Chapter 10

yudhiṣṭhira uvāca |
mitrasauhṛdabhāvena upadeśaṃ karoti yaḥ |
jātyāvarasya rājarṣe doṣastasya bhavenna vā || 1 ||
[Analyze grammar]

etadicchāmi tattvena vyākhyātuṃ vai pitāmaha |
sūkṣmā gatirhi dharmasya yatra muhyanti mānavāḥ || 2 ||
[Analyze grammar]

bhīṣma uvāca |
atra te vartayiṣyāmi śṛṇu rājanyathāgamam |
ṛṣīṇāṃ vadatāṃ pūrvaṃ śrutamāsīdyathā mayā || 3 ||
[Analyze grammar]

upadeśo na kartavyo jātihīnasya kasyacit |
upadeśe mahāndoṣa upādhyāyasya bhāṣyate || 4 ||
[Analyze grammar]

nidarśanamidaṃ rājañśṛṇu me bharatarṣabha |
duruktavacane rājanyathā pūrvaṃ yudhiṣṭhira |
brahmāśramapade vṛttaṃ pārśve himavataḥ śubhe || 5 ||
[Analyze grammar]

tatrāśramapadaṃ puṇyaṃ nānāvṛkṣagaṇāyutam |
bahugulmalatākīrṇaṃ mṛgadvijaniṣevitam || 6 ||
[Analyze grammar]

siddhacāraṇasaṃghuṣṭaṃ ramyaṃ puṣpitakānanam |
vratibhirbahubhiḥ kīrṇaṃ tāpasairupaśobhitam || 7 ||
[Analyze grammar]

brāhmaṇaiśca mahābhāgaiḥ sūryajvalanasaṃnibhaiḥ |
niyamavratasaṃpannaiḥ samākīrṇaṃ tapasvibhiḥ |
dīkṣitairbharataśreṣṭha yatāhāraiḥ kṛtātmabhiḥ || 8 ||
[Analyze grammar]

vedādhyayanaghoṣaiśca nāditaṃ bharatarṣabha |
vālakhilyaiśca bahubhiryatibhiśca niṣevitam || 9 ||
[Analyze grammar]

tatra kaścitsamutsāhaṃ kṛtvā śūdro dayānvitaḥ |
āgato hyāśramapadaṃ pūjitaśca tapasvibhiḥ || 10 ||
[Analyze grammar]

tāṃstu dṛṣṭvā munigaṇāndevakalpānmahaujasaḥ |
vahato vividhā dīkṣāḥ saṃprahṛṣyata bhārata || 11 ||
[Analyze grammar]

athāsya buddhirabhavattapasye bharatarṣabha |
tato'bravītkulapatiṃ pādau saṃgṛhya bhārata || 12 ||
[Analyze grammar]

bhavatprasādādicchāmi dharmaṃ cartuṃ dvijarṣabha |
tanmāṃ tvaṃ bhagavanvaktuṃ pravrājayitumarhasi || 13 ||
[Analyze grammar]

varṇāvaro'haṃ bhagavañśūdro jātyāsmi sattama |
śuśrūṣāṃ kartumicchāmi prapannāya prasīda me || 14 ||
[Analyze grammar]

kulapatiruvāca |
na śakyamiha śūdreṇa liṅgamāśritya vartitum |
āsyatāṃ yadi te buddhiḥ śuśrūṣānirato bhava || 15 ||
[Analyze grammar]

bhīṣma uvāca |
evamuktastu muninā sa śūdro'cintayannṛpa |
kathamatra mayā kāryaṃ śraddhā dharme parā ca me |
vijñātamevaṃ bhavatu kariṣye priyamātmanaḥ || 16 ||
[Analyze grammar]

gatvāśramapadāddūramuṭajaṃ kṛtavāṃstu saḥ |
tatra vediṃ ca bhūmiṃ ca devatāyatanāni ca |
niveśya bharataśreṣṭha niyamastho'bhavatsukham || 17 ||
[Analyze grammar]

abhiṣekāṃśca niyamāndevatāyataneṣu ca |
baliṃ ca kṛtvā hutvā ca devatāṃ cāpyapūjayat || 18 ||
[Analyze grammar]

saṃkalpaniyamopetaḥ phalāhāro jitendriyaḥ |
nityaṃ saṃnihitābhiśca oṣadhībhiḥ phalaistathā || 19 ||
[Analyze grammar]

atithīnpūjayāmāsa yathāvatsamupāgatān |
evaṃ hi sumahānkālo vyatyakrāmatsa tasya vai || 20 ||
[Analyze grammar]

athāsya munirāgacchatsaṃgatyā vai tamāśramam |
saṃpūjya svāgatenarṣiṃ vidhivatparyatoṣayat || 21 ||
[Analyze grammar]

anukūlāḥ kathāḥ kṛtvā yathāvatparyapṛcchata |
ṛṣiḥ paramatejasvī dharmātmā saṃyatendriyaḥ || 22 ||
[Analyze grammar]

evaṃ sa bahuśastasya śūdrasya bharatarṣabha |
so'gacchadāśramamṛṣiḥ śūdraṃ draṣṭuṃ nararṣabha || 23 ||
[Analyze grammar]

atha taṃ tāpasaṃ śūdraḥ so'bravīdbharatarṣabha |
pitṛkāryaṃ kariṣyāmi tatra me'nugrahaṃ kuru || 24 ||
[Analyze grammar]

bāḍhamityeva taṃ vipra uvāca bharatarṣabha |
śucirbhūtvā sa śūdrastu tasyarṣeḥ pādyamānayat || 25 ||
[Analyze grammar]

atha darbhāṃśca vanyāśca oṣadhīrbharatarṣabha |
pavitramāsanaṃ caiva bṛsīṃ ca samupānayat || 26 ||
[Analyze grammar]

atha dakṣiṇamāvṛtya bṛsīṃ paramaśīrṣikām |
kṛtāmanyāyato dṛṣṭvā tatastamṛṣirabravīt || 27 ||
[Analyze grammar]

kuruṣvaitāṃ pūrvaśīrṣāṃ bhava codaṅmukhaḥ śuciḥ |
sa ca tatkṛtavāñśūdraḥ sarvaṃ yadṛṣirabravīt || 28 ||
[Analyze grammar]

yathopadiṣṭaṃ medhāvī darbhādīṃstānyathātatham |
havyakavyavidhiṃ kṛtsnamuktaṃ tena tapasvinā || 29 ||
[Analyze grammar]

ṛṣiṇā pitṛkārye ca sa ca dharmapathe sthitaḥ |
pitṛkārye kṛte cāpi visṛṣṭaḥ sa jagāma ha || 30 ||
[Analyze grammar]

atha dīrghasya kālasya sa tapyañśūdratāpasaḥ |
vane pañcatvamagamatsukṛtena ca tena vai |
ajāyata mahārājarājavaṃśe mahādyutiḥ || 31 ||
[Analyze grammar]

tathaiva sa ṛṣistāta kāladharmamavāpya ha |
purohitakule vipra ājāto bharatarṣabha || 32 ||
[Analyze grammar]

evaṃ tau tatra saṃbhūtāvubhau śūdramunī tadā |
krameṇa vardhitau cāpi vidyāsu kuśalāvubhau || 33 ||
[Analyze grammar]

atharvavede vede ca babhūvarṣiḥ suniścitaḥ |
kalpaprayoge cotpanne jyotiṣe ca paraṃ gataḥ |
sakhye cāpi parā prītistayoścāpi vyavardhata || 34 ||
[Analyze grammar]

pitaryuparate cāpi kṛtaśaucaḥ sa bhārata |
abhiṣiktaḥ prakṛtibhī rājaputraḥ sa pārthivaḥ |
abhiṣiktena sa ṛṣirabhiṣiktaḥ purohitaḥ || 35 ||
[Analyze grammar]

sa taṃ purodhāya sukhamavasadbharatarṣabha |
rājyaṃ śaśāsa dharmeṇa prajāśca paripālayan || 36 ||
[Analyze grammar]

puṇyāhavācane nityaṃ dharmakāryeṣu cāsakṛt |
utsmayanprāhasaccāpi dṛṣṭvā rājā purohitam |
evaṃ sa bahuśo rājanpurodhasamupāhasat || 37 ||
[Analyze grammar]

lakṣayitvā purodhāstu bahuśastaṃ narādhipam |
utsmayantaṃ ca satataṃ dṛṣṭvāsau manyumānabhūt || 38 ||
[Analyze grammar]

atha śūnye purodhāstu saha rājñā samāgataḥ |
kathābhiranukūlābhī rājānamabhirāmayat || 39 ||
[Analyze grammar]

tato'bravīnnarendraṃ sa purodhā bharatarṣabha |
varamicchāmyahaṃ tvekaṃ tvayā dattaṃ mahādyute || 40 ||
[Analyze grammar]

rājovāca |
varāṇāṃ te śataṃ dadyāṃ kimutaikaṃ dvijottama |
snehācca bahumānācca nāstyadeyaṃ hi me tava || 41 ||
[Analyze grammar]

purohita uvāca |
ekaṃ vai varamicchāmi yadi tuṣṭo'si pārthiva |
yaddadāsi mahārāja satyaṃ tadvada mānṛtam || 42 ||
[Analyze grammar]

bhīṣma uvāca |
bāḍhamityeva taṃ rājā pratyuvāca yudhiṣṭhira |
yadi jñāsyāmi vakṣyāmi ajānanna tu saṃvade || 43 ||
[Analyze grammar]

purohita uvāca |
puṇyāhavācane nityaṃ dharmakṛtyeṣu cāsakṛt |
śāntihomeṣu ca sadā kiṃ tvaṃ hasasi vīkṣya mām || 44 ||
[Analyze grammar]

savrīḍaṃ vai bhavati hi mano me hasatā tvayā |
kāmayā śāpito rājannānyathā vaktumarhasi || 45 ||
[Analyze grammar]

bhāvyaṃ hi kāraṇenātra na te hāsyamakāraṇam |
kautūhalaṃ me subhṛśaṃ tattvena kathayasva me || 46 ||
[Analyze grammar]

rājovāca |
evamukte tvayā vipra yadavācyaṃ bhavedapi |
avaśyameva vaktavyaṃ śṛṇuṣvaikamanā dvija || 47 ||
[Analyze grammar]

pūrvadehe yathā vṛttaṃ tannibodha dvijottama |
jātiṃ smarāmyahaṃ brahmannavadhānena me śṛṇu || 48 ||
[Analyze grammar]

śūdro'hamabhavaṃ pūrvaṃ tāpaso bhṛśasaṃyutaḥ |
ṛṣirugratapāstvaṃ ca tadābhūrdvijasattama || 49 ||
[Analyze grammar]

prīyatā hi tadā brahmanmamānugrahabuddhinā |
pitṛkārye tvayā pūrvamupadeśaḥ kṛto'nagha |
bṛsyāṃ darbheṣu havye ca kavye ca munisattama || 50 ||
[Analyze grammar]

etena karmadoṣeṇa purodhāstvamajāyathāḥ |
ahaṃ rājā ca viprendra paśya kālasya paryayam |
matkṛte hyupadeśena tvayā prāptamidaṃ phalam || 51 ||
[Analyze grammar]

etasmātkāraṇādbrahmanprahase tvāṃ dvijottama |
na tvāṃ paribhavanbrahmanprahasāmi gururbhavān || 52 ||
[Analyze grammar]

viparyayeṇa me manyustena saṃtapyate manaḥ |
jātiṃ smarāmyahaṃ tubhyamatastvāṃ prahasāmi vai || 53 ||
[Analyze grammar]

evaṃ tavograṃ hi tapa upadeśena nāśitam |
purohitatvamutsṛjya yatasva tvaṃ punarbhave || 54 ||
[Analyze grammar]

itastvamadhamāmanyāṃ mā yoniṃ prāpsyase dvija |
gṛhyatāṃ draviṇaṃ vipra pūtātmā bhava sattama || 55 ||
[Analyze grammar]

bhīṣma uvāca |
tato visṛṣṭo rājñā tu vipro dānānyanekaśaḥ |
brāhmaṇebhyo dadau vittaṃ bhūmiṃ grāmāṃśca sarvaśaḥ || 56 ||
[Analyze grammar]

kṛcchrāṇi cīrtvā ca tato yathoktāni dvijottamaḥ |
tīrthāni cābhigatvā vai dānāni vividhāni ca || 57 ||
[Analyze grammar]

dattvā gāścaiva viprāṇāṃ pūtātmā so'bhavaddvijaḥ |
tameva cāśramaṃ gatvā cacāra vipulaṃ tapaḥ || 58 ||
[Analyze grammar]

tataḥ siddhiṃ parāṃ prāpto brāhmaṇo rājasattama |
saṃmataścābhavatteṣāmāśrame''śramavāsinām || 59 ||
[Analyze grammar]

evaṃ prāpto mahatkṛcchramṛṣiḥ sa nṛpasattama |
brāhmaṇena na vaktavyaṃ tasmādvarṇāvare jane || 60 ||
[Analyze grammar]

varjayedupadeśaṃ ca sadaiva brāhmaṇo nṛpa |
upadeśaṃ hi kurvāṇo dvijaḥ kṛcchramavāpnuyāt || 61 ||
[Analyze grammar]

eṣitavyaṃ sadā vācā nṛpeṇa dvijasattamāt |
na pravaktavyamiha hi kiṃcidvarṇāvare jane || 62 ||
[Analyze grammar]

brāhmaṇāḥ kṣatriyā vaiśyāstrayo varṇā dvijātayaḥ |
eteṣu kathayanrājanbrāhmaṇo na praduṣyati || 63 ||
[Analyze grammar]

tasmātsadbhirna vaktavyaṃ kasyacitkiṃcidagrataḥ |
sūkṣmā gatirhi dharmasya durjñeyā hyakṛtātmabhiḥ || 64 ||
[Analyze grammar]

tasmānmaunāni munayo dīkṣāṃ kurvanti cādṛtāḥ |
duruktasya bhayādrājannānubhāṣanti kiṃcana || 65 ||
[Analyze grammar]

dhārmikā guṇasaṃpannāḥ satyārjavaparāyaṇāḥ |
duruktavācābhihatāḥ prāpnuvantīha duṣkṛtam || 66 ||
[Analyze grammar]

upadeśo na kartavyaḥ kadācidapi kasyacit |
upadeśāddhi tatpāpaṃ brāhmaṇaḥ samavāpnuyāt || 67 ||
[Analyze grammar]

vimṛśya tasmātprājñena vaktavyaṃ dharmamicchatā |
satyānṛtena hi kṛta upadeśo hinasti vai || 68 ||
[Analyze grammar]

vaktavyamiha pṛṣṭena viniścitya viparyayam |
sa copadeśaḥ kartavyo yena dharmamavāpnuyāt || 69 ||
[Analyze grammar]

etatte sarvamākhyātamupadeśe kṛte sati |
mahānkleśo hi bhavati tasmānnopadiśetkvacit || 70 ||
[Analyze grammar]