Chapter 144

yudhiṣṭhira uvāca |
brūhi brāhmaṇapūjāyāṃ vyuṣṭiṃ tvaṃ madhusūdana |
vettā tvamasya cārthasya veda tvāṃ hi pitāmahaḥ || 1 ||
[Analyze grammar]

vāsudeva uvāca |
śṛṇuṣvāvahito rājandvijānāṃ bharatarṣabha |
yathātattvena vadato guṇānme kurusattama || 2 ||
[Analyze grammar]

pradyumnaḥ paripapraccha brāhmaṇaiḥ parikopitaḥ |
kiṃ phalaṃ brāhmaṇeṣvasti pūjāyāṃ madhusūdana |
īśvarasya satastasya iha caiva paratra ca || 3 ||
[Analyze grammar]

sadā dvijātīnsaṃpūjya kiṃ phalaṃ tatra mānada |
etadbrūhi pitaḥ sarvaṃ sumahānsaṃśayo'tra me || 4 ||
[Analyze grammar]

ityuktavacanastena pradyumnena tadā tvaham |
pratyabruvaṃ mahārāja yattacchṛṇu samāhitaḥ || 5 ||
[Analyze grammar]

vyuṣṭiṃ brāhmaṇapūjāyāṃ raukmiṇeya nibodha me |
ete hi somarājāna īśvarāḥ sukhaduḥkhayoḥ || 6 ||
[Analyze grammar]

asmiṃlloke raukmiṇeya tathāmuṣmiṃśca putraka |
brāhmaṇapramukhaṃ saukhyaṃ na me'trāsti vicāraṇā || 7 ||
[Analyze grammar]

brāhmaṇapramukhaṃ vīryamāyuḥ kīrtiryaśo balam |
lokā lokeśvarāścaiva sarve brāhmaṇapūrvakāḥ || 8 ||
[Analyze grammar]

tatkathaṃ nādriyeyaṃ vai īśvaro'smīti putraka |
mā te manyurmahābāho bhavatvatra dvijānprati || 9 ||
[Analyze grammar]

brāhmaṇo hi mahadbhūtamasmiṃlloke paratra ca |
bhasma kuryurjagadidaṃ kruddhāḥ pratyakṣadarśinaḥ || 10 ||
[Analyze grammar]

anyānapi sṛjeyuśca lokāṃllokeśvarāṃstathā |
kathaṃ teṣu na varteya samyagjñānātsutejasaḥ || 11 ||
[Analyze grammar]

avasanmadgṛhe tāta brāhmaṇo haripiṅgalaḥ |
cīravāsā bilvadaṇḍī dīrghaśmaśrunakhādimān |
dīrghebhyaśca manuṣyebhyaḥ pramāṇādadhiko bhuvi || 12 ||
[Analyze grammar]

sa sma saṃcarate lokānye divyā ye ca mānuṣāḥ |
imā gāthā gāyamānaścatvareṣu sabhāsu ca || 13 ||
[Analyze grammar]

durvāsasaṃ vāsayetko brāhmaṇaṃ satkṛtaṃ gṛhe |
paribhāṣāṃ ca me śrutvā ko nu dadyātpratiśrayam |
yo māṃ kaścidvāsayeta na sa māṃ kopayediha || 14 ||
[Analyze grammar]

taṃ sma nādriyate kaścittato'haṃ tamavāsayam || 15 ||
[Analyze grammar]

sa sma bhuṅkte sahasrāṇāṃ bahūnāmannamekadā |
ekadā smālpakaṃ bhuṅkte na vaiti ca punargṛhān || 16 ||
[Analyze grammar]

akasmācca prahasati tathākasmātpraroditi |
na cāsya vayasā tulyaḥ pṛthivyāmabhavattadā || 17 ||
[Analyze grammar]

so'smadāvasathaṃ gatvā śayyāścāstaraṇāni ca |
kanyāścālaṃkṛtā dagdhvā tato vyapagataḥ svayam || 18 ||
[Analyze grammar]

atha māmabravīdbhūyaḥ sa muniḥ saṃśitavrataḥ |
kṛṣṇa pāyasamicchāmi bhoktumityeva satvaraḥ || 19 ||
[Analyze grammar]

sadaiva tu mayā tasya cittajñena gṛhe janaḥ |
sarvāṇyevānnapānāni bhakṣyāścoccāvacāstathā |
bhavantu satkṛtānīti pūrvameva pracoditaḥ || 20 ||
[Analyze grammar]

tato'haṃ jvalamānaṃ vai pāyasaṃ pratyavedayam |
tadbhuktvaiva tu sa kṣipraṃ tato vacanamabravīt |
kṣipramaṅgāni limpasva pāyaseneti sa sma ha || 21 ||
[Analyze grammar]

avimṛśyaiva ca tataḥ kṛtavānasmi tattathā |
tenocchiṣṭena gātrāṇi śiraścaivābhyamṛkṣayam || 22 ||
[Analyze grammar]

sa dadarśa tadābhyāśe mātaraṃ te śubhānanām |
tāmapi smayamānaḥ sa pāyasenābhyalepayat || 23 ||
[Analyze grammar]

muniḥ pāyasadigdhāṅgīṃ rathe tūrṇamayojayat |
tamāruhya rathaṃ caiva niryayau sa gṛhānmama || 24 ||
[Analyze grammar]

agnivarṇo jvalandhīmānsa dvijo rathadhuryavat |
pratodenātudadbālāṃ rukmiṇīṃ mama paśyataḥ || 25 ||
[Analyze grammar]

na ca me stokamapyāsīdduḥkhamīrṣyākṛtaṃ tadā |
tataḥ sa rājamārgeṇa mahatā niryayau bahiḥ || 26 ||
[Analyze grammar]

taddṛṣṭvā mahadāścaryaṃ dāśārhā jātamanyavaḥ |
tatrājalpanmithaḥ kecitsamābhāṣya parasparam || 27 ||
[Analyze grammar]

brāhmaṇā eva jāyerannānyo varṇaḥ kathaṃcana |
ko hyenaṃ rathamāsthāya jīvedanyaḥ pumāniha || 28 ||
[Analyze grammar]

āśīviṣaviṣaṃ tīkṣṇaṃ tatastīkṣṇataraṃ viṣam |
brahmāśīviṣadagdhasya nāsti kaściccikitsakaḥ || 29 ||
[Analyze grammar]

tasminvrajati durdharṣe prāskhaladrukmiṇī pathi |
tāṃ nāmarṣayata śrīmāṃstatastūrṇamacodayat || 30 ||
[Analyze grammar]

tataḥ paramasaṃkruddho rathātpraskandya sa dvijaḥ |
padātirutpathenaiva prādhāvaddakṣiṇāmukhaḥ || 31 ||
[Analyze grammar]

tamutpathena dhāvantamanvadhāvaṃ dvijottamam |
tathaiva pāyasādigdhaḥ prasīda bhagavanniti || 32 ||
[Analyze grammar]

tato vilokya tejasvī brāhmaṇo māmuvāca ha |
jitaḥ krodhastvayā kṛṣṇa prakṛtyaiva mahābhuja || 33 ||
[Analyze grammar]

na te'parādhamiha vai dṛṣṭavānasmi suvrata |
prīto'smi tava govinda vṛṇu kāmānyathepsitān |
prasannasya ca me tāta paśya vyuṣṭiryathāvidhā || 34 ||
[Analyze grammar]

yāvadeva manuṣyāṇāmanne bhāvo bhaviṣyati |
yathaivānne tathā teṣāṃ tvayi bhāvo bhaviṣyati || 35 ||
[Analyze grammar]

yāvacca puṇyā lokeṣu tvayi kīrtirbhaviṣyati |
triṣu lokeṣu tāvacca vaiśiṣṭyaṃ pratipatsyase |
supriyaḥ sarvalokasya bhaviṣyasi janārdana || 36 ||
[Analyze grammar]

yatte bhinnaṃ ca dagdhaṃ ca yacca kiṃcidvināśitam |
sarvaṃ tathaiva draṣṭāsi viśiṣṭaṃ vā janārdana || 37 ||
[Analyze grammar]

yāvadetatpraliptaṃ te gātreṣu madhusūdana |
ato mṛtyubhayaṃ nāsti yāvadicchā tavācyuta || 38 ||
[Analyze grammar]

na tu pādatale lipte kasmātte putrakādya vai |
naitanme priyamityeva sa māṃ prīto'bravīttadā |
ityukto'haṃ śarīraṃ svamapaśyaṃ śrīsamāyutam || 39 ||
[Analyze grammar]

rukmiṇīṃ cābravītprītaḥ sarvastrīṇāṃ varaṃ yaśaḥ |
kīrtiṃ cānuttamāṃ loke samavāpsyasi śobhane || 40 ||
[Analyze grammar]

na tvāṃ jarā vā rogo vā vaivarṇyaṃ cāpi bhāmini |
sprakṣyanti puṇyagandhā ca kṛṣṇamārādhayiṣyasi || 41 ||
[Analyze grammar]

ṣoḍaśānāṃ sahasrāṇāṃ vadhūnāṃ keśavasya ha |
variṣṭhā sahalokyā ca keśavasya bhaviṣyasi || 42 ||
[Analyze grammar]

tava mātaramityuktvā tato māṃ punarabravīt |
prasthitaḥ sumahātejā durvāsā vahnivajjvalan || 43 ||
[Analyze grammar]

eṣaiva te buddhirastu brāhmaṇānprati keśava |
ityuktvā sa tadā putra tatraivāntaradhīyata || 44 ||
[Analyze grammar]

tasminnantarhite cāhamupāṃśuvratamādiśam |
yatkiṃcidbrāhmaṇo brūyātsarvaṃ kuryāmiti prabho || 45 ||
[Analyze grammar]

etadvratamahaṃ kṛtvā mātrā te saha putraka |
tataḥ paramahṛṣṭātmā prāviśaṃ gṛhameva ca || 46 ||
[Analyze grammar]

praviṣṭamātraśca gṛhe sarvaṃ paśyāmi tannavam |
yadbhinnaṃ yacca vai dagdhaṃ tena vipreṇa putraka || 47 ||
[Analyze grammar]

tato'haṃ vismayaṃ prāptaḥ sarvaṃ dṛṣṭvā navaṃ dṛḍham |
apūjayaṃ ca manasā raukmiṇeya dvijaṃ tadā || 48 ||
[Analyze grammar]

ityahaṃ raukmiṇeyasya pṛcchato bharatarṣabha |
māhātmyaṃ dvijamukhyasya sarvamākhyātavāṃstadā || 49 ||
[Analyze grammar]

tathā tvamapi kaunteya brāhmaṇānsatataṃ prabho |
pūjayasva mahābhāgānvāgbhirdānaiśca nityadā || 50 ||
[Analyze grammar]

evaṃ vyuṣṭimahaṃ prāpto brāhmaṇānāṃ prasādajām |
yacca māmāha bhīṣmo'yaṃ tatsatyaṃ bharatarṣabha || 51 ||
[Analyze grammar]