Chapter 19

brāhmaṇa uvāca |
yaḥ syādekāyane līnastūṣṇīṃ kiṃcidacintayan |
pūrvaṃ pūrvaṃ parityajya sa nirārambhako bhavet || 1 ||
[Analyze grammar]

sarvamitraḥ sarvasahaḥ samarakto jitendriyaḥ |
vyapetabhayamanyuśca kāmahā mucyate naraḥ || 2 ||
[Analyze grammar]

ātmavatsarvabhūteṣu yaścarenniyataḥ śuciḥ |
amānī nirabhīmānaḥ sarvato mukta eva saḥ || 3 ||
[Analyze grammar]

jīvitaṃ maraṇaṃ cobhe sukhaduḥkhe tathaiva ca |
lābhālābhe priyadveṣye yaḥ samaḥ sa ca mucyate || 4 ||
[Analyze grammar]

na kasyacitspṛhayate nāvajānāti kiṃcana |
nirdvaṃdvo vītarāgātmā sarvato mukta eva saḥ || 5 ||
[Analyze grammar]

anamitro'tha nirbandhuranapatyaśca yaḥ kvacit |
tyaktadharmārthakāmaśca nirākāṅkṣī sa mucyate || 6 ||
[Analyze grammar]

naiva dharmī na cādharmī pūrvopacitahā ca yaḥ |
dhātukṣayapraśāntātmā nirdvaṃdvaḥ sa vimucyate || 7 ||
[Analyze grammar]

akarmā cāvikāṅkṣaśca paśyañjagadaśāśvatam |
asvasthamavaśaṃ nityaṃ janmasaṃsāramohitam || 8 ||
[Analyze grammar]

vairāgyabuddhiḥ satataṃ tāpadoṣavyapekṣakaḥ |
ātmabandhavinirmokṣaṃ sa karotyacirādiva || 9 ||
[Analyze grammar]

agandharasamasparśamaśabdamaparigraham |
arūpamanabhijñeyaṃ dṛṣṭvātmānaṃ vimucyate || 10 ||
[Analyze grammar]

pañcabhūtaguṇairhīnamamūrtimadalepakam |
aguṇaṃ guṇabhoktāraṃ yaḥ paśyati sa mucyate || 11 ||
[Analyze grammar]

vihāya sarvasaṃkalpānbuddhyā śārīramānasān |
śanairnirvāṇamāpnoti nirindhana ivānalaḥ || 12 ||
[Analyze grammar]

vimuktaḥ sarvasaṃskāraistato brahma sanātanam |
paramāpnoti saṃśāntamacalaṃ divyamakṣaram || 13 ||
[Analyze grammar]

ataḥ paraṃ pravakṣyāmi yogaśāstramanuttamam |
yajjñātvā siddhamātmānaṃ loke paśyanti yoginaḥ || 14 ||
[Analyze grammar]

tasyopadeśaṃ paśyāmi yathāvattannibodha me |
yairdvāraiścārayannityaṃ paśyatyātmānamātmani || 15 ||
[Analyze grammar]

indriyāṇi tu saṃhṛtya mana ātmani dhārayet |
tīvraṃ taptvā tapaḥ pūrvaṃ tato yoktumupakramet || 16 ||
[Analyze grammar]

tapasvī tyaktasaṃkalpo dambhāhaṃkāravarjitaḥ |
manīṣī manasā vipraḥ paśyatyātmānamātmani || 17 ||
[Analyze grammar]

sa cecchaknotyayaṃ sādhuryoktumātmānamātmani |
tata ekāntaśīlaḥ sa paśyatyātmānamātmani || 18 ||
[Analyze grammar]

saṃyataḥ satataṃ yukta ātmavānvijitendriyaḥ |
tathāyamātmanātmānaṃ sādhu yuktaḥ prapaśyati || 19 ||
[Analyze grammar]

yathā hi puruṣaḥ svapne dṛṣṭvā paśyatyasāviti |
tathārūpamivātmānaṃ sādhu yuktaḥ prapaśyati || 20 ||
[Analyze grammar]

iṣīkāṃ vā yathā muñjātkaścinnirhṛtya darśayet |
yogī niṣkṛṣṭamātmānaṃ tathā saṃpaśyate tanau || 21 ||
[Analyze grammar]

muñjaṃ śarīraṃ tasyāhuriṣīkāmātmani śritām |
etannidarśanaṃ proktaṃ yogavidbhiranuttamam || 22 ||
[Analyze grammar]

yadā hi yuktamātmānaṃ samyakpaśyati dehabhṛt |
tadāsya neśate kaścittrailokyasyāpi yaḥ prabhuḥ || 23 ||
[Analyze grammar]

anyonyāścaiva tanavo yatheṣṭaṃ pratipadyate |
vinivṛtya jarāmṛtyū na hṛṣyati na śocati || 24 ||
[Analyze grammar]

devānāmapi devatvaṃ yuktaḥ kārayate vaśī |
brahma cāvyayamāpnoti hitvā dehamaśāśvatam || 25 ||
[Analyze grammar]

vinaśyatsvapi lokeṣu na bhayaṃ tasya jāyate |
kliśyamāneṣu bhūteṣu na sa kliśyati kenacit || 26 ||
[Analyze grammar]

duḥkhaśokamayairghoraiḥ saṅgasnehasamudbhavaiḥ |
na vicālyeta yuktātmā niḥspṛhaḥ śāntamānasaḥ || 27 ||
[Analyze grammar]

nainaṃ śastrāṇi vidhyante na mṛtyuścāsya vidyate |
nātaḥ sukhataraṃ kiṃcilloke kvacana vidyate || 28 ||
[Analyze grammar]

samyagyuktvā yadātmānamātmanyeva prapaśyati |
tadaiva na spṛhayate sākṣādapi śatakratoḥ || 29 ||
[Analyze grammar]

nirvedastu na gantavyo yuñjānena kathaṃcana |
yogamekāntaśīlastu yathā yuñjīta tacchṛṇu || 30 ||
[Analyze grammar]

dṛṣṭapūrvāṃ diśaṃ cintya yasminsaṃnivasetpure |
purasyābhyantare tasya manaścāryaṃ na bāhyataḥ || 31 ||
[Analyze grammar]

purasyābhyantare tiṣṭhanyasminnāvasathe vaset |
tasminnāvasathe dhāryaṃ sabāhyābhyantaraṃ manaḥ || 32 ||
[Analyze grammar]

pracintyāvasathaṃ kṛtsnaṃ yasminkāye'vatiṣṭhate |
tasminkāye manaścāryaṃ na kathaṃcana bāhyataḥ || 33 ||
[Analyze grammar]

saṃniyamyendriyagrāmaṃ nirghoṣe nirjane vane |
kāyamabhyantaraṃ kṛtsnamekāgraḥ paricintayet || 34 ||
[Analyze grammar]

dantāṃstālu ca jihvāṃ ca galaṃ grīvāṃ tathaiva ca |
hṛdayaṃ cintayeccāpi tathā hṛdayabandhanam || 35 ||
[Analyze grammar]

ityuktaḥ sa mayā śiṣyo medhāvī madhusūdana |
papraccha punarevemaṃ mokṣadharmaṃ sudurvacam || 36 ||
[Analyze grammar]

bhuktaṃ bhuktaṃ kathamidamannaṃ koṣṭhe vipacyate |
kathaṃ rasatvaṃ vrajati śoṇitaṃ jāyate katham |
tathā māṃsaṃ ca medaśca snāyvasthīni ca poṣati || 37 ||
[Analyze grammar]

kathametāni sarvāṇi śarīrāṇi śarīriṇām |
vardhante vardhamānasya vardhate ca kathaṃ balam |
nirojasāṃ niṣkramaṇaṃ malānāṃ ca pṛthakpṛthak || 38 ||
[Analyze grammar]

kuto vāyaṃ praśvasiti ucchvasityapi vā punaḥ |
kaṃ ca deśamadhiṣṭhāya tiṣṭhatyātmāyamātmani || 39 ||
[Analyze grammar]

jīvaḥ kāyaṃ vahati cecceṣṭayānaḥ kalevaram |
kiṃvarṇaṃ kīdṛśaṃ caiva niveśayati vai manaḥ |
yāthātathyena bhagavanvaktumarhasi me'nagha || 40 ||
[Analyze grammar]

iti saṃparipṛṣṭo'haṃ tena vipreṇa mādhava |
pratyabruvaṃ mahābāho yathāśrutamariṃdama || 41 ||
[Analyze grammar]

yathā svakoṣṭhe prakṣipya koṣṭhaṃ bhāṇḍamanā bhavet |
tathā svakāye prakṣipya mano dvārairaniścalaiḥ |
ātmānaṃ tatra mārgeta pramādaṃ parivarjayet || 42 ||
[Analyze grammar]

evaṃ satatamudyuktaḥ prītātmā nacirādiva |
āsādayati tadbrahma yaddṛṣṭvā syātpradhānavit || 43 ||
[Analyze grammar]

na tvasau cakṣuṣā grāhyo na ca sarvairapīndriyaiḥ |
manasaiva pradīpena mahānātmani dṛśyate || 44 ||
[Analyze grammar]

sarvataḥpāṇipādaṃ taṃ sarvatokṣiśiromukham |
jīvo niṣkrāntamātmānaṃ śarīrātsaṃprapaśyati || 45 ||
[Analyze grammar]

sa tadutsṛjya dehaṃ svaṃ dhārayanbrahma kevalam |
ātmānamālokayati manasā prahasanniva || 46 ||
[Analyze grammar]

idaṃ sarvarahasyaṃ te mayoktaṃ dvijasattama |
āpṛcche sādhayiṣyāmi gaccha śiṣya yathāsukham || 47 ||
[Analyze grammar]

ityuktaḥ sa tadā kṛṣṇa mayā śiṣyo mahātapāḥ |
agacchata yathākāmaṃ brāhmaṇaśchinnasaṃśayaḥ || 48 ||
[Analyze grammar]

vāsudeva uvāca |
ityuktvā sa tadā vākyaṃ māṃ pārtha dvijapuṃgavaḥ |
mokṣadharmāśritaḥ samyaktatraivāntaradhīyata || 49 ||
[Analyze grammar]

kaccidetattvayā pārtha śrutamekāgracetasā |
tadāpi hi rathasthastvaṃ śrutavānetadeva hi || 50 ||
[Analyze grammar]

naitatpārtha suvijñeyaṃ vyāmiśreṇeti me matiḥ |
nareṇākṛtasaṃjñena vidagdhenākṛtātmanā || 51 ||
[Analyze grammar]

surahasyamidaṃ proktaṃ devānāṃ bharatarṣabha |
kaccinnedaṃ śrutaṃ pārtha martyenānyena kenacit || 52 ||
[Analyze grammar]

na hyetacchrotumarho'nyo manuṣyastvāmṛte'nagha |
naitadadya suvijñeyaṃ vyāmiśreṇāntarātmanā || 53 ||
[Analyze grammar]

kriyāvadbhirhi kaunteya devalokaḥ samāvṛtaḥ |
na caitadiṣṭaṃ devānāṃ martyai rūpanivartanam || 54 ||
[Analyze grammar]

parā hi sā gatiḥ pārtha yattadbrahma sanātanam |
yatrāmṛtatvaṃ prāpnoti tyaktvā duḥkhaṃ sadā sukhī || 55 ||
[Analyze grammar]

evaṃ hi dharmamāsthāya ye'pi syuḥ pāpayonayaḥ |
striyo vaiśyāstathā śūdrāste'pi yānti parāṃ gatim || 56 ||
[Analyze grammar]

kiṃ punarbrāhmaṇāḥ pārtha kṣatriyā vā bahuśrutāḥ |
svadharmaratayo nityaṃ brahmalokaparāyaṇāḥ || 57 ||
[Analyze grammar]

hetumaccaitaduddiṣṭamupāyāścāsya sādhane |
siddheḥ phalaṃ ca mokṣaśca duḥkhasya ca vinirṇayaḥ |
ataḥ paraṃ sukhaṃ tvanyatkiṃ nu syādbharatarṣabha || 58 ||
[Analyze grammar]

śrutavāñśraddadhānaśca parākrāntaśca pāṇḍava |
yaḥ parityajate martyo lokatantramasāravat |
etairupāyaiḥ sa kṣipraṃ parāṃ gatimavāpnuyāt || 59 ||
[Analyze grammar]

etāvadeva vaktavyaṃ nāto bhūyo'sti kiṃcana |
ṣaṇmāsānnityayuktasya yogaḥ pārtha pravartate || 60 ||
[Analyze grammar]