Chapter 17

vāsudeva uvāca |
tataḥ sa prayato bhūtvā mama tāta yudhiṣṭhira |
prāñjaliḥ prāha viprarṣirnāmasaṃhāramāditaḥ || 1 ||
[Analyze grammar]

upamanyuruvāca |
brahmaproktairṛṣiproktairvedavedāṅgasaṃbhavaiḥ |
sarvalokeṣu vikhyātaiḥ sthāṇuṃ stoṣyāmi nāmabhiḥ || 2 ||
[Analyze grammar]

mahadbhirvihitaiḥ satyaiḥ siddhaiḥ sarvārthasādhakaiḥ |
ṛṣiṇā taṇḍinā bhaktyā kṛtairdevakṛtātmanā || 3 ||
[Analyze grammar]

yathoktairlokavikhyātairmunibhistattvadarśibhiḥ |
pravaraṃ prathamaṃ svargyaṃ sarvabhūtahitaṃ śubham |
śrutaiḥ sarvatra jagati brahmalokāvatāritaiḥ || 4 ||
[Analyze grammar]

yattadrahasyaṃ paramaṃ brahmaproktaṃ sanātanam |
vakṣye yadukulaśreṣṭha śṛṇuṣvāvahito mama || 5 ||
[Analyze grammar]

paratvena bhavaṃ devaṃ bhaktastvaṃ parameśvaram |
tena te śrāvayiṣyāmi yattadbrahma sanātanam || 6 ||
[Analyze grammar]

na śakyaṃ vistarātkṛtsnaṃ vaktuṃ śarvasya kenacit |
yuktenāpi vibhūtīnāmapi varṣaśatairapi || 7 ||
[Analyze grammar]

yasyādirmadhyamantaśca surairapi na gamyate |
kastasya śaknuyādvaktuṃ guṇānkārtsnyena mādhava || 8 ||
[Analyze grammar]

kiṃ tu devasya mahataḥ saṃkṣiptārthapadākṣaram |
śaktitaścaritaṃ vakṣye prasādāttasya caiva hi || 9 ||
[Analyze grammar]

aprāpyeha tato'nujñāṃ na śakyaḥ stotumīśvaraḥ |
yadā tenābhyanujñātaḥ stuvatyeva sadā bhavam || 10 ||
[Analyze grammar]

anādinidhanasyāhaṃ sarvayonermahātmanaḥ |
nāmnāṃ kaṃcitsamuddeśaṃ vakṣye hyavyaktayoninaḥ || 11 ||
[Analyze grammar]

varadasya vareṇyasya viśvarūpasya dhīmataḥ |
śṛṇu nāmasamuddeśaṃ yaduktaṃ padmayoninā || 12 ||
[Analyze grammar]

daśa nāmasahasrāṇi yānyāha prapitāmahaḥ |
tāni nirmathya manasā dadhno ghṛtamivoddhṛtam || 13 ||
[Analyze grammar]

gireḥ sāraṃ yathā hema puṣpātsāraṃ yathā madhu |
ghṛtātsāraṃ yathā maṇḍastathaitatsāramuddhṛtam || 14 ||
[Analyze grammar]

sarvapāpmāpahamidaṃ caturvedasamanvitam |
prayatnenādhigantavyaṃ dhāryaṃ ca prayatātmanā |
śāntikaṃ pauṣṭikaṃ caiva rakṣoghnaṃ pāvanaṃ mahat || 15 ||
[Analyze grammar]

idaṃ bhaktāya dātavyaṃ śraddadhānāstikāya ca |
nāśraddadhānarūpāya nāstikāyājitātmane || 16 ||
[Analyze grammar]

yaścābhyasūyate devaṃ bhūtātmānaṃ pinākinam |
sa kṛṣṇa narakaṃ yāti saha pūrvaiḥ sahānugaiḥ || 17 ||
[Analyze grammar]

idaṃ dhyānamidaṃ yogamidaṃ dhyeyamanuttamam |
idaṃ japyamidaṃ jñānaṃ rahasyamidamuttamam |
idaṃ jñātvāntakāle'pi gaccheddhi paramāṃ gatim || 18 ||
[Analyze grammar]

pavitraṃ maṅgalaṃ puṇyaṃ kalyāṇamidamuttamam |
nigadiṣye mahābāho stavānāmuttamaṃ stavam || 19 ||
[Analyze grammar]

idaṃ brahmā purā kṛtvā sarvalokapitāmahaḥ |
sarvastavānāṃ divyānāṃ rājatve samakalpayat || 20 ||
[Analyze grammar]

tadāprabhṛti caivāyamīśvarasya mahātmanaḥ |
stavarājeti vikhyāto jagatyamarapūjitaḥ |
brahmalokādayaṃ caiva stavarājo'vatāritaḥ || 21 ||
[Analyze grammar]

yasmāttaṇḍiḥ purā prāha tena taṇḍikṛto'bhavat |
svargāccaivātra bhūlokaṃ taṇḍinā hyavatāritaḥ || 22 ||
[Analyze grammar]

sarvamaṅgalamaṅgalyaṃ sarvapāpapraṇāśanam |
nigadiṣye mahābāho stavānāmuttamaṃ stavam || 23 ||
[Analyze grammar]

brahmaṇāmapi yadbrahma parāṇāmapi yatparam |
tejasāmapi yattejastapasāmapi yattapaḥ || 24 ||
[Analyze grammar]

śāntīnāmapi yā śāntirdyutīnāmapi yā dyutiḥ |
dāntānāmapi yo dānto dhīmatāmapi yā ca dhīḥ || 25 ||
[Analyze grammar]

devānāmapi yo devo munīnāmapi yo muniḥ |
yajñānāmapi yo yajñaḥ śivānāmapi yaḥ śivaḥ || 26 ||
[Analyze grammar]

rudrāṇāmapi yo rudraḥ prabhuḥ prabhavatāmapi |
yogināmapi yo yogī kāraṇānāṃ ca kāraṇam || 27 ||
[Analyze grammar]

yato lokāḥ saṃbhavanti na bhavanti yataḥ punaḥ |
sarvabhūtātmabhūtasya harasyāmitatejasaḥ || 28 ||
[Analyze grammar]

aṣṭottarasahasraṃ tu nāmnāṃ śarvasya me śṛṇu |
yacchrutvā manujaśreṣṭha sarvānkāmānavāpsyasi || 29 ||
[Analyze grammar]

sthiraḥ sthāṇuḥ prabhurbhānuḥ pravaro varado varaḥ |
sarvātmā sarvavikhyātaḥ sarvaḥ sarvakaro bhavaḥ || 30 ||
[Analyze grammar]

jaṭī carmī śikhaṇḍī ca sarvāṅgaḥ sarvabhāvanaḥ |
hariśca hariṇākṣaśca sarvabhūtaharaḥ prabhuḥ || 31 ||
[Analyze grammar]

pravṛttiśca nivṛttiśca niyataḥ śāśvato dhruvaḥ |
śmaśānacārī bhagavānkhacaro gocaro'rdanaḥ || 32 ||
[Analyze grammar]

abhivādyo mahākarmā tapasvī bhūtabhāvanaḥ |
unmattaveśapracchannaḥ sarvalokaprajāpatiḥ || 33 ||
[Analyze grammar]

mahārūpo mahākāyaḥ sarvarūpo mahāyaśāḥ |
mahātmā sarvabhūtaśca virūpo vāmano manuḥ || 34 ||
[Analyze grammar]

lokapālo'ntarhitātmā prasādo hayagardabhiḥ |
pavitraśca mahāṃścaiva niyamo niyamāśrayaḥ || 35 ||
[Analyze grammar]

sarvakarmā svayaṃbhūśca ādirādikaro nidhiḥ |
sahasrākṣo virūpākṣaḥ somo nakṣatrasādhakaḥ || 36 ||
[Analyze grammar]

candrasūryagatiḥ keturgraho grahapatirvaraḥ |
adriradryālayaḥ kartā mṛgabāṇārpaṇo'naghaḥ || 37 ||
[Analyze grammar]

mahātapā ghoratapā adīno dīnasādhakaḥ |
saṃvatsarakaro mantraḥ pramāṇaṃ paramaṃ tapaḥ || 38 ||
[Analyze grammar]

yogī yojyo mahābījo mahāretā mahātapāḥ |
suvarṇaretāḥ sarvajñaḥ subījo vṛṣavāhanaḥ || 39 ||
[Analyze grammar]

daśabāhustvanimiṣo nīlakaṇṭha umāpatiḥ |
viśvarūpaḥ svayaṃśreṣṭho balavīro balo gaṇaḥ || 40 ||
[Analyze grammar]

gaṇakartā gaṇapatirdigvāsāḥ kāmya eva ca |
pavitraṃ paramaṃ mantraḥ sarvabhāvakaro haraḥ || 41 ||
[Analyze grammar]

kamaṇḍaludharo dhanvī bāṇahastaḥ kapālavān |
aśanī śataghnī khaḍgī paṭṭiśī cāyudhī mahān || 42 ||
[Analyze grammar]

sruvahastaḥ surūpaśca tejastejaskaro nidhiḥ |
uṣṇīṣī ca suvaktraśca udagro vinatastathā || 43 ||
[Analyze grammar]

dīrghaśca harikeśaśca sutīrthaḥ kṛṣṇa eva ca |
sṛgālarūpaḥ sarvārtho muṇḍaḥ kuṇḍī kamaṇḍaluḥ || 44 ||
[Analyze grammar]

ajaśca mṛgarūpaśca gandhadhārī kapardyapi |
ūrdhvaretā ūrdhvaliṅga ūrdhvaśāyī nabhastalaḥ || 45 ||
[Analyze grammar]

trijaṭaścīravāsāśca rudraḥ senāpatirvibhuḥ |
ahaścaro'tha naktaṃ ca tigmamanyuḥ suvarcasaḥ || 46 ||
[Analyze grammar]

gajahā daityahā loko lokadhātā guṇākaraḥ |
siṃhaśārdūlarūpaśca ārdracarmāmbarāvṛtaḥ || 47 ||
[Analyze grammar]

kālayogī mahānādaḥ sarvavāsaścatuṣpathaḥ |
niśācaraḥ pretacārī bhūtacārī maheśvaraḥ || 48 ||
[Analyze grammar]

bahubhūto bahudhanaḥ sarvādhāro'mito gatiḥ |
nṛtyapriyo nityanarto nartakaḥ sarvalāsakaḥ || 49 ||
[Analyze grammar]

ghoro mahātapāḥ pāśo nityo giricaro nabhaḥ |
sahasrahasto vijayo vyavasāyo hyaninditaḥ || 50 ||
[Analyze grammar]

amarṣaṇo marṣaṇātmā yajñahā kāmanāśanaḥ |
dakṣayajñāpahārī ca susaho madhyamastathā || 51 ||
[Analyze grammar]

tejopahārī balahā mudito'rtho jito varaḥ |
gambhīraghoṣo gambhīro gambhīrabalavāhanaḥ || 52 ||
[Analyze grammar]

nyagrodharūpo nyagrodho vṛkṣakarṇasthitirvibhuḥ |
tīkṣṇatāpaśca haryaśvaḥ sahāyaḥ karmakālavit || 53 ||
[Analyze grammar]

viṣṇuprasādito yajñaḥ samudro vaḍavāmukhaḥ |
hutāśanasahāyaśca praśāntātmā hutāśanaḥ || 54 ||
[Analyze grammar]

ugratejā mahātejā jayo vijayakālavit |
jyotiṣāmayanaṃ siddhiḥ saṃdhirvigraha eva ca || 55 ||
[Analyze grammar]

śikhī daṇḍī jaṭī jvālī mūrtijo mūrdhago balī |
vaiṇavī paṇavī tālī kālaḥ kālakaṭaṃkaṭaḥ || 56 ||
[Analyze grammar]

nakṣatravigrahavidhirguṇavṛddhirlayo'gamaḥ |
prajāpatirdiśābāhurvibhāgaḥ sarvatomukhaḥ || 57 ||
[Analyze grammar]

vimocanaḥ suragaṇo hiraṇyakavacodbhavaḥ |
meḍhrajo balacārī ca mahācārī stutastathā || 58 ||
[Analyze grammar]

sarvatūryaninādī ca sarvavādyaparigrahaḥ |
vyālarūpo bilāvāsī hemamālī taraṃgavit || 59 ||
[Analyze grammar]

tridaśastrikāladhṛkkarmasarvabandhavimocanaḥ |
bandhanastvasurendrāṇāṃ yudhi śatruvināśanaḥ || 60 ||
[Analyze grammar]

sāṃkhyaprasādo durvāsāḥ sarvasādhuniṣevitaḥ |
praskandano vibhāgaśca atulyo yajñabhāgavit || 61 ||
[Analyze grammar]

sarvāvāsaḥ sarvacārī durvāsā vāsavo'maraḥ |
hemo hemakaro yajñaḥ sarvadhārī dharottamaḥ || 62 ||
[Analyze grammar]

lohitākṣo mahākṣaśca vijayākṣo viśāradaḥ |
saṃgraho nigrahaḥ kartā sarpacīranivāsanaḥ || 63 ||
[Analyze grammar]

mukhyo'mukhyaśca dehaśca deharddhiḥ sarvakāmadaḥ |
sarvakālaprasādaśca subalo balarūpadhṛk || 64 ||
[Analyze grammar]

ākāśanidhirūpaśca nipātī uragaḥ khagaḥ |
raudrarūpoṃ'śurādityo vasuraśmiḥ suvarcasī || 65 ||
[Analyze grammar]

vasuvego mahāvego manovego niśācaraḥ |
sarvāvāsī śriyāvāsī upadeśakaro haraḥ || 66 ||
[Analyze grammar]

munirātmapatirloke saṃbhojyaśca sahasradaḥ |
pakṣī ca pakṣirūpī ca atidīpto viśāṃ patiḥ || 67 ||
[Analyze grammar]

unmādo madanākāro arthārthakararomaśaḥ |
vāmadevaśca vāmaśca prāgdakṣiṇyaśca vāmanaḥ || 68 ||
[Analyze grammar]

siddhayogāpahārī ca siddhaḥ sarvārthasādhakaḥ |
bhikṣuśca bhikṣurūpaśca viṣāṇī mṛduravyayaḥ || 69 ||
[Analyze grammar]

mahāseno viśākhaśca ṣaṣṭibhāgo gavāṃ patiḥ |
vajrahastaśca viṣkambhī camūstambhana eva ca || 70 ||
[Analyze grammar]

ṛturṛtukaraḥ kālo madhurmadhukaro'calaḥ |
vānaspatyo vājaseno nityamāśramapūjitaḥ || 71 ||
[Analyze grammar]

brahmacārī lokacārī sarvacārī sucāravit |
īśāna īśvaraḥ kālo niśācārī pinākadhṛk || 72 ||
[Analyze grammar]

nandīśvaraśca nandī ca nandano nandivardhanaḥ |
bhagasyākṣinihantā ca kālo brahmavidāṃ varaḥ || 73 ||
[Analyze grammar]

caturmukho mahāliṅgaścāruliṅgastathaiva ca |
liṅgādhyakṣaḥ surādhyakṣo lokādhyakṣo yugāvahaḥ || 74 ||
[Analyze grammar]

bījādhyakṣo bījakartā adhyātmānugato balaḥ |
itihāsakaraḥ kalpo gautamo'tha jaleśvaraḥ || 75 ||
[Analyze grammar]

dambho hyadambho vaidambho vaśyo vaśyakaraḥ kaviḥ |
lokakartā paśupatirmahākartā mahauṣadhiḥ || 76 ||
[Analyze grammar]

akṣaraṃ paramaṃ brahma balavāñśakra eva ca |
nītirhyanītiḥ śuddhātmā śuddho mānyo manogatiḥ || 77 ||
[Analyze grammar]

bahuprasādaḥ svapano darpaṇo'tha tvamitrajit |
vedakāraḥ sūtrakāro vidvānsamaramardanaḥ || 78 ||
[Analyze grammar]

mahāmeghanivāsī ca mahāghoro vaśīkaraḥ |
agnijvālo mahājvālo atidhūmro huto haviḥ || 79 ||
[Analyze grammar]

vṛṣaṇaḥ śaṃkaro nityo varcasvī dhūmaketanaḥ |
nīlastathāṅgalubdhaśca śobhano niravagrahaḥ || 80 ||
[Analyze grammar]

svastidaḥ svastibhāvaśca bhāgī bhāgakaro laghuḥ |
utsaṅgaśca mahāṅgaśca mahāgarbhaḥ paro yuvā || 81 ||
[Analyze grammar]

kṛṣṇavarṇaḥ suvarṇaśca indriyaḥ sarvadehinām |
mahāpādo mahāhasto mahākāyo mahāyaśāḥ || 82 ||
[Analyze grammar]

mahāmūrdhā mahāmātro mahānetro digālayaḥ |
mahādanto mahākarṇo mahāmeḍhro mahāhanuḥ || 83 ||
[Analyze grammar]

mahānāso mahākamburmahāgrīvaḥ śmaśānadhṛk |
mahāvakṣā mahorasko antarātmā mṛgālayaḥ || 84 ||
[Analyze grammar]

lambano lambitoṣṭhaśca mahāmāyaḥ payonidhiḥ |
mahādanto mahādaṃṣṭro mahājihvo mahāmukhaḥ || 85 ||
[Analyze grammar]

mahānakho mahāromā mahākeśo mahājaṭaḥ |
asapatnaḥ prasādaśca pratyayo girisādhanaḥ || 86 ||
[Analyze grammar]

snehano'snehanaścaiva ajitaśca mahāmuniḥ |
vṛkṣākāro vṛkṣaketuranalo vāyuvāhanaḥ || 87 ||
[Analyze grammar]

maṇḍalī merudhāmā ca devadānavadarpahā |
atharvaśīrṣaḥ sāmāsya ṛksahasrāmitekṣaṇaḥ || 88 ||
[Analyze grammar]

yajuḥpādabhujo guhyaḥ prakāśo jaṅgamastathā |
amoghārthaḥ prasādaśca abhigamyaḥ sudarśanaḥ || 89 ||
[Analyze grammar]

upahārapriyaḥ śarvaḥ kanakaḥ kāñcanaḥ sthiraḥ |
nābhirnandikaro bhāvyaḥ puṣkarasthapatiḥ sthiraḥ || 90 ||
[Analyze grammar]

dvādaśastrāsanaścādyo yajño yajñasamāhitaḥ |
naktaṃ kaliśca kālaśca makaraḥ kālapūjitaḥ || 91 ||
[Analyze grammar]

sagaṇo gaṇakāraśca bhūtabhāvanasārathiḥ |
bhasmaśāyī bhasmagoptā bhasmabhūtastarurgaṇaḥ || 92 ||
[Analyze grammar]

agaṇaścaiva lopaśca mahātmā sarvapūjitaḥ |
śaṅkustriśaṅkuḥ saṃpannaḥ śucirbhūtaniṣevitaḥ || 93 ||
[Analyze grammar]

āśramasthaḥ kapotastho viśvakarmā patirvaraḥ |
śākho viśākhastāmroṣṭho hyambujālaḥ suniścayaḥ || 94 ||
[Analyze grammar]

kapilo'kapilaḥ śūra āyuścaiva paro'paraḥ |
gandharvo hyaditistārkṣyaḥ suvijñeyaḥ susārathiḥ || 95 ||
[Analyze grammar]

paraśvadhāyudho deva arthakārī subāndhavaḥ |
tumbavīṇī mahākopa ūrdhvaretā jaleśayaḥ || 96 ||
[Analyze grammar]

ugro vaṃśakaro vaṃśo vaṃśanādo hyaninditaḥ |
sarvāṅgarūpo māyāvī suhṛdo hyanilo'nalaḥ || 97 ||
[Analyze grammar]

bandhano bandhakartā ca subandhanavimocanaḥ |
sa yajñāriḥ sa kāmārirmahādaṃṣṭro mahāyudhaḥ || 98 ||
[Analyze grammar]

bāhustvaninditaḥ śarvaḥ śaṃkaraḥ śaṃkaro'dhanaḥ |
amareśo mahādevo viśvadevaḥ surārihā || 99 ||
[Analyze grammar]

ahirbudhno nirṛtiśca cekitāno haristathā |
ajaikapācca kāpālī triśaṅkurajitaḥ śivaḥ || 100 ||
[Analyze grammar]

dhanvantarirdhūmaketuḥ skando vaiśravaṇastathā |
dhātā śakraśca viṣṇuśca mitrastvaṣṭā dhruvo dharaḥ || 101 ||
[Analyze grammar]

prabhāvaḥ sarvago vāyuraryamā savitā raviḥ |
udagraśca vidhātā ca māndhātā bhūtabhāvanaḥ || 102 ||
[Analyze grammar]

ratitīrthaśca vāgmī ca sarvakāmaguṇāvahaḥ |
padmagarbho mahāgarbhaścandravaktro manoramaḥ || 103 ||
[Analyze grammar]

balavāṃścopaśāntaśca purāṇaḥ puṇyacañcurī |
kurukartā kālarūpī kurubhūto maheśvaraḥ || 104 ||
[Analyze grammar]

sarvāśayo darbhaśāyī sarveṣāṃ prāṇināṃ patiḥ |
devadevamukho'saktaḥ sadasatsarvaratnavit || 105 ||
[Analyze grammar]

kailāsaśikharāvāsī himavadgirisaṃśrayaḥ |
kūlahārī kūlakartā bahuvidyo bahupradaḥ || 106 ||
[Analyze grammar]

vaṇijo vardhano vṛkṣo nakulaścandanaśchadaḥ |
sāragrīvo mahājatruralolaśca mahauṣadhaḥ || 107 ||
[Analyze grammar]

siddhārthakārī siddhārthaśchandovyākaraṇottaraḥ |
siṃhanādaḥ siṃhadaṃṣṭraḥ siṃhagaḥ siṃhavāhanaḥ || 108 ||
[Analyze grammar]

prabhāvātmā jagatkālastālo lokahitastaruḥ |
sāraṅgo navacakrāṅgaḥ ketumālī sabhāvanaḥ || 109 ||
[Analyze grammar]

bhūtālayo bhūtapatirahorātramaninditaḥ |
vāhitā sarvabhūtānāṃ nilayaśca vibhurbhavaḥ || 110 ||
[Analyze grammar]

amoghaḥ saṃyato hyaśvo bhojanaḥ prāṇadhāraṇaḥ |
dhṛtimānmatimāndakṣaḥ satkṛtaśca yugādhipaḥ || 111 ||
[Analyze grammar]

gopālirgopatirgrāmo gocarmavasano haraḥ |
hiraṇyabāhuśca tathā guhāpālaḥ praveśinām || 112 ||
[Analyze grammar]

pratiṣṭhāyī mahāharṣo jitakāmo jitendriyaḥ |
gandhāraśca surālaśca tapaḥkarmaratirdhanuḥ || 113 ||
[Analyze grammar]

mahāgīto mahānṛtto hyapsarogaṇasevitaḥ |
mahāketurdhanurdhāturnaikasānucaraścalaḥ || 114 ||
[Analyze grammar]

āvedanīya āveśaḥ sarvagandhasukhāvahaḥ |
toraṇastāraṇo vāyuḥ paridhāvati caikataḥ || 115 ||
[Analyze grammar]

saṃyogo vardhano vṛddho mahāvṛddho gaṇādhipaḥ |
nitya ātmasahāyaśca devāsurapatiḥ patiḥ || 116 ||
[Analyze grammar]

yuktaśca yuktabāhuśca dvividhaśca suparvaṇaḥ |
āṣāḍhaśca suṣāḍhaśca dhruvo harihaṇo haraḥ || 117 ||
[Analyze grammar]

vapurāvartamānebhyo vasuśreṣṭho mahāpathaḥ |
śirohārī vimarṣaśca sarvalakṣaṇabhūṣitaḥ || 118 ||
[Analyze grammar]

akṣaśca rathayogī ca sarvayogī mahābalaḥ |
samāmnāyo'samāmnāyastīrthadevo mahārathaḥ || 119 ||
[Analyze grammar]

nirjīvo jīvano mantraḥ śubhākṣo bahukarkaśaḥ |
ratnaprabhūto raktāṅgo mahārṇavanipānavit || 120 ||
[Analyze grammar]

mūlo viśālo hyamṛto vyaktāvyaktastaponidhiḥ |
ārohaṇo nirohaśca śailahārī mahātapāḥ || 121 ||
[Analyze grammar]

senākalpo mahākalpo yugāyugakaro hariḥ |
yugarūpo mahārūpaḥ pavano gahano nagaḥ || 122 ||
[Analyze grammar]

nyāyanirvāpaṇaḥ pādaḥ paṇḍito hyacalopamaḥ |
bahumālo mahāmālaḥ sumālo bahulocanaḥ || 123 ||
[Analyze grammar]

vistāro lavaṇaḥ kūpaḥ kusumaḥ saphalodayaḥ |
vṛṣabho vṛṣabhāṅkāṅgo maṇibilvo jaṭādharaḥ || 124 ||
[Analyze grammar]

indurvisargaḥ sumukhaḥ suraḥ sarvāyudhaḥ sahaḥ |
nivedanaḥ sudhājātaḥ sugandhāro mahādhanuḥ || 125 ||
[Analyze grammar]

gandhamālī ca bhagavānutthānaḥ sarvakarmaṇām |
manthāno bahulo bāhuḥ sakalaḥ sarvalocanaḥ || 126 ||
[Analyze grammar]

tarastālī karastālī ūrdhvasaṃhanano vahaḥ |
chatraṃ succhatro vikhyātaḥ sarvalokāśrayo mahān || 127 ||
[Analyze grammar]

muṇḍo virūpo vikṛto daṇḍimuṇḍo vikurvaṇaḥ |
haryakṣaḥ kakubho vajrī dīptajihvaḥ sahasrapāt || 128 ||
[Analyze grammar]

sahasramūrdhā devendraḥ sarvadevamayo guruḥ |
sahasrabāhuḥ sarvāṅgaḥ śaraṇyaḥ sarvalokakṛt || 129 ||
[Analyze grammar]

pavitraṃ trimadhurmantraḥ kaniṣṭhaḥ kṛṣṇapiṅgalaḥ |
brahmadaṇḍavinirmātā śataghnī śatapāśadhṛk || 130 ||
[Analyze grammar]

padmagarbho mahāgarbho brahmagarbho jalodbhavaḥ |
gabhastirbrahmakṛdbrahmā brahmavidbrāhmaṇo gatiḥ || 131 ||
[Analyze grammar]

anantarūpo naikātmā tigmatejāḥ svayaṃbhuvaḥ |
ūrdhvagātmā paśupatirvātaraṃhā manojavaḥ || 132 ||
[Analyze grammar]

candanī padmamālāgryaḥ surabhyuttaraṇo naraḥ |
karṇikāramahāsragvī nīlamauliḥ pinākadhṛk || 133 ||
[Analyze grammar]

umāpatirumākānto jāhnavīdhṛgumādhavaḥ |
varo varāho varado vareśaḥ sumahāsvanaḥ || 134 ||
[Analyze grammar]

mahāprasādo damanaḥ śatruhā śvetapiṅgalaḥ |
prītātmā prayatātmā ca saṃyatātmā pradhānadhṛk || 135 ||
[Analyze grammar]

sarvapārśvasutastārkṣyo dharmasādhāraṇo varaḥ |
carācarātmā sūkṣmātmā suvṛṣo govṛṣeśvaraḥ || 136 ||
[Analyze grammar]

sādhyarṣirvasurādityo vivasvānsavitā mṛḍaḥ |
vyāsaḥ sarvasya saṃkṣepo vistaraḥ paryayo nayaḥ || 137 ||
[Analyze grammar]

ṛtuḥ saṃvatsaro māsaḥ pakṣaḥ saṃkhyāsamāpanaḥ |
kalā kāṣṭhā lavo mātrā muhūrto'haḥ kṣapāḥ kṣaṇāḥ || 138 ||
[Analyze grammar]

viśvakṣetraṃ prajābījaṃ liṅgamādyastvaninditaḥ |
sadasadvyaktamavyaktaṃ pitā mātā pitāmahaḥ || 139 ||
[Analyze grammar]

svargadvāraṃ prajādvāraṃ mokṣadvāraṃ triviṣṭapam |
nirvāṇaṃ hlādanaṃ caiva brahmalokaḥ parā gatiḥ || 140 ||
[Analyze grammar]

devāsuravinirmātā devāsuraparāyaṇaḥ |
devāsuragururdevo devāsuranamaskṛtaḥ || 141 ||
[Analyze grammar]

devāsuramahāmātro devāsuragaṇāśrayaḥ |
devāsuragaṇādhyakṣo devāsuragaṇāgraṇīḥ || 142 ||
[Analyze grammar]

devātidevo devarṣirdevāsuravarapradaḥ |
devāsureśvaro devo devāsuramaheśvaraḥ || 143 ||
[Analyze grammar]

sarvadevamayo'cintyo devatātmātmasaṃbhavaḥ |
udbhidastrikramo vaidyo virajo virajombaraḥ || 144 ||
[Analyze grammar]

īḍyo hastī suravyāghro devasiṃho nararṣabhaḥ |
vibudhāgravaraḥ śreṣṭhaḥ sarvadevottamottamaḥ || 145 ||
[Analyze grammar]

prayuktaḥ śobhano vajra īśānaḥ prabhuravyayaḥ |
guruḥ kānto nijaḥ sargaḥ pavitraḥ sarvavāhanaḥ || 146 ||
[Analyze grammar]

śṛṅgī śṛṅgapriyo babhrū rājarājo nirāmayaḥ |
abhirāmaḥ suragaṇo virāmaḥ sarvasādhanaḥ || 147 ||
[Analyze grammar]

lalāṭākṣo viśvadeho hariṇo brahmavarcasaḥ |
sthāvarāṇāṃ patiścaiva niyamendriyavardhanaḥ || 148 ||
[Analyze grammar]

siddhārthaḥ sarvabhūtārtho'cintyaḥ satyavrataḥ śuciḥ |
vratādhipaḥ paraṃ brahma muktānāṃ paramā gatiḥ || 149 ||
[Analyze grammar]

vimukto muktatejāśca śrīmāñśrīvardhano jagat |
yathāpradhānaṃ bhagavāniti bhaktyā stuto mayā || 150 ||
[Analyze grammar]

yaṃ na brahmādayo devā viduryaṃ na maharṣayaḥ |
taṃ stavyamarcyaṃ vandyaṃ ca kaḥ stoṣyati jagatpatim || 151 ||
[Analyze grammar]

bhaktimeva puraskṛtya mayā yajñapatirvasuḥ |
tato'bhyanujñāṃ prāpyaiva stuto matimatāṃ varaḥ || 152 ||
[Analyze grammar]

śivamebhiḥ stuvandevaṃ nāmabhiḥ puṣṭivardhanaiḥ |
nityayuktaḥ śucirbhūtvā prāpnotyātmānamātmanā || 153 ||
[Analyze grammar]

etaddhi paramaṃ brahma svayaṃ gītaṃ svayaṃbhuvā |
ṛṣayaścaiva devāśca stuvantyetena tatparam || 154 ||
[Analyze grammar]

stūyamāno mahādevaḥ prīyate cātmanāmabhiḥ |
bhaktānukampī bhagavānātmasaṃsthānkaroti tān || 155 ||
[Analyze grammar]

tathaiva ca manuṣyeṣu ye manuṣyāḥ pradhānataḥ |
āstikāḥ śraddadhānāśca bahubhirjanmabhiḥ stavaiḥ || 156 ||
[Analyze grammar]

jāgrataśca svapantaśca vrajantaḥ pathi saṃsthitāḥ |
stuvanti stūyamānāśca tuṣyanti ca ramanti ca |
janmakoṭisahasreṣu nānāsaṃsārayoniṣu || 157 ||
[Analyze grammar]

jantorviśuddhapāpasya bhave bhaktiḥ prajāyate |
utpannā ca bhave bhaktirananyā sarvabhāvataḥ || 158 ||
[Analyze grammar]

kāraṇaṃ bhāvitaṃ tasya sarvamuktasya sarvataḥ |
etaddeveṣu duṣprāpaṃ manuṣyeṣu na labhyate || 159 ||
[Analyze grammar]

nirvighnā niścalā rudre bhaktiravyabhicāriṇī |
tasyaiva ca prasādena bhaktirutpadyate nṛṇām |
yayā yānti parāṃ siddhiṃ tadbhāvagatacetasaḥ || 160 ||
[Analyze grammar]

ye sarvabhāvopagatāḥ paratvenābhavannarāḥ |
prapannavatsalo devaḥ saṃsārāttānsamuddharet || 161 ||
[Analyze grammar]

evamanye na kurvanti devāḥ saṃsāramocanam |
manuṣyāṇāṃ mahādevādanyatrāpi tapobalāt || 162 ||
[Analyze grammar]

iti tenendrakalpena bhagavānsadasatpatiḥ |
kṛttivāsāḥ stutaḥ kṛṣṇa taṇḍinā śuddhabuddhinā || 163 ||
[Analyze grammar]

stavametaṃ bhagavato brahmā svayamadhārayat |
brahmā provāca śakrāya śakraḥ provāca mṛtyave || 164 ||
[Analyze grammar]

mṛtyuḥ provāca rudrāṇāṃ rudrebhyastaṇḍimāgamat |
mahatā tapasā prāptastaṇḍinā brahmasadmani || 165 ||
[Analyze grammar]

taṇḍiḥ provāca śukrāya gautamāyāha bhārgavaḥ |
vaivasvatāya manave gautamaḥ prāha mādhava || 166 ||
[Analyze grammar]

nārāyaṇāya sādhyāya manuriṣṭāya dhīmate |
yamāya prāha bhagavānsādhyo nārāyaṇo'cyutaḥ || 167 ||
[Analyze grammar]

nāciketāya bhagavānāha vaivasvato yamaḥ |
mārkaṇḍeyāya vārṣṇeya nāciketo'bhyabhāṣata || 168 ||
[Analyze grammar]

mārkaṇḍeyānmayā prāptaṃ niyamena janārdana |
tavāpyahamamitraghna stavaṃ dadmyadya viśrutam |
svargyamārogyamāyuṣyaṃ dhanyaṃ balyaṃ tathaiva ca || 169 ||
[Analyze grammar]

na tasya vighnaṃ kurvanti dānavā yakṣarākṣasāḥ |
piśācā yātudhānāśca guhyakā bhujagā api || 170 ||
[Analyze grammar]

yaḥ paṭheta śucirbhūtvā brahmacārī jitendriyaḥ |
abhagnayogo varṣaṃ tu so'śvamedhaphalaṃ labhet || 171 ||
[Analyze grammar]