Chapter 335

janamejaya uvāca |
śrutaṃ bhagavatastasya māhātmyaṃ paramātmanaḥ |
janma dharmagṛhe caiva naranārāyaṇātmakam |
mahāvarāhasṛṣṭā ca piṇḍotpattiḥ purātanī || 1 ||
[Analyze grammar]

pravṛttau ca nivṛttau ca yo yathā parikalpitaḥ |
sa tathā naḥ śruto brahmankathyamānastvayānagha || 2 ||
[Analyze grammar]

yacca tatkathitaṃ pūrvaṃ tvayā hayaśiro mahat |
havyakavyabhujo viṣṇorudakpūrve mahodadhau |
tacca dṛṣṭaṃ bhagavatā brahmaṇā parameṣṭhinā || 3 ||
[Analyze grammar]

kiṃ tadutpāditaṃ pūrvaṃ hariṇā lokadhāriṇā |
rūpaṃ prabhāvamahatāmapūrvaṃ dhīmatāṃ vara || 4 ||
[Analyze grammar]

dṛṣṭvā hi vibudhaśreṣṭhamapūrvamamitaujasam |
tadaśvaśirasaṃ puṇyaṃ brahmā kimakaronmune || 5 ||
[Analyze grammar]

etannaḥ saṃśayaṃ brahmanpurāṇajñānasaṃbhavam |
kathayasvottamamate mahāpuruṣanirmitam |
pāvitāḥ sma tvayā brahmanpuṇyāṃ kathayatā kathām || 6 ||
[Analyze grammar]

vaiśaṃpāyana uvāca |
kathayiṣyāmi te sarvaṃ purāṇaṃ vedasaṃmitam |
jagau yadbhagavānvyāso rājño dharmasutasya vai || 7 ||
[Analyze grammar]

śrutvāśvaśiraso mūrtiṃ devasya harimedhasaḥ |
utpannasaṃśayo rājā tameva samacodayat || 8 ||
[Analyze grammar]

yudhiṣṭhira uvāca |
yattaddarśitavānbrahmā devaṃ hayaśirodharam |
kimarthaṃ tatsamabhavadvapurdevopakalpitam || 9 ||
[Analyze grammar]

vyāsa uvāca |
yatkiṃcidiha loke vai dehabaddhaṃ viśāṃ pate |
sarvaṃ pañcabhirāviṣṭaṃ bhūtairīśvarabuddhijaiḥ || 10 ||
[Analyze grammar]

īśvaro hi jagatsraṣṭā prabhurnārāyaṇo virāṭ |
bhūtāntarātmā varadaḥ saguṇo nirguṇo'pi ca |
bhūtapralayamavyaktaṃ śṛṇuṣva nṛpasattama || 11 ||
[Analyze grammar]

dharaṇyāmatha līnāyāmapsu caikārṇave purā |
jyotirbhūte jale cāpi līne jyotiṣi cānile || 12 ||
[Analyze grammar]

vāyau cākāśasaṃlīne ākāśe ca manonuge |
vyakte manasi saṃlīne vyakte cāvyaktatāṃ gate || 13 ||
[Analyze grammar]

avyakte puruṣaṃ yāte puṃsi sarvagate'pi ca |
tama evābhavatsarvaṃ na prājñāyata kiṃcana || 14 ||
[Analyze grammar]

tamaso brahma saṃbhūtaṃ tamomūlamṛtātmakam |
tadviśvabhāvasaṃjñāntaṃ pauruṣīṃ tanumāsthitam || 15 ||
[Analyze grammar]

so'niruddha iti proktastatpradhānaṃ pracakṣate |
tadavyaktamiti jñeyaṃ triguṇaṃ nṛpasattama || 16 ||
[Analyze grammar]

vidyāsahāyavāndevo viṣvakseno hariḥ prabhuḥ |
apsveva śayanaṃ cakre nidrāyogamupāgataḥ |
jagataścintayansṛṣṭiṃ citrāṃ bahuguṇodbhavām || 17 ||
[Analyze grammar]

tasya cintayataḥ sṛṣṭiṃ mahānātmaguṇaḥ smṛtaḥ |
ahaṃkārastato jāto brahmā śubhacaturmukhaḥ |
hiraṇyagarbho bhagavānsarvalokapitāmahaḥ || 18 ||
[Analyze grammar]

padme'niruddhātsaṃbhūtastadā padmanibhekṣaṇaḥ |
sahasrapatre dyutimānupaviṣṭaḥ sanātanaḥ || 19 ||
[Analyze grammar]

dadṛśe'dbhutasaṃkāśe lokānāpomayānprabhuḥ |
sattvasthaḥ parameṣṭhī sa tato bhūtagaṇānsṛjat || 20 ||
[Analyze grammar]

pūrvameva ca padmasya patre sūryāṃśusaprabhe |
nārāyaṇakṛtau bindū apāmāstāṃ guṇottarau || 21 ||
[Analyze grammar]

tāvapaśyatsa bhagavānanādinidhano'cyutaḥ |
ekastatrābhavadbindurmadhvābho ruciraprabhaḥ || 22 ||
[Analyze grammar]

sa tāmaso madhurjātastadā nārāyaṇājñayā |
kaṭhinastvaparo binduḥ kaiṭabho rājasastu saḥ || 23 ||
[Analyze grammar]

tāvabhyadhāvatāṃ śreṣṭhau tamorajaguṇānvitau |
balavantau gadāhastau padmanālānusāriṇau || 24 ||
[Analyze grammar]

dadṛśāte'ravindasthaṃ brahmāṇamamitaprabham |
sṛjantaṃ prathamaṃ vedāṃścaturaścāruvigrahān || 25 ||
[Analyze grammar]

tato vigrahavantau tau vedāndṛṣṭvāsurottamau |
sahasā jagṛhaturvedānbrahmaṇaḥ paśyatastadā || 26 ||
[Analyze grammar]

atha tau dānavaśreṣṭhau vedāngṛhya sanātanān |
rasāṃ viviśatustūrṇamudakpūrve mahodadhau || 27 ||
[Analyze grammar]

tato hṛteṣu vedeṣu brahmā kaśmalamāviśat |
tato vacanamīśānaṃ prāha vedairvinākṛtaḥ || 28 ||
[Analyze grammar]

vedā me paramaṃ cakṣurvedā me paramaṃ balam |
vedā me paramaṃ dhāma vedā me brahma cottamam || 29 ||
[Analyze grammar]

mama vedā hṛtāḥ sarve dānavābhyāṃ balāditaḥ |
andhakārā hi me lokā jātā vedairvinākṛtāḥ |
vedānṛte hi kiṃ kuryāṃ lokānvai sraṣṭumudyataḥ || 30 ||
[Analyze grammar]

aho bata mahadduḥkhaṃ vedanāśanajaṃ mama |
prāptaṃ dunoti hṛdayaṃ tīvraśokāya randhayan || 31 ||
[Analyze grammar]

ko hi śokārṇave magnaṃ māmito'dya samuddharet |
vedāṃstānānayennaṣṭānkasya cāhaṃ priyo bhave || 32 ||
[Analyze grammar]

ityevaṃ bhāṣamāṇasya brahmaṇo nṛpasattama |
hareḥ stotrārthamudbhūtā buddhirbuddhimatāṃ vara |
tato jagau paraṃ japyaṃ sāñjalipragrahaḥ prabhuḥ || 33 ||
[Analyze grammar]

namaste brahmahṛdaya namaste mama pūrvaja |
lokādya bhuvanaśreṣṭha sāṃkhyayoganidhe vibho || 34 ||
[Analyze grammar]

vyaktāvyaktakarācintya kṣemaṃ panthānamāsthita |
viśvabhuksarvabhūtānāmantarātmannayonija || 35 ||
[Analyze grammar]

ahaṃ prasādajastubhyaṃ lokadhāmne svayaṃbhuve |
tvatto me mānasaṃ janma prathamaṃ dvijapūjitam || 36 ||
[Analyze grammar]

cākṣuṣaṃ vai dvitīyaṃ me janma cāsītpurātanam |
tvatprasādācca me janma tṛtīyaṃ vācikaṃ mahat || 37 ||
[Analyze grammar]

tvattaḥ śravaṇajaṃ cāpi caturthaṃ janma me vibho |
nāsikyaṃ cāpi me janma tvattaḥ pañcamamucyate || 38 ||
[Analyze grammar]

aṇḍajaṃ cāpi me janma tvattaḥ ṣaṣṭhaṃ vinirmitam |
idaṃ ca saptamaṃ janma padmajaṃ me'mitaprabha || 39 ||
[Analyze grammar]

sarge sarge hyahaṃ putrastava triguṇavarjitaḥ |
prathitaḥ puṇḍarīkākṣa pradhānaguṇakalpitaḥ || 40 ||
[Analyze grammar]

tvamīśvarasvabhāvaśca svayaṃbhūḥ puruṣottamaḥ |
tvayā vinirmito'haṃ vai vedacakṣurvayotigaḥ || 41 ||
[Analyze grammar]

te me vedā hṛtāścakṣurandho jāto'smi jāgṛhi |
dadasva cakṣuṣī mahyaṃ priyo'haṃ te priyo'si me || 42 ||
[Analyze grammar]

evaṃ stutaḥ sa bhagavānpuruṣaḥ sarvatomukhaḥ |
jahau nidrāmatha tadā vedakāryārthamudyataḥ |
aiśvareṇa prayogeṇa dvitīyāṃ tanumāsthitaḥ || 43 ||
[Analyze grammar]

sunāsikena kāyena bhūtvā candraprabhastadā |
kṛtvā hayaśiraḥ śubhraṃ vedānāmālayaṃ prabhuḥ || 44 ||
[Analyze grammar]

tasya mūrdhā samabhavaddyauḥ sanakṣatratārakā |
keśāścāsyābhavandīrghā raveraṃśusamaprabhāḥ || 45 ||
[Analyze grammar]

karṇāvākāśapātāle lalāṭaṃ bhūtadhāriṇī |
gaṅgā sarasvatī puṇyā bhruvāvāstāṃ mahānadī || 46 ||
[Analyze grammar]

cakṣuṣī somasūryau te nāsā saṃdhyā punaḥ smṛtā |
oṃkārastvatha saṃskāro vidyujjihvā ca nirmitā || 47 ||
[Analyze grammar]

dantāśca pitaro rājansomapā iti viśrutāḥ |
goloko brahmalokaśca oṣṭhāvāstāṃ mahātmanaḥ |
grīvā cāsyābhavadrājankālarātrirguṇottarā || 48 ||
[Analyze grammar]

etaddhayaśiraḥ kṛtvā nānāmūrtibhirāvṛtam |
antardadhe sa viśveśo viveśa ca rasāṃ prabhuḥ || 49 ||
[Analyze grammar]

rasāṃ punaḥ praviṣṭaśca yogaṃ paramamāsthitaḥ |
śaikṣaṃ svaraṃ samāsthāya omiti prāsṛjatsvaram || 50 ||
[Analyze grammar]

sa svaraḥ sānunādī ca sarvagaḥ snigdha eva ca |
babhūvāntarmahībhūtaḥ sarvabhūtaguṇoditaḥ || 51 ||
[Analyze grammar]

tatastāvasurau kṛtvā vedānsamayabandhanān |
rasātale vinikṣipya yataḥ śabdastato drutau || 52 ||
[Analyze grammar]

etasminnantare rājandevo hayaśirodharaḥ |
jagrāha vedānakhilānrasātalagatānhariḥ |
prādācca brahmaṇe bhūyastataḥ svāṃ prakṛtiṃ gataḥ || 53 ||
[Analyze grammar]

sthāpayitvā hayaśira udakpūrve mahodadhau |
vedānāmālayaścāpi babhūvāśvaśirāstataḥ || 54 ||
[Analyze grammar]

atha kiṃcidapaśyantau dānavau madhukaiṭabhau |
punarājagmatustatra vegitau paśyatāṃ ca tau |
yatra vedā vinikṣiptāstatsthānaṃ śūnyameva ca || 55 ||
[Analyze grammar]

tata uttamamāsthāya vegaṃ balavatāṃ varau |
punaruttasthatuḥ śīghraṃ rasānāmālayāttadā |
dadṛśāte ca puruṣaṃ tamevādikaraṃ prabhum || 56 ||
[Analyze grammar]

śvetaṃ candraviśuddhābhamaniruddhatanau sthitam |
bhūyo'pyamitavikrāntaṃ nidrāyogamupāgatam || 57 ||
[Analyze grammar]

ātmapramāṇaracite apāmupari kalpite |
śayane nāgabhogāḍhye jvālāmālāsamāvṛte || 58 ||
[Analyze grammar]

niṣkalmaṣeṇa sattvena saṃpannaṃ ruciraprabham |
taṃ dṛṣṭvā dānavendrau tau mahāhāsamamuñcatām || 59 ||
[Analyze grammar]

ūcatuśca samāviṣṭau rajasā tamasā ca tau |
ayaṃ sa puruṣaḥ śvetaḥ śete nidrāmupāgataḥ || 60 ||
[Analyze grammar]

anena nūnaṃ vedānāṃ kṛtamāharaṇaṃ rasāt |
kasyaiṣa ko nu khalveṣa kiṃ ca svapiti bhogavān || 61 ||
[Analyze grammar]

ityuccāritavākyau tau bodhayāmāsaturharim |
yuddhārthinau tu vijñāya vibuddhaḥ puruṣottamaḥ || 62 ||
[Analyze grammar]

nirīkṣya cāsurendrau tau tato yuddhe mano dadhe |
atha yuddhaṃ samabhavattayornārāyaṇasya ca || 63 ||
[Analyze grammar]

rajastamoviṣṭatanū tāvubhau madhukaiṭabhau |
brahmaṇopacitiṃ kurvañjaghāna madhusūdanaḥ || 64 ||
[Analyze grammar]

tatastayorvadhenāśu vedāpaharaṇena ca |
śokāpanayanaṃ cakre brahmaṇaḥ puruṣottamaḥ || 65 ||
[Analyze grammar]

tataḥ parivṛto brahmā hatārirvedasatkṛtaḥ |
nirmame sa tadā lokānkṛtsnānsthāvarajaṅgamān || 66 ||
[Analyze grammar]

dattvā pitāmahāyāgryāṃ buddhiṃ lokavisargikīm |
tatraivāntardadhe devo yata evāgato hariḥ || 67 ||
[Analyze grammar]

tau dānavau harirhatvā kṛtvā hayaśirastanum |
punaḥ pravṛttidharmārthaṃ tāmeva vidadhe tanum || 68 ||
[Analyze grammar]

evameṣa mahābhāgo babhūvāśvaśirā hariḥ |
paurāṇametadākhyātaṃ rūpaṃ varadamaiśvaram || 69 ||
[Analyze grammar]

yo hyetadbrāhmaṇo nityaṃ śṛṇuyāddhārayeta vā |
na tasyādhyayanaṃ nāśamupagacchetkadācana || 70 ||
[Analyze grammar]

ārādhya tapasogreṇa devaṃ hayaśirodharam |
pāñcālena kramaḥ prāpto rāmeṇa pathi deśite || 71 ||
[Analyze grammar]

etaddhayaśiro rājannākhyānaṃ tava kīrtitam |
purāṇaṃ vedasamitaṃ yanmāṃ tvaṃ paripṛcchasi || 72 ||
[Analyze grammar]

yāṃ yāmicchettanuṃ devaḥ kartuṃ kāryavidhau kvacit |
tāṃ tāṃ kuryādvikurvāṇaḥ svayamātmānamātmanā || 73 ||
[Analyze grammar]

eṣa vedanidhiḥ śrīmāneṣa vai tapaso nidhiḥ |
eṣa yogaśca sāṃkhyaṃ ca brahma cāgryaṃ harirvibhuḥ || 74 ||
[Analyze grammar]

nārāyaṇaparā vedā yajñā nārāyaṇātmakāḥ |
tapo nārāyaṇaparaṃ nārāyaṇaparā gatiḥ || 75 ||
[Analyze grammar]

nārāyaṇaparaṃ satyamṛtaṃ nārāyaṇātmakam |
nārāyaṇaparo dharmaḥ punarāvṛttidurlabhaḥ || 76 ||
[Analyze grammar]

pravṛttilakṣaṇaścaiva dharmo nārāyaṇātmakaḥ |
nārāyaṇātmako gandho bhūmau śreṣṭhatamaḥ smṛtaḥ || 77 ||
[Analyze grammar]

apāṃ caiva guṇo rājanraso nārāyaṇātmakaḥ |
jyotiṣāṃ ca guṇo rūpaṃ smṛtaṃ nārāyaṇātmakam || 78 ||
[Analyze grammar]

nārāyaṇātmakaścāpi sparśo vāyuguṇaḥ smṛtaḥ |
nārāyaṇātmakaścāpi śabda ākāśasaṃbhavaḥ || 79 ||
[Analyze grammar]

manaścāpi tato bhūtamavyaktaguṇalakṣaṇam |
nārāyaṇaparaḥ kālo jyotiṣāmayanaṃ ca yat || 80 ||
[Analyze grammar]

nārāyaṇaparā kīrtiḥ śrīśca lakṣmīśca devatāḥ |
nārāyaṇaparaṃ sāṃkhyaṃ yogo nārāyaṇātmakaḥ || 81 ||
[Analyze grammar]

kāraṇaṃ puruṣo yeṣāṃ pradhānaṃ cāpi kāraṇam |
svabhāvaścaiva karmāṇi daivaṃ yeṣāṃ ca kāraṇam || 82 ||
[Analyze grammar]

pañcakāraṇasaṃkhyāto niṣṭhā sarvatra vai hariḥ |
tattvaṃ jijñāsamānānāṃ hetubhiḥ sarvatomukhaiḥ || 83 ||
[Analyze grammar]

tattvameko mahāyogī harirnārāyaṇaḥ prabhuḥ |
sabrahmakānāṃ lokānāmṛṣīṇāṃ ca mahātmanām || 84 ||
[Analyze grammar]

sāṃkhyānāṃ yogināṃ cāpi yatīnāmātmavedinām |
manīṣitaṃ vijānāti keśavo na tu tasya te || 85 ||
[Analyze grammar]

ye kecitsarvalokeṣu daivaṃ pitryaṃ ca kurvate |
dānāni ca prayacchanti tapyanti ca tapo mahat || 86 ||
[Analyze grammar]

sarveṣāmāśrayo viṣṇuraiśvaraṃ vidhimāsthitaḥ |
sarvabhūtakṛtāvāso vāsudeveti cocyate || 87 ||
[Analyze grammar]

ayaṃ hi nityaḥ paramo maharṣirmahāvibhūtirguṇavānnirguṇākhyaḥ |
guṇaiśca saṃyogamupaiti śīghraṃ kālo yathartāvṛtusaṃprayuktaḥ || 88 ||
[Analyze grammar]

naivāsya vindanti gatiṃ mahātmano na cāgatiṃ kaścidihānupaśyati |
jñānātmakāḥ saṃyamino maharṣayaḥ paśyanti nityaṃ puruṣaṃ guṇādhikam || 89 ||
[Analyze grammar]