Chapter 42

brahmovāca |
ahaṃkārātprasūtāni mahābhūtāni pañca vai |
pṛthivī vāyurākāśamāpo jyotiśca pañcamam || 1 ||
[Analyze grammar]

teṣu bhūtāni muhyante mahābhūteṣu pañcasu |
śabdasparśanarūpeṣu rasagandhakriyāsu ca || 2 ||
[Analyze grammar]

mahābhūtavināśānte pralaye pratyupasthite |
sarvaprāṇabhṛtāṃ dhīrā mahadutpadyate bhayam || 3 ||
[Analyze grammar]

yadyasmājjāyate bhūtaṃ tatra tatpravilīyate |
līyante pratilomāni jāyante cottarottaram || 4 ||
[Analyze grammar]

tataḥ pralīne sarvasminbhūte sthāvarajaṅgame |
smṛtimantastadā dhīrā na līyante kadācana || 5 ||
[Analyze grammar]

śabdaḥ sparśastathā rūpaṃ raso gandhaśca pañcamaḥ |
kriyākāraṇayuktāḥ syuranityā mohasaṃjñitāḥ || 6 ||
[Analyze grammar]

lobhaprajanasaṃyuktā nirviśeṣā hyakiṃcanāḥ |
māṃsaśoṇitasaṃghātā anyonyasyopajīvinaḥ || 7 ||
[Analyze grammar]

bahirātmāna ityete dīnāḥ kṛpaṇavṛttayaḥ |
prāṇāpānāvudānaśca samāno vyāna eva ca || 8 ||
[Analyze grammar]

antarātmeti cāpyete niyatāḥ pañca vāyavaḥ |
vāṅmanobuddhirityebhiḥ sārdhamaṣṭātmakaṃ jagat || 9 ||
[Analyze grammar]

tvagghrāṇaśrotracakṣūṃṣi rasanaṃ vākca saṃyatā |
viśuddhaṃ ca mano yasya buddhiścāvyabhicāriṇī || 10 ||
[Analyze grammar]

aṣṭau yasyāgnayo hyete na dahante manaḥ sadā |
sa tadbrahma śubhaṃ yāti yasmādbhūyo na vidyate || 11 ||
[Analyze grammar]

ekādaśa ca yānyāhurindriyāṇi viśeṣataḥ |
ahaṃkāraprasūtāni tāni vakṣyāmyahaṃ dvijāḥ || 12 ||
[Analyze grammar]

śrotraṃ tvakcakṣuṣī jihvā nāsikā caiva pañcamī |
pādau pāyurupasthaṃ ca hastau vāgdaśamī bhavet || 13 ||
[Analyze grammar]

indriyagrāma ityeṣa mana ekādaśaṃ bhavet |
etaṃ grāmaṃ jayetpūrvaṃ tato brahma prakāśate || 14 ||
[Analyze grammar]

buddhīndriyāṇi pañcāhuḥ pañca karmendriyāṇi ca |
śrotrādīnyapi pañcāhurbuddhiyuktāni tattvataḥ || 15 ||
[Analyze grammar]

aviśeṣāṇi cānyāni karmayuktāni tāni tu |
ubhayatra mano jñeyaṃ buddhirdvādaśamī bhavet || 16 ||
[Analyze grammar]

ityuktānīndriyāṇīmānyekādaśa mayā kramāt |
manyante kṛtamityeva viditvaitāni paṇḍitāḥ || 17 ||
[Analyze grammar]

trīṇi sthānāni bhūtānāṃ caturthaṃ nopapadyate |
sthalamāpastathākāśaṃ janma cāpi caturvidham || 18 ||
[Analyze grammar]

aṇḍajodbhijjasaṃsvedajarāyujamathāpi ca |
caturdhā janma ityetadbhūtagrāmasya lakṣyate || 19 ||
[Analyze grammar]

acarāṇyapi bhūtāni khecarāṇi tathaiva ca |
aṇḍajāni vijānīyātsarvāṃścaiva sarīsṛpān || 20 ||
[Analyze grammar]

saṃsvedāḥ kṛmayaḥ proktā jantavaśca tathāvidhāḥ |
janma dvitīyamityetajjaghanyataramucyate || 21 ||
[Analyze grammar]

bhittvā tu pṛthivīṃ yāni jāyante kālaparyayāt |
udbhijjānīti tānyāhurbhūtāni dvijasattamāḥ || 22 ||
[Analyze grammar]

dvipādabahupādāni tiryaggatimatīni ca |
jarāyujāni bhūtāni vitta tānyapi sattamāḥ || 23 ||
[Analyze grammar]

dvividhāpīha vijñeyā brahmayoniḥ sanātanā |
tapaḥ karma ca yatpuṇyamityeṣa viduṣāṃ nayaḥ || 24 ||
[Analyze grammar]

dvividhaṃ karma vijñeyamijyā dānaṃ ca yanmakhe |
jātasyādhyayanaṃ puṇyamiti vṛddhānuśāsanam || 25 ||
[Analyze grammar]

etadyo veda vidhivatsa muktaḥ syāddvijarṣabhāḥ |
vimuktaḥ sarvapāpebhya iti caiva nibodhata || 26 ||
[Analyze grammar]

ākāśaṃ prathamaṃ bhūtaṃ śrotramadhyātmamucyate |
adhibhūtaṃ tathā śabdo diśastatrādhidaivatam || 27 ||
[Analyze grammar]

dvitīyaṃ māruto bhūtaṃ tvagadhyātmaṃ ca viśrutam |
spraṣṭavyamadhibhūtaṃ ca vidyuttatrādhidaivatam || 28 ||
[Analyze grammar]

tṛtīyaṃ jyotirityāhuścakṣuradhyātmamucyate |
adhibhūtaṃ tato rūpaṃ sūryastatrādhidaivatam || 29 ||
[Analyze grammar]

caturthamāpo vijñeyaṃ jihvā cādhyātmamiṣyate |
adhibhūtaṃ rasaścātra somastatrādhidaivatam || 30 ||
[Analyze grammar]

pṛthivī pañcamaṃ bhūtaṃ ghrāṇaścādhyātmamiṣyate |
adhibhūtaṃ tathā gandho vāyustatrādhidaivatam || 31 ||
[Analyze grammar]

eṣa pañcasu bhūteṣu catuṣṭayavidhiḥ smṛtaḥ |
ataḥ paraṃ pravakṣyāmi sarvaṃ trividhamindriyam || 32 ||
[Analyze grammar]

pādāvadhyātmamityāhurbrāhmaṇāstattvadarśinaḥ |
adhibhūtaṃ tu gantavyaṃ viṣṇustatrādhidaivatam || 33 ||
[Analyze grammar]

avāggatirapānaśca pāyuradhyātmamiṣyate |
adhibhūtaṃ visargaśca mitrastatrādhidaivatam || 34 ||
[Analyze grammar]

prajanaḥ sarvabhūtānāmupastho'dhyātmamucyate |
adhibhūtaṃ tathā śukraṃ daivataṃ ca prajāpatiḥ || 35 ||
[Analyze grammar]

hastāvadhyātmamityāhuradhyātmaviduṣo janāḥ |
adhibhūtaṃ tu karmāṇi śakrastatrādhidaivatam || 36 ||
[Analyze grammar]

vaiśvadevī manaḥpūrvā vāgadhyātmamihocyate |
vaktavyamadhibhūtaṃ ca vahnistatrādhidaivatam || 37 ||
[Analyze grammar]

adhyātmaṃ mana ityāhuḥ pañcabhūtānucārakam |
adhibhūtaṃ ca mantavyaṃ candramāścādhidaivatam || 38 ||
[Analyze grammar]

adhyātmaṃ buddhirityāhuḥ ṣaḍindriyavicāriṇī |
adhibhūtaṃ tu vijñeyaṃ brahmā tatrādhidaivatam || 39 ||
[Analyze grammar]

yathāvadadhyātmavidhireṣa vaḥ kīrtito mayā |
jñānamasya hi dharmajñāḥ prāptaṃ buddhimatāmiha || 40 ||
[Analyze grammar]

indriyāṇīndriyārthāśca mahābhūtāni pañca ca |
sarvāṇyetāni saṃdhāya manasā saṃpradhārayet || 41 ||
[Analyze grammar]

kṣīṇe manasi sarvasminna janmasukhamiṣyate |
jñānasaṃpannasattvānāṃ tatsukhaṃ viduṣāṃ matam || 42 ||
[Analyze grammar]

ataḥ paraṃ pravakṣyāmi sūkṣmabhāvakarīṃ śivām |
nivṛttiṃ sarvabhūteṣu mṛdunā dāruṇena vā || 43 ||
[Analyze grammar]

guṇāguṇamanāsaṅgamekacaryamanantaram |
etadbrāhmaṇato vṛttamāhurekapadaṃ sukham || 44 ||
[Analyze grammar]

vidvānkūrma ivāṅgāni kāmānsaṃhṛtya sarvaśaḥ |
virajāḥ sarvato mukto yo naraḥ sa sukhī sadā || 45 ||
[Analyze grammar]

kāmānātmani saṃyamya kṣīṇatṛṣṇaḥ samāhitaḥ |
sarvabhūtasuhṛnmaitro brahmabhūyaṃ sa gacchati || 46 ||
[Analyze grammar]

indriyāṇāṃ nirodhena sarveṣāṃ viṣayaiṣiṇām |
munerjanapadatyāgādadhyātmāgniḥ samidhyate || 47 ||
[Analyze grammar]

yathāgnirindhanairiddho mahājyotiḥ prakāśate |
tathendriyanirodhena mahānātmā prakāśate || 48 ||
[Analyze grammar]

yadā paśyati bhūtāni prasannātmātmano hṛdi |
svayaṃyonistadā sūkṣmātsūkṣmamāpnotyanuttamam || 49 ||
[Analyze grammar]

agnī rūpaṃ payaḥ sroto vāyuḥ sparśanameva ca |
mahī paṅkadharaṃ ghoramākāśaṃ śravaṇaṃ tathā || 50 ||
[Analyze grammar]

rāgaśokasamāviṣṭaṃ pañcasrotaḥsamāvṛtam |
pañcabhūtasamāyuktaṃ navadvāraṃ dvidaivatam || 51 ||
[Analyze grammar]

rajasvalamathādṛśyaṃ triguṇaṃ ca tridhātukam |
saṃsargābhirataṃ mūḍhaṃ śarīramiti dhāraṇā || 52 ||
[Analyze grammar]

duścaraṃ jīvaloke'sminsattvaṃ prati samāśritam |
etadeva hi loke'sminkālacakraṃ pravartate || 53 ||
[Analyze grammar]

etanmahārṇavaṃ ghoramagādhaṃ mohasaṃjñitam |
visṛjetsaṃkṣipeccaiva bodhayetsāmaraṃ jagat || 54 ||
[Analyze grammar]

kāmakrodhau bhayaṃ mohamabhidrohamathānṛtam |
indriyāṇāṃ nirodhena sa tāṃstyajati dustyajān || 55 ||
[Analyze grammar]

yasyaite nirjitā loke triguṇāḥ pañca dhātavaḥ |
vyomni tasya paraṃ sthānamanantamatha lakṣyate || 56 ||
[Analyze grammar]

kāmakūlāmapārāntāṃ manaḥsrotobhayāvahām |
nadīṃ durgahradāṃ tīrṇaḥ kāmakrodhāvubhau jayet || 57 ||
[Analyze grammar]

sa sarvadoṣanirmuktastataḥ paśyati yatparam |
mano manasi saṃdhāya paśyatyātmānamātmani || 58 ||
[Analyze grammar]

sarvavitsarvabhūteṣu vīkṣatyātmānamātmani |
ekadhā bahudhā caiva vikurvāṇastatastataḥ || 59 ||
[Analyze grammar]

dhruvaṃ paśyati rūpāṇi dīpāddīpaśataṃ yathā |
sa vai viṣṇuśca mitraśca varuṇo'gniḥ prajāpatiḥ || 60 ||
[Analyze grammar]

sa hi dhātā vidhātā ca sa prabhuḥ sarvatomukhaḥ |
hṛdayaṃ sarvabhūtānāṃ mahānātmā prakāśate || 61 ||
[Analyze grammar]

taṃ viprasaṃghāśca surāsurāśca yakṣāḥ piśācāḥ pitaro vayāṃsi |
rakṣogaṇā bhūtagaṇāśca sarve maharṣayaścaiva sadā stuvanti || 62 ||
[Analyze grammar]