Chapter 80

yudhiṣṭhira uvāca |
pavitrāṇāṃ pavitraṃ yacchreṣṭhaṃ loke ca yadbhavet |
pāvanaṃ paramaṃ caiva tanme brūhi pitāmaha || 1 ||
[Analyze grammar]

bhīṣma uvāca |
gāvo mahārthāḥ puṇyāśca tārayanti ca mānavān |
dhārayanti prajāścemāḥ payasā haviṣā tathā || 2 ||
[Analyze grammar]

na hi puṇyatamaṃ kiṃcidgobhyo bharatasattama |
etāḥ pavitrāḥ puṇyāśca triṣu lokeṣvanuttamāḥ || 3 ||
[Analyze grammar]

devānāmupariṣṭācca gāvaḥ prativasanti vai |
dattvā caitā narapate yānti svargaṃ manīṣiṇaḥ || 4 ||
[Analyze grammar]

māndhātā yauvanāśvaśca yayātirnahuṣastathā |
gāvo dadantaḥ satataṃ sahasraśatasaṃmitāḥ |
gatāḥ paramakaṃ sthānaṃ devairapi sudurlabham || 5 ||
[Analyze grammar]

api cātra purāvṛttaṃ kathayiṣyāmi te'nagha || 6 ||
[Analyze grammar]

ṛṣīṇāmuttamaṃ dhīmānkṛṣṇadvaipāyanaṃ śukaḥ |
abhivādyāhnikaṃ kṛtvā śuciḥ prayatamānasaḥ |
pitaraṃ paripapraccha dṛṣṭalokaparāvaram || 7 ||
[Analyze grammar]

ko yajñaḥ sarvayajñānāṃ variṣṭha upalakṣyate |
kiṃ ca kṛtvā paraṃ svargaṃ prāpnuvanti manīṣiṇaḥ || 8 ||
[Analyze grammar]

kena devāḥ pavitreṇa svargamaśnanti vā vibho |
kiṃ ca yajñasya yajñatvaṃ kva ca yajñaḥ pratiṣṭhitaḥ || 9 ||
[Analyze grammar]

dānānāmuttamaṃ kiṃ ca kiṃ ca satramataḥ param |
pavitrāṇāṃ pavitraṃ ca yattadbrūhi mamānagha || 10 ||
[Analyze grammar]

etacchrutvā tu vacanaṃ vyāsaḥ paramadharmavit |
putrāyākathayatsarvaṃ tattvena bharatarṣabha || 11 ||
[Analyze grammar]

vyāsa uvāca |
gāvaḥ pratiṣṭhā bhūtānāṃ tathā gāvaḥ parāyaṇam |
gāvaḥ puṇyāḥ pavitrāśca pāvanaṃ dharma eva ca || 12 ||
[Analyze grammar]

pūrvamāsannaśṛṅgā vai gāva ityanuśuśrumaḥ |
śṛṅgārthe samupāsanta tāḥ kila prabhumavyayam || 13 ||
[Analyze grammar]

tato brahmā tu gāḥ prāyamupaviṣṭāḥ samīkṣya ha |
īpsitaṃ pradadau tābhyo gobhyaḥ pratyekaśaḥ prabhuḥ || 14 ||
[Analyze grammar]

tāsāṃ śṛṅgāṇyajāyanta yasyā yādṛṅmanogatam |
nānāvarṇāḥ śṛṅgavantyastā vyarocanta putraka || 15 ||
[Analyze grammar]

brahmaṇā varadattāstā havyakavyapradāḥ śubhāḥ |
puṇyāḥ pavitrāḥ subhagā divyasaṃsthānalakṣaṇāḥ |
gāvastejo mahaddivyaṃ gavāṃ dānaṃ praśasyate || 16 ||
[Analyze grammar]

ye caitāḥ saṃprayacchanti sādhavo vītamatsarāḥ |
te vai sukṛtinaḥ proktāḥ sarvadānapradāśca te |
gavāṃ lokaṃ tathā puṇyamāpnuvanti ca te'nagha || 17 ||
[Analyze grammar]

yatra vṛkṣā madhuphalā divyapuṣpaphalopagāḥ |
puṣpāṇi ca sugandhīni divyāni dvijasattama || 18 ||
[Analyze grammar]

sarvā maṇimayī bhūmiḥ sūkṣmakāñcanavālukā |
sarvatra sukhasaṃsparśā niṣpaṅkā nīrajā śubhā || 19 ||
[Analyze grammar]

raktotpalavanaiścaiva maṇidaṇḍairhiraṇmayaiḥ |
taruṇādityasaṃkāśairbhānti tatra jalāśayāḥ || 20 ||
[Analyze grammar]

mahārhamaṇipatraiśca kāñcanaprabhakesaraiḥ |
nīlotpalavimiśraiśca sarobhirbahupaṅkajaiḥ || 21 ||
[Analyze grammar]

karavīravanaiḥ phullaiḥ sahasrāvartasaṃvṛtaiḥ |
saṃtānakavanaiḥ phullairvṛkṣaiśca samalaṃkṛtāḥ || 22 ||
[Analyze grammar]

nirmalābhiśca muktābhirmaṇibhiśca mahādhanaiḥ |
uddhūtapulināstatra jātarūpaiśca nimnagāḥ || 23 ||
[Analyze grammar]

sarvaratnamayaiścitrairavagāḍhā nagottamaiḥ |
jātarūpamayaiścānyairhutāśanasamaprabhaiḥ || 24 ||
[Analyze grammar]

sauvarṇagirayastatra maṇiratnaśiloccayāḥ |
sarvaratnamayairbhānti śṛṅgaiścārubhirucchritaiḥ || 25 ||
[Analyze grammar]

nityapuṣpaphalāstatra nagāḥ patrarathākulāḥ |
divyagandharasaiḥ puṣpaiḥ phalaiśca bharatarṣabha || 26 ||
[Analyze grammar]

ramante puṇyakarmāṇastatra nityaṃ yudhiṣṭhira |
sarvakāmasamṛddhārthā niḥśokā gatamanyavaḥ || 27 ||
[Analyze grammar]

vimāneṣu vicitreṣu ramaṇīyeṣu bhārata |
modante puṇyakarmāṇo viharanto yaśasvinaḥ || 28 ||
[Analyze grammar]

upakrīḍanti tānrājañśubhāścāpsarasāṃ gaṇāḥ |
etāṃllokānavāpnoti gāṃ dattvā vai yudhiṣṭhira || 29 ||
[Analyze grammar]

yāsāmadhipatiḥ pūṣā māruto balavānbalī |
aiśvarye varuṇo rājā tā māṃ pāntu yugaṃdharāḥ || 30 ||
[Analyze grammar]

surūpā bahurūpāśca viśvarūpāśca mātaraḥ |
prājāpatyā iti brahmañjapennityaṃ yatavrataḥ || 31 ||
[Analyze grammar]

gāstu śuśrūṣate yaśca samanveti ca sarvaśaḥ |
tasmai tuṣṭāḥ prayacchanti varānapi sudurlabhān || 32 ||
[Analyze grammar]

na druhyenmanasā cāpi goṣu tā hi sukhapradāḥ |
arcayeta sadā caiva namaskāraiśca pūjayet |
dāntaḥ prītamanā nityaṃ gavāṃ vyuṣṭiṃ tathāśnute || 33 ||
[Analyze grammar]

yena devāḥ pavitreṇa bhuñjate lokamuttamam |
yatpavitraṃ pavitrāṇāṃ tadghṛtaṃ śirasā vahet || 34 ||
[Analyze grammar]

ghṛtena juhuyādagniṃ ghṛtena svasti vācayet |
ghṛtaṃ prāśedghṛtaṃ dadyādgavāṃ vyuṣṭiṃ tathāśnute || 35 ||
[Analyze grammar]

tryahamuṣṇaṃ pibenmūtraṃ tryahamuṣṇaṃ pibetpayaḥ |
gavāmuṣṇaṃ payaḥ pītvā tryahamuṣṇaṃ ghṛtaṃ pibet |
tryahamuṣṇaṃ ghṛtaṃ pītvā vāyubhakṣo bhavettryaham || 36 ||
[Analyze grammar]

nirhṛtaiśca yavairgobhirmāsaṃ prasṛtayāvakaḥ |
brahmahatyāsamaṃ pāpaṃ sarvametena śudhyati || 37 ||
[Analyze grammar]

parābhavārthaṃ daityānāṃ devaiḥ śaucamidaṃ kṛtam |
devatvamapi ca prāptāḥ saṃsiddhāśca mahābalāḥ || 38 ||
[Analyze grammar]

gāvaḥ pavitrāḥ puṇyāśca pāvanaṃ paramaṃ mahat |
tāśca dattvā dvijātibhyo naraḥ svargamupāśnute || 39 ||
[Analyze grammar]

gavāṃ madhye śucirbhūtvā gomatīṃ manasā japet |
pūtābhiradbhirācamya śucirbhavati nirmalaḥ || 40 ||
[Analyze grammar]

agnimadhye gavāṃ madhye brāhmaṇānāṃ ca saṃsadi |
vidyāvedavratasnātā brāhmaṇāḥ puṇyakarmiṇaḥ || 41 ||
[Analyze grammar]

adhyāpayerañśiṣyānvai gomatīṃ yajñasaṃmitām |
trirātropoṣitaḥ śrutvā gomatīṃ labhate varam || 42 ||
[Analyze grammar]

putrakāmaśca labhate putraṃ dhanamathāpi ca |
patikāmā ca bhartāraṃ sarvakāmāṃśca mānavaḥ |
gāvastuṣṭāḥ prayacchanti sevitā vai na saṃśayaḥ || 43 ||
[Analyze grammar]

evametā mahābhāgā yajñiyāḥ sarvakāmadāḥ |
rohiṇya iti jānīhi naitābhyo vidyate param || 44 ||
[Analyze grammar]

ityuktaḥ sa mahātejāḥ śukaḥ pitrā mahātmanā |
pūjayāmāsa gā nityaṃ tasmāttvamapi pūjaya || 45 ||
[Analyze grammar]