
[Analyze grammar]

tamanvagādvānaravaryaketanaḥ sasātyakirmādravatīsutāvapi |
agādhabuddhirviduraśca mādhavaṃ svayaṃ ca bhīmo gajarājavikramaḥ || 54 ||
[Analyze grammar]

nivartayitvā kururāṣṭravardhanāṃstataḥ sa sarvānviduraṃ ca vīryavān |
janārdano dārukamāha satvaraḥ pracodayāśvāniti sātyakistadā || 55 ||
[Analyze grammar]

tato yayau śatrugaṇapramardanaḥ śinipravīrānugato janārdanaḥ |
yathā nihatyārigaṇāñśatakraturdivaṃ tathānartapurīṃ pratāpavān || 56 ||
[Analyze grammar]