Chapter 173

yudhiṣṭhira uvāca |
bāndhavāḥ karma vittaṃ vā prajñā veha pitāmaha |
narasya kā pratiṣṭhā syādetatpṛṣṭo vadasva me || 1 ||
[Analyze grammar]

bhīṣma uvāca |
prajñā pratiṣṭhā bhūtānāṃ prajñā lābhaḥ paro mataḥ |
prajñā naiḥśreyasī loke prajñā svargo mataḥ satām || 2 ||
[Analyze grammar]

prajñayā prāpitārtho hi baliraiśvaryasaṃkṣaye |
prahrādo namucirmaṅkistasyāḥ kiṃ vidyate param || 3 ||
[Analyze grammar]

atrāpyudāharantīmamitihāsaṃ purātanam |
indrakāśyapasaṃvādaṃ tannibodha yudhiṣṭhira || 4 ||
[Analyze grammar]

vaiśyaḥ kaścidṛṣiṃ tāta kāśyapaṃ saṃśitavratam |
rathena pātayāmāsa śrīmāndṛptastapasvinam || 5 ||
[Analyze grammar]

ārtaḥ sa patitaḥ kruddhastyaktvātmānamathābravīt |
mariṣyāmyadhanasyeha jīvitārtho na vidyate || 6 ||
[Analyze grammar]

tathā mumūrṣumāsīnamakūjantamacetasam |
indraḥ sṛgālarūpeṇa babhāṣe kruddhamānasam || 7 ||
[Analyze grammar]

manuṣyayonimicchanti sarvabhūtāni sarvaśaḥ |
manuṣyatve ca vipratvaṃ sarva evābhinandati || 8 ||
[Analyze grammar]

manuṣyo brāhmaṇaścāsi śrotriyaścāsi kāśyapa |
sudurlabhamavāpyaitadadoṣānmartumicchasi || 9 ||
[Analyze grammar]

sarve lābhāḥ sābhimānā iti satyā bata śrutiḥ |
saṃtoṣaṇīyarūpo'si lobhādyadabhimanyase || 10 ||
[Analyze grammar]

aho siddhārthatā teṣāṃ yeṣāṃ santīha pāṇayaḥ |
pāṇimadbhyaḥ spṛhāsmākaṃ yathā tava dhanasya vai || 11 ||
[Analyze grammar]

na pāṇilābhādadhiko lābhaḥ kaścana vidyate |
apāṇitvādvayaṃ brahmankaṇṭakānnoddharāmahe || 12 ||
[Analyze grammar]

atha yeṣāṃ punaḥ pāṇī devadattau daśāṅgulī |
uddharanti kṛmīnaṅgāddaśamānānkaṣanti ca || 13 ||
[Analyze grammar]

himavarṣātapānāṃ ca paritrāṇāni kurvate |
celamannaṃ sukhaṃ śayyāṃ nivātaṃ copabhuñjate || 14 ||
[Analyze grammar]

adhiṣṭhāya ca gāṃ loke bhuñjate vāhayanti ca |
upāyairbahubhiścaiva vaśyānātmani kurvate || 15 ||
[Analyze grammar]

ye khalvajihvāḥ kṛpaṇā alpaprāṇā apāṇayaḥ |
sahante tāni duḥkhāni diṣṭyā tvaṃ na tathā mune || 16 ||
[Analyze grammar]

diṣṭyā tvaṃ na sṛgālo vai na kṛmirna ca mūṣakaḥ |
na sarpo na ca maṇḍūko na cānyaḥ pāpayonijaḥ || 17 ||
[Analyze grammar]

etāvatāpi lābhena toṣṭumarhasi kāśyapa |
kiṃ punaryo'si sattvānāṃ sarveṣāṃ brāhmaṇottamaḥ || 18 ||
[Analyze grammar]

ime māṃ kṛmayo'danti teṣāmuddharaṇāya me |
nāsti śaktirapāṇitvātpaśyāvasthāmimāṃ mama || 19 ||
[Analyze grammar]

akāryamiti caivemaṃ nātmānaṃ saṃtyajāmyaham |
netaḥ pāpīyasīṃ yoniṃ pateyamaparāmiti || 20 ||
[Analyze grammar]

madhye vai pāpayonīnāṃ sārgālī yāmahaṃ gataḥ |
pāpīyasyo bahutarā ito'nyāḥ pāpayonayaḥ || 21 ||
[Analyze grammar]

jātyaivaike sukhatarāḥ santyanye bhṛśaduḥkhitāḥ |
naikāntasukhameveha kvacitpaśyāmi kasyacit || 22 ||
[Analyze grammar]

manuṣyā hyāḍhyatāṃ prāpya rājyamicchantyanantaram |
rājyāddevatvamicchanti devatvādindratāmapi || 23 ||
[Analyze grammar]

bhavestvaṃ yadyapi tvāḍhyo na rājā na ca daivatam |
devatvaṃ prāpya cendratvaṃ naiva tuṣyestathā sati || 24 ||
[Analyze grammar]

na tṛptiḥ priyalābhe'sti tṛṣṇā nādbhiḥ praśāmyati |
saṃprajvalati sā bhūyaḥ samidbhiriva pāvakaḥ || 25 ||
[Analyze grammar]

astyeva tvayi śoko vai harṣaścāsti tathā tvayi |
sukhaduḥkhe tathā cobhe tatra kā paridevanā || 26 ||
[Analyze grammar]

paricchidyaiva kāmānāṃ sarveṣāṃ caiva karmaṇām |
mūlaṃ rundhīndriyagrāmaṃ śakuntāniva pañjare || 27 ||
[Analyze grammar]

na khalvapyarasajñasya kāmaḥ kvacana jāyate |
saṃsparśāddarśanādvāpi śravaṇādvāpi jāyate || 28 ||
[Analyze grammar]

na tvaṃ smarasi vāruṇyā laṭvākānāṃ ca pakṣiṇām |
tābhyāṃ cābhyadhiko bhakṣyo na kaścidvidyate kvacit || 29 ||
[Analyze grammar]

yāni cānyāni dūreṣu bhakṣyabhojyāni kāśyapa |
yeṣāmabhuktapūrvaṃ te teṣāmasmṛtireva ca || 30 ||
[Analyze grammar]

aprāśanamasaṃsparśamasaṃdarśanameva ca |
puruṣasyaiṣa niyamo manye śreyo na saṃśayaḥ || 31 ||
[Analyze grammar]

pāṇimanto dhanairyuktā balavanto na saṃśayaḥ |
manuṣyā mānuṣaireva dāsatvamupapāditāḥ || 32 ||
[Analyze grammar]

vadhabandhaparikleśaiḥ kliśyante ca punaḥ punaḥ |
te khalvapi ramante ca modante ca hasanti ca || 33 ||
[Analyze grammar]

apare bāhubalinaḥ kṛtavidyā manasvinaḥ |
jugupsitāṃ sukṛpaṇāṃ pāpāṃ vṛttimupāsate || 34 ||
[Analyze grammar]

utsahante ca te vṛttimanyāmapyupasevitum |
svakarmaṇā tu niyataṃ bhavitavyaṃ tu tattathā || 35 ||
[Analyze grammar]

na pulkaso na caṇḍāla ātmānaṃ tyaktumicchati |
asaṃtuṣṭaḥ svayā yonyā māyāṃ paśyasva yādṛśīm || 36 ||
[Analyze grammar]

dṛṣṭvā kuṇīnpakṣahatānmanuṣyānāmayāvinaḥ |
susaṃpūrṇaḥ svayā yonyā labdhalābho'si kāśyapa || 37 ||
[Analyze grammar]

yadi brāhmaṇa dehaste nirātaṅko nirāmayaḥ |
aṅgāni ca samagrāṇi na ca lokeṣu dhikkṛtaḥ || 38 ||
[Analyze grammar]

na kenacitpravādena satyenaivāpahāriṇā |
dharmāyottiṣṭha viprarṣe nātmānaṃ tyaktumarhasi || 39 ||
[Analyze grammar]

yadi brahmañśṛṇoṣyetacchraddadhāsi ca me vacaḥ |
vedoktasya ca dharmasya phalaṃ mukhyamavāpsyasi || 40 ||
[Analyze grammar]

svādhyāyamagnisaṃskāramapramatto'nupālaya |
satyaṃ damaṃ ca dānaṃ ca spardhiṣṭhā mā ca kenacit || 41 ||
[Analyze grammar]

ye kecana svadhyayanāḥ prāptā yajanayājanam |
kathaṃ te jātu śoceyurdhyāyeyurvāpyaśobhanam || 42 ||
[Analyze grammar]

icchantaste vihārāya sukhaṃ mahadavāpnuyuḥ |
uta jātāḥ sunakṣatre sutīrthāḥ sumuhūrtajāḥ || 43 ||
[Analyze grammar]

nakṣatreṣvāsureṣvanye dustīrthā durmuhūrtajāḥ |
saṃpatantyāsurīṃ yoniṃ yajñaprasavavarjitām || 44 ||
[Analyze grammar]

ahamāsaṃ paṇḍitako haituko vedanindakaḥ |
ānvīkṣikīṃ tarkavidyāmanurakto nirarthikām || 45 ||
[Analyze grammar]

hetuvādānpravaditā vaktā saṃsatsu hetumat |
ākroṣṭā cābhivaktā ca brahmayajñeṣu vai dvijān || 46 ||
[Analyze grammar]

nāstikaḥ sarvaśaṅkī ca mūrkhaḥ paṇḍitamānikaḥ |
tasyeyaṃ phalanirvṛttiḥ sṛgālatvaṃ mama dvija || 47 ||
[Analyze grammar]

api jātu tathā tatsyādahorātraśatairapi |
yadahaṃ mānuṣīṃ yoniṃ sṛgālaḥ prāpnuyāṃ punaḥ || 48 ||
[Analyze grammar]

saṃtuṣṭaścāpramattaśca yajñadānataporatiḥ |
jñeyajñātā bhaveyaṃ vai varjyavarjayitā tathā || 49 ||
[Analyze grammar]

tataḥ sa munirutthāya kāśyapastamuvāca ha |
aho batāsi kuśalo buddhimāniti vismitaḥ || 50 ||
[Analyze grammar]

samavaikṣata taṃ vipro jñānadīrgheṇa cakṣuṣā |
dadarśa cainaṃ devānāmindraṃ devaṃ śacīpatim || 51 ||
[Analyze grammar]

tataḥ saṃpūjayāmāsa kāśyapo harivāhanam |
anujñātaśca tenātha praviveśa svamāśramam || 52 ||
[Analyze grammar]