Chapter 99

yudhiṣṭhira uvāca |
ārāmāṇāṃ taḍāgānāṃ yatphalaṃ kurunandana |
tadahaṃ śrotumicchāmi tvatto'dya bharatarṣabha || 1 ||
[Analyze grammar]

bhīṣma uvāca |
supradarśā vanavatī citradhātuvibhūṣitā |
upetā sarvabījaiśca śreṣṭhā bhūmirihocyate || 2 ||
[Analyze grammar]

tasyāḥ kṣetraviśeṣaṃ ca taḍāgānāṃ niveśanam |
audakāni ca sarvāṇi pravakṣyāmyanupūrvaśaḥ || 3 ||
[Analyze grammar]

taḍāgānāṃ ca vakṣyāmi kṛtānāṃ cāpi ye guṇāḥ |
triṣu lokeṣu sarvatra pūjito yastaḍāgavān || 4 ||
[Analyze grammar]

atha vā mitrasadanaṃ maitraṃ mitravivardhanam |
kīrtisaṃjananaṃ śreṣṭhaṃ taḍāgānāṃ niveśanam || 5 ||
[Analyze grammar]

dharmasyārthasya kāmasya phalamāhurmanīṣiṇaḥ |
taḍāgaṃ sukṛtaṃ deśe kṣetrameva mahāśrayam || 6 ||
[Analyze grammar]

caturvidhānāṃ bhūtānāṃ taḍāgamupalakṣayet |
taḍāgāni ca sarvāṇi diśanti śriyamuttamām || 7 ||
[Analyze grammar]

devā manuṣyā gandharvāḥ pitaroragarākṣasāḥ |
sthāvarāṇi ca bhūtāni saṃśrayanti jalāśayam || 8 ||
[Analyze grammar]

tasmāttāṃste pravakṣyāmi taḍāge ye guṇāḥ smṛtāḥ |
yā ca tatra phalāvāptirṛṣibhiḥ samudāhṛtā || 9 ||
[Analyze grammar]

varṣamātre taḍāge tu salilaṃ yasya tiṣṭhati |
agnihotraphalaṃ tasya phalamāhurmanīṣiṇaḥ || 10 ||
[Analyze grammar]

śaratkāle tu salilaṃ taḍāge yasya tiṣṭhati |
gosahasrasya sa pretya labhate phalamuttamam || 11 ||
[Analyze grammar]

hemantakāle salilaṃ taḍāge yasya tiṣṭhati |
sa vai bahusuvarṇasya yajñasya labhate phalam || 12 ||
[Analyze grammar]

yasya vai śaiśire kāle taḍāge salilaṃ bhavet |
agniṣṭomasya yajñasya phalamāhurmanīṣiṇaḥ || 13 ||
[Analyze grammar]

taḍāgaṃ sukṛtaṃ yasya vasante tu mahāśrayam |
atirātrasya yajñasya phalaṃ sa samupāśnute || 14 ||
[Analyze grammar]

nidāghakāle pānīyaṃ taḍāge yasya tiṣṭhati |
vājapeyasamaṃ tasya phalaṃ vai munayo viduḥ || 15 ||
[Analyze grammar]

sa kulaṃ tārayetsarvaṃ yasya khāte jalāśaye |
gāvaḥ pibanti pānīyaṃ sādhavaśca narāḥ sadā || 16 ||
[Analyze grammar]

taḍāge yasya gāvastu pibanti tṛṣitā jalam |
mṛgapakṣimanuṣyāśca so'śvamedhaphalaṃ labhet || 17 ||
[Analyze grammar]

yatpibanti jalaṃ tatra snāyante viśramanti ca |
taḍāgadasya tatsarvaṃ pretyānantyāya kalpate || 18 ||
[Analyze grammar]

durlabhaṃ salilaṃ tāta viśeṣeṇa paratra vai |
pānīyasya pradānena prītirbhavati śāśvatī || 19 ||
[Analyze grammar]

tilāndadata pānīyaṃ dīpāndadata jāgrata |
jñātibhiḥ saha modadhvametatpreteṣu durlabham || 20 ||
[Analyze grammar]

sarvadānairgurutaraṃ sarvadānairviśiṣyate |
pānīyaṃ naraśārdūla tasmāddātavyameva hi || 21 ||
[Analyze grammar]

evametattaḍāgeṣu kīrtitaṃ phalamuttamam |
ata ūrdhvaṃ pravakṣyāmi vṛkṣāṇāmapi ropaṇe || 22 ||
[Analyze grammar]

sthāvarāṇāṃ ca bhūtānāṃ jātayaḥ ṣaṭprakīrtitāḥ |
vṛkṣagulmalatāvallyastvaksārāstṛṇajātayaḥ || 23 ||
[Analyze grammar]

etā jātyastu vṛkṣāṇāṃ teṣāṃ rope guṇāstvime |
kīrtiśca mānuṣe loke pretya caiva phalaṃ śubham || 24 ||
[Analyze grammar]

labhate nāma loke ca pitṛbhiśca mahīyate |
devalokagatasyāpi nāma tasya na naśyati || 25 ||
[Analyze grammar]

atītānāgate cobhe pitṛvaṃśaṃ ca bhārata |
tārayedvṛkṣaropī ca tasmādvṛkṣānpraropayet || 26 ||
[Analyze grammar]

tasya putrā bhavantyete pādapā nātra saṃśayaḥ |
paralokagataḥ svargaṃ lokāṃścāpnoti so'vyayān || 27 ||
[Analyze grammar]

puṣpaiḥ suragaṇānvṛkṣāḥ phalaiścāpi tathā pitṝn |
chāyayā cātithīṃstāta pūjayanti mahīruhāḥ || 28 ||
[Analyze grammar]

kiṃnaroragarakṣāṃsi devagandharvamānavāḥ |
tathā ṛṣigaṇāścaiva saṃśrayanti mahīruhān || 29 ||
[Analyze grammar]

puṣpitāḥ phalavantaśca tarpayantīha mānavān |
vṛkṣadaṃ putravadvṛkṣāstārayanti paratra ca || 30 ||
[Analyze grammar]

tasmāttaḍāge vṛkṣā vai ropyāḥ śreyorthinā sadā |
putravatparipālyāśca putrāste dharmataḥ smṛtāḥ || 31 ||
[Analyze grammar]

taḍāgakṛdvṛkṣaropī iṣṭayajñaśca yo dvijaḥ |
ete svarge mahīyante ye cānye satyavādinaḥ || 32 ||
[Analyze grammar]

tasmāttaḍāgaṃ kurvīta ārāmāṃścaiva ropayet |
yajecca vividhairyajñaiḥ satyaṃ ca satataṃ vadet || 33 ||
[Analyze grammar]