Chapter 228

vyāsa uvāca |
atha cedrocayedetaddruhyeta manasā tathā |
unmajjaṃśca nimajjaṃśca jñānavānplavavānbhavet || 1 ||
[Analyze grammar]

prajñayā nirmitairdhīrāstārayantyabudhānplavaiḥ |
nābudhāstārayantyanyānātmānaṃ vā kathaṃcana || 2 ||
[Analyze grammar]

chinnadoṣo muniryogānyukto yuñjīta dvādaśa |
daśakarmasukhānarthānupāyāpāyanirbhayaḥ || 3 ||
[Analyze grammar]

cakṣurācāravitprājño manasā darśanena ca |
yacchedvāṅmanasī buddhyā ya icchejjñānamuttamam |
jñānena yacchedātmānaṃ ya icchecchāntimātmanaḥ || 4 ||
[Analyze grammar]

eteṣāṃ cedanudraṣṭā puruṣo'pi sudāruṇaḥ |
yadi vā sarvavedajño yadi vāpyanṛco'japaḥ || 5 ||
[Analyze grammar]

yadi vā dhārmiko yajvā yadi vā pāpakṛttamaḥ |
yadi vā puruṣavyāghro yadi vā klaibyadhāritā || 6 ||
[Analyze grammar]

taratyeva mahādurgaṃ jarāmaraṇasāgaram |
evaṃ hyetena yogena yuñjāno'pyekamantataḥ |
api jijñāsamāno hi śabdabrahmātivartate || 7 ||
[Analyze grammar]

dharmopastho hrīvarūtha upāyāpāyakūbaraḥ |
apānākṣaḥ prāṇayugaḥ prajñāyurjīvabandhanaḥ || 8 ||
[Analyze grammar]

cetanābandhuraścārurācāragrahanemivān |
darśanasparśanavaho ghrāṇaśravaṇavāhanaḥ || 9 ||
[Analyze grammar]

prajñānābhiḥ sarvatantrapratodo jñānasārathiḥ |
kṣetrajñādhiṣṭhito dhīraḥ śraddhādamapuraḥsaraḥ || 10 ||
[Analyze grammar]

tyāgavartmānugaḥ kṣemyaḥ śaucago dhyānagocaraḥ |
jīvayukto ratho divyo brahmaloke virājate || 11 ||
[Analyze grammar]

atha saṃtvaramāṇasya rathametaṃ yuyukṣataḥ |
akṣaraṃ gantumanaso vidhiṃ vakṣyāmi śīghragam || 12 ||
[Analyze grammar]

sapta yo dhāraṇāḥ kṛtsnā vāgyataḥ pratipadyate |
pṛṣṭhataḥ pārśvataścānyā yāvatyastāḥ pradhāraṇāḥ || 13 ||
[Analyze grammar]

kramaśaḥ pārthivaṃ yacca vāyavyaṃ khaṃ tathā payaḥ |
jyotiṣo yattadaiśvaryamahaṃkārasya buddhitaḥ || 14 ||
[Analyze grammar]

avyaktasya tathaiśvaryaṃ kramaśaḥ pratipadyate |
vikramāścāpi yasyaite tathā yuṅkte sa yogataḥ || 15 ||
[Analyze grammar]

athāsya yogayuktasya siddhimātmani paśyataḥ |
nirmathyamānaḥ sūkṣmatvādrūpāṇīmāni darśayet || 16 ||
[Analyze grammar]

śaiśirastu yathā dhūmaḥ sūkṣmaḥ saṃśrayate nabhaḥ |
tathā dehādvimuktasya pūrvarūpaṃ bhavatyuta || 17 ||
[Analyze grammar]

atha dhūmasya virame dvitīyaṃ rūpadarśanam |
jalarūpamivākāśe tatraivātmani paśyati || 18 ||
[Analyze grammar]

apāṃ vyatikrame cāpi vahnirūpaṃ prakāśate |
tasminnuparate cāsya pītavastravadiṣyate |
ūrṇārūpasavarṇaṃ ca tasya rūpaṃ prakāśate || 19 ||
[Analyze grammar]

atha śvetāṃ gatiṃ gatvā vāyavyaṃ sūkṣmamapyajaḥ |
aśuklaṃ cetasaḥ saukṣmyamavyaktaṃ brahmaṇo'sya vai || 20 ||
[Analyze grammar]

eteṣvapi hi jāteṣu phalajātāni me śṛṇu |
jātasya pārthivaiśvarye sṛṣṭiriṣṭā vidhīyate || 21 ||
[Analyze grammar]

prajāpatirivākṣobhyaḥ śarīrātsṛjati prajāḥ |
aṅgulyaṅguṣṭhamātreṇa hastapādena vā tathā || 22 ||
[Analyze grammar]

pṛthivīṃ kampayatyeko guṇo vāyoriti smṛtaḥ |
ākāśabhūtaścākāśe savarṇatvātpraṇaśyati || 23 ||
[Analyze grammar]

varṇato gṛhyate cāpi kāmātpibati cāśayān |
na cāsya tejasā rūpaṃ dṛśyate śāmyate tathā || 24 ||
[Analyze grammar]

ahaṃkārasya vijiteḥ pañcaite syurvaśānugāḥ |
ṣaṇṇāmātmani buddhau ca jitāyāṃ prabhavatyatha || 25 ||
[Analyze grammar]

nirdoṣā pratibhā hyenaṃ kṛtsnā samabhivartate |
tathaiva vyaktamātmānamavyaktaṃ pratipadyate || 26 ||
[Analyze grammar]

yato niḥsarate loko bhavati vyaktasaṃjñakaḥ |
tatrāvyaktamayīṃ vyākhyāṃ śṛṇu tvaṃ vistareṇa me |
tathā vyaktamayīṃ caiva saṃkhyāṃ pūrvaṃ nibodha me || 27 ||
[Analyze grammar]

pañcaviṃśatitattvāni tulyānyubhayataḥ samam |
yoge sāṃkhye'pi ca tathā viśeṣāṃstatra me śṛṇu || 28 ||
[Analyze grammar]

proktaṃ tadvyaktamityeva jāyate vardhate ca yat |
jīryate mriyate caiva caturbhirlakṣaṇairyutam || 29 ||
[Analyze grammar]

viparītamato yattu tadavyaktamudāhṛtam |
dvāvātmānau ca vedeṣu siddhānteṣvapyudāhṛtau || 30 ||
[Analyze grammar]

caturlakṣaṇajaṃ tvanyaṃ caturvargaṃ pracakṣate |
vyaktamavyaktajaṃ caiva tathā buddhamathetarat |
sattvaṃ kṣetrajña ityetaddvayamapyanudarśitam || 31 ||
[Analyze grammar]

dvāvātmānau ca vedeṣu viṣayeṣu ca rajyataḥ |
viṣayātpratisaṃhāraḥ sāṃkhyānāṃ siddhilakṣaṇam || 32 ||
[Analyze grammar]

nirmamaścānahaṃkāro nirdvaṃdvaśchinnasaṃśayaḥ |
naiva krudhyati na dveṣṭi nānṛtā bhāṣate giraḥ || 33 ||
[Analyze grammar]

ākruṣṭastāḍitaścaiva maitreṇa dhyāti nāśubham |
vāgdaṇḍakarmamanasāṃ trayāṇāṃ ca nivartakaḥ || 34 ||
[Analyze grammar]

samaḥ sarveṣu bhūteṣu brahmāṇamabhivartate |
naivecchati na cāniccho yātrāmātravyavasthitaḥ || 35 ||
[Analyze grammar]

alolupo'vyatho dānto na kṛtī na nirākṛtiḥ |
nāsyendriyamanekāgraṃ nātikṣiptamanorathaḥ |
ahiṃsraḥ sarvabhūtānāmīdṛksāṃkhyo vimucyate || 36 ||
[Analyze grammar]

atha yogādvimucyante kāraṇairyairnibodha me |
yogaiśvaryamatikrānto yo'tikrāmati mucyate || 37 ||
[Analyze grammar]

ityeṣā bhāvajā buddhiḥ kathitā te na saṃśayaḥ |
evaṃ bhavati nirdvaṃdvo brahmāṇaṃ cādhigacchati || 38 ||
[Analyze grammar]