Chapter 17

vāsudeva uvāca |
tatastasyopasaṃgṛhya pādau praśnānsudurvacān |
papraccha tāṃśca sarvānsa prāha dharmabhṛtāṃ varaḥ || 1 ||
[Analyze grammar]

kāśyapa uvāca |
kathaṃ śarīraṃ cyavate kathaṃ caivopapadyate |
kathaṃ kaṣṭācca saṃsārātsaṃsaranparimucyate || 2 ||
[Analyze grammar]

ātmānaṃ vā kathaṃ yuktvā taccharīraṃ vimuñcati |
śarīrataśca nirmuktaḥ kathamanyatprapadyate || 3 ||
[Analyze grammar]

kathaṃ śubhāśubhe cāyaṃ karmaṇī svakṛte naraḥ |
upabhuṅkte kva vā karma videhasyopatiṣṭhati || 4 ||
[Analyze grammar]

brāhmaṇa uvāca |
evaṃ saṃcoditaḥ siddhaḥ praśnāṃstānpratyabhāṣata |
ānupūrvyeṇa vārṣṇeya yathā tanme vacaḥ śṛṇu || 5 ||
[Analyze grammar]

siddha uvāca |
āyuḥkīrtikarāṇīha yāni karmāṇi sevate |
śarīragrahaṇe'nyasmiṃsteṣu kṣīṇeṣu sarvaśaḥ || 6 ||
[Analyze grammar]

āyuḥkṣayaparītātmā viparītāni sevate |
buddhirvyāvartate cāsya vināśe pratyupasthite || 7 ||
[Analyze grammar]

sattvaṃ balaṃ ca kālaṃ cāpyaviditvātmanastathā |
ativelamupāśnāti tairviruddhānyanātmavān || 8 ||
[Analyze grammar]

yadāyamatikaṣṭāni sarvāṇyupaniṣevate |
atyarthamapi vā bhuṅkte na vā bhuṅkte kadācana || 9 ||
[Analyze grammar]

duṣṭānnaṃ viṣamānnaṃ ca so'nyonyena virodhi ca |
guru vāpi samaṃ bhuṅkte nātijīrṇe'pi vā punaḥ || 10 ||
[Analyze grammar]

vyāyāmamatimātraṃ vā vyavāyaṃ copasevate |
satataṃ karmalobhādvā prāptaṃ vegavidhāraṇam || 11 ||
[Analyze grammar]

rasātiyuktamannaṃ vā divāsvapnaṃ niṣevate |
apakvānāgate kāle svayaṃ doṣānprakopayan || 12 ||
[Analyze grammar]

svadoṣakopanādrogaṃ labhate maraṇāntikam |
atha codbandhanādīni parītāni vyavasyati || 13 ||
[Analyze grammar]

tasya taiḥ kāraṇairjantoḥ śarīrāccyavate yathā |
jīvitaṃ procyamānaṃ tadyathāvadupadhāraya || 14 ||
[Analyze grammar]

ūṣmā prakupitaḥ kāye tīvravāyusamīritaḥ |
śarīramanuparyeti sarvānprāṇānruṇaddhi vai || 15 ||
[Analyze grammar]

atyarthaṃ balavānūṣmā śarīre parikopitaḥ |
bhinatti jīvasthānāni tāni marmāṇi viddhi ca || 16 ||
[Analyze grammar]

tataḥ savedanaḥ sadyo jīvaḥ pracyavate kṣaran |
śarīraṃ tyajate jantuśchidyamāneṣu marmasu |
vedanābhiḥ parītātmā tadviddhi dvijasattama || 17 ||
[Analyze grammar]

jātīmaraṇasaṃvignāḥ satataṃ sarvajantavaḥ |
dṛśyante saṃtyajantaśca śarīrāṇi dvijarṣabha || 18 ||
[Analyze grammar]

garbhasaṃkramaṇe cāpi marmaṇāmatisarpaṇe |
tādṛśīmeva labhate vedanāṃ mānavaḥ punaḥ || 19 ||
[Analyze grammar]

bhinnasaṃdhiratha kledamadbhiḥ sa labhate naraḥ |
yathā pañcasu bhūteṣu saṃśritatvaṃ nigacchati |
śaityātprakupitaḥ kāye tīvravāyusamīritaḥ || 20 ||
[Analyze grammar]

yaḥ sa pañcasu bhūteṣu prāṇāpāne vyavasthitaḥ |
sa gacchatyūrdhvago vāyuḥ kṛcchrānmuktvā śarīriṇam || 21 ||
[Analyze grammar]

śarīraṃ ca jahātyeva nirucchvāsaśca dṛśyate |
nirūṣmā sa nirucchvāso niḥśrīko gatacetanaḥ || 22 ||
[Analyze grammar]

brahmaṇā saṃparityakto mṛta ityucyate naraḥ |
srotobhiryairvijānāti indriyārthāñśarīrabhṛt |
taireva na vijānāti prāṇamāhārasaṃbhavam || 23 ||
[Analyze grammar]

tatraiva kurute kāye yaḥ sa jīvaḥ sanātanaḥ |
teṣāṃ yadyadbhavedyuktaṃ saṃnipāte kvacitkvacit |
tattanmarma vijānīhi śāstradṛṣṭaṃ hi tattathā || 24 ||
[Analyze grammar]

teṣu marmasu bhinneṣu tataḥ sa samudīrayan |
āviśya hṛdayaṃ jantoḥ sattvaṃ cāśu ruṇaddhi vai |
tataḥ sa cetano janturnābhijānāti kiṃcana || 25 ||
[Analyze grammar]

tamasā saṃvṛtajñānaḥ saṃvṛteṣvatha marmasu |
sa jīvo niradhiṣṭhānaścāvyate mātariśvanā || 26 ||
[Analyze grammar]

tataḥ sa taṃ mahocchvāsaṃ bhṛśamucchvasya dāruṇam |
niṣkrāmankampayatyāśu taccharīramacetanam || 27 ||
[Analyze grammar]

sa jīvaḥ pracyutaḥ kāyātkarmabhiḥ svaiḥ samāvṛtaḥ |
aṅkitaḥ svaiḥ śubhaiḥ puṇyaiḥ pāpairvāpyupapadyate || 28 ||
[Analyze grammar]

brāhmaṇā jñānasaṃpannā yathāvacchrutaniścayāḥ |
itaraṃ kṛtapuṇyaṃ vā taṃ vijānanti lakṣaṇaiḥ || 29 ||
[Analyze grammar]

yathāndhakāre khadyotaṃ līyamānaṃ tatastataḥ |
cakṣuṣmantaḥ prapaśyanti tathā taṃ jñānacakṣuṣaḥ || 30 ||
[Analyze grammar]

paśyantyevaṃvidhāḥ siddhā jīvaṃ divyena cakṣuṣā |
cyavantaṃ jāyamānaṃ ca yoniṃ cānupraveśitam || 31 ||
[Analyze grammar]

tasya sthānāni dṛṣṭāni trividhānīha śāstrataḥ |
karmabhūmiriyaṃ bhūmiryatra tiṣṭhanti jantavaḥ || 32 ||
[Analyze grammar]

tataḥ śubhāśubhaṃ kṛtvā labhante sarvadehinaḥ |
ihaivoccāvacānbhogānprāpnuvanti svakarmabhiḥ || 33 ||
[Analyze grammar]

ihaivāśubhakarmā tu karmabhirnirayaṃ gataḥ |
avāksa niraye pāpo mānavaḥ pacyate bhṛśam |
tasmātsudurlabho mokṣa ātmā rakṣyo bhṛśaṃ tataḥ || 34 ||
[Analyze grammar]

ūrdhvaṃ tu jantavo gatvā yeṣu sthāneṣvavasthitāḥ |
kīrtyamānāni tānīha tattvataḥ saṃnibodha me |
tacchrutvā naiṣṭhikīṃ buddhiṃ budhyethāḥ karmaniścayāt || 35 ||
[Analyze grammar]

tārārūpāṇi sarvāṇi yaccaitaccandramaṇḍalam |
yacca vibhrājate loke svabhāsā sūryamaṇḍalam |
sthānānyetāni jānīhi narāṇāṃ puṇyakarmaṇām || 36 ||
[Analyze grammar]

karmakṣayācca te sarve cyavante vai punaḥ punaḥ |
tatrāpi ca viśeṣo'sti divi nīcoccamadhyamaḥ || 37 ||
[Analyze grammar]

na tatrāpyasti saṃtoṣo dṛṣṭvā dīptatarāṃ śriyam |
ityetā gatayaḥ sarvāḥ pṛthaktve samudīritāḥ || 38 ||
[Analyze grammar]

upapattiṃ tu garbhasya vakṣyāmyahamataḥ param |
yathāvattāṃ nigadataḥ śṛṇuṣvāvahito dvija || 39 ||
[Analyze grammar]