Chapter 140

yudhiṣṭhira uvāca |
yadidaṃ ghoramuddiṣṭamaśraddheyamivānṛtam |
asti sviddasyumaryādā yāmahaṃ parivarjaye || 1 ||
[Analyze grammar]

saṃmuhyāmi viṣīdāmi dharmo me śithilīkṛtaḥ |
udyamaṃ nādhigacchāmi kutaścitparicintayan || 2 ||
[Analyze grammar]

bhīṣma uvāca |
naitacchuddhāgamādeva tava dharmānuśāsanam |
prajñāsamavatāro'yaṃ kavibhiḥ saṃbhṛtaṃ madhu || 3 ||
[Analyze grammar]

bahvyaḥ pratividhātavyāḥ prajñā rājñā tatastataḥ |
naikaśākhena dharmeṇa yātraiṣā saṃpravartate || 4 ||
[Analyze grammar]

buddhisaṃjananaṃ rājñāṃ dharmamācaratāṃ sadā |
jayo bhavati kauravya tadā tadviddhi me vacaḥ || 5 ||
[Analyze grammar]

buddhiśreṣṭhā hi rājāno jayanti vijayaiṣiṇaḥ |
dharmaḥ pratividhātavyo buddhyā rājñā tatastataḥ || 6 ||
[Analyze grammar]

naikaśākhena dharmeṇa rājñāṃ dharmo vidhīyate |
durbalasya kutaḥ prajñā purastādanudāhṛtā || 7 ||
[Analyze grammar]

advaidhajñaḥ pathi dvaidhe saṃśayaṃ prāptumarhati |
buddhidvaidhaṃ veditavyaṃ purastādeva bhārata || 8 ||
[Analyze grammar]

pārśvataḥkaraṇaṃ prajñā viṣūcī tvāpagā iva |
janastūccāritaṃ dharmaṃ vijānātyanyathānyathā || 9 ||
[Analyze grammar]

samyagvijñāninaḥ kecinmithyāvijñānino'pare |
tadvai yathātathaṃ buddhvā jñānamādadate satām || 10 ||
[Analyze grammar]

parimuṣṇanti śāstrāṇi dharmasya paripanthinaḥ |
vaiṣamyamarthavidyānāṃ nairarthyātkhyāpayanti te || 11 ||
[Analyze grammar]

ājijīviṣavo vidyāṃ yaśaskāmāḥ samantataḥ |
te sarve narapāpiṣṭhā dharmasya paripanthinaḥ || 12 ||
[Analyze grammar]

apakvamatayo mandā na jānanti yathātatham |
sadā hyaśāstrakuśalāḥ sarvatrāpariniṣṭhitāḥ || 13 ||
[Analyze grammar]

parimuṣṇanti śāstrāṇi śāstradoṣānudarśinaḥ |
vijñānamatha vidyānāṃ na samyagiti vartate || 14 ||
[Analyze grammar]

nindayā paravidyānāṃ svāṃ vidyāṃ khyāpayanti ye |
vāgastrā vākchurīmattvā dugdhavidyāphalā iva |
tānvidyāvaṇijo viddhi rākṣasāniva bhārata || 15 ||
[Analyze grammar]

vyājena kṛtsno vidito dharmaste parihāsyate |
na dharmavacanaṃ vācā na buddhyā ceti naḥ śrutam || 16 ||
[Analyze grammar]

iti bārhaspataṃ jñānaṃ provāca maghavā svayam |
na tveva vacanaṃ kiṃcidanimittādihocyate || 17 ||
[Analyze grammar]

svavinītena śāstreṇa vyavasyanti tathāpare |
lokayātrāmihaike tu dharmamāhurmanīṣiṇaḥ || 18 ||
[Analyze grammar]

samuddiṣṭaṃ satāṃ dharmaṃ svayamūhenna paṇḍitaḥ |
amarṣācchāstrasaṃmohādavijñānācca bhārata || 19 ||
[Analyze grammar]

śāstraṃ prājñasya vadataḥ samūhe yātyadarśanam |
āgatāgamayā buddhyā vacanena praśasyate || 20 ||
[Analyze grammar]

ajñānājjñānahetutvādvacanaṃ sādhu manyate |
anapāhatamevedaṃ nedaṃ śāstramapārthakam || 21 ||
[Analyze grammar]

daiteyānuśanāḥ prāha saṃśayacchedane purā |
jñānamavyapadeśyaṃ hi yathā nāsti tathaiva tat || 22 ||
[Analyze grammar]

tena tvaṃ chinnamūlena kaṃ toṣayitumarhasi |
atathyavihitaṃ yo vā nedaṃ vākyamupāśnuyāt || 23 ||
[Analyze grammar]

ugrāyaiva hi sṛṣṭo'si karmaṇe na tvavekṣase |
aṅgemāmanvavekṣasva rājanītiṃ bubhūṣitum |
yayā pramucyate tvanyo yadarthaṃ ca pramodate || 24 ||
[Analyze grammar]

ajo'śvaḥ kṣatramityetatsadṛśaṃ brahmaṇā kṛtam |
tasmānnatīkṣṇabhūtānāṃ yātrā kācitprasidhyati || 25 ||
[Analyze grammar]

yastvavadhyavadhe doṣaḥ sa vadhyasyāvadhe smṛtaḥ |
eṣaiva khalu maryādā yāmayaṃ parivarjayet || 26 ||
[Analyze grammar]

tasmāttīkṣṇaḥ prajā rājā svadharme sthāpayeduta |
anyonyaṃ bhakṣayanto hi pracareyurvṛkā iva || 27 ||
[Analyze grammar]

yasya dasyugaṇā rāṣṭre dhvāṅkṣā matsyāñjalādiva |
viharanti parasvāni sa vai kṣatriyapāṃsanaḥ || 28 ||
[Analyze grammar]

kulīnānsacivānkṛtvā vedavidyāsamanvitān |
praśādhi pṛthivīṃ rājanprajā dharmeṇa pālayan || 29 ||
[Analyze grammar]

vihīnajamakarmāṇaṃ yaḥ pragṛhṇāti bhūmipaḥ |
ubhayasyāviśeṣajñastadvai kṣatraṃ napuṃsakam || 30 ||
[Analyze grammar]

naivograṃ naiva cānugraṃ dharmeṇeha praśasyate |
ubhayaṃ na vyatikrāmedugro bhūtvā mṛdurbhava || 31 ||
[Analyze grammar]

kaṣṭaḥ kṣatriyadharmo'yaṃ sauhṛdaṃ tvayi yatsthitam |
ugre karmaṇi sṛṣṭo'si tasmādrājyaṃ praśādhi vai || 32 ||
[Analyze grammar]

aśiṣṭanigraho nityaṃ śiṣṭasya paripālanam |
iti śakro'bravīddhīmānāpatsu bharatarṣabha || 33 ||
[Analyze grammar]

yudhiṣṭhira uvāca |
asti sviddasyumaryādā yāmanyo nātilaṅghayet |
pṛcchāmi tvāṃ satāṃ śreṣṭha tanme brūhi pitāmaha || 34 ||
[Analyze grammar]

bhīṣma uvāca |
brāhmaṇāneva seveta vidyāvṛddhāṃstapasvinaḥ |
śrutacāritravṛttāḍhyānpavitraṃ hyetaduttamam || 35 ||
[Analyze grammar]

yā devatāsu vṛttiste sāstu vipreṣu sarvadā |
kruddhairhi vipraiḥ karmāṇi kṛtāni bahudhā nṛpa || 36 ||
[Analyze grammar]

teṣāṃ prītyā yaśo mukhyamaprītyā tu viparyayaḥ |
prītyā hyamṛtavadviprāḥ kruddhāścaiva yathā viṣam || 37 ||
[Analyze grammar]