Chapter 96

bhīṣma uvāca |
atraivodāharantīmamitihāsaṃ purātanam |
yadvṛttaṃ tīrthayātrāyāṃ śapathaṃ prati tacchṛṇu || 1 ||
[Analyze grammar]

puṣkarārthaṃ kṛtaṃ stainyaṃ purā bharatasattama |
rājarṣibhirmahārāja tathaiva ca dvijarṣibhiḥ || 2 ||
[Analyze grammar]

ṛṣayaḥ sametāḥ paścime vai prabhāse samāgatā mantramamantrayanta |
carāma sarve pṛthivīṃ puṇyatīrthāṃ tannaḥ kāryaṃ hanta gacchāma sarve || 3 ||
[Analyze grammar]

śukro'ṅgirāścaiva kaviśca vidvāṃstathāgastyo nāradaparvatau ca |
bhṛgurvasiṣṭhaḥ kaśyapo gautamaśca viśvāmitro jamadagniśca rājan || 4 ||
[Analyze grammar]

ṛṣistathā gālavo'thāṣṭakaśca bharadvājo'rundhatī vālakhilyāḥ |
śibirdilīpo nahuṣo'mbarīṣo rājā yayātirdhundhumāro'tha pūruḥ || 5 ||
[Analyze grammar]

jagmuḥ puraskṛtya mahānubhāvaṃ śatakratuṃ vṛtrahaṇaṃ narendra |
tīrthāni sarvāṇi parikramanto māghyāṃ yayuḥ kauśikīṃ puṇyatīrthām || 6 ||
[Analyze grammar]

sarveṣu tīrtheṣvatha dhūtapāpā jagmustato brahmasaraḥ supuṇyam |
devasya tīrthe jalamagnikalpā vigāhya te bhuktabisaprasūnāḥ || 7 ||
[Analyze grammar]

kecidbisānyakhanaṃstatra rājannanye mṛṇālānyakhanaṃstatra viprāḥ |
athāpaśyanpuṣkaraṃ te hriyantaṃ hradādagastyena samuddhṛtaṃ vai || 8 ||
[Analyze grammar]

tānāha sarvānṛṣimukhyānagastyaḥ kenādattaṃ puṣkaraṃ me sujātam |
yuṣmāñśaṅke dīyatāṃ puṣkaraṃ me na vai bhavanto hartumarhanti padmam || 9 ||
[Analyze grammar]

śṛṇomi kālo hiṃsate dharmavīryaṃ seyaṃ prāptā vardhate dharmapīḍā |
purādharmo vardhate neha yāvattāvadgacchāmi paralokaṃ cirāya || 10 ||
[Analyze grammar]

purā vedānbrāhmaṇā grāmamadhye ghuṣṭasvarā vṛṣalāñśrāvayanti |
purā rājā vyavahārānadharmyānpaśyatyahaṃ paralokaṃ vrajāmi || 11 ||
[Analyze grammar]

purāvarānpratyavarāngarīyaso yāvannarā nāvamaṃsyanti sarve |
tamottaraṃ yāvadidaṃ na vartate tāvadvrajāmi paralokaṃ cirāya || 12 ||
[Analyze grammar]

purā prapaśyāmi pareṇa martyānbalīyasā durbalānbhujyamānān |
tasmādyāsyāmi paralokaṃ cirāya na hyutsahe draṣṭumīdṛṅnṛloke || 13 ||
[Analyze grammar]

tamāhurārtā ṛṣayo maharṣiṃ na te vayaṃ puṣkaraṃ corayāmaḥ |
mithyābhiṣaṅgo bhavatā na kāryaḥ śapāma tīkṣṇāñśapathānmaharṣe || 14 ||
[Analyze grammar]

te niścitāstatra maharṣayastu saṃmanyanto dharmamevaṃ narendra |
tato'śapañśapathānparyayeṇa sahaiva te pārthiva putrapautraiḥ || 15 ||
[Analyze grammar]

bhṛguruvāca |
pratyākrośedihākruṣṭastāḍitaḥ pratitāḍayet |
khādecca pṛṣṭhamāṃsāni yaste harati puṣkaram || 16 ||
[Analyze grammar]

vasiṣṭha uvāca |
asvādhyāyaparo loke śvānaṃ ca parikarṣatu |
pure ca bhikṣurbhavatu yaste harati puṣkaram || 17 ||
[Analyze grammar]

kaśyapa uvāca |
sarvatra sarvaṃ paṇatu nyāse lobhaṃ karotu ca |
kūṭasākṣitvamabhyetu yaste harati puṣkaram || 18 ||
[Analyze grammar]

gautama uvāca |
jīvatvahaṃkṛto buddhyā vipaṇatvadhamena saḥ |
karṣako matsarī cāstu yaste harati puṣkaram || 19 ||
[Analyze grammar]

aṅgirā uvāca |
aśucirbrahmakūṭo'stu śvānaṃ ca parikarṣatu |
brahmahānikṛtiścāstu yaste harati puṣkaram || 20 ||
[Analyze grammar]

dhundhumāra uvāca |
akṛtajño'stu mitrāṇāṃ śūdrāyāṃ tu prajāyatu |
ekaḥ saṃpannamaśnātu yaste harati puṣkaram || 21 ||
[Analyze grammar]

pūruruvāca |
cikitsāyāṃ pracaratu bhāryayā caiva puṣyatu |
śvaśurāttasya vṛttiḥ syādyaste harati puṣkaram || 22 ||
[Analyze grammar]

dilīpa uvāca |
udapānaplave grāme brāhmaṇo vṛṣalīpatiḥ |
tasya lokānsa vrajatu yaste harati puṣkaram || 23 ||
[Analyze grammar]

śukra uvāca |
pṛṣṭhamāṃsaṃ samaśnātu divā gacchatu maithunam |
preṣyo bhavatu rājñaśca yaste harati puṣkaram || 24 ||
[Analyze grammar]

jamadagniruvāca |
anadhyāyeṣvadhīyīta mitraṃ śrāddhe ca bhojayet |
śrāddhe śūdrasya cāśnīyādyaste harati puṣkaram || 25 ||
[Analyze grammar]

śibiruvāca |
anāhitāgnirmriyatāṃ yajñe vighnaṃ karotu ca |
tapasvibhirvirudhyeta yaste harati puṣkaram || 26 ||
[Analyze grammar]

yayātiruvāca |
anṛtau jaṭī vratinyāṃ vai bhāryāyāṃ saṃprajāyatu |
nirākarotu vedāṃśca yaste harati puṣkaram || 27 ||
[Analyze grammar]

nahuṣa uvāca |
atithiṃ gṛhastho nudatu kāmavṛtto'stu dīkṣitaḥ |
vidyāṃ prayacchatu bhṛto yaste harati puṣkaram || 28 ||
[Analyze grammar]

ambarīṣa uvāca |
nṛśaṃsastyaktadharmo'stu strīṣu jñātiṣu goṣu ca |
brāhmaṇaṃ cāpi jahatu yaste harati puṣkaram || 29 ||
[Analyze grammar]

nārada uvāca |
gūḍho'jñānī bahiḥ śāstraṃ paṭhatāṃ visvaraṃ padam |
garīyaso'vajānātu yaste harati puṣkaram || 30 ||
[Analyze grammar]

nābhāga uvāca |
anṛtaṃ bhāṣatu sadā sadbhiścaiva virudhyatu |
śulkena kanyāṃ dadatu yaste harati puṣkaram || 31 ||
[Analyze grammar]

kaviruvāca |
padā sa gāṃ tāḍayatu sūryaṃ ca prati mehatu |
śaraṇāgataṃ ca tyajatu yaste harati puṣkaram || 32 ||
[Analyze grammar]

viśvāmitra uvāca |
karotu bhṛtako'varṣāṃ rājñaścāstu purohitaḥ |
ṛtvigastu hyayājyasya yaste harati puṣkaram || 33 ||
[Analyze grammar]

parvata uvāca |
grāme cādhikṛtaḥ so'stu kharayānena gacchatu |
śunaḥ karṣatu vṛttyarthe yaste harati puṣkaram || 34 ||
[Analyze grammar]

bharadvāja uvāca |
sarvapāpasamādānaṃ nṛśaṃse cānṛte ca yat |
tattasyāstu sadā pāpaṃ yaste harati puṣkaram || 35 ||
[Analyze grammar]

aṣṭaka uvāca |
sa rājāstvakṛtaprajñaḥ kāmavṛttiśca pāpakṛt |
adharmeṇānuśāstūrvīṃ yaste harati puṣkaram || 36 ||
[Analyze grammar]

gālava uvāca |
pāpiṣṭhebhyastvanarghārhaḥ sa naro'stu svapāpakṛt |
dattvā dānaṃ kīrtayatu yaste harati puṣkaram || 37 ||
[Analyze grammar]

arundhatyuvāca |
śvaśrvāpavādaṃ vadatu bharturbhavatu durmanāḥ |
ekā svādu samaśnātu yā te harati puṣkaram || 38 ||
[Analyze grammar]

vālakhilyā ūcuḥ |
ekapādena vṛttyarthaṃ grāmadvāre sa tiṣṭhatu |
dharmajñastyaktadharmo'stu yaste harati puṣkaram || 39 ||
[Analyze grammar]

paśusakha uvāca |
agnihotramanādṛtya sukhaṃ svapatu sa dvijaḥ |
parivrāṭkāmavṛtto'stu yaste harati puṣkaram || 40 ||
[Analyze grammar]

surabhyuvāca |
bālvajena nidānena kāṃsyaṃ bhavatu dohanam |
duhyeta paravatsena yā te harati puṣkaram || 41 ||
[Analyze grammar]

bhīṣma uvāca |
tatastu taiḥ śapathaiḥ śapyamānairnānāvidhairbahubhiḥ kauravendra |
sahasrākṣo devarāṭsaṃprahṛṣṭaḥ samīkṣya taṃ kopanaṃ vipramukhyam || 42 ||
[Analyze grammar]

athābravīnmaghavā pratyayaṃ svaṃ samābhāṣya tamṛṣiṃ jātaroṣam |
brahmarṣidevarṣinṛparṣimadhye yattannibodheha mamādya rājan || 43 ||
[Analyze grammar]

śakra uvāca |
adhvaryave duhitaraṃ dadātu cchandoge vā caritabrahmacarye |
ātharvaṇaṃ vedamadhītya vipraḥ snāyīta yaḥ puṣkaramādadāti || 44 ||
[Analyze grammar]

sarvānvedānadhīyīta puṇyaśīlo'stu dhārmikaḥ |
brahmaṇaḥ sadanaṃ yātu yaste harati puṣkaram || 45 ||
[Analyze grammar]

agastya uvāca |
āśīrvādastvayā proktaḥ śapatho balasūdana |
dīyatāṃ puṣkaraṃ mahyameṣa dharmaḥ sanātanaḥ || 46 ||
[Analyze grammar]

indra uvāca |
na mayā bhagavaṃllobhāddhṛtaṃ puṣkaramadya vai |
dharmaṃ tu śrotukāmena hṛtaṃ na kroddhumarhasi || 47 ||
[Analyze grammar]

dharmaḥ śrutisamutkarṣo dharmaseturanāmayaḥ |
ārṣo vai śāśvato nityamavyayo'yaṃ mayā śrutaḥ || 48 ||
[Analyze grammar]

tadidaṃ gṛhyatāṃ vidvanpuṣkaraṃ munisattama |
atikramaṃ me bhagavankṣantumarhasyanindita || 49 ||
[Analyze grammar]

ityuktaḥ sa mahendreṇa tapasvī kopano bhṛśam |
jagrāha puṣkaraṃ dhīmānprasannaścābhavanmuniḥ || 50 ||
[Analyze grammar]

prayayuste tato bhūyastīrthāni vanagocarāḥ |
puṇyatīrtheṣu ca tathā gātrāṇyāplāvayanti te || 51 ||
[Analyze grammar]

ākhyānaṃ ya idaṃ yuktaḥ paṭhetparvaṇi parvaṇi |
na mūrkhaṃ janayetputraṃ na bhavecca nirākṛtiḥ || 52 ||
[Analyze grammar]

na tamāpatspṛśetkācinna jvaro na rujaśca ha |
virajāḥ śreyasā yuktaḥ pretya svargamavāpnuyāt || 53 ||
[Analyze grammar]

yaśca śāstramanudhyāyedṛṣibhiḥ paripālitam |
sa gacchedbrahmaṇo lokamavyayaṃ ca narottama || 54 ||
[Analyze grammar]