Chapter 291

yudhiṣṭhira uvāca |
kiṃ tadakṣaramityuktaṃ yasmānnāvartate punaḥ |
kiṃ ca tatkṣaramityuktaṃ yasmādāvartate punaḥ || 1 ||
[Analyze grammar]

akṣarakṣarayorvyaktimicchāmyariniṣūdana |
upalabdhuṃ mahābāho tattvena kurunandana || 2 ||
[Analyze grammar]

tvaṃ hi jñānanidhirviprairucyase vedapāragaiḥ |
ṛṣibhiśca mahābhāgairyatibhiśca mahātmabhiḥ || 3 ||
[Analyze grammar]

śeṣamalpaṃ dinānāṃ te dakṣiṇāyanabhāskare |
āvṛtte bhagavatyarke gantāsi paramāṃ gatim || 4 ||
[Analyze grammar]

tvayi pratigate śreyaḥ kutaḥ śroṣyāmahe vayam |
kuruvaṃśapradīpastvaṃ jñānadravyeṇa dīpyase || 5 ||
[Analyze grammar]

tadetacchrotumicchāmi tvattaḥ kurukulodvaha |
na tṛpyāmīha rājendra śṛṇvannamṛtamīdṛśam || 6 ||
[Analyze grammar]

bhīṣma uvāca |
atra te vartayiṣye'hamitihāsaṃ purātanam |
vasiṣṭhasya ca saṃvādaṃ karālajanakasya ca || 7 ||
[Analyze grammar]

vasiṣṭhaṃ śreṣṭhamāsīnamṛṣīṇāṃ bhāskaradyutim |
papraccha janako rājā jñānaṃ naiḥśreyasaṃ param || 8 ||
[Analyze grammar]

paramadhyātmakuśalamadhyātmagatiniścayam |
maitrāvaruṇimāsīnamabhivādya kṛtāñjaliḥ || 9 ||
[Analyze grammar]

svakṣaraṃ praśritaṃ vākyaṃ madhuraṃ cāpyanulbaṇam |
papraccharṣivaraṃ rājā karālajanakaḥ purā || 10 ||
[Analyze grammar]

bhagavañśrotumicchāmi paraṃ brahma sanātanam |
yasmānna punarāvṛttimāpnuvanti manīṣiṇaḥ || 11 ||
[Analyze grammar]

yacca tatkṣaramityuktaṃ yatredaṃ kṣarate jagat |
yaccākṣaramiti proktaṃ śivaṃ kṣemyamanāmayam || 12 ||
[Analyze grammar]

vasiṣṭha uvāca |
śrūyatāṃ pṛthivīpāla kṣaratīdaṃ yathā jagat |
yanna kṣarati pūrveṇa yāvatkālena cāpyatha || 13 ||
[Analyze grammar]

yugaṃ dvādaśasāhasraṃ kalpaṃ viddhi caturguṇam |
daśakalpaśatāvṛttaṃ tadaharbrāhmamucyate |
rātriścaitāvatī rājanyasyānte pratibudhyate || 14 ||
[Analyze grammar]

sṛjatyanantakarmāṇaṃ mahāntaṃ bhūtamagrajam |
mūrtimantamamūrtātmā viśvaṃ śaṃbhuḥ svayaṃbhuvaḥ |
aṇimā laghimā prāptirīśānaṃ jyotiravyayam || 15 ||
[Analyze grammar]

sarvataḥpāṇipādāntaṃ sarvatokṣiśiromukham |
sarvataḥśrutimalloke sarvamāvṛtya tiṣṭhati || 16 ||
[Analyze grammar]

hiraṇyagarbho bhagavāneṣa buddhiriti smṛtaḥ |
mahāniti ca yogeṣu viriñca iti cāpyuta || 17 ||
[Analyze grammar]

sāṃkhye ca paṭhyate śāstre nāmabhirbahudhātmakaḥ |
vicitrarūpo viśvātmā ekākṣara iti smṛtaḥ || 18 ||
[Analyze grammar]

vṛtaṃ naikātmakaṃ yena kṛtsnaṃ trailokyamātmanā |
tathaiva bahurūpatvādviśvarūpa iti smṛtaḥ || 19 ||
[Analyze grammar]

eṣa vai vikriyāpannaḥ sṛjatyātmānamātmanā |
ahaṃkāraṃ mahātejāḥ prajāpatimahaṃkṛtam || 20 ||
[Analyze grammar]

avyaktādvyaktamutpannaṃ vidyāsargaṃ vadanti tam |
mahāntaṃ cāpyahaṃkāramavidyāsargameva ca || 21 ||
[Analyze grammar]

avidhiśca vidhiścaiva samutpannau tathaikataḥ |
vidyāvidyeti vikhyāte śrutiśāstrārthacintakaiḥ || 22 ||
[Analyze grammar]

bhūtasargamahaṃkārāttṛtīyaṃ viddhi pārthiva |
ahaṃkāreṣu bhūteṣu caturthaṃ viddhi vaikṛtam || 23 ||
[Analyze grammar]

vāyurjyotirathākāśamāpo'tha pṛthivī tathā |
śabdaḥ sparśaśca rūpaṃ ca raso gandhastathaiva ca || 24 ||
[Analyze grammar]

evaṃ yugapadutpannaṃ daśavargamasaṃśayam |
pañcamaṃ viddhi rājendra bhautikaṃ sargamarthavat || 25 ||
[Analyze grammar]

śrotraṃ tvakcakṣuṣī jihvā ghrāṇameva ca pañcamam |
vākca hastau ca pādau ca pāyurmeḍhraṃ tathaiva ca || 26 ||
[Analyze grammar]

buddhīndriyāṇi caitāni tathā karmendriyāṇi ca |
saṃbhūtānīha yugapanmanasā saha pārthiva || 27 ||
[Analyze grammar]

eṣā tattvacaturviṃśā sarvākṛtiṣu vartate |
yāṃ jñātvā nābhiśocanti brāhmaṇāstattvadarśinaḥ || 28 ||
[Analyze grammar]

etaddehaṃ samākhyātaṃ trailokye sarvadehiṣu |
veditavyaṃ naraśreṣṭha sadevanaradānave || 29 ||
[Analyze grammar]

sayakṣabhūtagandharve sakiṃnaramahorage |
sacāraṇapiśāce vai sadevarṣiniśācare || 30 ||
[Analyze grammar]

sadaṃśakīṭamaśake sapūtikṛmimūṣake |
śuni śvapāke vaiṇeye sacaṇḍāle sapulkase || 31 ||
[Analyze grammar]

hastyaśvakharaśārdūle savṛkṣe gavi caiva ha |
yacca mūrtimayaṃ kiṃcitsarvatraitannidarśanam || 32 ||
[Analyze grammar]

jale bhuvi tathākāśe nānyatreti viniścayaḥ |
sthānaṃ dehavatāmasti ityevamanuśuśruma || 33 ||
[Analyze grammar]

kṛtsnametāvatastāta kṣarate vyaktasaṃjñakam |
ahanyahani bhūtātmā tataḥ kṣara iti smṛtaḥ || 34 ||
[Analyze grammar]

etadakṣaramityuktaṃ kṣaratīdaṃ yathā jagat |
jaganmohātmakaṃ prāhuravyaktaṃ vyaktasaṃjñakam || 35 ||
[Analyze grammar]

mahāṃścaivāgrajo nityametatkṣaranidarśanam |
kathitaṃ te mahārāja yasmānnāvartate punaḥ || 36 ||
[Analyze grammar]

pañcaviṃśatimo viṣṇurnistattvastattvasaṃjñakaḥ |
tattvasaṃśrayaṇādetattattvamāhurmanīṣiṇaḥ || 37 ||
[Analyze grammar]

yadamūrtyasṛjadvyaktaṃ tattanmūrtyadhitiṣṭhati |
caturviṃśatimo vyakto hyamūrtaḥ pañcaviṃśakaḥ || 38 ||
[Analyze grammar]

sa eva hṛdi sarvāsu mūrtiṣvātiṣṭhate''tmavān |
cetayaṃścetano nityaḥ sarvamūrtiramūrtimān || 39 ||
[Analyze grammar]

sargapralayadharmiṇyā asargapralayātmakaḥ |
gocare vartate nityaṃ nirguṇo guṇasaṃjñakaḥ || 40 ||
[Analyze grammar]

evameṣa mahānātmā sargapralayakovidaḥ |
vikurvāṇaḥ prakṛtimānabhimanyatyabuddhimān || 41 ||
[Analyze grammar]

tamaḥsattvarajoyuktastāsu tāsviha yoniṣu |
līyate'pratibuddhatvādabuddhajanasevanāt || 42 ||
[Analyze grammar]

sahavāso nivāsātmā nānyo'hamiti manyate |
yo'haṃ so'hamiti hyuktvā guṇānanu nivartate || 43 ||
[Analyze grammar]

tamasā tāmasānbhāvānvividhānpratipadyate |
rajasā rājasāṃścaiva sāttvikānsattvasaṃśrayāt || 44 ||
[Analyze grammar]

śuklalohitakṛṣṇāni rūpāṇyetāni trīṇi tu |
sarvāṇyetāni rūpāṇi jānīhi prākṛtāni vai || 45 ||
[Analyze grammar]

tāmasā nirayaṃ yānti rājasā mānuṣāṃstathā |
sāttvikā devalokāya gacchanti sukhabhāginaḥ || 46 ||
[Analyze grammar]

niṣkaivalyena pāpena tiryagyonimavāpnuyāt |
puṇyapāpena mānuṣyaṃ puṇyenaikena devatāḥ || 47 ||
[Analyze grammar]

evamavyaktaviṣayaṃ kṣaramāhurmanīṣiṇaḥ |
pañcaviṃśatimo yo'yaṃ jñānādeva pravartate || 48 ||
[Analyze grammar]