Chapter 277

yudhiṣṭhira uvāca |
kathaṃ nu muktaḥ pṛthivīṃ caredasmadvidho nṛpaḥ |
nityaṃ kaiśca guṇairyuktaḥ saṅgapāśādvimucyate || 1 ||
[Analyze grammar]

bhīṣma uvāca |
atra te vartayiṣyāmi itihāsaṃ purātanam |
ariṣṭaneminā proktaṃ sagarāyānupṛcchate || 2 ||
[Analyze grammar]

sagara uvāca |
kiṃ śreyaḥ paramaṃ brahmankṛtveha sukhamaśnute |
kathaṃ na śocenna kṣubhyedetadicchāmi veditum || 3 ||
[Analyze grammar]

bhīṣma uvāca |
evamuktastadā tārkṣyaḥ sarvaśāstraviśāradaḥ |
vibudhya saṃpadaṃ cāgryāṃ sadvākyamidamabravīt || 4 ||
[Analyze grammar]

sukhaṃ mokṣasukhaṃ loke na ca loko'vagacchati |
prasaktaḥ putrapaśuṣu dhanadhānyasamākulaḥ || 5 ||
[Analyze grammar]

saktabuddhiraśāntātmā na sa śakyaścikitsitum |
snehapāśasito mūḍho na sa mokṣāya kalpate || 6 ||
[Analyze grammar]

snehajāniha te pāśānvakṣyāmi śṛṇu tānmama |
sakarṇakena śirasā śakyāśchettuṃ vijānatā || 7 ||
[Analyze grammar]

saṃbhāvya putrānkālena yauvanasthānniveśya ca |
samarthāñjīvane jñātvā muktaścara yathāsukham || 8 ||
[Analyze grammar]

bhāryāṃ putravatīṃ vṛddhāṃ lālitāṃ putravatsalām |
jñātvā prajahi kāle tvaṃ parārthamanudṛśya ca || 9 ||
[Analyze grammar]

sāpatyo nirapatyo vā muktaścara yathāsukham |
indriyairindriyārthāṃstvamanubhūya yathāvidhi || 10 ||
[Analyze grammar]

kṛtakautūhalasteṣu muktaścara yathāsukham |
upapattyopalabdheṣu lābheṣu ca samo bhava || 11 ||
[Analyze grammar]

eṣa tāvatsamāsena tava saṃkīrtito mayā |
mokṣārtho vistareṇāpi bhūyo vakṣyāmi tacchṛṇu || 12 ||
[Analyze grammar]

muktā vītabhayā loke caranti sukhino narāḥ |
saktabhāvā vinaśyanti narāstatra na saṃśayaḥ || 13 ||
[Analyze grammar]

āhārasaṃcayāścaiva tathā kīṭapipīlikāḥ |
asaktāḥ sukhino loke saktāścaiva vināśinaḥ || 14 ||
[Analyze grammar]

svajane na ca te cintā kartavyā mokṣabuddhinā |
ime mayā vinābhūtā bhaviṣyanti kathaṃ tviti || 15 ||
[Analyze grammar]

svayamutpadyate jantuḥ svayameva vivardhate |
sukhaduḥkhe tathā mṛtyuṃ svayamevādhigacchati || 16 ||
[Analyze grammar]

bhojanācchādane caiva mātrā pitrā ca saṃgraham |
svakṛtenādhigacchanti loke nāstyakṛtaṃ purā || 17 ||
[Analyze grammar]

dhātrā vihitabhakṣyāṇi sarvabhūtāni medinīm |
loke viparidhāvanti rakṣitāni svakarmabhiḥ || 18 ||
[Analyze grammar]

svayaṃ mṛtpiṇḍabhūtasya paratantrasya sarvadā |
ko hetuḥ svajanaṃ poṣṭuṃ rakṣituṃ vādṛḍhātmanaḥ || 19 ||
[Analyze grammar]

svajanaṃ hi yadā mṛtyurhantyeva tava paśyataḥ |
kṛte'pi yatne mahati tatra boddhavyamātmanā || 20 ||
[Analyze grammar]

jīvantamapi caivainaṃ bharaṇe rakṣaṇe tathā |
asamāpte parityajya paścādapi mariṣyasi || 21 ||
[Analyze grammar]

yadā mṛtaśca svajanaṃ na jñāsyasi kathaṃcana |
sukhitaṃ duḥkhitaṃ vāpi nanu boddhavyamātmanā || 22 ||
[Analyze grammar]

mṛte vā tvayi jīve vā yadi bhokṣyati vai janaḥ |
svakṛtaṃ nanu buddhvaivaṃ kartavyaṃ hitamātmanaḥ || 23 ||
[Analyze grammar]

evaṃ vijānaṃlloke'sminkaḥ kasyetyabhiniścitaḥ |
mokṣe niveśaya mano bhūyaścāpyupadhāraya || 24 ||
[Analyze grammar]

kṣutpipāsādayo bhāvā jitā yasyeha dehinaḥ |
krodho lobhastathā mohaḥ sattvavānmukta eva saḥ || 25 ||
[Analyze grammar]

dyūte pāne tathā strīṣu mṛgayāyāṃ ca yo naraḥ |
na pramādyati saṃmohātsatataṃ mukta eva saḥ || 26 ||
[Analyze grammar]

divase divase nāma rātrau rātrau sadā sadā |
bhoktavyamiti yaḥ khinno doṣabuddhiḥ sa ucyate || 27 ||
[Analyze grammar]

ātmabhāvaṃ tathā strīṣu muktameva punaḥ punaḥ |
yaḥ paśyati sadā yukto yathāvanmukta eva saḥ || 28 ||
[Analyze grammar]

saṃbhavaṃ ca vināśaṃ ca bhūtānāṃ ceṣṭitaṃ tathā |
yastattvato vijānāti loke'sminmukta eva saḥ || 29 ||
[Analyze grammar]

prasthaṃ vāhasahasreṣu yātrārthaṃ caiva koṭiṣu |
prāsāde mañcakasthānaṃ yaḥ paśyati sa mucyate || 30 ||
[Analyze grammar]

mṛtyunābhyāhataṃ lokaṃ vyādhibhiścopapīḍitam |
avṛttikarśitaṃ caiva yaḥ paśyati sa mucyate || 31 ||
[Analyze grammar]

yaḥ paśyati sukhī tuṣṭo napaśyaṃśca vihanyate |
yaścāpyalpena saṃtuṣṭo loke'sminmukta eva saḥ || 32 ||
[Analyze grammar]

agnīṣomāvidaṃ sarvamiti yaścānupaśyati |
na ca saṃspṛśyate bhāvairadbhutairmukta eva saḥ || 33 ||
[Analyze grammar]

paryaṅkaśayyā bhūmiśca samāne yasya dehinaḥ |
śālayaśca kadannaṃ ca yasya syānmukta eva saḥ || 34 ||
[Analyze grammar]

kṣaumaṃ ca kuśacīraṃ ca kauśeyaṃ valkalāni ca |
āvikaṃ carma ca samaṃ yasya syānmukta eva saḥ || 35 ||
[Analyze grammar]

pañcabhūtasamudbhūtaṃ lokaṃ yaścānupaśyati |
tathā ca vartate dṛṣṭvā loke'sminmukta eva saḥ || 36 ||
[Analyze grammar]

sukhaduḥkhe same yasya lābhālābhau jayājayau |
icchādveṣau bhayodvegau sarvathā mukta eva saḥ || 37 ||
[Analyze grammar]

raktamūtrapurīṣāṇāṃ doṣāṇāṃ saṃcayaṃ tathā |
śarīraṃ doṣabahulaṃ dṛṣṭvā cedaṃ vimucyate || 38 ||
[Analyze grammar]

valīpalitasaṃyogaṃ kārśyaṃ vaivarṇyameva ca |
kubjabhāvaṃ ca jarayā yaḥ paśyati sa mucyate || 39 ||
[Analyze grammar]

puṃstvopaghātaṃ kālena darśanoparamaṃ tathā |
bādhiryaṃ prāṇamandatvaṃ yaḥ paśyati sa mucyate || 40 ||
[Analyze grammar]

gatānṛṣīṃstathā devānasurāṃśca tathā gatān |
lokādasmātparaṃ lokaṃ yaḥ paśyati sa mucyate || 41 ||
[Analyze grammar]

prabhāvairanvitāstaistaiḥ pārthivendrāḥ sahasraśaḥ |
ye gatāḥ pṛthivīṃ tyaktvā iti jñātvā vimucyate || 42 ||
[Analyze grammar]

arthāṃśca durlabhāṃlloke kleśāṃśca sulabhāṃstathā |
duḥkhaṃ caiva kuṭumbārthe yaḥ paśyati sa mucyate || 43 ||
[Analyze grammar]

apatyānāṃ ca vaiguṇyaṃ janaṃ viguṇameva ca |
paśyanbhūyiṣṭhaśo loke ko mokṣaṃ nābhipūjayet || 44 ||
[Analyze grammar]

śāstrāllokācca yo buddhaḥ sarvaṃ paśyati mānavaḥ |
asāramiva mānuṣyaṃ sarvathā mukta eva saḥ || 45 ||
[Analyze grammar]

etacchrutvā mama vaco bhavāṃścaratu muktavat |
gārhasthye yadi te mokṣe kṛtā buddhiraviklavā || 46 ||
[Analyze grammar]

tattasya vacanaṃ śrutvā samyaksa pṛthivīpatiḥ |
mokṣajaiśca guṇairyuktaḥ pālayāmāsa ca prajāḥ || 47 ||
[Analyze grammar]