Chapter 69

bhīṣma uvāca |
atraiva kīrtyate sadbhirbrāhmaṇasvābhimarśane |
nṛgeṇa sumahatkṛcchraṃ yadavāptaṃ kurūdvaha || 1 ||
[Analyze grammar]

niviśantyāṃ purā pārtha dvāravatyāmiti śrutiḥ |
adṛśyata mahākūpastṛṇavīrutsamāvṛtaḥ || 2 ||
[Analyze grammar]

prayatnaṃ tatra kurvāṇāstasmātkūpājjalārthinaḥ |
śrameṇa mahatā yuktāstasmiṃstoye susaṃvṛte || 3 ||
[Analyze grammar]

dadṛśuste mahākāyaṃ kṛkalāsamavasthitam |
tasya coddharaṇe yatnamakurvaṃste sahasraśaḥ || 4 ||
[Analyze grammar]

pragrahaiścarmapaṭṭaiśca taṃ baddhvā parvatopamam |
nāśaknuvansamuddhartuṃ tato jagmurjanārdanam || 5 ||
[Analyze grammar]

khamāvṛtyodapānasya kṛkalāsaḥ sthito mahān |
tasya nāsti samuddhartetyatha kṛṣṇe nyavedayan || 6 ||
[Analyze grammar]

sa vāsudevena samuddhṛtaśca pṛṣṭaśca kāmānnijagāda rājā |
nṛgastadātmānamatho nyavedayatpurātanaṃ yajñasahasrayājinam || 7 ||
[Analyze grammar]

tathā bruvāṇaṃ tu tamāha mādhavaḥ śubhaṃ tvayā karma kṛtaṃ na pāpakam |
kathaṃ bhavāndurgatimīdṛśīṃ gato narendra tadbrūhi kimetadīdṛśam || 8 ||
[Analyze grammar]

śataṃ sahasrāṇi śataṃ gavāṃ punaḥ punaḥ śatānyaṣṭa śatāyutāni |
tvayā purā dattamitīha śuśruma nṛpa dvijebhyaḥ kva nu tadgataṃ tava || 9 ||
[Analyze grammar]

nṛgastato'bravītkṛṣṇaṃ brāhmaṇasyāgnihotriṇaḥ |
proṣitasya paribhraṣṭā gaurekā mama godhane || 10 ||
[Analyze grammar]

gavāṃ sahasre saṃkhyātā tadā sā paśupairmama |
sā brāhmaṇāya me dattā pretyārthamabhikāṅkṣatā || 11 ||
[Analyze grammar]

apaśyatparimārgaṃśca tāṃ yāṃ paragṛhe dvijaḥ |
mameyamiti covāca brāhmaṇo yasya sābhavat || 12 ||
[Analyze grammar]

tāvubhau samanuprāptau vivadantau bhṛśajvarau |
bhavāndātā bhavānhartetyatha tau māṃ tadocatuḥ || 13 ||
[Analyze grammar]

śatena śatasaṃkhyena gavāṃ vinimayena vai |
yāce pratigrahītāraṃ sa tu māmabravīdidam || 14 ||
[Analyze grammar]

deśakālopasaṃpannā dogdhrī kṣāntātivatsalā |
svādukṣīrapradā dhanyā mama nityaṃ niveśane || 15 ||
[Analyze grammar]

kṛśaṃ ca bharate yā gaurmama putramapastanam |
na sā śakyā mayā hātumityuktvā sa jagāma ha || 16 ||
[Analyze grammar]

tatastamaparaṃ vipraṃ yāce vinimayena vai |
gavāṃ śatasahasraṃ vai tatkṛte gṛhyatāmiti || 17 ||
[Analyze grammar]

brāhmaṇa uvāca |
na rājñāṃ pratigṛhṇāmi śakto'haṃ svasya mārgaṇe |
saiva gaurdīyatāṃ śīghraṃ mameti madhusūdana || 18 ||
[Analyze grammar]

rukmamaśvāṃśca dadato rajataṃ syandanāṃstathā |
na jagrāha yayau cāpi tadā sa brāhmaṇarṣabhaḥ || 19 ||
[Analyze grammar]

etasminneva kāle tu coditaḥ kāladharmaṇā |
pitṛlokamahaṃ prāpya dharmarājamupāgamam || 20 ||
[Analyze grammar]

yamastu pūjayitvā māṃ tato vacanamabravīt |
nāntaḥ saṃkhyāyate rājaṃstava puṇyasya karmaṇaḥ || 21 ||
[Analyze grammar]

asti caiva kṛtaṃ pāpamajñānāttadapi tvayā |
carasva pāpaṃ paścādvā pūrvaṃ vā tvaṃ yathecchasi || 22 ||
[Analyze grammar]

rakṣitāsmīti coktaṃ te pratijñā cānṛtā tava |
brāhmaṇasvasya cādānaṃ trividhaste vyatikramaḥ || 23 ||
[Analyze grammar]

pūrvaṃ kṛcchraṃ cariṣye'haṃ paścācchubhamiti prabho |
dharmarājaṃ bruvannevaṃ patito'smi mahītale || 24 ||
[Analyze grammar]

aśrauṣaṃ pracyutaścāhaṃ yamasyoccaiḥ prabhāṣataḥ |
vāsudevaḥ samuddhartā bhavitā te janārdanaḥ || 25 ||
[Analyze grammar]

pūrṇe varṣasahasrānte kṣīṇe karmaṇi duṣkṛte |
prāpsyase śāśvatāṃllokāñjitānsvenaiva karmaṇā || 26 ||
[Analyze grammar]

kūpe''tmānamadhaḥśīrṣamapaśyaṃ patitaṃ ca ha |
tiryagyonimanuprāptaṃ na tu māmajahātsmṛtiḥ || 27 ||
[Analyze grammar]

tvayā tu tārito'smyadya kimanyatra tapobalāt |
anujānīhi māṃ kṛṣṇa gaccheyaṃ divamadya vai || 28 ||
[Analyze grammar]

anujñātaḥ sa kṛṣṇena namaskṛtya janārdanam |
vimānaṃ divyamāsthāya yayau divamariṃdama || 29 ||
[Analyze grammar]

tatastasmindivaṃ prāpte nṛge bharatasattama |
vāsudeva imaṃ ślokaṃ jagāda kurunandana || 30 ||
[Analyze grammar]

brāhmaṇasvaṃ na hartavyaṃ puruṣeṇa vijānatā |
brāhmaṇasvaṃ hṛtaṃ hanti nṛgaṃ brāhmaṇagauriva || 31 ||
[Analyze grammar]

satāṃ samāgamaḥ sadbhirnāphalaḥ pārtha vidyate |
vimuktaṃ narakātpaśya nṛgaṃ sādhusamāgamāt || 32 ||
[Analyze grammar]

pradānaṃ phalavattatra drohastatra tathāphalaḥ |
apacāraṃ gavāṃ tasmādvarjayeta yudhiṣṭhira || 33 ||
[Analyze grammar]