Chapter 14

yudhiṣṭhira uvāca |
pitāmaheśāya vibho nāmānyācakṣva śaṃbhave |
babhrave viśvamāyāya mahābhāgyaṃ ca tattvataḥ || 1 ||
[Analyze grammar]

bhīṣma uvāca |
surāsuraguro deva viṣṇo tvaṃ vaktumarhasi |
śivāya viśvarūpāya yanmāṃ pṛcchadyudhiṣṭhiraḥ || 2 ||
[Analyze grammar]

nāmnāṃ sahasraṃ devasya taṇḍinā brahmayoninā |
niveditaṃ brahmaloke brahmaṇo yatpurābhavat || 3 ||
[Analyze grammar]

dvaipāyanaprabhṛtayastathaiveme tapodhanāḥ |
ṛṣayaḥ suvratā dāntāḥ śṛṇvantu gadatastava || 4 ||
[Analyze grammar]

dhruvāya nandine hotre goptre viśvasṛje'gnaye |
mahābhāgyaṃ vibho brūhi muṇḍine'tha kapardine || 5 ||
[Analyze grammar]

vāsudeva uvāca |
na gatiḥ karmaṇāṃ śakyā vettumīśasya tattvataḥ || 6 ||
[Analyze grammar]

hiraṇyagarbhapramukhā devāḥ sendrā maharṣayaḥ |
na viduryasya nidhanamādiṃ vā sūkṣmadarśinaḥ |
sa kathaṃ naramātreṇa śakyo jñātuṃ satāṃ gatiḥ || 7 ||
[Analyze grammar]

tasyāhamasuraghnasya kāṃścidbhagavato guṇān |
bhavatāṃ kīrtayiṣyāmi vrateśāya yathātatham || 8 ||
[Analyze grammar]

vaiśaṃpāyana uvāca |
evamuktvā tu bhagavānguṇāṃstasya mahātmanaḥ |
upaspṛśya śucirbhūtvā kathayāmāsa dhīmataḥ || 9 ||
[Analyze grammar]

vāsudeva uvāca |
śuśrūṣadhvaṃ brāhmaṇendrāstvaṃ ca tāta yudhiṣṭhira |
tvaṃ cāpageya nāmāni niśāmaya jagatpateḥ || 10 ||
[Analyze grammar]

yadavāptaṃ ca me pūrvaṃ sāmbahetoḥ suduṣkaram |
yathā ca bhagavāndṛṣṭo mayā pūrvaṃ samādhinā || 11 ||
[Analyze grammar]

śambare nihate pūrvaṃ raukmiṇeyena dhīmatā |
atīte dvādaśe varṣe jāmbavatyabravīddhi mām || 12 ||
[Analyze grammar]

pradyumnacārudeṣṇādīnrukmiṇyā vīkṣya putrakān |
putrārthinī māmupetya vākyamāha yudhiṣṭhira || 13 ||
[Analyze grammar]

śūraṃ balavatāṃ śreṣṭhaṃ kāntarūpamakalmaṣam |
ātmatulyaṃ mama sutaṃ prayacchācyuta māciram || 14 ||
[Analyze grammar]

na hi te'prāpyamastīha triṣu lokeṣu kiṃcana |
lokānsṛjestvamaparānicchanyadukulodvaha || 15 ||
[Analyze grammar]

tvayā dvādaśa varṣāṇi vāyubhūtena śuṣyatā |
ārādhya paśubhartāraṃ rukmiṇyā janitāḥ sutāḥ || 16 ||
[Analyze grammar]

cārudeṣṇaḥ sucāruśca cāruveṣo yaśodharaḥ |
cāruśravāścāruyaśāḥ pradyumnaḥ śaṃbhureva ca || 17 ||
[Analyze grammar]

yathā te janitāḥ putrā rukmiṇyāścāruvikramāḥ |
tathā mamāpi tanayaṃ prayaccha balaśālinam || 18 ||
[Analyze grammar]

ityevaṃ codito devyā tāmavocaṃ sumadhyamām |
anujānīhi māṃ rājñi kariṣye vacanaṃ tava |
sā ca māmabravīdgaccha vijayāya śivāya ca || 19 ||
[Analyze grammar]

brahmā śivaḥ kāśyapaśca nadyo devā manonugāḥ |
kṣetrauṣadhyo yajñavāhācchandāṃsyṛṣigaṇā dharā || 20 ||
[Analyze grammar]

samudrā dakṣiṇā stobhā ṛkṣāṇi pitaro grahāḥ |
devapatnyo devakanyā devamātara eva ca || 21 ||
[Analyze grammar]

manvantarāṇi gāvaśca candramāḥ savitā hariḥ |
sāvitrī brahmavidyā ca ṛtavo vatsarāḥ kṣapāḥ || 22 ||
[Analyze grammar]

kṣaṇā lavā muhūrtāśca nimeṣā yugaparyayāḥ |
rakṣantu sarvatra gataṃ tvāṃ yādava sukhāvaham |
ariṣṭaṃ gaccha panthānamapramatto bhavānagha || 23 ||
[Analyze grammar]

evaṃ kṛtasvastyayanastayāhaṃ tāmabhyanujñāya kapīndraputrīm |
pituḥ samīpe narasattamasya mātuśca rājñaśca tathāhukasya || 24 ||
[Analyze grammar]

tamarthamāvedya yadabravīnmāṃ vidyādharendrasya sutā bhṛśārtā |
tānabhyanujñāya tadātiduḥkhādgadaṃ tathaivātibalaṃ ca rāmam || 25 ||
[Analyze grammar]

prāpyānujñāṃ gurujanādahaṃ tārkṣyamacintayam |
so'vahaddhimavantaṃ māṃ prāpya cainaṃ vyasarjayam || 26 ||
[Analyze grammar]

tatrāhamadbhutānbhāvānapaśyaṃ girisattame |
kṣetraṃ ca tapasāṃ śreṣṭhaṃ paśyāmyāśramamuttamam || 27 ||
[Analyze grammar]

divyaṃ vaiyāghrapadyasya upamanyormahātmanaḥ |
pūjitaṃ devagandharvairbrāhmyā lakṣmyā samanvitam || 28 ||
[Analyze grammar]

dhavakakubhakadambanārikelaiḥ kurabakaketakajambupāṭalābhiḥ |
vaṭavaruṇakavatsanābhabilvaiḥ saralakapitthapriyālasālatālaiḥ || 29 ||
[Analyze grammar]

badarīkundapunnāgairaśokāmrātimuktakaiḥ |
bhallātakairmadhūkaiśca campakaiḥ panasaistathā || 30 ||
[Analyze grammar]

vanyairbahuvidhairvṛkṣaiḥ phalapuṣpapradairyutam |
puṣpagulmalatākīrṇaṃ kadalīṣaṇḍaśobhitam || 31 ||
[Analyze grammar]

nānāśakunisaṃbhojyaiḥ phalairvṛkṣairalaṃkṛtam |
yathāsthānavinikṣiptairbhūṣitaṃ vanarājibhiḥ || 32 ||
[Analyze grammar]

ruruvāraṇaśārdūlasiṃhadvīpisamākulam |
kuraṅgabarhiṇākīrṇaṃ mārjārabhujagāvṛtam |
pūgaiśca mṛgajātīnāṃ mahiṣarkṣaniṣevitam || 33 ||
[Analyze grammar]

nānāpuṣparajomiśro gajadānādhivāsitaḥ |
divyastrīgītabahulo māruto'tra sukho vavau || 34 ||
[Analyze grammar]

dhārāninādairvihagapraṇādaiḥ śubhaistathā bṛṃhitaiḥ kuñjarāṇām |
gītaistathā kiṃnarāṇāmudāraiḥ śubhaiḥ svanaiḥ sāmagānāṃ ca vīra || 35 ||
[Analyze grammar]

acintyaṃ manasāpyanyaiḥ sarobhiḥ samalaṃkṛtam |
viśālaiścāgniśaraṇairbhūṣitaṃ kuśasaṃvṛtam || 36 ||
[Analyze grammar]

vibhūṣitaṃ puṇyapavitratoyayā sadā ca juṣṭaṃ nṛpa jahnukanyayā |
mahātmabhirdharmabhṛtāṃ variṣṭhairmaharṣibhirbhūṣitamagnikalpaiḥ || 37 ||
[Analyze grammar]

vāyvāhārairambupairjapyanityaiḥ saṃprakṣālairyatibhirdhyānanityaiḥ |
dhūmāśanairūṣmapaiḥ kṣīrapaiśca vibhūṣitaṃ brāhmaṇendraiḥ samantāt || 38 ||
[Analyze grammar]

gocāriṇo'thāśmakuṭṭā dantolūkhalinastathā |
marīcipāḥ phenapāśca tathaiva mṛgacāriṇaḥ || 39 ||
[Analyze grammar]

suduḥkhānniyamāṃstāṃstānvahataḥ sutaponvitān |
paśyannutphullanayanaḥ praveṣṭumupacakrame || 40 ||
[Analyze grammar]

supūjitaṃ devagaṇairmahātmabhiḥ śivādibhirbhārata puṇyakarmabhiḥ |
rarāja taccāśramamaṇḍalaṃ sadā divīva rājanravimaṇḍalaṃ yathā || 41 ||
[Analyze grammar]

krīḍanti sarpairnakulā mṛgairvyāghrāśca mitravat |
prabhāvāddīptatapasaḥ saṃnikarṣaguṇānvitāḥ || 42 ||
[Analyze grammar]

tatrāśramapade śreṣṭhe sarvabhūtamanorame |
sevite dvijaśārdūlairvedavedāṅgapāragaiḥ || 43 ||
[Analyze grammar]

nānāniyamavikhyātairṛṣibhiśca mahātmabhiḥ |
praviśanneva cāpaśyaṃ jaṭācīradharaṃ prabhum || 44 ||
[Analyze grammar]

tejasā tapasā caiva dīpyamānaṃ yathānalam |
śiṣyamadhyagataṃ śāntaṃ yuvānaṃ brāhmaṇarṣabham |
śirasā vandamānaṃ māmupamanyurabhāṣata || 45 ||
[Analyze grammar]

svāgataṃ puṇḍarīkākṣa saphalāni tapāṃsi naḥ |
yatpūjyaḥ pūjayasi no draṣṭavyo draṣṭumicchasi || 46 ||
[Analyze grammar]

tamahaṃ prāñjalirbhūtvā mṛgapakṣiṣvathāgniṣu |
dharme ca śiṣyavarge ca samapṛcchamanāmayam || 47 ||
[Analyze grammar]

tato māṃ bhagavānāha sāmnā paramavalgunā |
lapsyase tanayaṃ kṛṣṇa ātmatulyamasaṃśayam || 48 ||
[Analyze grammar]

tapaḥ sumahadāsthāya toṣayeśānamīśvaram |
iha devaḥ sapatnīkaḥ samākrīḍatyadhokṣaja || 49 ||
[Analyze grammar]

ihaiva devatāśreṣṭhaṃ devāḥ sarṣigaṇāḥ purā |
tapasā brahmacaryeṇa satyena ca damena ca |
toṣayitvā śubhānkāmānprāpnuvaṃste janārdana || 50 ||
[Analyze grammar]

tejasāṃ tapasāṃ caiva nidhiḥ sa bhagavāniha |
śubhāśubhānvitānbhāvānvisṛjansaṃkṣipannapi |
āste devyā sahācintyo yaṃ prārthayasi śatruhan || 51 ||
[Analyze grammar]

hiraṇyakaśipuryo'bhūddānavo merukampanaḥ |
tena sarvāmaraiśvaryaṃ śarvātprāptaṃ samārbudam || 52 ||
[Analyze grammar]

tasyaiva putrapravaro mandaro nāma viśrutaḥ |
mahādevavarācchakraṃ varṣārbudamayodhayat || 53 ||
[Analyze grammar]

viṣṇoścakraṃ ca tadghoraṃ vajramākhaṇḍalasya ca |
śīrṇaṃ purābhavattāta grahasyāṅgeṣu keśava || 54 ||
[Analyze grammar]

ardyamānāśca vibudhā graheṇa subalīyasā |
śivadattavarāñjaghnurasurendrānsurā bhṛśam || 55 ||
[Analyze grammar]

tuṣṭo vidyutprabhasyāpi trilokeśvaratāmadāt |
śataṃ varṣasahasrāṇāṃ sarvalokeśvaro'bhavat |
mamaivānucaro nityaṃ bhavitāsīti cābravīt || 56 ||
[Analyze grammar]

tathā putrasahasrāṇāmayutaṃ ca dadau prabhuḥ |
kuśadvīpaṃ ca sa dadau rājyena bhagavānajaḥ || 57 ||
[Analyze grammar]

tathā śatamukho nāma dhātrā sṛṣṭo mahāsuraḥ |
yena varṣaśataṃ sāgramātmamāṃsairhuto'nalaḥ |
taṃ prāha bhagavāṃstuṣṭaḥ kiṃ karomīti śaṃkaraḥ || 58 ||
[Analyze grammar]

taṃ vai śatamukhaḥ prāha yogo bhavatu me'dbhutaḥ |
balaṃ ca daivataśreṣṭha śāśvataṃ saṃprayaccha me || 59 ||
[Analyze grammar]

svāyaṃbhuvaḥ kratuścāpi putrārthamabhavatpurā |
āviśya yogenātmānaṃ trīṇi varṣaśatānyapi || 60 ||
[Analyze grammar]

tasya devo'dadatputrānsahasraṃ kratusaṃmitān |
yogeśvaraṃ devagītaṃ vettha kṛṣṇa na saṃśayaḥ || 61 ||
[Analyze grammar]

vālakhilyā maghavatā avajñātāḥ purā kila |
taiḥ kruddhairbhagavānrudrastapasā toṣito hyabhūt || 62 ||
[Analyze grammar]

tāṃścāpi daivataśreṣṭhaḥ prāha prīto jagatpatiḥ |
suparṇaṃ somahartāraṃ tapasotpādayiṣyatha || 63 ||
[Analyze grammar]

mahādevasya roṣācca āpo naṣṭāḥ purābhavan |
tāśca saptakapālena devairanyāḥ pravartitāḥ || 64 ||
[Analyze grammar]

atrerbhāryāpi bhartāraṃ saṃtyajya brahmavādinī |
nāhaṃ tasya munerbhūyo vaśagā syāṃ kathaṃcana |
ityuktvā sā mahādevamagacchaccharaṇaṃ kila || 65 ||
[Analyze grammar]

nirāhārā bhayādatrestrīṇi varṣaśatānyapi |
aśeta musaleṣveva prasādārthaṃ bhavasya sā || 66 ||
[Analyze grammar]

tāmabravīddhasandevo bhavitā vai sutastava |
vaṃśe tavaiva nāmnā tu khyātiṃ yāsyati cepsitām || 67 ||
[Analyze grammar]

śākalyaḥ saṃśitātmā vai nava varṣaśatānyapi |
ārādhayāmāsa bhavaṃ manoyajñena keśava || 68 ||
[Analyze grammar]

taṃ cāha bhagavāṃstuṣṭo granthakāro bhaviṣyasi |
vatsākṣayā ca te kīrtistrailokye vai bhaviṣyati |
akṣayaṃ ca kulaṃ te'stu maharṣibhiralaṃkṛtam || 69 ||
[Analyze grammar]

sāvarṇiścāpi vikhyāta ṛṣirāsītkṛte yuge |
iha tena tapastaptaṃ ṣaṣṭiṃ varṣaśatānyatha || 70 ||
[Analyze grammar]

tamāha bhagavānrudraḥ sākṣāttuṣṭo'smi te'nagha |
granthakṛllokavikhyāto bhavitāsyajarāmaraḥ || 71 ||
[Analyze grammar]

mayāpi ca yathā dṛṣṭo devadevaḥ purā vibhuḥ |
sākṣātpaśupatistāta taccāpi śṛṇu mādhava || 72 ||
[Analyze grammar]

yadarthaṃ ca mahādevaḥ prayatena mayā purā |
ārādhito mahātejāstaccāpi śṛṇu vistaram || 73 ||
[Analyze grammar]

yadavāptaṃ ca me pūrvaṃ devadevānmaheśvarāt |
tatsarvamakhilenādya kathayiṣyāmi te'nagha || 74 ||
[Analyze grammar]

purā kṛtayuge tāta ṛṣirāsīnmahāyaśāḥ |
vyāghrapāda iti khyāto vedavedāṅgapāragaḥ |
tasyāhamabhavaṃ putro dhaumyaścāpi mamānujaḥ || 75 ||
[Analyze grammar]

kasyacittvatha kālasya dhaumyena saha mādhava |
āgacchamāśramaṃ krīḍanmunīnāṃ bhāvitātmanām || 76 ||
[Analyze grammar]

tatrāpi ca mayā dṛṣṭā duhyamānā payasvinī |
lakṣitaṃ ca mayā kṣīraṃ svāduto hyamṛtopamam || 77 ||
[Analyze grammar]

tataḥ piṣṭaṃ samāloḍya toyena saha mādhava |
āvayoḥ kṣīramityeva pānārthamupanīyate || 78 ||
[Analyze grammar]

atha gavyaṃ payastāta kadācitprāśitaṃ mayā |
tataḥ piṣṭarasaṃ tāta na me prītimudāvahat || 79 ||
[Analyze grammar]

tato'hamabruvaṃ bālyājjananīmātmanastadā |
kṣīrodanasamāyuktaṃ bhojanaṃ ca prayaccha me || 80 ||
[Analyze grammar]

tato māmabravīnmātā duḥkhaśokasamanvitā |
putrasnehātpariṣvajya mūrdhni cāghrāya mādhava || 81 ||
[Analyze grammar]

kutaḥ kṣīrodanaṃ vatsa munīnāṃ bhāvitātmanām |
vane nivasatāṃ nityaṃ kandamūlaphalāśinām || 82 ||
[Analyze grammar]

aprasādya virūpākṣaṃ varadaṃ sthāṇumavyayam |
kutaḥ kṣīrodanaṃ vatsa sukhāni vasanāni ca || 83 ||
[Analyze grammar]

taṃ prapadya sadā vatsa sarvabhāvena śaṃkaram |
tatprasādācca kāmebhyaḥ phalaṃ prāpsyasi putraka || 84 ||
[Analyze grammar]

jananyāstadvacaḥ śrutvā tadāprabhṛti śatruhan |
mama bhaktirmahādeve naiṣṭhikī samapadyata || 85 ||
[Analyze grammar]

tato'haṃ tapa āsthāya toṣayāmāsa śaṃkaram |
divyaṃ varṣasahasraṃ tu pādāṅguṣṭhāgraviṣṭhitaḥ || 86 ||
[Analyze grammar]

ekaṃ varṣaśataṃ caiva phalāhārastadābhavam |
dvitīyaṃ śīrṇaparṇāśī tṛtīyaṃ cāmbubhojanaḥ |
śatāni sapta caivāhaṃ vāyubhakṣastadābhavam || 87 ||
[Analyze grammar]

tataḥ prīto mahādevaḥ sarvalokeśvaraḥ prabhuḥ |
śakrarūpaṃ sa kṛtvā tu sarvairdevagaṇairvṛtaḥ |
sahasrākṣastadā bhūtvā vajrapāṇirmahāyaśāḥ || 88 ||
[Analyze grammar]

sudhāvadātaṃ raktākṣaṃ stabdhakarṇaṃ madotkaṭam |
āveṣṭitakaraṃ raudraṃ caturdaṃṣṭraṃ mahāgajam || 89 ||
[Analyze grammar]

samāsthitaśca bhagavāndīpyamānaḥ svatejasā |
ājagāma kirīṭī tu hārakeyūrabhūṣitaḥ || 90 ||
[Analyze grammar]

pāṇḍureṇātapatreṇa dhriyamāṇena mūrdhani |
sevyamāno'psarobhiśca divyagandharvanāditaḥ || 91 ||
[Analyze grammar]

tato māmāha devendraḥ prītaste'haṃ dvijottama |
varaṃ vṛṇīṣva mattastvaṃ yatte manasi vartate || 92 ||
[Analyze grammar]

śakrasya tu vacaḥ śrutvā nāhaṃ prītamanābhavam |
abruvaṃ ca tadā kṛṣṇa devarājamidaṃ vacaḥ || 93 ||
[Analyze grammar]

nāhaṃ tvatto varaṃ kāṅkṣe nānyasmādapi daivatāt |
mahādevādṛte saumya satyametadbravīmi te || 94 ||
[Analyze grammar]

paśupativacanādbhavāmi sadyaḥ kṛmiratha vā tarurapyanekaśākhaḥ |
apaśupativaraprasādajā me tribhuvanarājyavibhūtirapyaniṣṭā || 95 ||
[Analyze grammar]

api kīṭaḥ pataṃgo vā bhaveyaṃ śaṃkarājñayā |
na tu śakra tvayā dattaṃ trailokyamapi kāmaye || 96 ||
[Analyze grammar]

yāvacchaśāṅkaśakalāmalabaddhamaulirna prīyate paśupatirbhagavānmameśaḥ |
tāvajjarāmaraṇajanmaśatābhighātairduḥkhāni dehavihitāni samudvahāmi || 97 ||
[Analyze grammar]

divasakaraśaśāṅkavahnidīptaṃ tribhuvanasāramapāramādyamekam |
ajaramamaramaprasādya rudraṃ jagati pumāniha ko labheta śāntim || 98 ||
[Analyze grammar]

śakra uvāca |
kaḥ punastava heturvai īśe kāraṇakāraṇe |
yena devādṛte'nyasmātprasādaṃ nābhikāṅkṣasi || 99 ||
[Analyze grammar]

upamanyuruvāca |
hetubhirvā kimanyaiste īśaḥ kāraṇakāraṇam |
na śuśruma yadanyasya liṅgamabhyarcyate suraiḥ || 100 ||
[Analyze grammar]

kasyānyasya suraiḥ sarvairliṅgaṃ muktvā maheśvaram |
arcyate'rcitapūrvaṃ vā brūhi yadyasti te śrutiḥ || 101 ||
[Analyze grammar]

yasya brahmā ca viṣṇuśca tvaṃ cāpi saha daivataiḥ |
arcayadhvaṃ sadā liṅgaṃ tasmācchreṣṭhatamo hi saḥ || 102 ||
[Analyze grammar]

tasmādvaramahaṃ kāṅkṣe nidhanaṃ vāpi kauśika |
gaccha vā tiṣṭha vā śakra yatheṣṭaṃ balasūdana || 103 ||
[Analyze grammar]

kāmameṣa varo me'stu śāpo vāpi maheśvarāt |
na cānyāṃ devatāṃ kāṅkṣe sarvakāmaphalānyapi || 104 ||
[Analyze grammar]

evamuktvā tu devendraṃ duḥkhādākulitendriyaḥ |
na prasīdati me rudraḥ kimetaditi cintayan |
athāpaśyaṃ kṣaṇenaiva tamevairāvataṃ punaḥ || 105 ||
[Analyze grammar]

haṃsakundendusadṛśaṃ mṛṇālakumudaprabham |
vṛṣarūpadharaṃ sākṣātkṣīrodamiva sāgaram || 106 ||
[Analyze grammar]

kṛṣṇapucchaṃ mahākāyaṃ madhupiṅgalalocanam |
jāmbūnadena dāmnā ca sarvataḥ samalaṃkṛtam || 107 ||
[Analyze grammar]

raktākṣaṃ sumahānāsaṃ sukarṇaṃ sukaṭītaṭam |
supārśvaṃ vipulaskandhaṃ surūpaṃ cārudarśanam || 108 ||
[Analyze grammar]

kakudaṃ tasya cābhāti skandhamāpūrya viṣṭhitam |
tuṣāragirikūṭābhaṃ sitābhraśikharopamam || 109 ||
[Analyze grammar]

tamāsthitaśca bhagavāndevadevaḥ sahomayā |
aśobhata mahādevaḥ paurṇamāsyāmivoḍurāṭ || 110 ||
[Analyze grammar]

tasya tejobhavo vahniḥ sameghaḥ stanayitnumān |
sahasramiva sūryāṇāṃ sarvamāvṛtya tiṣṭhati || 111 ||
[Analyze grammar]

īśvaraḥ sumahātejāḥ saṃvartaka ivānalaḥ |
yugānte sarvabhūtāni didhakṣuriva codyataḥ || 112 ||
[Analyze grammar]

tejasā tu tadā vyāpte durnirīkṣye samantataḥ |
punarudvignahṛdayaḥ kimetaditi cintayam || 113 ||
[Analyze grammar]

muhūrtamiva tattejo vyāpya sarvā diśo daśa |
praśāntaṃ ca kṣaṇenaiva devadevasya māyayā || 114 ||
[Analyze grammar]

athāpaśyaṃ sthitaṃ sthāṇuṃ bhagavantaṃ maheśvaram |
saurabheyagataṃ saumyaṃ vidhūmamiva pāvakam |
sahitaṃ cārusarvāṅgyā pārvatyā parameśvaram || 115 ||
[Analyze grammar]

nīlakaṇṭhaṃ mahātmānamasaktaṃ tejasāṃ nidhim |
aṣṭādaśabhujaṃ sthāṇuṃ sarvābharaṇabhūṣitam || 116 ||
[Analyze grammar]

śuklāmbaradharaṃ devaṃ śuklamālyānulepanam |
śukladhvajamanādhṛṣyaṃ śuklayajñopavītinam || 117 ||
[Analyze grammar]

gāyadbhirnṛtyamānaiśca utpatadbhiritastataḥ |
vṛtaṃ pāriṣadairdivyairātmatulyaparākramaiḥ || 118 ||
[Analyze grammar]

bālendumukuṭaṃ pāṇḍuṃ śaraccandramivoditam |
tribhirnetraiḥ kṛtoddyotaṃ tribhiḥ sūryairivoditaiḥ || 119 ||
[Analyze grammar]

aśobhata ca devasya mālā gātre sitaprabhe |
jātarūpamayaiḥ padmairgrathitā ratnabhūṣitā || 120 ||
[Analyze grammar]

mūrtimanti tathāstrāṇi sarvatejomayāni ca |
mayā dṛṣṭāni govinda bhavasyāmitatejasaḥ || 121 ||
[Analyze grammar]

indrāyudhasahasrābhaṃ dhanustasya mahātmanaḥ |
pinākamiti vikhyātaṃ sa ca vai pannago mahān || 122 ||
[Analyze grammar]

saptaśīrṣo mahākāyastīkṣṇadaṃṣṭro viṣolbaṇaḥ |
jyāveṣṭitamahāgrīvaḥ sthitaḥ puruṣavigrahaḥ || 123 ||
[Analyze grammar]

śaraśca sūryasaṃkāśaḥ kālānalasamadyutiḥ |
yattadastraṃ mahāghoraṃ divyaṃ pāśupataṃ mahat || 124 ||
[Analyze grammar]

advitīyamanirdeśyaṃ sarvabhūtabhayāvaham |
sasphuliṅgaṃ mahākāyaṃ visṛjantamivānalam || 125 ||
[Analyze grammar]

ekapādaṃ mahādaṃṣṭraṃ sahasraśirasodaram |
sahasrabhujajihvākṣamudgirantamivānalam || 126 ||
[Analyze grammar]

brāhmānnārāyaṇādaindrādāgneyādapi vāruṇāt |
yadviśiṣṭaṃ mahābāho sarvaśastravighātanam || 127 ||
[Analyze grammar]

yena tattripuraṃ dagdhvā kṣaṇādbhasmīkṛtaṃ purā |
śareṇaikena govinda mahādevena līlayā || 128 ||
[Analyze grammar]

nirdadāha jagatkṛtsnaṃ trailokyaṃ sacarācaram |
maheśvarabhujotsṛṣṭaṃ nimeṣārdhānna saṃśayaḥ || 129 ||
[Analyze grammar]

nāvadhyo yasya loke'sminbrahmaviṣṇusureṣvapi |
tadahaṃ dṛṣṭavāṃstāta āścaryādbhutamuttamam || 130 ||
[Analyze grammar]

guhyamastraṃ paraṃ cāpi tattulyādhikameva vā |
yattacchūlamiti khyātaṃ sarvalokeṣu śūlinaḥ || 131 ||
[Analyze grammar]

dārayedyanmahīṃ kṛtsnāṃ śoṣayedvā mahodadhim |
saṃharedvā jagatkṛtsnaṃ visṛṣṭaṃ śūlapāṇinā || 132 ||
[Analyze grammar]

yauvanāśvo hato yena māṃdhātā sabalaḥ purā |
cakravartī mahātejāstrilokavijayī nṛpaḥ || 133 ||
[Analyze grammar]

mahābalo mahāvīryaḥ śakratulyaparākramaḥ |
karasthenaiva govinda lavaṇasyeha rakṣasaḥ || 134 ||
[Analyze grammar]

tacchūlamatitīkṣṇāgraṃ subhīmaṃ lomaharṣaṇam |
triśikhāṃ bhrukuṭīṃ kṛtvā tarjamānamiva sthitam || 135 ||
[Analyze grammar]

vidhūmaṃ sārciṣaṃ kṛṣṇaṃ kālasūryamivoditam |
sarpahastamanirdeśyaṃ pāśahastamivāntakam |
dṛṣṭavānasmi govinda tadastraṃ rudrasaṃnidhau || 136 ||
[Analyze grammar]

paraśustīkṣṇadhāraśca datto rāmasya yaḥ purā |
mahādevena tuṣṭena kṣatriyāṇāṃ kṣayaṃkaraḥ |
kārtavīryo hato yena cakravartī mahāmṛdhe || 137 ||
[Analyze grammar]

triḥsaptakṛtvaḥ pṛthivī yena niḥkṣatriyā kṛtā |
jāmadagnyena govinda rāmeṇākliṣṭakarmaṇā || 138 ||
[Analyze grammar]

dīptadhāraḥ suraudrāsyaḥ sarpakaṇṭhāgraveṣṭitaḥ |
abhavacchūlino'bhyāśe dīptavahniśikhopamaḥ || 139 ||
[Analyze grammar]

asaṃkhyeyāni cāstrāṇi tasya divyāni dhīmataḥ |
prādhānyato mayaitāni kīrtitāni tavānagha || 140 ||
[Analyze grammar]

savyadeśe tu devasya brahmā lokapitāmahaḥ |
divyaṃ vimānamāsthāya haṃsayuktaṃ manojavam || 141 ||
[Analyze grammar]

vāmapārśvagataścaiva tathā nārāyaṇaḥ sthitaḥ |
vainateyaṃ samāsthāya śaṅkhacakragadādharaḥ || 142 ||
[Analyze grammar]

skando mayūramāsthāya sthito devyāḥ samīpataḥ |
śaktiṃ kaṇṭhe samādāya dvitīya iva pāvakaḥ || 143 ||
[Analyze grammar]

purastāccaiva devasya nandiṃ paśyāmyavasthitam |
śūlaṃ viṣṭabhya tiṣṭhantaṃ dvitīyamiva śaṃkaram || 144 ||
[Analyze grammar]

svāyaṃbhuvādyā manavo bhṛgvādyā ṛṣayastathā |
śakrādyā devatāścaiva sarva eva samabhyayuḥ || 145 ||
[Analyze grammar]

te'bhivādya mahātmānaṃ parivārya samantataḥ |
astuvanvividhaiḥ stotrairmahādevaṃ surāstadā || 146 ||
[Analyze grammar]

brahmā bhavaṃ tadā stunvanrathantaramudīrayan |
jyeṣṭhasāmnā ca deveśaṃ jagau nārāyaṇastadā |
gṛṇañśakraḥ paraṃ brahma śatarudrīyamuttamam || 147 ||
[Analyze grammar]

brahmā nārāyaṇaścaiva devarājaśca kauśikaḥ |
aśobhanta mahātmānastrayastraya ivāgnayaḥ || 148 ||
[Analyze grammar]

teṣāṃ madhyagato devo rarāja bhagavāñśivaḥ |
śaradghanavinirmuktaḥ pariviṣṭa ivāṃśumān |
tato'hamastuvaṃ devaṃ stavenānena suvratam || 149 ||
[Analyze grammar]

namo devādhidevāya mahādevāya vai namaḥ |
śakrāya śakrarūpāya śakraveṣadharāya ca || 150 ||
[Analyze grammar]

namaste vajrahastāya piṅgalāyāruṇāya ca |
pinākapāṇaye nityaṃ khaḍgaśūladharāya ca || 151 ||
[Analyze grammar]

namaste kṛṣṇavāsāya kṛṣṇakuñcitamūrdhaje |
kṛṣṇājinottarīyāya kṛṣṇāṣṭamiratāya ca || 152 ||
[Analyze grammar]

śuklavarṇāya śuklāya śuklāmbaradharāya ca |
śuklabhasmāvaliptāya śuklakarmaratāya ca || 153 ||
[Analyze grammar]

tvaṃ brahmā sarvadevānāṃ rudrāṇāṃ nīlalohitaḥ |
ātmā ca sarvabhūtānāṃ sāṃkhye puruṣa ucyase || 154 ||
[Analyze grammar]

ṛṣabhastvaṃ pavitrāṇāṃ yogināṃ niṣkalaḥ śivaḥ |
āśramāṇāṃ gṛhasthastvamīśvarāṇāṃ maheśvaraḥ |
kuberaḥ sarvayakṣāṇāṃ kratūnāṃ viṣṇurucyase || 155 ||
[Analyze grammar]

parvatānāṃ mahāmerurnakṣatrāṇāṃ ca candramāḥ |
vasiṣṭhastvamṛṣīṇāṃ ca grahāṇāṃ sūrya ucyase || 156 ||
[Analyze grammar]

āraṇyānāṃ paśūnāṃ ca siṃhastvaṃ parameśvaraḥ |
grāmyāṇāṃ govṛṣaścāsi bhagavāṃllokapūjitaḥ || 157 ||
[Analyze grammar]

ādityānāṃ bhavānviṣṇurvasūnāṃ caiva pāvakaḥ |
pakṣiṇāṃ vainateyaśca ananto bhujageṣu ca || 158 ||
[Analyze grammar]

sāmavedaśca vedānāṃ yajuṣāṃ śatarudriyam |
sanatkumāro yogīnāṃ sāṃkhyānāṃ kapilo hyasi || 159 ||
[Analyze grammar]

śakro'si marutāṃ deva pitṝṇāṃ dharmarāḍasi |
brahmalokaśca lokānāṃ gatīnāṃ mokṣa ucyase || 160 ||
[Analyze grammar]

kṣīrodaḥ sāgarāṇāṃ ca śailānāṃ himavāngiriḥ |
varṇānāṃ brāhmaṇaścāsi viprāṇāṃ dīkṣito dvijaḥ |
ādistvamasi lokānāṃ saṃhartā kāla eva ca || 161 ||
[Analyze grammar]

yaccānyadapi lokeṣu sattvaṃ tejodhikaṃ smṛtam |
tatsarvaṃ bhagavāneva iti me niścitā matiḥ || 162 ||
[Analyze grammar]

namaste bhagavandeva namaste bhaktavatsala |
yogeśvara namaste'stu namaste viśvasaṃbhava || 163 ||
[Analyze grammar]

prasīda mama bhaktasya dīnasya kṛpaṇasya ca |
anaiśvaryeṇa yuktasya gatirbhava sanātana || 164 ||
[Analyze grammar]

yaṃ cāparādhaṃ kṛtavānajñānātparameśvara |
madbhakta iti deveśa tatsarvaṃ kṣantumarhasi || 165 ||
[Analyze grammar]

mohitaścāsmi deveśa tubhyaṃ rūpaviparyayāt |
tena nārghyaṃ mayā dattaṃ pādyaṃ cāpi sureśvara || 166 ||
[Analyze grammar]

evaṃ stutvāhamīśānaṃ pādyamarghyaṃ ca bhaktitaḥ |
kṛtāñjalipuṭo bhūtvā sarvaṃ tasmai nyavedayam || 167 ||
[Analyze grammar]

tataḥ śītāmbusaṃyuktā divyagandhasamanvitā |
puṣpavṛṣṭiḥ śubhā tāta papāta mama mūrdhani || 168 ||
[Analyze grammar]

dundubhiśca tato divyastāḍito devakiṃkaraiḥ |
vavau ca mārutaḥ puṇyaḥ śucigandhaḥ sukhāvahaḥ || 169 ||
[Analyze grammar]

tataḥ prīto mahādevaḥ sapatnīko vṛṣadhvajaḥ |
abravīttridaśāṃstatra harṣayanniva māṃ tadā || 170 ||
[Analyze grammar]

paśyadhvaṃ tridaśāḥ sarve upamanyormahātmanaḥ |
mayi bhaktiṃ parāṃ divyāmekabhāvādavasthitām || 171 ||
[Analyze grammar]

evamuktāstataḥ kṛṣṇa surāste śūlapāṇinā |
ūcuḥ prāñjalayaḥ sarve namaskṛtvā vṛṣadhvajam || 172 ||
[Analyze grammar]

bhagavandevadeveśa lokanātha jagatpate |
labhatāṃ sarvakāmebhyaḥ phalaṃ tvatto dvijottamaḥ || 173 ||
[Analyze grammar]

evamuktastataḥ śarvaḥ surairbrahmādibhistathā |
āha māṃ bhagavānīśaḥ prahasanniva śaṃkaraḥ || 174 ||
[Analyze grammar]

vatsopamanyo prīto'smi paśya māṃ munipuṃgava |
dṛḍhabhakto'si viprarṣe mayā jijñāsito hyasi || 175 ||
[Analyze grammar]

anayā caiva bhaktyā te atyarthaṃ prītimānaham |
tasmātsarvāndadāmyadya kāmāṃstava yathepśitān || 176 ||
[Analyze grammar]

evamuktasya caivātha mahādevena me vibho |
harṣādaśrūṇyavartanta lomaharṣaśca jāyate || 177 ||
[Analyze grammar]

abruvaṃ ca tadā devaṃ harṣagadgadayā girā |
jānubhyāmavaniṃ gatvā praṇamya ca punaḥ punaḥ || 178 ||
[Analyze grammar]

adya jāto hyahaṃ deva adya me saphalaṃ tapaḥ |
yanme sākṣānmahādevaḥ prasannastiṣṭhate'grataḥ || 179 ||
[Analyze grammar]

yaṃ na paśyanti cārādhya devā hyamitavikramam |
tamahaṃ dṛṣṭavāndevaṃ ko'nyo dhanyataro mayā || 180 ||
[Analyze grammar]

evaṃ dhyāyanti vidvāṃsaḥ paraṃ tattvaṃ sanātanam |
ṣaḍviṃśakamiti khyātaṃ yatparātparamakṣaram || 181 ||
[Analyze grammar]

sa eṣa bhagavāndevaḥ sarvatattvādiravyayaḥ |
sarvatattvavidhānajñaḥ pradhānapuruṣeśvaraḥ || 182 ||
[Analyze grammar]

yo'sṛjaddakṣiṇādaṅgādbrahmāṇaṃ lokasaṃbhavam |
vāmapārśvāttathā viṣṇuṃ lokarakṣārthamīśvaraḥ |
yugānte caiva saṃprāpte rudramaṅgātsṛjatprabhuḥ || 183 ||
[Analyze grammar]

sa rudraḥ saṃharankṛtsnaṃ jagatsthāvarajaṅgamam |
kālo bhūtvā mahātejāḥ saṃvartaka ivānalaḥ || 184 ||
[Analyze grammar]

eṣa devo mahādevo jagatsṛṣṭvā carācaram |
kalpānte caiva sarveṣāṃ smṛtimākṣipya tiṣṭhati || 185 ||
[Analyze grammar]

sarvagaḥ sarvabhūtātmā sarvabhūtabhavodbhavaḥ |
āste sarvagato nityamadṛśyaḥ sarvadaivataiḥ || 186 ||
[Analyze grammar]

yadi deyo varo mahyaṃ yadi tuṣṭaśca me prabhuḥ |
bhaktirbhavatu me nityaṃ śāśvatī tvayi śaṃkara || 187 ||
[Analyze grammar]

atītānāgataṃ caiva vartamānaṃ ca yadvibho |
jānīyāmiti me buddhistvatprasādātsurottama || 188 ||
[Analyze grammar]

kṣīrodanaṃ ca bhuñjīyāmakṣayaṃ saha bāndhavaiḥ |
āśrame ca sadā mahyaṃ sāṃnidhyaṃ paramastu te || 189 ||
[Analyze grammar]

evamuktaḥ sa māṃ prāha bhagavāṃllokapūjitaḥ |
maheśvaro mahātejāścarācaraguruḥ prabhuḥ || 190 ||
[Analyze grammar]

ajaraścāmaraścaiva bhava duḥkhavivarjitaḥ |
śīlavānguṇasaṃpannaḥ sarvajñaḥ priyadarśanaḥ || 191 ||
[Analyze grammar]

akṣayaṃ yauvanaṃ te'stu tejaścaivānalopamam |
kṣīrodaḥ sāgaraścaiva yatra yatrecchase mune || 192 ||
[Analyze grammar]

tatra te bhavitā kāmaṃ sāṃnidhyaṃ payaso nidheḥ |
kṣīrodanaṃ ca bhuṅkṣva tvamamṛtena samanvitam || 193 ||
[Analyze grammar]

bandhubhiḥ sahitaḥ kalpaṃ tato māmupayāsyasi |
sāṃnidhyamāśrame nityaṃ kariṣyāmi dvijottama || 194 ||
[Analyze grammar]

tiṣṭha vatsa yathākāmaṃ notkaṇṭhāṃ kartumarhasi |
smṛtaḥ smṛtaśca te vipra sadā dāsyāmi darśanam || 195 ||
[Analyze grammar]

evamuktvā sa bhagavānsūryakoṭisamaprabhaḥ |
mameśāno varaṃ dattvā tatraivāntaradhīyata || 196 ||
[Analyze grammar]

evaṃ dṛṣṭo mayā kṛṣṇa devadevaḥ samādhinā |
tadavāptaṃ ca me sarvaṃ yaduktaṃ tena dhīmatā || 197 ||
[Analyze grammar]

pratyakṣaṃ caiva te kṛṣṇa paśya siddhānvyavasthitān |
ṛṣīnvidyādharānyakṣāngandharvāpsarasastathā || 198 ||
[Analyze grammar]

paśya vṛkṣānmanoramyānsadā puṣpaphalānvitān |
sarvartukusumairyuktānsnigdhapatrānsuśākhinaḥ |
sarvametanmahābāho divyabhāvasamanvitam || 199 ||
[Analyze grammar]