Chapter 326

bhīṣma uvāca |
evaṃ stutaḥ sa bhagavānguhyaistathyaiśca nāmabhiḥ |
taṃ muniṃ darśayāmāsa nāradaṃ viśvarūpadhṛk || 1 ||
[Analyze grammar]

kiṃciccandraviśuddhātmā kiṃciccandrādviśeṣavān |
kṛśānuvarṇaḥ kiṃcicca kiṃciddhiṣṇyākṛtiḥ prabhuḥ || 2 ||
[Analyze grammar]

śukapatravarṇaḥ kiṃcicca kiṃcitsphaṭikasaprabhaḥ |
nīlāñjanacayaprakhyo jātarūpaprabhaḥ kvacit || 3 ||
[Analyze grammar]

pravālāṅkuravarṇaśca śvetavarṇaḥ kvacidbabhau |
kvacitsuvarṇavarṇābho vaiḍūryasadṛśaḥ kvacit || 4 ||
[Analyze grammar]

nīlavaiḍūryasadṛśa indranīlanibhaḥ kvacit |
mayūragrīvavarṇābho muktāhāranibhaḥ kvacit || 5 ||
[Analyze grammar]

etānvarṇānbahuvidhānrūpe bibhratsanātanaḥ |
sahasranayanaḥ śrīmāñśataśīrṣaḥ sahasrapāt || 6 ||
[Analyze grammar]

sahasrodarabāhuśca avyakta iti ca kvacit |
oṃkāramudgiranvaktrātsāvitrīṃ ca tadanvayām || 7 ||
[Analyze grammar]

śeṣebhyaścaiva vaktrebhyaścaturvedodgataṃ vasu |
āraṇyakaṃ jagau devo harirnārāyaṇo vaśī || 8 ||
[Analyze grammar]

vedīṃ kamaṇḍaluṃ darbhānmaṇirūpānathopalān |
ajinaṃ daṇḍakāṣṭhaṃ ca jvalitaṃ ca hutāśanam |
dhārayāmāsa deveśo hastairyajñapatistadā || 9 ||
[Analyze grammar]

taṃ prasannaṃ prasannātmā nārado dvijasattamaḥ |
vāgyataḥ prayato bhūtvā vavande parameśvaram |
tamuvāca nataṃ mūrdhnā devānāmādiravyayaḥ || 10 ||
[Analyze grammar]

ekataśca dvitaścaiva tritaścaiva maharṣayaḥ |
imaṃ deśamanuprāptā mama darśanalālasāḥ || 11 ||
[Analyze grammar]

na ca māṃ te dadṛśire na ca drakṣyati kaścana |
ṛte hyekāntikaśreṣṭhāttvaṃ caivaikāntiko mataḥ || 12 ||
[Analyze grammar]

mamaitāstanavaḥ śreṣṭhā jātā dharmagṛhe dvija |
tāstvaṃ bhajasva satataṃ sādhayasva yathāgatam || 13 ||
[Analyze grammar]

vṛṇīṣva ca varaṃ vipra mattastvaṃ yamihecchasi |
prasanno'haṃ tavādyeha viśvamūrtirihāvyayaḥ || 14 ||
[Analyze grammar]

nārada uvāca |
adya me tapaso deva yamasya niyamasya ca |
sadyaḥ phalamavāptaṃ vai dṛṣṭo yadbhagavānmayā || 15 ||
[Analyze grammar]

vara eṣa mamātyantaṃ dṛṣṭastvaṃ yatsanātanaḥ |
bhagavānviśvadṛksiṃhaḥ sarvamūrtirmahāprabhuḥ || 16 ||
[Analyze grammar]

bhīṣma uvāca |
evaṃ saṃdarśayitvā tu nāradaṃ parameṣṭhijam |
uvāca vacanaṃ bhūyo gaccha nārada māciram || 17 ||
[Analyze grammar]

ime hyanindriyāhārā madbhaktāścandravarcasaḥ |
ekāgrāścintayeyurmāṃ naiṣāṃ vighno bhavediti || 18 ||
[Analyze grammar]

siddhāścaite mahābhāgāḥ purā hyekāntino'bhavan |
tamorajovinirmuktā māṃ pravekṣyantyasaṃśayam || 19 ||
[Analyze grammar]

na dṛśyaścakṣuṣā yo'sau na spṛśyaḥ sparśanena ca |
na ghreyaścaiva gandhena rasena ca vivarjitaḥ || 20 ||
[Analyze grammar]

sattvaṃ rajastamaścaiva na guṇāstaṃ bhajanti vai |
yaśca sarvagataḥ sākṣī lokasyātmeti kathyate || 21 ||
[Analyze grammar]

bhūtagrāmaśarīreṣu naśyatsu na vinaśyati |
ajo nityaḥ śāśvataśca nirguṇo niṣkalastathā || 22 ||
[Analyze grammar]

dvirdvādaśebhyastattvebhyaḥ khyāto yaḥ pañcaviṃśakaḥ |
puruṣo niṣkriyaścaiva jñānadṛśyaśca kathyate || 23 ||
[Analyze grammar]

yaṃ praviśya bhavantīha muktā vai dvijasattama |
sa vāsudevo vijñeyaḥ paramātmā sanātanaḥ || 24 ||
[Analyze grammar]

paśya devasya māhātmyaṃ mahimānaṃ ca nārada |
śubhāśubhaiḥ karmabhiryo na lipyati kadācana || 25 ||
[Analyze grammar]

sattvaṃ rajastamaścaiva guṇānetānpracakṣate |
ete sarvaśarīreṣu tiṣṭhanti vicaranti ca || 26 ||
[Analyze grammar]

etānguṇāṃstu kṣetrajño bhuṅkte naibhiḥ sa bhujyate |
nirguṇo guṇabhukcaiva guṇasraṣṭā guṇādhikaḥ || 27 ||
[Analyze grammar]

jagatpratiṣṭhā devarṣe pṛthivyapsu pralīyate |
jyotiṣyāpaḥ pralīyante jyotirvāyau pralīyate || 28 ||
[Analyze grammar]

khe vāyuḥ pralayaṃ yāti manasyākāśameva ca |
mano hi paramaṃ bhūtaṃ tadavyakte pralīyate || 29 ||
[Analyze grammar]

avyaktaṃ puruṣe brahmanniṣkriye saṃpralīyate |
nāsti tasmātparataraṃ puruṣādvai sanātanāt || 30 ||
[Analyze grammar]

nityaṃ hi nāsti jagati bhūtaṃ sthāvarajaṅgamam |
ṛte tamekaṃ puruṣaṃ vāsudevaṃ sanātanam |
sarvabhūtātmabhūto hi vāsudevo mahābalaḥ || 31 ||
[Analyze grammar]

pṛthivī vāyurākāśamāpo jyotiśca pañcamam |
te sametā mahātmānaḥ śarīramiti saṃjñitam || 32 ||
[Analyze grammar]

tadāviśati yo brahmannadṛśyo laghuvikramaḥ |
utpanna eva bhavati śarīraṃ ceṣṭayanprabhuḥ || 33 ||
[Analyze grammar]

na vinā dhātusaṃghātaṃ śarīraṃ bhavati kvacit |
na ca jīvaṃ vinā brahmandhātavaśceṣṭayantyuta || 34 ||
[Analyze grammar]

sa jīvaḥ parisaṃkhyātaḥ śeṣaḥ saṃkarṣaṇaḥ prabhuḥ |
tasmātsanatkumāratvaṃ yo labheta svakarmaṇā || 35 ||
[Analyze grammar]

yasmiṃśca sarvabhūtāni pralayaṃ yānti saṃkṣaye |
sa manaḥ sarvabhūtānāṃ pradyumnaḥ paripaṭhyate || 36 ||
[Analyze grammar]

tasmātprasūto yaḥ kartā kāryaṃ kāraṇameva ca |
yasmātsarvaṃ prabhavati jagatsthāvarajaṅgamam |
so'niruddhaḥ sa īśāno vyaktiḥ sā sarvakarmasu || 37 ||
[Analyze grammar]

yo vāsudevo bhagavānkṣetrajño nirguṇātmakaḥ |
jñeyaḥ sa eva bhagavāñjīvaḥ saṃkarṣaṇaḥ prabhuḥ || 38 ||
[Analyze grammar]

saṃkarṣaṇācca pradyumno manobhūtaḥ sa ucyate |
pradyumnādyo'niruddhastu so'haṃkāro maheśvaraḥ || 39 ||
[Analyze grammar]

mattaḥ sarvaṃ saṃbhavati jagatsthāvarajaṅgamam |
akṣaraṃ ca kṣaraṃ caiva saccāsaccaiva nārada || 40 ||
[Analyze grammar]

māṃ praviśya bhavantīha muktā bhaktāstu ye mama |
ahaṃ hi puruṣo jñeyo niṣkriyaḥ pañcaviṃśakaḥ || 41 ||
[Analyze grammar]

nirguṇo niṣkalaścaiva nirdvaṃdvo niṣparigrahaḥ |
etattvayā na vijñeyaṃ rūpavāniti dṛśyate |
icchanmuhūrtānnaśyeyamīśo'haṃ jagato guruḥ || 42 ||
[Analyze grammar]

māyā hyeṣā mayā sṛṣṭā yanmāṃ paśyasi nārada |
sarvabhūtaguṇairyuktaṃ naivaṃ tvaṃ jñātumarhasi |
mayaitatkathitaṃ samyaktava mūrticatuṣṭayam || 43 ||
[Analyze grammar]

siddhā hyete mahābhāgā narā hyekāntino'bhavan |
tamorajobhyāṃ nirmuktāḥ pravekṣyanti ca māṃ mune || 44 ||
[Analyze grammar]

ahaṃ kartā ca kāryaṃ ca kāraṇaṃ cāpi nārada |
ahaṃ hi jīvasaṃjño vai mayi jīvaḥ samāhitaḥ |
maivaṃ te buddhiratrābhūddṛṣṭo jīvo mayeti ca || 45 ||
[Analyze grammar]

ahaṃ sarvatrago brahmanbhūtagrāmāntarātmakaḥ |
bhūtagrāmaśarīreṣu naśyatsu na naśāmyaham || 46 ||
[Analyze grammar]

hiraṇyagarbho lokādiścaturvaktro niruktagaḥ |
brahmā sanātano devo mama bahvarthacintakaḥ || 47 ||
[Analyze grammar]

paśyaikādaśa me rudrāndakṣiṇaṃ pārśvamāsthitān |
dvādaśaiva tathādityānvāmaṃ pārśvaṃ samāsthitān || 48 ||
[Analyze grammar]

agrataścaiva me paśya vasūnaṣṭau surottamān |
nāsatyaṃ caiva dasraṃ ca bhiṣajau paśya pṛṣṭhataḥ || 49 ||
[Analyze grammar]

sarvānprajāpatīnpaśya paśya sapta ṛṣīnapi |
vedānyajñāṃśca śataśaḥ paśyāmṛtamathauṣadhīḥ || 50 ||
[Analyze grammar]

tapāṃsi niyamāṃścaiva yamānapi pṛthagvidhān |
tathāṣṭaguṇamaiśvaryamekasthaṃ paśya mūrtimat || 51 ||
[Analyze grammar]

śriyaṃ lakṣmīṃ ca kīrtiṃ ca pṛthivīṃ ca kakudminīm |
vedānāṃ mātaraṃ paśya matsthāṃ devīṃ sarasvatīm || 52 ||
[Analyze grammar]

dhruvaṃ ca jyotiṣāṃ śreṣṭhaṃ paśya nārada khecaram |
ambhodharānsamudrāṃśca sarāṃsi saritastathā || 53 ||
[Analyze grammar]

mūrtimantaḥ pitṛgaṇāṃścaturaḥ paśya sattama |
trīṃścaivemānguṇānpaśya matsthānmūrtivivarjitān || 54 ||
[Analyze grammar]

devakāryādapi mune pitṛkāryaṃ viśiṣyate |
devānāṃ ca pitṝṇāṃ ca pitā hyeko'hamāditaḥ || 55 ||
[Analyze grammar]

ahaṃ hayaśiro bhūtvā samudre paścimottare |
pibāmi suhutaṃ havyaṃ kavyaṃ ca śraddhayānvitam || 56 ||
[Analyze grammar]

mayā sṛṣṭaḥ purā brahmā madyajñamayajatsvayam |
tatastasmai varānprīto dadāvahamanuttamān || 57 ||
[Analyze grammar]

matputratvaṃ ca kalpādau lokādhyakṣatvameva ca |
ahaṃkārakṛtaṃ caiva nāma paryāyavācakam || 58 ||
[Analyze grammar]

tvayā kṛtāṃ ca maryādāṃ nātikrāmyati kaścana |
tvaṃ caiva varado brahmanvarepsūnāṃ bhaviṣyasi || 59 ||
[Analyze grammar]

surāsuragaṇānāṃ ca ṛṣīṇāṃ ca tapodhana |
pitṝṇāṃ ca mahābhāga satataṃ saṃśitavrata |
vividhānāṃ ca bhūtānāṃ tvamupāsyo bhaviṣyasi || 60 ||
[Analyze grammar]

prādurbhāvagataścāhaṃ surakāryeṣu nityadā |
anuśāsyastvayā brahmanniyojyaśca suto yathā || 61 ||
[Analyze grammar]

etāṃścānyāṃśca rucirānbrahmaṇe'mitatejase |
ahaṃ dattvā varānprīto nivṛttiparamo'bhavam || 62 ||
[Analyze grammar]

nirvāṇaṃ sarvadharmāṇāṃ nivṛttiḥ paramā smṛtā |
tasmānnivṛttimāpannaścaretsarvāṅganirvṛtaḥ || 63 ||
[Analyze grammar]

vidyāsahāyavantaṃ māmādityasthaṃ sanātanam |
kapilaṃ prāhurācāryāḥ sāṃkhyaniścitaniścayāḥ || 64 ||
[Analyze grammar]

hiraṇyagarbho bhagavāneṣa chandasi suṣṭutaḥ |
so'haṃ yogagatirbrahmanyogaśāstreṣu śabditaḥ || 65 ||
[Analyze grammar]

eṣo'haṃ vyaktimāgamya tiṣṭhāmi divi śāśvataḥ |
tato yugasahasrānte saṃhariṣye jagatpunaḥ |
kṛtvātmasthāni bhūtāni sthāvarāṇi carāṇi ca || 66 ||
[Analyze grammar]

ekākī vidyayā sārdhaṃ vihariṣye dvijottama |
tato bhūyo jagatsarvaṃ kariṣyāmīha vidyayā || 67 ||
[Analyze grammar]

asmanmūrtiścaturthī yā sāsṛjaccheṣamavyayam |
sa hi saṃkarṣaṇaḥ proktaḥ pradyumnaṃ so'pyajījanat || 68 ||
[Analyze grammar]

pradyumnādaniruddho'haṃ sargo mama punaḥ punaḥ |
aniruddhāttathā brahmā tatrādikamalodbhavaḥ || 69 ||
[Analyze grammar]

brahmaṇaḥ sarvabhūtāni carāṇi sthāvarāṇi ca |
etāṃ sṛṣṭiṃ vijānīhi kalpādiṣu punaḥ punaḥ || 70 ||
[Analyze grammar]

yathā sūryasya gaganādudayāstamayāviha |
naṣṭau punarbalātkāla ānayatyamitadyutiḥ |
tathā balādahaṃ pṛthvīṃ sarvabhūtahitāya vai || 71 ||
[Analyze grammar]

sattvairākrāntasarvāṅgāṃ naṣṭāṃ sāgaramekhalām |
ānayiṣyāmi svaṃ sthānaṃ vārāhaṃ rūpamāsthitaḥ || 72 ||
[Analyze grammar]

hiraṇyākṣaṃ haniṣyāmi daiteyaṃ balagarvitam |
nārasiṃhaṃ vapuḥ kṛtvā hiraṇyakaśipuṃ punaḥ |
surakārye haniṣyāmi yajñaghnaṃ ditinandanam || 73 ||
[Analyze grammar]

virocanasya balavānbaliḥ putro mahāsuraḥ |
bhaviṣyati sa śakraṃ ca svarājyāccyāvayiṣyati || 74 ||
[Analyze grammar]

trailokye'pahṛte tena vimukhe ca śacīpatau |
adityāṃ dvādaśaḥ putraḥ saṃbhaviṣyāmi kaśyapāt || 75 ||
[Analyze grammar]

tato rājyaṃ pradāsyāmi śakrāyāmitatejase |
devatāḥ sthāpayiṣyāmi sveṣu sthāneṣu nārada |
baliṃ caiva kariṣyāmi pātālatalavāsinam || 76 ||
[Analyze grammar]

tretāyuge bhaviṣyāmi rāmo bhṛgukulodvahaḥ |
kṣatraṃ cotsādayiṣyāmi samṛddhabalavāhanam || 77 ||
[Analyze grammar]

saṃdhau tu samanuprāpte tretāyāṃ dvāparasya ca |
rāmo dāśarathirbhūtvā bhaviṣyāmi jagatpatiḥ || 78 ||
[Analyze grammar]

tritopaghātādvairūpyamekato'tha dvitastathā |
prāpsyato vānaratvaṃ hi prajāpatisutāvṛṣī || 79 ||
[Analyze grammar]

tayorye tvanvaye jātā bhaviṣyanti vanaukasaḥ |
te sahāyā bhaviṣyanti surakārye mama dvija || 80 ||
[Analyze grammar]

tato rakṣaḥpatiṃ ghoraṃ pulastyakulapāṃsanam |
haniṣye rāvaṇaṃ saṃkhye sagaṇaṃ lokakaṇṭakam || 81 ||
[Analyze grammar]

dvāparasya kaleścaiva saṃdhau paryavasānike |
prādurbhāvaḥ kaṃsahetormathurāyāṃ bhaviṣyati || 82 ||
[Analyze grammar]

tatrāhaṃ dānavānhatvā subahūndevakaṇṭakān |
kuśasthalīṃ kariṣyāmi nivāsaṃ dvārakāṃ purīm || 83 ||
[Analyze grammar]

vasānastatra vai puryāmaditervipriyaṃkaram |
haniṣye narakaṃ bhaumaṃ muraṃ pīṭhaṃ ca dānavam || 84 ||
[Analyze grammar]

prāgjyotiṣapuraṃ ramyaṃ nānādhanasamanvitam |
kuśasthalīṃ nayiṣyāmi hatvā vai dānavottamān || 85 ||
[Analyze grammar]

śaṃkaraṃ ca mahāsenaṃ bāṇapriyahitaiṣiṇam |
parājeṣyāmyathodyuktau devalokanamaskṛtau || 86 ||
[Analyze grammar]

tataḥ sutaṃ balerjitvā bāṇaṃ bāhusahasriṇam |
vināśayiṣyāmi tataḥ sarvānsaubhanivāsinaḥ || 87 ||
[Analyze grammar]

yaḥ kālayavanaḥ khyāto gargatejobhisaṃvṛtaḥ |
bhaviṣyati vadhastasya matta eva dvijottama || 88 ||
[Analyze grammar]

jarāsaṃdhaśca balavānsarvarājavirodhakaḥ |
bhaviṣyatyasuraḥ sphīto bhūmipālo girivraje |
mama buddhiparispandādvadhastasya bhaviṣyati || 89 ||
[Analyze grammar]

samāgateṣu baliṣu pṛthivyāṃ sarvarājasu |
vāsaviḥ susahāyo vai mama hyeko bhaviṣyati || 90 ||
[Analyze grammar]

evaṃ lokā vadiṣyanti naranārāyaṇāvṛṣī |
udyuktau dahataḥ kṣatraṃ lokakāryārthamīśvarau || 91 ||
[Analyze grammar]

kṛtvā bhārāvataraṇaṃ vasudhāyā yathepsitam |
sarvasātvatamukhyānāṃ dvārakāyāśca sattama |
kariṣye pralayaṃ ghoramātmajñātivināśanam || 92 ||
[Analyze grammar]

karmāṇyaparimeyāni caturmūrtidharo hyaham |
kṛtvā lokāngamiṣyāmi svānahaṃ brahmasatkṛtān || 93 ||
[Analyze grammar]

haṃso hayaśirāścaiva prādurbhāvā dvijottama |
yadā vedaśrutirnaṣṭā mayā pratyāhṛtā tadā |
savedāḥ saśrutīkāśca kṛtāḥ pūrvaṃ kṛte yuge || 94 ||
[Analyze grammar]

atikrāntāḥ purāṇeṣu śrutāste yadi vā kvacit |
atikrāntāśca bahavaḥ prādurbhāvā mamottamāḥ |
lokakāryāṇi kṛtvā ca punaḥ svāṃ prakṛtiṃ gatāḥ || 95 ||
[Analyze grammar]

na hyetadbrahmaṇā prāptamīdṛśaṃ mama darśanam |
yattvayā prāptamadyeha ekāntagatabuddhinā || 96 ||
[Analyze grammar]

etatte sarvamākhyātaṃ brahmanbhaktimato mayā |
purāṇaṃ ca bhaviṣyaṃ ca sarahasyaṃ ca sattama || 97 ||
[Analyze grammar]

evaṃ sa bhagavāndevo viśvamūrtidharo'vyayaḥ |
etāvaduktvā vacanaṃ tatraivāntaradhīyata || 98 ||
[Analyze grammar]

nārado'pi mahātejāḥ prāpyānugrahamīpsitam |
naranārāyaṇau draṣṭuṃ prādravadbadarāśramam || 99 ||
[Analyze grammar]

idaṃ mahopaniṣadaṃ caturvedasamanvitam |
sāṃkhyayogakṛtaṃ tena pañcarātrānuśabditam || 100 ||
[Analyze grammar]

nārāyaṇamukhodgītaṃ nārado'śrāvayatpunaḥ |
brahmaṇaḥ sadane tāta yathā dṛṣṭaṃ yathā śrutam || 101 ||
[Analyze grammar]

yudhiṣṭhira uvāca |
etadāścaryabhūtaṃ hi māhātmyaṃ tasya dhīmataḥ |
kiṃ brahmā na vijānīte yataḥ śuśrāva nāradāt || 102 ||
[Analyze grammar]

pitāmaho hi bhagavāṃstasmāddevādanantaraḥ |
kathaṃ sa na vijānīyātprabhāvamamitaujasaḥ || 103 ||
[Analyze grammar]

bhīṣma uvāca |
mahākalpasahasrāṇi mahākalpaśatāni ca |
samatītāni rājendra sargāśca pralayāśca ha || 104 ||
[Analyze grammar]

sargasyādau smṛto brahmā prajāsargakaraḥ prabhuḥ |
jānāti devapravaraṃ bhūyaścāto'dhikaṃ nṛpa |
paramātmānamīśānamātmanaḥ prabhavaṃ tathā || 105 ||
[Analyze grammar]

ye tvanye brahmasadane siddhasaṃghāḥ samāgatāḥ |
tebhyastacchrāvayāmāsa purāṇaṃ vedasaṃmitam || 106 ||
[Analyze grammar]

teṣāṃ sakāśātsūryaśca śrutvā vai bhāvitātmanām |
ātmānugāmināṃ brahma śrāvayāmāsa bhārata || 107 ||
[Analyze grammar]

ṣaṭṣaṣṭirhi sahasrāṇi ṛṣīṇāṃ bhāvitātmanām |
sūryasya tapato lokānnirmitā ye puraḥsarāḥ |
teṣāmakathayatsūryaḥ sarveṣāṃ bhāvitātmanām || 108 ||
[Analyze grammar]

sūryānugāmibhistāta ṛṣibhistairmahātmabhiḥ |
merau samāgatā devāḥ śrāvitāścedamuttamam || 109 ||
[Analyze grammar]

devānāṃ tu sakāśādvai tataḥ śrutvāsito dvijaḥ |
śrāvayāmāsa rājendra pitṝṇāṃ munisattamaḥ || 110 ||
[Analyze grammar]

mama cāpi pitā tāta kathayāmāsa śaṃtanuḥ |
tato mayaitacchrutvā ca kīrtitaṃ tava bhārata || 111 ||
[Analyze grammar]

surairvā munibhirvāpi purāṇaṃ yairidaṃ śrutam |
sarve te paramātmānaṃ pūjayanti punaḥ punaḥ || 112 ||
[Analyze grammar]

idamākhyānamārṣeyaṃ pāraṃparyāgataṃ nṛpa |
nāvāsudevabhaktāya tvayā deyaṃ kathaṃcana || 113 ||
[Analyze grammar]

matto'nyāni ca te rājannupākhyānaśatāni vai |
yāni śrutāni dharmyāṇi teṣāṃ sāro'yamuddhṛtaḥ || 114 ||
[Analyze grammar]

surāsurairyathā rājannirmathyāmṛtamuddhṛtam |
evametatpurā vipraiḥ kathāmṛtamihoddhṛtam || 115 ||
[Analyze grammar]

yaścedaṃ paṭhate nityaṃ yaścedaṃ śṛṇuyānnaraḥ |
ekāntabhāvopagata ekānte susamāhitaḥ || 116 ||
[Analyze grammar]

prāpya śvetaṃ mahādvīpaṃ bhūtvā candraprabho naraḥ |
sa sahasrārciṣaṃ devaṃ praviśennātra saṃśayaḥ || 117 ||
[Analyze grammar]

mucyedārtastathā rogācchrutvemāmāditaḥ kathām |
jijñāsurlabhate kāmānbhakto bhaktagatiṃ vrajet || 118 ||
[Analyze grammar]

tvayāpi satataṃ rājannabhyarcyaḥ puruṣottamaḥ |
sa hi mātā pitā caiva kṛtsnasya jagato guruḥ || 119 ||
[Analyze grammar]

brahmaṇyadevo bhagavānprīyatāṃ te sanātanaḥ |
yudhiṣṭhira mahābāho mahābāhurjanārdanaḥ || 120 ||
[Analyze grammar]

vaiśaṃpāyana uvāca |
śrutvaitadākhyānavaraṃ dharmarāḍjanamejaya |
bhrātaraścāsya te sarve nārāyaṇaparābhavan || 121 ||
[Analyze grammar]

jitaṃ bhagavatā tena puruṣeṇeti bhārata |
nityaṃ japyaparā bhūtvā sarasvatīmudīrayan || 122 ||
[Analyze grammar]

yo hyasmākaṃ guruḥ śreṣṭhaḥ kṛṣṇadvaipāyano muniḥ |
sa jagau paramaṃ japyaṃ nārāyaṇamudīrayan || 123 ||
[Analyze grammar]

gatvāntarikṣātsatataṃ kṣīrodamamṛtāśayam |
pūjayitvā ca deveśaṃ punarāyātsvamāśramam || 124 ||
[Analyze grammar]