Chapter 169

yudhiṣṭhira uvāca |
atikrāmati kāle'sminsarvabhūtakṣayāvahe |
kiṃ śreyaḥ pratipadyeta tanme brūhi pitāmaha || 1 ||
[Analyze grammar]

bhīṣma uvāca |
atrāpyudāharantīmamitihāsaṃ purātanam |
pituḥ putreṇa saṃvādaṃ tannibodha yudhiṣṭhira || 2 ||
[Analyze grammar]

dvijāteḥ kasyacitpārtha svādhyāyaniratasya vai |
babhūva putro medhāvī medhāvī nāma nāmataḥ || 3 ||
[Analyze grammar]

so'bravītpitaraṃ putraḥ svādhyāyakaraṇe ratam |
mokṣadharmārthakuśalo lokatattvavicakṣaṇaḥ || 4 ||
[Analyze grammar]

dhīraḥ kiṃ svittāta kuryātprajānankṣipraṃ hyāyurbhraśyate mānavānām |
pitastadācakṣva yathārthayogaṃ mamānupūrvyā yena dharmaṃ careyam || 5 ||
[Analyze grammar]

pitovāca |
vedānadhītya brahmacaryeṇa putra putrānicchetpāvanārthaṃ pitṝṇām |
agnīnādhāya vidhivacceṣṭayajño vanaṃ praviśyātha munirbubhūṣet || 6 ||
[Analyze grammar]

putra uvāca |
evamabhyāhate loke samantātparivārite |
amoghāsu patantīṣu kiṃ dhīra iva bhāṣase || 7 ||
[Analyze grammar]

pitovāca |
kathamabhyāhato lokaḥ kena vā parivāritaḥ |
amoghāḥ kāḥ patantīha kiṃ nu bhīṣayasīva mām || 8 ||
[Analyze grammar]

putra uvāca |
mṛtyunābhyāhato loko jarayā parivāritaḥ |
ahorātrāḥ patantyete nanu kasmānna budhyase || 9 ||
[Analyze grammar]

yadāhametajjānāmi na mṛtyustiṣṭhatīti ha |
so'haṃ kathaṃ pratīkṣiṣye jālenāpihitaścaran || 10 ||
[Analyze grammar]

rātryāṃ rātryāṃ vyatītāyāmāyuralpataraṃ yadā |
gādhodake matsya iva sukhaṃ vindeta kastadā |
tadeva vandhyaṃ divasamiti vidyādvicakṣaṇaḥ || 11 ||
[Analyze grammar]

anavāpteṣu kāmeṣu mṛtyurabhyeti mānavam |
śaṣpāṇīva vicinvantamanyatragatamānasam |
vṛkīvoraṇamāsādya mṛtyurādāya gacchati || 12 ||
[Analyze grammar]

adyaiva kuru yacchreyo mā tvā kālo'tyagādayam |
akṛteṣveva kāryeṣu mṛtyurvai saṃprakarṣati || 13 ||
[Analyze grammar]

śvaḥkāryamadya kurvīta pūrvāhṇe cāparāhṇikam |
na hi pratīkṣate mṛtyuḥ kṛtaṃ vāsya na vā kṛtam |
ko hi jānāti kasyādya mṛtyusenā nivekṣyate || 14 ||
[Analyze grammar]

yuvaiva dharmaśīlaḥ syādanimittaṃ hi jīvitam |
kṛte dharme bhavetkīrtiriha pretya ca vai sukham || 15 ||
[Analyze grammar]

mohena hi samāviṣṭaḥ putradārārthamudyataḥ |
kṛtvā kāryamakāryaṃ vā puṣṭimeṣāṃ prayacchati || 16 ||
[Analyze grammar]

taṃ putrapaśusaṃmattaṃ vyāsaktamanasaṃ naram |
suptaṃ vyāghraṃ mahaugho vā mṛtyurādāya gacchati || 17 ||
[Analyze grammar]

saṃcinvānakamevaikaṃ kāmānāmavitṛptakam |
vyāghraḥ paśumivādāya mṛtyurādāya gacchati || 18 ||
[Analyze grammar]

idaṃ kṛtamidaṃ kāryamidamanyatkṛtākṛtam |
evamīhāsukhāsaktaṃ kṛtāntaḥ kurute vaśe || 19 ||
[Analyze grammar]

kṛtānāṃ phalamaprāptaṃ karmaṇāṃ phalasaṅginam |
kṣetrāpaṇagṛhāsaktaṃ mṛtyurādāya gacchati || 20 ||
[Analyze grammar]

mṛtyurjarā ca vyādhiśca duḥkhaṃ cānekakāraṇam |
anuṣaktaṃ yadā dehe kiṃ svastha iva tiṣṭhasi || 21 ||
[Analyze grammar]

jātamevāntako'ntāya jarā cānveti dehinam |
anuṣaktā dvayenaite bhāvāḥ sthāvarajaṅgamāḥ || 22 ||
[Analyze grammar]

mṛtyorvā gṛhamevaitadyā grāme vasato ratiḥ |
devānāmeṣa vai goṣṭho yadaraṇyamiti śrutiḥ || 23 ||
[Analyze grammar]

nibandhanī rajjureṣā yā grāme vasato ratiḥ |
chittvaināṃ sukṛto yānti naināṃ chindanti duṣkṛtaḥ || 24 ||
[Analyze grammar]

na hiṃsayati yaḥ prāṇānmanovākkāyahetubhiḥ |
jīvitārthāpanayanaiḥ karmabhirna sa badhyate || 25 ||
[Analyze grammar]

na mṛtyusenāmāyāntīṃ jātu kaścitprabādhate |
ṛte satyamasaṃtyājyaṃ satye hyamṛtamāśritam || 26 ||
[Analyze grammar]

tasmātsatyavratācāraḥ satyayogaparāyaṇaḥ |
satyārāmaḥ samo dāntaḥ satyenaivāntakaṃ jayet || 27 ||
[Analyze grammar]

amṛtaṃ caiva mṛtyuśca dvayaṃ dehe pratiṣṭhitam |
mṛtyumāpadyate mohātsatyenāpadyate'mṛtam || 28 ||
[Analyze grammar]

so'haṃ hyahiṃsraḥ satyārthī kāmakrodhabahiṣkṛtaḥ |
samaduḥkhasukhaḥ kṣemī mṛtyuṃ hāsyāmyamartyavat || 29 ||
[Analyze grammar]

śāntiyajñarato dānto brahmayajñe sthito muniḥ |
vāṅmanaḥkarmayajñaśca bhaviṣyāmyudagāyane || 30 ||
[Analyze grammar]

paśuyajñaiḥ kathaṃ hiṃsrairmādṛśo yaṣṭumarhati |
antavadbhiruta prājñaḥ kṣatrayajñaiḥ piśācavat || 31 ||
[Analyze grammar]

yasya vāṅmanasī syātāṃ samyakpraṇihite sadā |
tapastyāgaśca yogaśca sa vai sarvamavāpnuyāt || 32 ||
[Analyze grammar]

nāsti vidyāsamaṃ cakṣurnāsti vidyāsamaṃ balam |
nāsti rāgasamaṃ duḥkhaṃ nāsti tyāgasamaṃ sukham || 33 ||
[Analyze grammar]

ātmanyevātmanā jāta ātmaniṣṭho'prajo'pi vā |
ātmanyeva bhaviṣyāmi na māṃ tārayati prajā || 34 ||
[Analyze grammar]

naitādṛśaṃ brāhmaṇasyāsti vittaṃ yathaikatā samatā satyatā ca |
śīle sthitirdaṇḍanidhānamārjavaṃ tatastataścoparamaḥ kriyābhyaḥ || 35 ||
[Analyze grammar]

kiṃ te dhanairbāndhavairvāpi kiṃ te kiṃ te dārairbrāhmaṇa yo mariṣyasi |
ātmānamanviccha guhāṃ praviṣṭaṃ pitāmahaste kva gataḥ pitā ca || 36 ||
[Analyze grammar]

bhīṣma uvāca |
putrasyaitadvacaḥ śrutvā tathākārṣītpitā nṛpa |
tathā tvamapi vartasva satyadharmaparāyaṇaḥ || 37 ||
[Analyze grammar]