Chapter 8

saṃvarta uvāca |
girerhimavataḥ pṛṣṭhe muñjavānnāma parvataḥ |
tapyate yatra bhagavāṃstapo nityamumāpatiḥ || 1 ||
[Analyze grammar]

vanaspatīnāṃ mūleṣu ṭaṅkeṣu śikhareṣu ca |
guhāsu śailarājasya yathākāmaṃ yathāsukham || 2 ||
[Analyze grammar]

umāsahāyo bhagavānyatra nityaṃ maheśvaraḥ |
āste śūlī mahātejā nānābhūtagaṇāvṛtaḥ || 3 ||
[Analyze grammar]

tatra rudrāśca sādhyāśca viśve'tha vasavastathā |
yamaśca varuṇaścaiva kuberaśca sahānugaḥ || 4 ||
[Analyze grammar]

bhūtāni ca piśācāśca nāsatyāvaśvināvapi |
gandharvāpsarasaścaiva yakṣā devarṣayastathā || 5 ||
[Analyze grammar]

ādityā marutaścaiva yātudhānāśca sarvaśaḥ |
upāsante mahātmānaṃ bahurūpamumāpatim || 6 ||
[Analyze grammar]

ramate bhagavāṃstatra kuberānucaraiḥ saha |
vikṛtairvikṛtākāraiḥ krīḍadbhiḥ pṛthivīpate |
śriyā jvalandṛśyate vai bālādityasamadyutiḥ || 7 ||
[Analyze grammar]

na rūpaṃ dṛśyate tasya saṃsthānaṃ vā kathaṃcana |
nirdeṣṭuṃ prāṇibhiḥ kaiścitprākṛtairmāṃsalocanaiḥ || 8 ||
[Analyze grammar]

noṣṇaṃ na śiśiraṃ tatra na vāyurna ca bhāskaraḥ |
na jarā kṣutpipāse vā na mṛtyurna bhayaṃ nṛpa || 9 ||
[Analyze grammar]

tasya śailasya pārśveṣu sarveṣu jayatāṃ vara |
dhātavo jātarūpasya raśmayaḥ savituryathā || 10 ||
[Analyze grammar]

rakṣyante te kuberasya sahāyairudyatāyudhaiḥ |
cikīrṣadbhiḥ priyaṃ rājankuberasya mahātmanaḥ || 11 ||
[Analyze grammar]

tasmai bhagavate kṛtvā namaḥ śarvāya vedhase |
rudrāya śitikaṇṭhāya surūpāya suvarcase || 12 ||
[Analyze grammar]

kapardine karālāya haryakṣṇe varadāya ca |
tryakṣṇe pūṣṇo dantabhide vāmanāya śivāya ca || 13 ||
[Analyze grammar]

yāmyāyāvyaktakeśāya sadvṛtte śaṃkarāya ca |
kṣemyāya harinetrāya sthāṇave puruṣāya ca || 14 ||
[Analyze grammar]

harikeśāya muṇḍāya kṛśāyottāraṇāya ca |
bhāskarāya sutīrthāya devadevāya raṃhase || 15 ||
[Analyze grammar]

uṣṇīṣiṇe suvaktrāya sahasrākṣāya mīḍhuṣe |
giriśāya praśāntāya yataye cīravāsase || 16 ||
[Analyze grammar]

bilvadaṇḍāya siddhāya sarvadaṇḍadharāya ca |
mṛgavyādhāya mahate dhanvine'tha bhavāya ca || 17 ||
[Analyze grammar]

varāya saumyavaktrāya paśuhastāya varṣiṇe |
hiraṇyabāhave rājannugrāya pataye diśām || 18 ||
[Analyze grammar]

paśūnāṃ pataye caiva bhūtānāṃ pataye tathā |
vṛṣāya mātṛbhaktāya senānye madhyamāya ca || 19 ||
[Analyze grammar]

sruvahastāya pataye dhanvine bhārgavāya ca |
ajāya kṛṣṇanetrāya virūpākṣāya caiva ha || 20 ||
[Analyze grammar]

tīkṣṇadaṃṣṭrāya tīkṣṇāya vaiśvānaramukhāya ca |
mahādyutaye'naṅgāya sarvāṅgāya prajāvate || 21 ||
[Analyze grammar]

tathā śukrādhipataye pṛthave kṛttivāsase |
kapālamāline nityaṃ suvarṇamukuṭāya ca || 22 ||
[Analyze grammar]

mahādevāya kṛṣṇāya tryambakāyānaghāya ca |
krodhanāya nṛśaṃsāya mṛdave bāhuśāline || 23 ||
[Analyze grammar]

daṇḍine taptatapase tathaiva krūrakarmaṇe |
sahasraśirase caiva sahasracaraṇāya ca |
namaḥ svadhāsvarūpāya bahurūpāya daṃṣṭriṇe || 24 ||
[Analyze grammar]

pinākinaṃ mahādevaṃ mahāyoginamavyayam |
triśūlapāṇiṃ varadaṃ tryambakaṃ bhuvaneśvaram || 25 ||
[Analyze grammar]

tripuraghnaṃ trinayanaṃ trilokeśaṃ mahaujasam |
prabhavaṃ sarvabhūtānāṃ dhāraṇaṃ dharaṇīdharam || 26 ||
[Analyze grammar]

īśānaṃ śaṃkaraṃ sarvaṃ śivaṃ viśveśvaraṃ bhavam |
umāpatiṃ paśupatiṃ viśvarūpaṃ maheśvaram || 27 ||
[Analyze grammar]

virūpākṣaṃ daśabhujaṃ tiṣyagovṛṣabhadhvajam |
ugraṃ sthāṇuṃ śivaṃ ghoraṃ śarvaṃ gaurīśamīśvaram || 28 ||
[Analyze grammar]

śitikaṇṭhamajaṃ śukraṃ pṛthuṃ pṛthuharaṃ haram |
viśvarūpaṃ virūpākṣaṃ bahurūpamumāpatim || 29 ||
[Analyze grammar]

praṇamya śirasā devamanaṅgāṅgaharaṃ haram |
śaraṇyaṃ śaraṇaṃ yāhi mahādevaṃ caturmukham || 30 ||
[Analyze grammar]

evaṃ kṛtvā namastasmai mahādevāya raṃhase |
mahātmane kṣitipate tatsuvarṇamavāpsyasi |
suvarṇamāhariṣyantastatra gacchantu te narāḥ || 31 ||
[Analyze grammar]

vyāsa uvāca |
ityuktaḥ sa vacastasya cakre kāraṃdhamātmajaḥ |
tato'timānuṣaṃ sarvaṃ cakre yajñasya saṃvidhim |
sauvarṇāni ca bhāṇḍāni saṃcakrustatra śilpinaḥ || 32 ||
[Analyze grammar]

bṛhaspatistu tāṃ śrutvā maruttasya mahīpateḥ |
samṛddhimati devebhyaḥ saṃtāpamakarodbhṛśam || 33 ||
[Analyze grammar]

sa tapyamāno vaivarṇyaṃ kṛśatvaṃ cāgamatparam |
bhaviṣyati hi me śatruḥ saṃvarto vasumāniti || 34 ||
[Analyze grammar]

taṃ śrutvā bhṛśasaṃtaptaṃ devarājo bṛhaspatim |
abhigamyāmaravṛtaḥ provācedaṃ vacastadā || 35 ||
[Analyze grammar]