Chapter 2

yudhiṣṭhira uvāca |
pitāmaha mahāprājña sarvaśāstraviśārada |
śrutaṃ me mahadākhyānamidaṃ matimatāṃ vara || 1 ||
[Analyze grammar]

bhūyastu śrotumicchāmi dharmārthasahitaṃ nṛpa |
kathyamānaṃ tvayā kiṃcittanme vyākhyātumarhasi || 2 ||
[Analyze grammar]

kena mṛtyurgṛhasthena dharmamāśritya nirjitaḥ |
ityetatsarvamācakṣva tattvena mama pārthiva || 3 ||
[Analyze grammar]

bhīṣma uvāca |
atrāpyudāharantīmamitihāsaṃ purātanam |
yathā mṛtyurgṛhasthena dharmamāśritya nirjitaḥ || 4 ||
[Analyze grammar]

manoḥ prajāpate rājannikṣvākurabhavatsutaḥ |
tasya putraśataṃ jajñe nṛpateḥ sūryavarcasaḥ || 5 ||
[Analyze grammar]

daśamastasya putrastu daśāśvo nāma bhārata |
māhiṣmatyāmabhūdrājā dharmātmā satyavikramaḥ || 6 ||
[Analyze grammar]

daśāśvasya sutastvāsīdrājā paramadhārmikaḥ |
satye tapasi dāne ca yasya nityaṃ rataṃ manaḥ || 7 ||
[Analyze grammar]

madirāśva iti khyātaḥ pṛthivyāṃ pṛthivīpatiḥ |
dhanurvede ca vede ca nirato yo'bhavatsadā || 8 ||
[Analyze grammar]

madirāśvasya putrastu dyutimānnāma pārthivaḥ |
mahābhāgo mahātejā mahāsattvo mahābalaḥ || 9 ||
[Analyze grammar]

putro dyutimatastvāsītsuvīro nāma pārthivaḥ |
dharmātmā kośavāṃścāpi devarāja ivāparaḥ || 10 ||
[Analyze grammar]

suvīrasya tu putro'bhūtsarvasaṃgrāmadurjayaḥ |
durjayetyabhivikhyātaḥ sarvaśāstraviśāradaḥ || 11 ||
[Analyze grammar]

durjayasyendravapuṣaḥ putro'gnisadṛśadyutiḥ |
duryodhano nāma mahānrājāsīdrājasattama || 12 ||
[Analyze grammar]

tasyendrasamavīryasya saṃgrāmeṣvanivartinaḥ |
viṣayaśca prabhāvaśca tulyamevābhyavartata || 13 ||
[Analyze grammar]

ratnairdhanaiśca paśubhiḥ sasyaiścāpi pṛthagvidhaiḥ |
nagaraṃ viṣayaścāsya pratipūrṇaṃ tadābhavat || 14 ||
[Analyze grammar]

na tasya viṣaye cābhūtkṛpaṇo nāpi durgataḥ |
vyādhito vā kṛśo vāpi tasminnābhūnnaraḥ kvacit || 15 ||
[Analyze grammar]

sudakṣiṇo madhuravāganasūyurjitendriyaḥ |
dharmātmā cānṛśaṃsaśca vikrānto'thāvikatthanaḥ || 16 ||
[Analyze grammar]

yajvā vadānyo medhāvī brahmaṇyaḥ satyasaṃgaraḥ |
na cāvamantā dātā ca vedavedāṅgapāragaḥ || 17 ||
[Analyze grammar]

taṃ narmadā devanadī puṇyā śītajalā śivā |
cakame puruṣaśreṣṭhaṃ svena bhāvena bhārata || 18 ||
[Analyze grammar]

tasya jajñe tadā nadyāṃ kanyā rājīvalocanā |
nāmnā sudarśanā rājanrūpeṇa ca sudarśanā || 19 ||
[Analyze grammar]

tādṛgrūpā na nārīṣu bhūtapūrvā yudhiṣṭhira |
duryodhanasutā yādṛgabhavadvaravarṇinī || 20 ||
[Analyze grammar]

tāmagniścakame sākṣādrājakanyāṃ sudarśanām |
bhūtvā ca brāhmaṇaḥ sākṣādvarayāmāsa taṃ nṛpam || 21 ||
[Analyze grammar]

daridraścāsavarṇaśca mamāyamiti pārthivaḥ |
na ditsati sutāṃ tasmai tāṃ viprāya sudarśanām || 22 ||
[Analyze grammar]

tato'sya vitate yajñe naṣṭo'bhūddhavyavāhanaḥ |
tato duryodhano rājā vākyamāhartvijastadā || 23 ||
[Analyze grammar]

duṣkṛtaṃ mama kiṃ nu syādbhavatāṃ vā dvijarṣabhāḥ |
yena nāśaṃ jagāmāgniḥ kṛtaṃ kupuruṣeṣviva || 24 ||
[Analyze grammar]

na hyalpaṃ duṣkṛtaṃ no'sti yenāgnirnāśamāgataḥ |
bhavatāṃ vātha vā mahyaṃ tattvenaitadvimṛśyatām || 25 ||
[Analyze grammar]

etadrājño vacaḥ śrutvā viprāste bharatarṣabha |
niyatā vāgyatāścaiva pāvakaṃ śaraṇaṃ yayuḥ || 26 ||
[Analyze grammar]

tāndarśayāmāsa tadā bhagavānhavyavāhanaḥ |
svaṃ rūpaṃ dīptimatkṛtvā śaradarkasamadyutiḥ || 27 ||
[Analyze grammar]

tato mahātmā tānāha dahano brāhmaṇarṣabhān |
varayāmyātmano'rthāya duryodhanasutāmiti || 28 ||
[Analyze grammar]

tataste kālyamutthāya tasmai rājñe nyavedayan |
brāhmaṇā vismitāḥ sarve yaduktaṃ citrabhānunā || 29 ||
[Analyze grammar]

tataḥ sa rājā tacchrutvā vacanaṃ brahmavādinām |
avāpya paramaṃ harṣaṃ tatheti prāha buddhimān || 30 ||
[Analyze grammar]

prāyācata nṛpaḥ śulkaṃ bhagavantaṃ vibhāvasum |
nityaṃ sāṃnidhyamiha te citrabhāno bhavediti |
tamāha bhagavānagnirevamastviti pārthivam || 31 ||
[Analyze grammar]

tataḥ sāṃnidhyamadhyāpi māhiṣmatyāṃ vibhāvasoḥ |
dṛṣṭaṃ hi sahadevena diśo vijayatā tadā || 32 ||
[Analyze grammar]

tatastāṃ samalaṃkṛtya kanyāmahatavāsasam |
dadau duryodhano rājā pāvakāya mahātmane || 33 ||
[Analyze grammar]

pratijagrāha cāgnistāṃ rājaputrīṃ sudarśanām |
vidhinā vedadṛṣṭena vasordhārāmivādhvare || 34 ||
[Analyze grammar]

tasyā rūpeṇa śīlena kulena vapuṣā śriyā |
abhavatprītimānagnirgarbhaṃ tasyāṃ samādadhe || 35 ||
[Analyze grammar]

tasyāṃ samabhavatputro nāmnāgneyaḥ sudarśanaḥ |
śiśurevādhyagātsarvaṃ sa ca brahma sanātanam || 36 ||
[Analyze grammar]

athaughavānnāma nṛpo nṛgasyāsītpitāmahaḥ |
tasyāpyoghavatī kanyā putraścaugharatho'bhavat || 37 ||
[Analyze grammar]

tāmoghavāndadau tasmai svayamoghavatīṃ sutām |
sudarśanāya viduṣe bhāryārthe devarūpiṇīm || 38 ||
[Analyze grammar]

sa gṛhasthāśramaratastayā saha sudarśanaḥ |
kurukṣetre'vasadrājannoghavatyā samanvitaḥ || 39 ||
[Analyze grammar]

gṛhasthaścāvajeṣyāmi mṛtyumityeva sa prabho |
pratijñāmakaroddhīmāndīptatejā viśāṃ pate || 40 ||
[Analyze grammar]

tāmathaughavatīṃ rājansa pāvakasuto'bravīt |
atitheḥ pratikūlaṃ te na kartavyaṃ kathaṃcana || 41 ||
[Analyze grammar]

yena yena ca tuṣyeta nityameva tvayātithiḥ |
apyātmanaḥ pradānena na te kāryā vicāraṇā || 42 ||
[Analyze grammar]

etadvrataṃ mama sadā hṛdi saṃparivartate |
gṛhasthānāṃ hi suśroṇi nātithervidyate param || 43 ||
[Analyze grammar]

pramāṇaṃ yadi vāmoru vacaste mama śobhane |
idaṃ vacanamavyagrā hṛdi tvaṃ dhārayeḥ sadā || 44 ||
[Analyze grammar]

niṣkrānte mayi kalyāṇi tathā saṃnihite'naghe |
nātithiste'vamantavyaḥ pramāṇaṃ yadyahaṃ tava || 45 ||
[Analyze grammar]

tamabravīdoghavatī yatā mūrdhni kṛtāñjaliḥ |
na me tvadvacanātkiṃcidakartavyaṃ kathaṃcana || 46 ||
[Analyze grammar]

jigīṣamāṇaṃ tu gṛhe tadā mṛtyuḥ sudarśanam |
pṛṣṭhato'nvagamadrājanrandhrānveṣī tadā sadā || 47 ||
[Analyze grammar]

idhmārthaṃ tu gate tasminnagniputre sudarśane |
atithirbrāhmaṇaḥ śrīmāṃstāmāhaughavatīṃ tadā || 48 ||
[Analyze grammar]

ātithyaṃ dattamicchāmi tvayādya varavarṇini |
pramāṇaṃ yadi dharmaste gṛhasthāśramasaṃmataḥ || 49 ||
[Analyze grammar]

ityuktā tena vipreṇa rājaputrī yaśasvinī |
vidhinā pratijagrāha vedoktena viśāṃ pate || 50 ||
[Analyze grammar]

āsanaṃ caiva pādyaṃ ca tasmai dattvā dvijātaye |
provācaughavatī vipraṃ kenārthaḥ kiṃ dadāmi te || 51 ||
[Analyze grammar]

tāmabravīttato vipro rājaputrīṃ sudarśanām |
tvayā mamārthaḥ kalyāṇi nirviśaṅke tadācara || 52 ||
[Analyze grammar]

yadi pramāṇaṃ dharmaste gṛhasthāśramasaṃmataḥ |
pradānenātmano rājñi kartumarhasi me priyam || 53 ||
[Analyze grammar]

tathā saṃchandyamāno'nyairīpsitairnṛpakanyayā |
nānyamātmapradānātsa tasyā vavre varaṃ dvijaḥ || 54 ||
[Analyze grammar]

sā tu rājasutā smṛtvā bharturvacanamāditaḥ |
tatheti lajjamānā sā tamuvāca dvijarṣabham || 55 ||
[Analyze grammar]

tato rahaḥ sa viprarṣiḥ sā caivopaviveśa ha |
saṃsmṛtya bharturvacanaṃ gṛhasthāśramakāṅkṣiṇaḥ || 56 ||
[Analyze grammar]

athedhmānsamupādāya sa pāvakirupāgamat |
mṛtyunā raudrabhāvena nityaṃ bandhurivānvitaḥ || 57 ||
[Analyze grammar]

tatastvāśramamāgamya sa pāvakasutastadā |
tāmājuhāvaughavatīṃ kvāsi yāteti cāsakṛt || 58 ||
[Analyze grammar]

tasmai prativacaḥ sā tu bhartre na pradadau tadā |
karābhyāṃ tena vipreṇa spṛṣṭā bhartṛvratā satī || 59 ||
[Analyze grammar]

ucchiṣṭāsmīti manvānā lajjitā bhartureva ca |
tūṣṇīṃbhūtābhavatsādhvī na covācātha kiṃcana || 60 ||
[Analyze grammar]

atha tāṃ punarevedaṃ provāca sa sudarśanaḥ |
kva sā sādhvī kva sā yātā garīyaḥ kimato mama || 61 ||
[Analyze grammar]

pativratā satyaśīlā nityaṃ caivārjave ratā |
kathaṃ na pratyudetyadya smayamānā yathā purā || 62 ||
[Analyze grammar]

uṭajasthastu taṃ vipraḥ pratyuvāca sudarśanam |
atithiṃ viddhi saṃprāptaṃ pāvake brāhmaṇaṃ ca mām || 63 ||
[Analyze grammar]

anayā chandyamāno'haṃ bhāryayā tava sattama |
taistairatithisatkārairārjave'syā dṛḍhaṃ manaḥ || 64 ||
[Analyze grammar]

anena vidhinā seyaṃ māmarcati śubhānanā |
anurūpaṃ yadatrādya tadbhavānvaktumarhati || 65 ||
[Analyze grammar]

kūṭamudgarahastastu mṛtyustaṃ vai samanvayāt |
hīnapratijñamatrainaṃ vadhiṣyāmīti cintayan || 66 ||
[Analyze grammar]

sudarśanastu manasā karmaṇā cakṣuṣā girā |
tyakterṣyastyaktamanyuśca smayamāno'bravīdidam || 67 ||
[Analyze grammar]

surataṃ te'stu viprāgrya prītirhi paramā mama |
gṛhasthasya hi dharmo'gryaḥ saṃprāptātithipūjanam || 68 ||
[Analyze grammar]

atithiḥ pūjito yasya gṛhasthasya tu gacchati |
nānyastasmātparo dharma iti prāhurmanīṣiṇaḥ || 69 ||
[Analyze grammar]

prāṇā hi mama dārāśca yaccānyadvidyate vasu |
atithibhyo mayā deyamiti me vratamāhitam || 70 ||
[Analyze grammar]

niḥsaṃdigdhaṃ mayā vākyametatte samudāhṛtam |
tenāhaṃ vipra satyena svayamātmānamālabhe || 71 ||
[Analyze grammar]

pṛthivī vāyurākāśamāpo jyotiśca pañcamam |
buddhirātmā manaḥ kālo diśaścaiva guṇā daśa || 72 ||
[Analyze grammar]

nityamete hi paśyanti dehināṃ dehasaṃśritāḥ |
sukṛtaṃ duṣkṛtaṃ cāpi karma dharmabhṛtāṃ vara || 73 ||
[Analyze grammar]

yathaiṣā nānṛtā vāṇī mayādya samudāhṛtā |
tena satyena māṃ devāḥ pālayantu dahantu vā || 74 ||
[Analyze grammar]

tato nādaḥ samabhavaddikṣu sarvāsu bhārata |
asakṛtsatyamityeva naitanmithyeti sarvaśaḥ || 75 ||
[Analyze grammar]

uṭajāttu tatastasmānniścakrāma sa vai dvijaḥ |
vapuṣā khaṃ ca bhūmiṃ ca vyāpya vāyurivodyataḥ || 76 ||
[Analyze grammar]

svareṇa vipraḥ śaikṣeṇa trīṃllokānanunādayan |
uvāca cainaṃ dharmajñaṃ pūrvamāmantrya nāmataḥ || 77 ||
[Analyze grammar]

dharmo'hamasmi bhadraṃ te jijñāsārthaṃ tavānagha |
prāptaḥ satyaṃ ca te jñātvā prītirme paramā tvayi || 78 ||
[Analyze grammar]

vijitaśca tvayā mṛtyuryo'yaṃ tvāmanugacchati |
randhrānveṣī tava sadā tvayā dhṛtyā vaśīkṛtaḥ || 79 ||
[Analyze grammar]

na cāsti śaktistrailokye kasyacitpuruṣottama |
pativratāmimāṃ sādhvīṃ tavodvīkṣitumapyuta || 80 ||
[Analyze grammar]

rakṣitā tvadguṇaireṣā pativrataguṇaistathā |
adhṛṣyā yadiyaṃ brūyāttathā tannānyathā bhavet || 81 ||
[Analyze grammar]

eṣā hi tapasā svena saṃyuktā brahmavādinī |
pāvanārthaṃ ca lokasya saricchreṣṭhā bhaviṣyati || 82 ||
[Analyze grammar]

ardhenaughavatī nāma tvāmardhenānuyāsyati |
śarīreṇa mahābhāgā yogo hyasyā vaśe sthitaḥ || 83 ||
[Analyze grammar]

anayā saha lokāṃśca gantāsi tapasārjitān |
yatra nāvṛttimabhyeti śāśvatāṃstānsanātanān || 84 ||
[Analyze grammar]

anena caiva dehena lokāṃstvamabhipatsyase |
nirjitaśca tvayā mṛtyuraiśvaryaṃ ca tavottamam || 85 ||
[Analyze grammar]

pañca bhūtānyatikrāntaḥ svavīryācca manobhavaḥ |
gṛhasthadharmeṇānena kāmakrodhau ca te jitau || 86 ||
[Analyze grammar]

sneho rāgaśca tandrī ca moho drohaśca kevalaḥ |
tava śuśrūṣayā rājanrājaputryā vinirjitāḥ || 87 ||
[Analyze grammar]

bhīṣma uvāca |
śuklānāṃ tu sahasreṇa vājināṃ rathamuttamam |
yuktaṃ pragṛhya bhagavānvyavasāyo jagāma tam || 88 ||
[Analyze grammar]

mṛtyurātmā ca lokāśca jitā bhūtāni pañca ca |
buddhiḥ kālo mano vyoma kāmakrodhau tathaiva ca || 89 ||
[Analyze grammar]

tasmādgṛhāśramasthasya nānyaddaivatamasti vai |
ṛte'tithiṃ naravyāghra manasaitadvicāraya || 90 ||
[Analyze grammar]

atithiḥ pūjito yasya dhyāyate manasā śubham |
na tatkratuśatenāpi tulyamāhurmanīṣiṇaḥ || 91 ||
[Analyze grammar]

pātraṃ tvatithimāsādya śīlāḍhyaṃ yo na pūjayet |
sa dattvā sukṛtaṃ tasya kṣapayeta hyanarcitaḥ || 92 ||
[Analyze grammar]

etatte kathitaṃ putra mayākhyānamanuttamam |
yathā hi vijito mṛtyurgṛhasthena purābhavat || 93 ||
[Analyze grammar]

dhanyaṃ yaśasyamāyuṣyamidamākhyānamuttamam |
bubhūṣatābhimantavyaṃ sarvaduścaritāpaham || 94 ||
[Analyze grammar]

ya idaṃ kathayedvidvānahanyahani bhārata |
sudarśanasya caritaṃ puṇyāṃllokānavāpnuyāt || 95 ||
[Analyze grammar]