Chapter 16

janamejaya uvāca |
sabhāyāṃ vasatostasyāṃ nihatyārīnmahātmanoḥ |
keśavārjunayoḥ kā nu kathā samabhavaddvija || 1 ||
[Analyze grammar]

vaiśaṃpāyana uvāca |
kṛṣṇena sahitaḥ pārthaḥ svarājyaṃ prāpya kevalam |
tasyāṃ sabhāyāṃ ramyāyāṃ vijahāra mudā yutaḥ || 2 ||
[Analyze grammar]

tataḥ kaṃcitsabhoddeśaṃ svargoddeśasamaṃ nṛpa |
yadṛcchayā tau muditau jagmatuḥ svajanāvṛtau || 3 ||
[Analyze grammar]

tataḥ pratītaḥ kṛṣṇena sahitaḥ pāṇḍavo'rjunaḥ |
nirīkṣya tāṃ sabhāṃ ramyāmidaṃ vacanamabravīt || 4 ||
[Analyze grammar]

viditaṃ te mahābāho saṃgrāme samupasthite |
māhātmyaṃ devakīmātastacca te rūpamaiśvaram || 5 ||
[Analyze grammar]

yattu tadbhavatā proktaṃ tadā keśava sauhṛdāt |
tatsarvaṃ puruṣavyāghra naṣṭaṃ me naṣṭacetasaḥ || 6 ||
[Analyze grammar]

mama kautūhalaṃ tvasti teṣvartheṣu punaḥ prabho |
bhavāṃśca dvārakāṃ gantā nacirādiva mādhava || 7 ||
[Analyze grammar]

evamuktastataḥ kṛṣṇaḥ phalgunaṃ pratyabhāṣata |
pariṣvajya mahātejā vacanaṃ vadatāṃ varaḥ || 8 ||
[Analyze grammar]

śrāvitastvaṃ mayā guhyaṃ jñāpitaśca sanātanam |
dharmaṃ svarūpiṇaṃ pārtha sarvalokāṃśca śāśvatān || 9 ||
[Analyze grammar]

abuddhvā yanna gṛhṇīthāstanme sumahadapriyam |
nūnamaśraddadhāno'si durmedhāścāsi pāṇḍava || 10 ||
[Analyze grammar]

sa hi dharmaḥ suparyāpto brahmaṇaḥ padavedane |
na śakyaṃ tanmayā bhūyastathā vaktumaśeṣataḥ || 11 ||
[Analyze grammar]

paraṃ hi brahma kathitaṃ yogayuktena tanmayā |
itihāsaṃ tu vakṣyāmi tasminnarthe purātanam || 12 ||
[Analyze grammar]

yathā tāṃ buddhimāsthāya gatimagryāṃ gamiṣyasi |
śṛṇu dharmabhṛtāṃ śreṣṭha gadataḥ sarvameva me || 13 ||
[Analyze grammar]

āgacchadbrāhmaṇaḥ kaścitsvargalokādariṃdama |
brahmalokācca durdharṣaḥ so'smābhiḥ pūjito'bhavat || 14 ||
[Analyze grammar]

asmābhiḥ paripṛṣṭaśca yadāha bharatarṣabha |
divyena vidhinā pārtha tacchṛṇuṣvāvicārayan || 15 ||
[Analyze grammar]

brāhmaṇa uvāca |
mokṣadharmaṃ samāśritya kṛṣṇa yanmānupṛcchasi |
bhūtānāmanukampārthaṃ yanmohacchedanaṃ prabho || 16 ||
[Analyze grammar]

tatte'haṃ saṃpravakṣyāmi yathāvanmadhusūdana |
śṛṇuṣvāvahito bhūtvā gadato mama mādhava || 17 ||
[Analyze grammar]

kaścidviprastapoyuktaḥ kāśyapo dharmavittamaḥ |
āsasāda dvijaṃ kaṃciddharmāṇāmāgatāgamam || 18 ||
[Analyze grammar]

gatāgate subahuśo jñānavijñānapāragam |
lokatattvārthakuśalaṃ jñātāraṃ sukhaduḥkhayoḥ || 19 ||
[Analyze grammar]

jātīmaraṇatattvajñaṃ kovidaṃ puṇyapāpayoḥ |
draṣṭāramuccanīcānāṃ karmabhirdehināṃ gatim || 20 ||
[Analyze grammar]

carantaṃ muktavatsiddhaṃ praśāntaṃ saṃyatendriyam |
dīpyamānaṃ śriyā brāhmyā kramamāṇaṃ ca sarvaśaḥ || 21 ||
[Analyze grammar]

antardhānagatijñaṃ ca śrutvā tattvena kāśyapaḥ |
tathaivāntarhitaiḥ siddhairyāntaṃ cakradharaiḥ saha || 22 ||
[Analyze grammar]

saṃbhāṣamāṇamekānte samāsīnaṃ ca taiḥ saha |
yadṛcchayā ca gacchantamasaktaṃ pavanaṃ yathā || 23 ||
[Analyze grammar]

taṃ samāsādya medhāvī sa tadā dvijasattamaḥ |
caraṇau dharmakāmo vai tapasvī susamāhitaḥ |
pratipede yathānyāyaṃ bhaktyā paramayā yutaḥ || 24 ||
[Analyze grammar]

vismitaścādbhutaṃ dṛṣṭvā kāśyapastaṃ dvijottamam |
paricāreṇa mahatā guruṃ vaidyamatoṣayat || 25 ||
[Analyze grammar]

prītātmā copapannaśca śrutacāritrasaṃyutaḥ |
bhāvena toṣayaccainaṃ guruvṛttyā paraṃtapaḥ || 26 ||
[Analyze grammar]

tasmai tuṣṭaḥ sa śiṣyāya prasanno'thābravīdguruḥ |
siddhiṃ parāmabhiprekṣya śṛṇu tanme janārdana || 27 ||
[Analyze grammar]

vividhaiḥ karmabhistāta puṇyayogaiśca kevalaiḥ |
gacchantīha gatiṃ martyā devaloke'pi ca sthitim || 28 ||
[Analyze grammar]

na kvacitsukhamatyantaṃ na kvacicchāśvatī sthitiḥ |
sthānācca mahato bhraṃśo duḥkhalabdhātpunaḥ punaḥ || 29 ||
[Analyze grammar]

aśubhā gatayaḥ prāptāḥ kaṣṭā me pāpasevanāt |
kāmamanyuparītena tṛṣṇayā mohitena ca || 30 ||
[Analyze grammar]

punaḥ punaśca maraṇaṃ janma caiva punaḥ punaḥ |
āhārā vividhā bhuktāḥ pītā nānāvidhāḥ stanāḥ || 31 ||
[Analyze grammar]

mātaro vividhā dṛṣṭāḥ pitaraśca pṛthagvidhāḥ |
sukhāni ca vicitrāṇi duḥkhāni ca mayānagha || 32 ||
[Analyze grammar]

priyairvivāso bahuśaḥ saṃvāsaścāpriyaiḥ saha |
dhananāśaśca saṃprāpto labdhvā duḥkhena taddhanam || 33 ||
[Analyze grammar]

avamānāḥ sukaṣṭāśca parataḥ svajanāttathā |
śārīrā mānasāścāpi vedanā bhṛśadāruṇāḥ || 34 ||
[Analyze grammar]

prāptā vimānanāścogrā vadhabandhāśca dāruṇāḥ |
patanaṃ niraye caiva yātanāśca yamakṣaye || 35 ||
[Analyze grammar]

jarā rogāśca satataṃ vāsanāni ca bhūriśaḥ |
loke'sminnanubhūtāni dvaṃdvajāni bhṛśaṃ mayā || 36 ||
[Analyze grammar]

tataḥ kadācinnirvedānnikārānnikṛtena ca |
lokatantraṃ parityaktaṃ duḥkhārtena bhṛśaṃ mayā |
tataḥ siddhiriyaṃ prāptā prasādādātmano mayā || 37 ||
[Analyze grammar]

nāhaṃ punarihāgantā lokānālokayāmyaham |
ā siddherā prajāsargādātmano me gatiḥ śubhā || 38 ||
[Analyze grammar]

upalabdhā dvijaśreṣṭha tatheyaṃ siddhiruttamā |
itaḥ paraṃ gamiṣyāmi tataḥ parataraṃ punaḥ |
brahmaṇaḥ padamavyagraṃ mā te bhūdatra saṃśayaḥ || 39 ||
[Analyze grammar]

nāhaṃ punarihāgantā martyalokaṃ paraṃtapa |
prīto'smi te mahāprājña brūhi kiṃ karavāṇi te || 40 ||
[Analyze grammar]

yadīpsurupapannastvaṃ tasya kālo'yamāgataḥ |
abhijāne ca tadahaṃ yadarthaṃ mā tvamāgataḥ |
acirāttu gamiṣyāmi yenāhaṃ tvāmacūcudam || 41 ||
[Analyze grammar]

bhṛśaṃ prīto'smi bhavataścāritreṇa vicakṣaṇa |
paripṛccha yāvadbhavate bhāṣeyaṃ yattavepsitam || 42 ||
[Analyze grammar]

bahu manye ca te buddhiṃ bhṛśaṃ saṃpūjayāmi ca |
yenāhaṃ bhavatā buddho medhāvī hyasi kāśyapa || 43 ||
[Analyze grammar]