Chapter 6

vyāsa uvāca |
atrāpyudāharantīmamitihāsaṃ purātanam |
bṛhaspateśca saṃvādaṃ maruttasya ca bhārata || 1 ||
[Analyze grammar]

devarājasya samayaṃ kṛtamāṅgirasena ha |
śrutvā marutto nṛpatirmanyumāhārayattadā || 2 ||
[Analyze grammar]

saṃkalpya manasā yajñaṃ karaṃdhamasutātmajaḥ |
bṛhaspatimupāgamya vāgmī vacanamabravīt || 3 ||
[Analyze grammar]

bhagavanyanmayā pūrvamabhigamya tapodhana |
kṛto'bhisaṃdhiryajñāya bhavato vacanādguro || 4 ||
[Analyze grammar]

tamahaṃ yaṣṭumicchāmi saṃbhārāḥ saṃbhṛtāśca me |
yājyo'smi bhavataḥ sādho tatprāpnuhi vidhatsva ca || 5 ||
[Analyze grammar]

bṛhaspatiruvāca |
na kāmaye yājayituṃ tvāmahaṃ pṛthivīpate |
vṛto'smi devarājena pratijñātaṃ ca tasya me || 6 ||
[Analyze grammar]

marutta uvāca |
pitryamasmi tava kṣetraṃ bahu manye ca te bhṛśam |
na cāsmyayājyatāṃ prāpto bhajamānaṃ bhajasva mām || 7 ||
[Analyze grammar]

bṛhaspatiruvāca |
amartyaṃ yājayitvāhaṃ yājayiṣye na mānuṣam |
marutta gaccha vā mā vā nivṛtto'smyadya yājanāt || 8 ||
[Analyze grammar]

na tvāṃ yājayitāsmyadya vṛṇu tvaṃ yamihecchasi |
upādhyāyaṃ mahābāho yaste yajñaṃ kariṣyati || 9 ||
[Analyze grammar]

vyāsa uvāca |
evamuktastu nṛpatirmarutto vrīḍito'bhavat |
pratyāgacchacca saṃvigno dadarśa pathi nāradam || 10 ||
[Analyze grammar]

devarṣiṇā samāgamya nāradena sa pārthivaḥ |
vidhivatprāñjalistasthāvathainaṃ nārado'bravīt || 11 ||
[Analyze grammar]

rājarṣe nātihṛṣṭo'si kaccitkṣemaṃ tavānagha |
kva gato'si kuto vedamaprītisthānamāgatam || 12 ||
[Analyze grammar]

śrotavyaṃ cenmayā rājanbrūhi me pārthivarṣabha |
vyapaneṣyāmi te manyuṃ sarvayatnairnarādhipa || 13 ||
[Analyze grammar]

evamukto maruttastu nāradena maharṣiṇā |
vipralambhamupādhyāyātsarvameva nyavedayat || 14 ||
[Analyze grammar]

gato'smyaṅgirasaḥ putraṃ devācāryaṃ bṛhaspatim |
yajñārthamṛtvijaṃ draṣṭuṃ sa ca māṃ nābhyanandata || 15 ||
[Analyze grammar]

pratyākhyātaśca tenāhaṃ jīvituṃ nādya kāmaye |
parityaktaśca guruṇā dūṣitaścāsmi nārada || 16 ||
[Analyze grammar]

evamuktastu rājñā sa nāradaḥ pratyuvāca ha |
āvikṣitaṃ mahārāja vācā saṃjīvayanniva || 17 ||
[Analyze grammar]

rājannaṅgirasaḥ putraḥ saṃvarto nāma dhārmikaḥ |
caṅkramīti diśaḥ sarvā digvāsā mohayanprajāḥ || 18 ||
[Analyze grammar]

taṃ gaccha yadi yājyaṃ tvāṃ na vāñchati bṛhaspatiḥ |
prasannastvāṃ mahārāja saṃvarto yājayiṣyati || 19 ||
[Analyze grammar]

marutta uvāca |
saṃjīvito'haṃ bhavatā vākyenānena nārada |
paśyeyaṃ kva nu saṃvartaṃ śaṃsa me vadatāṃ vara || 20 ||
[Analyze grammar]

kathaṃ ca tasmai varteyaṃ kathaṃ māṃ na parityajet |
pratyākhyātaśca tenāpi nāhaṃ jīvitumutsahe || 21 ||
[Analyze grammar]

nārada uvāca |
unmattaveṣaṃ bibhratsa caṅkramīti yathāsukham |
vārāṇasīṃ tu nagarīmabhīkṣṇamupasevate || 22 ||
[Analyze grammar]

tasyā dvāraṃ samāsādya nyasethāḥ kuṇapaṃ kvacit |
taṃ dṛṣṭvā yo nivarteta sa saṃvarto mahīpate || 23 ||
[Analyze grammar]

taṃ pṛṣṭhato'nugacchethā yatra gacchetsa vīryavān |
tamekānte samāsādya prāñjaliḥ śaraṇaṃ vrajeḥ || 24 ||
[Analyze grammar]

pṛcchettvāṃ yadi kenāhaṃ tavākhyāta iti sma ha |
brūyāstvaṃ nāradeneti saṃtapta iva śatruhan || 25 ||
[Analyze grammar]

sa cettvāmanuyuñjīta mamābhigamanepsayā |
śaṃsethā vahnimārūḍhaṃ māmapi tvamaśaṅkayā || 26 ||
[Analyze grammar]

vyāsa uvāca |
sa tatheti pratiśrutya pūjayitvā ca nāradam |
abhyanujñāya rājarṣiryayau vārāṇasīṃ purīm || 27 ||
[Analyze grammar]

tatra gatvā yathoktaṃ sa puryā dvāre mahāyaśāḥ |
kuṇapaṃ sthāpayāmāsa nāradasya vacaḥ smaran || 28 ||
[Analyze grammar]

yaugapadyena vipraśca sa purīdvāramāviśat |
tataḥ sa kuṇapaṃ dṛṣṭvā sahasā sa nyavartata || 29 ||
[Analyze grammar]

sa taṃ nivṛttamālakṣya prāñjaliḥ pṛṣṭhato'nvagāt |
āvikṣito mahīpālaḥ saṃvartamupaśikṣitum || 30 ||
[Analyze grammar]

sa enaṃ vijane dṛṣṭvā pāṃsubhiḥ kardamena ca |
śleṣmaṇā cāpi rājānaṃ ṣṭhīvanaiśca samākirat || 31 ||
[Analyze grammar]

sa tathā bādhyamāno'pi saṃvartena mahīpatiḥ |
anvagādeva tamṛṣiṃ prāñjaliḥ saṃprasādayan || 32 ||
[Analyze grammar]

tato nivṛtya saṃvartaḥ pariśrānta upāviśat |
śītalacchāyamāsādya nyagrodhaṃ bahuśākhinam || 33 ||
[Analyze grammar]