Chapter 168

yudhiṣṭhira uvāca |
dharmāḥ pitāmahenoktā rājadharmāśritāḥ śubhāḥ |
dharmamāśramiṇāṃ śreṣṭhaṃ vaktumarhasi pārthiva || 1 ||
[Analyze grammar]

bhīṣma uvāca |
sarvatra vihito dharmaḥ svargyaḥ satyaphalaṃ tapaḥ |
bahudvārasya dharmasya nehāsti viphalā kriyā || 2 ||
[Analyze grammar]

yasminyasmiṃstu vinaye yo yo yāti viniścayam |
sa tamevābhijānāti nānyaṃ bharatasattama || 3 ||
[Analyze grammar]

yathā yathā ca paryeti lokatantramasāravat |
tathā tathā virāgo'tra jāyate nātra saṃśayaḥ || 4 ||
[Analyze grammar]

evaṃ vyavasite loke bahudoṣe yudhiṣṭhira |
ātmamokṣanimittaṃ vai yateta matimānnaraḥ || 5 ||
[Analyze grammar]

yudhiṣṭhira uvāca |
naṣṭe dhane vā dāre vā putre pitari vā mṛte |
yayā buddhyā nudecchokaṃ tanme brūhi pitāmaha || 6 ||
[Analyze grammar]

bhīṣma uvāca |
naṣṭe dhane vā dāre vā putre pitari vā mṛte |
aho duḥkhamiti dhyāyañśokasyāpacitiṃ caret || 7 ||
[Analyze grammar]

atrāpyudāharantīmamitihāsaṃ purātanam |
yathā senajitaṃ vipraḥ kaścidityabravīdvacaḥ || 8 ||
[Analyze grammar]

putraśokābhisaṃtaptaṃ rājānaṃ śokavihvalam |
viṣaṇṇavadanaṃ dṛṣṭvā vipro vacanamabravīt || 9 ||
[Analyze grammar]

kiṃ nu khalvasi mūḍhastvaṃ śocyaḥ kimanuśocasi |
yadā tvāmapi śocantaḥ śocyā yāsyanti tāṃ gatim || 10 ||
[Analyze grammar]

tvaṃ caivāhaṃ ca ye cānye tvāṃ rājanparyupāsate |
sarve tatra gamiṣyāmo yata evāgatā vayam || 11 ||
[Analyze grammar]

senajiduvāca |
kā buddhiḥ kiṃ tapo vipra kaḥ samādhistapodhana |
kiṃ jñānaṃ kiṃ śrutaṃ vā te yatprāpya na viṣīdasi || 12 ||
[Analyze grammar]

brāhmaṇa uvāca |
paśya bhūtāni duḥkhena vyatiṣaktāni sarvaśaḥ |
ātmāpi cāyaṃ na mama sarvā vā pṛthivī mama || 13 ||
[Analyze grammar]

yathā mama tathānyeṣāmiti buddhyā na me vyathā |
etāṃ buddhimahaṃ prāpya na prahṛṣye na ca vyathe || 14 ||
[Analyze grammar]

yathā kāṣṭhaṃ ca kāṣṭhaṃ ca sameyātāṃ mahodadhau |
sametya ca vyapeyātāṃ tadvadbhūtasamāgamaḥ || 15 ||
[Analyze grammar]

evaṃ putrāśca pautrāśca jñātayo bāndhavāstathā |
teṣu sneho na kartavyo viprayogo hi tairdhruvam || 16 ||
[Analyze grammar]

adarśanādāpatitaḥ punaścādarśanaṃ gataḥ |
na tvāsau veda na tvaṃ taṃ kaḥ sankamanuśocasi || 17 ||
[Analyze grammar]

tṛṣṇārtiprabhavaṃ duḥkhaṃ duḥkhārtiprabhavaṃ sukham |
sukhātsaṃjāyate duḥkhamevametatpunaḥ punaḥ |
sukhasyānantaraṃ duḥkhaṃ duḥkhasyānantaraṃ sukham || 18 ||
[Analyze grammar]

sukhāttvaṃ duḥkhamāpannaḥ punarāpatsyase sukham |
na nityaṃ labhate duḥkhaṃ na nityaṃ labhate sukham || 19 ||
[Analyze grammar]

nālaṃ sukhāya suhṛdo nālaṃ duḥkhāya śatravaḥ |
na ca prajñālamarthānāṃ na sukhānāmalaṃ dhanam || 20 ||
[Analyze grammar]

na buddhirdhanalābhāya na jāḍyamasamṛddhaye |
lokaparyāyavṛttāntaṃ prājño jānāti netaraḥ || 21 ||
[Analyze grammar]

buddhimantaṃ ca mūḍhaṃ ca śūraṃ bhīruṃ jaḍaṃ kavim |
durbalaṃ balavantaṃ ca bhāginaṃ bhajate sukham || 22 ||
[Analyze grammar]

dhenurvatsasya gopasya svāminastaskarasya ca |
payaḥ pibati yastasyā dhenustasyeti niścayaḥ || 23 ||
[Analyze grammar]

ye ca mūḍhatamā loke ye ca buddheḥ paraṃ gatāḥ |
te narāḥ sukhamedhante kliśyatyantarito janaḥ || 24 ||
[Analyze grammar]

antyeṣu remire dhīrā na te madhyeṣu remire |
antyaprāptiṃ sukhāmāhurduḥkhamantaramantayoḥ || 25 ||
[Analyze grammar]

ye tu buddhisukhaṃ prāptā dvaṃdvātītā vimatsarāḥ |
tānnaivārthā na cānarthā vyathayanti kadācana || 26 ||
[Analyze grammar]

atha ye buddhimaprāptā vyatikrāntāśca mūḍhatām |
te'tivelaṃ prahṛṣyanti saṃtāpamupayānti ca || 27 ||
[Analyze grammar]

nityapramuditā mūḍhā divi devagaṇā iva |
avalepena mahatā paridṛbdhā vicetasaḥ || 28 ||
[Analyze grammar]

sukhaṃ duḥkhāntamālasyaṃ duḥkhaṃ dākṣyaṃ sukhodayam |
bhūtiścaiva śriyā sārdhaṃ dakṣe vasati nālase || 29 ||
[Analyze grammar]

sukhaṃ vā yadi vā duḥkhaṃ dveṣyaṃ vā yadi vā priyam |
prāptaṃ prāptamupāsīta hṛdayenāparājitaḥ || 30 ||
[Analyze grammar]

śokasthānasahasrāṇi harṣasthānaśatāni ca |
divase divase mūḍhamāviśanti na paṇḍitam || 31 ||
[Analyze grammar]

buddhimantaṃ kṛtaprajñaṃ śuśrūṣumanasūyakam |
dāntaṃ jitendriyaṃ cāpi śoko na spṛśate naram || 32 ||
[Analyze grammar]

etāṃ buddhiṃ samāsthāya guptacittaścaredbudhaḥ |
udayāstamayajñaṃ hi na śokaḥ spraṣṭumarhati || 33 ||
[Analyze grammar]

yannimittaṃ bhavecchokastrāso vā duḥkhameva vā |
āyāso vā yatomūlastadekāṅgamapi tyajet || 34 ||
[Analyze grammar]

yadyattyajati kāmānāṃ tatsukhasyābhipūryate |
kāmānusārī puruṣaḥ kāmānanu vinaśyati || 35 ||
[Analyze grammar]

yacca kāmasukhaṃ loke yacca divyaṃ mahatsukham |
tṛṣṇākṣayasukhasyaite nārhataḥ ṣoḍaśīṃ kalām || 36 ||
[Analyze grammar]

pūrvadehakṛtaṃ karma śubhaṃ vā yadi vāśubham |
prājñaṃ mūḍhaṃ tathā śūraṃ bhajate yādṛśaṃ kṛtam || 37 ||
[Analyze grammar]

evameva kilaitāni priyāṇyevāpriyāṇi ca |
jīveṣu parivartante duḥkhāni ca sukhāni ca || 38 ||
[Analyze grammar]

tadevaṃ buddhimāsthāya sukhaṃ jīvedguṇānvitaḥ |
sarvānkāmāñjugupseta saṅgānkurvīta pṛṣṭhataḥ |
vṛtta eṣa hṛdi prauḍho mṛtyureṣa manomayaḥ || 39 ||
[Analyze grammar]

yadā saṃharate kāmānkūrmo'ṅgānīva sarvaśaḥ |
tadātmajyotirātmā ca ātmanyeva prasīdati || 40 ||
[Analyze grammar]

kiṃcideva mamatvena yadā bhavati kalpitam |
tadeva paritāpārthaṃ sarvaṃ saṃpadyate tadā || 41 ||
[Analyze grammar]

na bibheti yadā cāyaṃ yadā cāsmānna bibhyati |
yadā necchati na dveṣṭi brahma saṃpadyate tadā || 42 ||
[Analyze grammar]

ubhe satyānṛte tyaktvā śokānandau bhayābhaye |
priyāpriye parityajya praśāntātmā bhaviṣyasi || 43 ||
[Analyze grammar]

yadā na kurute dhīraḥ sarvabhūteṣu pāpakam |
karmaṇā manasā vācā brahma saṃpadyate tadā || 44 ||
[Analyze grammar]

yā dustyajā durmatibhiryā na jīryati jīryataḥ |
yo'sau prāṇāntiko rogastāṃ tṛṣṇāṃ tyajataḥ sukham || 45 ||
[Analyze grammar]

atra piṅgalayā gītā gāthāḥ śrūyanti pārthiva |
yathā sā kṛcchrakāle'pi lebhe dharmaṃ sanātanam || 46 ||
[Analyze grammar]

saṃkete piṅgalā veśyā kāntenāsīdvinākṛtā |
atha kṛcchragatā śāntāṃ buddhimāsthāpayattadā || 47 ||
[Analyze grammar]

piṅgalovāca |
unmattāhamanunmattaṃ kāntamanvavasaṃ ciram |
antike ramaṇaṃ santaṃ nainamadhyagamaṃ purā || 48 ||
[Analyze grammar]

ekasthūṇaṃ navadvāramapidhāsyāmyagārakam |
kā hi kāntamihāyāntamayaṃ kānteti maṃsyate || 49 ||
[Analyze grammar]

akāmāḥ kāmarūpeṇa dhūrtā narakarūpiṇaḥ |
na punarvañcayiṣyanti pratibuddhāsmi jāgṛmi || 50 ||
[Analyze grammar]

anartho'pi bhavatyartho daivātpūrvakṛtena vā |
saṃbuddhāhaṃ nirākārā nāhamadyājitendriyā || 51 ||
[Analyze grammar]

sukhaṃ nirāśaḥ svapiti nairāśyaṃ paramaṃ sukham |
āśāmanāśāṃ kṛtvā hi sukhaṃ svapiti piṅgalā || 52 ||
[Analyze grammar]

bhīṣma uvāca |
etaiścānyaiśca viprasya hetumadbhiḥ prabhāṣitaiḥ |
paryavasthāpito rājā senajinmumude sukham || 53 ||
[Analyze grammar]