Chapter 50

brahmovāca |
bhūtānāmatha pañcānāṃ yathaiṣāmīśvaraṃ manaḥ |
niyame ca visarge ca bhūtātmā mana eva ca || 1 ||
[Analyze grammar]

adhiṣṭhātā mano nityaṃ bhūtānāṃ mahatāṃ tathā |
buddhiraiśvaryamācaṣṭe kṣetrajñaḥ sarva ucyate || 2 ||
[Analyze grammar]

indriyāṇi mano yuṅkte sadaśvāniva sārathiḥ |
indriyāṇi mano buddhiṃ kṣetrajño yuñjate sadā || 3 ||
[Analyze grammar]

mahābhūtasamāyuktaṃ buddhisaṃyamanaṃ ratham |
tamāruhya sa bhūtātmā samantātparidhāvati || 4 ||
[Analyze grammar]

indriyagrāmasaṃyukto manaḥsārathireva ca |
buddhisaṃyamano nityaṃ mahānbrahmamayo rathaḥ || 5 ||
[Analyze grammar]

evaṃ yo vetti vidvānvai sadā brahmamayaṃ ratham |
sa dhīraḥ sarvalokeṣu na mohamadhigacchati || 6 ||
[Analyze grammar]

avyaktādi viśeṣāntaṃ trasasthāvarasaṃkulam |
candrasūryaprabhālokaṃ grahanakṣatramaṇḍitam || 7 ||
[Analyze grammar]

nadīparvatajālaiśca sarvataḥ paribhūṣitam |
vividhābhistathādbhiśca satataṃ samalaṃkṛtam || 8 ||
[Analyze grammar]

ājīvaḥ sarvabhūtānāṃ sarvaprāṇabhṛtāṃ gatiḥ |
etadbrahmavanaṃ nityaṃ yasmiṃścarati kṣetravit || 9 ||
[Analyze grammar]

loke'sminyāni bhūtāni sthāvarāṇi carāṇi ca |
tānyevāgre pralīyante paścādbhūtakṛtā guṇāḥ |
guṇebhyaḥ pañcabhūtāni eṣa bhūtasamucchrayaḥ || 10 ||
[Analyze grammar]

devā manuṣyā gandharvāḥ piśācāsurarākṣasāḥ |
sarve svabhāvataḥ sṛṣṭā na kriyābhyo na kāraṇāt || 11 ||
[Analyze grammar]

ete viśvakṛto viprā jāyante ha punaḥ punaḥ |
tebhyaḥ prasūtāsteṣveva mahābhūteṣu pañcasu |
pralīyante yathākālamūrmayaḥ sāgare yathā || 12 ||
[Analyze grammar]

viśvasṛgbhyastu bhūtebhyo mahābhūtāni gacchati |
bhūtebhyaścāpi pañcabhyo mukto gacchetprajāpatim || 13 ||
[Analyze grammar]

prajāpatiridaṃ sarvaṃ tapasaivāsṛjatprabhuḥ |
tathaiva vedānṛṣayastapasā pratipedire || 14 ||
[Analyze grammar]

tapasaścānupūrvyeṇa phalamūlāśinastathā |
trailokyaṃ tapasā siddhāḥ paśyantīha samāhitāḥ || 15 ||
[Analyze grammar]

oṣadhānyagadādīnī nānāvidyāśca sarvaśaḥ |
tapasaiva prasidhyanti tapomūlaṃ hi sādhanam || 16 ||
[Analyze grammar]

yaddurāpaṃ durāmnāyaṃ durādharṣaṃ duranvayam |
tatsarvaṃ tapasā sādhyaṃ tapo hi duratikramam || 17 ||
[Analyze grammar]

surāpo brahmahā steyī bhrūṇahā gurutalpagaḥ |
tapasaiva sutaptena mucyante kilbiṣāttataḥ || 18 ||
[Analyze grammar]

manuṣyāḥ pitaro devāḥ paśavo mṛgapakṣiṇaḥ |
yāni cānyāni bhūtāni trasāni sthāvarāṇi ca || 19 ||
[Analyze grammar]

tapaḥparāyaṇā nityaṃ sidhyante tapasā sadā |
tathaiva tapasā devā mahābhāgā divaṃ gatāḥ || 20 ||
[Analyze grammar]

āśīryuktāni karmāṇi kurvate ye tvatandritāḥ |
ahaṃkārasamāyuktāste sakāśe prajāpateḥ || 21 ||
[Analyze grammar]

dhyānayogena śuddhena nirmamā nirahaṃkṛtāḥ |
prāpnuvanti mahātmāno mahāntaṃ lokamuttamam || 22 ||
[Analyze grammar]

dhyānayogādupāgamya prasannamatayaḥ sadā |
sukhopacayamavyaktaṃ praviśantyātmavattayā || 23 ||
[Analyze grammar]

dhyānayogādupāgamya nirmamā nirahaṃkṛtāḥ |
avyaktaṃ praviśantīha mahāntaṃ lokamuttamam || 24 ||
[Analyze grammar]

avyaktādeva saṃbhūtaḥ samayajño gataḥ punaḥ |
tamorajobhyāṃ nirmuktaḥ sattvamāsthāya kevalam || 25 ||
[Analyze grammar]

vimuktaḥ sarvapāpebhyaḥ sarvaṃ tyajati niṣkalaḥ |
kṣetrajña iti taṃ vidyādyastaṃ veda sa vedavit || 26 ||
[Analyze grammar]

cittaṃ cittādupāgamya munirāsīta saṃyataḥ |
yaccittastanmanā bhūtvā guhyametatsanātanam || 27 ||
[Analyze grammar]

avyaktādi viśeṣāntamavidyālakṣaṇaṃ smṛtam |
nibodhata yathā hīdaṃ guṇairlakṣaṇamityuta || 28 ||
[Analyze grammar]

dvyakṣarastu bhavenmṛtyustryakṣaraṃ brahma śāśvatam |
mameti ca bhavenmṛtyurna mameti ca śāśvatam || 29 ||
[Analyze grammar]

karma kecitpraśaṃsanti mandabuddhitarā narāḥ |
ye tu buddhā mahātmāno na praśaṃsanti karma te || 30 ||
[Analyze grammar]

karmaṇā jāyate janturmūrtimānṣoḍaśātmakaḥ |
puruṣaṃ sṛjate'vidyā agrāhyamamṛtāśinam || 31 ||
[Analyze grammar]

tasmātkarmasu niḥsnehā ye kecitpāradarśinaḥ |
vidyāmayo'yaṃ puruṣo na tu karmamayaḥ smṛtaḥ || 32 ||
[Analyze grammar]

apūrvamamṛtaṃ nityaṃ ya enamavicāriṇam |
ya enaṃ vindate''tmānamagrāhyamamṛtāśinam |
agrāhyo'mṛto bhavati ya ebhiḥ kāraṇairdhruvaḥ || 33 ||
[Analyze grammar]

apohya sarvasaṃkalpānsaṃyamyātmānamātmani |
sa tadbrahma śubhaṃ vetti yasmādbhūyo na vidyate || 34 ||
[Analyze grammar]

prasādenaiva sattvasya prasādaṃ samavāpnuyāt |
lakṣaṇaṃ hi prasādasya yathā syātsvapnadarśanam || 35 ||
[Analyze grammar]

gatireṣā tu muktānāṃ ye jñānapariniṣṭhitāḥ |
pravṛttayaśca yāḥ sarvāḥ paśyanti pariṇāmajāḥ || 36 ||
[Analyze grammar]

eṣā gatirasaktānāmeṣa dharmaḥ sanātanaḥ |
eṣā jñānavatāṃ prāptiretadvṛttamaninditam || 37 ||
[Analyze grammar]

samena sarvabhūteṣu niḥspṛheṇa nirāśiṣā |
śakyā gatiriyaṃ gantuṃ sarvatra samadarśinā || 38 ||
[Analyze grammar]

etadvaḥ sarvamākhyātaṃ mayā viprarṣisattamāḥ |
evamācarata kṣipraṃ tataḥ siddhimavāpsyatha || 39 ||
[Analyze grammar]

gururuvāca |
ityuktāste tu munayo brahmaṇā guruṇā tathā |
kṛtavanto mahātmānastato lokānavāpnuvan || 40 ||
[Analyze grammar]

tvamapyetanmahābhāga yathoktaṃ brahmaṇo vacaḥ |
samyagācara śuddhātmaṃstataḥ siddhimavāpsyasi || 41 ||
[Analyze grammar]

vāsudeva uvāca |
ityuktaḥ sa tadā śiṣyo guruṇā dharmamuttamam |
cakāra sarvaṃ kaunteya tato mokṣamavāptavān || 42 ||
[Analyze grammar]

kṛtakṛtyaśca sa tadā śiṣyaḥ kurukulodvaha |
tatpadaṃ samanuprāpto yatra gatvā na śocati || 43 ||
[Analyze grammar]

arjuna uvāca |
ko nvasau brāhmaṇaḥ kṛṣṇa kaśca śiṣyo janārdana |
śrotavyaṃ cenmayaitadvai tattvamācakṣva me vibho || 44 ||
[Analyze grammar]

vāsudeva uvāca |
ahaṃ gururmahābāho manaḥ śiṣyaṃ ca viddhi me |
tvatprītyā guhyametacca kathitaṃ me dhanaṃjaya || 45 ||
[Analyze grammar]

mayi cedasti te prītirnityaṃ kurukulodvaha |
adhyātmametacchrutvā tvaṃ samyagācara suvrata || 46 ||
[Analyze grammar]

tatastvaṃ samyagācīrṇe dharme'sminkurunandana |
sarvapāpaviśuddhātmā mokṣaṃ prāpsyasi kevalam || 47 ||
[Analyze grammar]

pūrvamapyetadevoktaṃ yuddhakāla upasthite |
mayā tava mahābāho tasmādatra manaḥ kuru || 48 ||
[Analyze grammar]

mayā tu bharataśreṣṭha ciradṛṣṭaḥ pitā vibho |
tamahaṃ draṣṭumicchāmi saṃmate tava phalguna || 49 ||
[Analyze grammar]

vaiśaṃpāyana uvāca |
ityuktavacanaṃ kṛṣṇaṃ pratyuvāca dhanaṃjayaḥ |
gacchāvo nagaraṃ kṛṣṇa gajasāhvayamadya vai || 50 ||
[Analyze grammar]

sametya tatra rājānaṃ dharmātmānaṃ yudhiṣṭhiram |
samanujñāpya durdharṣaṃ svāṃ purīṃ yātumarhasi || 51 ||
[Analyze grammar]