Chapter 267

bhīṣma uvāca |
atraivodāharantīmamitihāsaṃ purātanam |
nāradasya ca saṃvādaṃ devalasyāsitasya ca || 1 ||
[Analyze grammar]

āsīnaṃ devalaṃ vṛddhaṃ buddhvā buddhimatāṃ varaḥ |
nāradaḥ paripapraccha bhūtānāṃ prabhavāpyayam || 2 ||
[Analyze grammar]

kutaḥ sṛṣṭamidaṃ viśvaṃ brahmansthāvarajaṅgamam |
pralaye ca kamabhyeti tadbhavānprabravītu me || 3 ||
[Analyze grammar]

asita uvāca |
yebhyaḥ sṛjati bhūtāni kālo bhāvapracoditaḥ |
mahābhūtāni pañceti tānyāhurbhūtacintakāḥ || 4 ||
[Analyze grammar]

tebhyaḥ sṛjati bhūtāni kāla ātmapracoditaḥ |
etebhyo yaḥ paraṃ brūyādasadbrūyādasaṃśayam || 5 ||
[Analyze grammar]

viddhi nārada pañcaitāñśāśvatānacalāndhruvān |
mahatastejaso rāśīnkālaṣaṣṭhānsvabhāvataḥ || 6 ||
[Analyze grammar]

āpaścaivāntarikṣaṃ ca pṛthivī vāyupāvakau |
asiddhiḥ parametebhyo bhūtebhyo muktasaṃśayam || 7 ||
[Analyze grammar]

nopapattyā na vā yuktyā tvasadbrūyādasaṃśayam |
vettha tānabhinirvṛttānṣaḍete yasya rāśayaḥ || 8 ||
[Analyze grammar]

pañcaiva tāni kālaśca bhāvābhāvau ca kevalau |
aṣṭau bhūtāni bhūtānāṃ śāśvatāni bhavāpyayau || 9 ||
[Analyze grammar]

abhāvādbhāviteṣveva tebhyaśca prabhavantyapi |
vinaṣṭo'pi ca tānyeva janturbhavati pañcadhā || 10 ||
[Analyze grammar]

tasya bhūmimayo dehaḥ śrotramākāśasaṃbhavam |
sūryaścakṣurasurvāyuradbhyastu khalu śoṇitam || 11 ||
[Analyze grammar]

cakṣuṣī nāsikākarṇau tvagjihveti ca pañcamī |
indriyāṇīndriyārthānāṃ jñānāni kavayo viduḥ || 12 ||
[Analyze grammar]

darśanaṃ śravaṇaṃ ghrāṇaṃ sparśanaṃ rasanaṃ tathā |
upapattyā guṇānviddhi pañca pañcasu pañcadhā || 13 ||
[Analyze grammar]

rūpaṃ gandho rasaḥ sparśaḥ śabdaścaivātha tadguṇāḥ |
indriyairupalabhyante pañcadhā pañca pañcabhiḥ || 14 ||
[Analyze grammar]

rūpaṃ gandhaṃ rasaṃ sparśaṃ śabdaṃ caitāṃstu tadguṇān |
indriyāṇi na budhyante kṣetrajñastaistu budhyate || 15 ||
[Analyze grammar]

cittamindriyasaṃghātātparaṃ tasmātparaṃ manaḥ |
manasastu parā buddhiḥ kṣetrajño buddhitaḥ paraḥ || 16 ||
[Analyze grammar]

pūrvaṃ cetayate janturindriyairviṣayānpṛthak |
vicārya manasā paścādatha buddhyā vyavasyati |
indriyairupalabdhārthānsarvānyastvadhyavasyati || 17 ||
[Analyze grammar]

cittamindriyasaṃghātaṃ mano buddhiṃ tathāṣṭamīm |
aṣṭau jñānendriyāṇyāhuretānyadhyātmacintakāḥ || 18 ||
[Analyze grammar]

pāṇipādaṃ ca pāyuśca mehanaṃ pañcamaṃ mukham |
iti saṃśabdyamānāni śṛṇu karmendriyāṇyapi || 19 ||
[Analyze grammar]

jalpanābhyavahārārthaṃ mukhamindriyamucyate |
gamanendriyaṃ tathā pādau karmaṇaḥ karaṇe karau || 20 ||
[Analyze grammar]

pāyūpasthau visargārthamindriye tulyakarmaṇī |
visarge ca purīṣasya visarge cābhikāmike || 21 ||
[Analyze grammar]

balaṃ ṣaṣṭhaṃ ṣaḍetāni vācā samyagyathāgamam |
jñānaceṣṭendriyaguṇāḥ sarve saṃśabditā mayā || 22 ||
[Analyze grammar]

indriyāṇāṃ svakarmabhyaḥ śramāduparamo yadā |
bhavatīndriyasaṃnyāsādatha svapiti vai naraḥ || 23 ||
[Analyze grammar]

indriyāṇāṃ vyuparame mano'nuparataṃ yadi |
sevate viṣayāneva tadvidyātsvapnadarśanam || 24 ||
[Analyze grammar]

sāttvikāścaiva ye bhāvāstathā rājasatāmasāḥ |
karmayuktānpraśaṃsanti sāttvikānitarāṃstathā || 25 ||
[Analyze grammar]

ānandaḥ karmaṇāṃ siddhiḥ pratipattiḥ parā gatiḥ |
sāttvikasya nimittāni bhāvānsaṃśrayate smṛtiḥ || 26 ||
[Analyze grammar]

jantuṣvekatameṣvevaṃ bhāvā ye vidhimāsthitāḥ |
bhāvayorīpsitaṃ nityaṃ pratyakṣagamanaṃ dvayoḥ || 27 ||
[Analyze grammar]

indriyāṇi ca bhāvāśca guṇāḥ saptadaśa smṛtāḥ |
teṣāmaṣṭādaśo dehī yaḥ śarīre sa śāśvataḥ || 28 ||
[Analyze grammar]

atha vā saśarīrāste guṇāḥ sarve śarīriṇām |
saṃśritāstadviyoge hi saśarīrā na santi te || 29 ||
[Analyze grammar]

atha vā saṃnipāto'yaṃ śarīraṃ pāñcabhautikam |
ekaśca daśa cāṣṭau ca guṇāḥ saha śarīriṇām |
ūṣmaṇā saha viṃśo vā saṃghātaḥ pāñcabhautikaḥ || 30 ||
[Analyze grammar]

mahānsaṃdhārayatyetaccharīraṃ vāyunā saha |
tasyāsya bhāvayuktasya nimittaṃ dehabhedane || 31 ||
[Analyze grammar]

yathaivotpadyate kiṃcitpañcatvaṃ gacchate tathā |
puṇyapāpavināśānte puṇyapāpasamīritam |
dehaṃ viśati kālena tato'yaṃ karmasaṃbhavam || 32 ||
[Analyze grammar]

hitvā hitvā hyayaṃ praiti dehāddehaṃ kṛtāśrayaḥ |
kālasaṃcoditaḥ kṣetrī viśīrṇādvā gṛhādgṛham || 33 ||
[Analyze grammar]

tatra naivānutapyante prājñā niścitaniścayāḥ |
kṛpaṇāstvanutapyante janāḥ saṃbandhimāninaḥ || 34 ||
[Analyze grammar]

na hyayaṃ kasyacitkaścinnāsya kaścana vidyate |
bhavatyeko hyayaṃ nityaṃ śarīre sukhaduḥkhabhāk || 35 ||
[Analyze grammar]

naiva saṃjāyate janturna ca jātu vipadyate |
yāti dehamayaṃ bhuktvā kadācitparamāṃ gatim || 36 ||
[Analyze grammar]

puṇyapāpamayaṃ dehaṃ kṣapayankarmasaṃcayāt |
kṣīṇadehaḥ punardehī brahmatvamupagacchati || 37 ||
[Analyze grammar]

puṇyapāpakṣayārthaṃ ca sāṃkhyaṃ jñānaṃ vidhīyate |
tatkṣaye hyasya paśyanti brahmabhāve parāṃ gatim || 38 ||
[Analyze grammar]