Chapter 138

yudhiṣṭhira uvāca |
yugakṣayātparikṣīṇe dharme loke ca bhārata |
dasyubhiḥ pīḍyamāne ca kathaṃ stheyaṃ pitāmaha || 1 ||
[Analyze grammar]

bhīṣma uvāca |
hanta te kathayiṣyāmi nītimāpatsu bhārata |
utsṛjyāpi ghṛṇāṃ kāle yathā varteta bhūmipaḥ || 2 ||
[Analyze grammar]

atrāpyudāharantīmamitihāsaṃ purātanam |
bharadvājasya saṃvādaṃ rājñaḥ śatruṃtapasya ca || 3 ||
[Analyze grammar]

rājā śatruṃtapo nāma sauvīrāṇāṃ mahārathaḥ |
kaṇiṅkamupasaṃgamya papracchārthaviniścayam || 4 ||
[Analyze grammar]

alabdhasya kathaṃ lipsā labdhaṃ kena vivardhate |
vardhitaṃ pālayetkena pālitaṃ praṇayetkatham || 5 ||
[Analyze grammar]

tasmai viniścayārthaṃ sa paripṛṣṭārthaniścayaḥ |
uvāca brāhmaṇo vākyamidaṃ hetumaduttaram || 6 ||
[Analyze grammar]

nityamudyatadaṇḍaḥ syānnityaṃ vivṛtapauruṣaḥ |
acchidraśchidradarśī ca pareṣāṃ vivarānugaḥ || 7 ||
[Analyze grammar]

nityamudyatadaṇḍasya bhṛśamudvijate janaḥ |
tasmātsarvāṇi bhūtāni daṇḍenaiva prarodhayet || 8 ||
[Analyze grammar]

evameva praśaṃsanti paṇḍitāstattvadarśinaḥ |
tasmāccatuṣṭaye tasminpradhāno daṇḍa ucyate || 9 ||
[Analyze grammar]

chinnamūle hyadhiṣṭhāne sarve tajjīvino hatāḥ |
kathaṃ hi śākhāstiṣṭheyuśchinnamūle vanaspatau || 10 ||
[Analyze grammar]

mūlamevāditaśchindyātparapakṣasya paṇḍitaḥ |
tataḥ sahāyānpakṣaṃ ca sarvamevānusārayet || 11 ||
[Analyze grammar]

sumantritaṃ suvikrāntaṃ suyuddhaṃ supalāyitam |
āpadāṃ padakāleṣu kurvīta na vicārayet || 12 ||
[Analyze grammar]

vāṅmātreṇa vinītaḥ syāddhṛdayena yathā kṣuraḥ |
ślakṣṇapūrvābhibhāṣī ca kāmakrodhau vivarjayet || 13 ||
[Analyze grammar]

sapatnasahite kārye kṛtvā saṃdhiṃ na viśvaset |
apakrāmettataḥ kṣipraṃ kṛtakāryo vicakṣaṇaḥ || 14 ||
[Analyze grammar]

śatruṃ ca mitrarūpeṇa sāntvenaivābhisāntvayet |
nityaśaścodvijettasmātsarpādveśmagatādiva || 15 ||
[Analyze grammar]

yasya buddhiṃ paribhavettamatītena sāntvayet |
anāgatena duṣprajñaṃ pratyutpannena paṇḍitam || 16 ||
[Analyze grammar]

añjaliṃ śapathaṃ sāntvaṃ praṇamya śirasā vadet |
aśruprapātanaṃ caiva kartavyaṃ bhūtimicchatā || 17 ||
[Analyze grammar]

vahedamitraṃ skandhena yāvatkālaviparyayaḥ |
athainamāgate kāle bhindyādghaṭamivāśmani || 18 ||
[Analyze grammar]

muhūrtamapi rājendra tindukālātavajjvalet |
na tuṣāgnirivānarcirdhūmāyeta naraściram || 19 ||
[Analyze grammar]

nānarthakenārthavattvaṃ kṛtaghnena samācaret |
arthe tu śakyate bhoktuṃ kṛtakāryo'vamanyate |
tasmātsarvāṇi kāryāṇi sāvaśeṣāṇi kārayet || 20 ||
[Analyze grammar]

kokilasya varāhasya meroḥ śūnyasya veśmanaḥ |
vyāḍasya bhakticitrasya yacchreṣṭhaṃ tatsamācaret || 21 ||
[Analyze grammar]

utthāyotthāya gacchecca nityayukto riporgṛhān |
kuśalaṃ cāpi pṛccheta yadyapyakuśalaṃ bhavet || 22 ||
[Analyze grammar]

nālasāḥ prāpnuvantyarthānna klībā na ca māninaḥ |
na ca lokaravādbhītā na ca śaśvatpratīkṣiṇaḥ || 23 ||
[Analyze grammar]

nāsya chidraṃ paro vidyādvidyācchidraṃ parasya tu |
gūhetkūrma ivāṅgāni rakṣedvivaramātmanaḥ || 24 ||
[Analyze grammar]

bakavaccintayedarthānsiṃhavacca parākramet |
vṛkavaccāvalumpeta śaśavacca viniṣpatet || 25 ||
[Analyze grammar]

pānamakṣāstathā nāryo mṛgayā gītavāditam |
etāni yuktyā seveta prasaṅgo hyatra doṣavān || 26 ||
[Analyze grammar]

kuryāttṛṇamayaṃ cāpaṃ śayīta mṛgaśāyikām |
andhaḥ syādandhavelāyāṃ bādhiryamapi saṃśrayet || 27 ||
[Analyze grammar]

deśaṃ kālaṃ samāsādya vikrameta vicakṣaṇaḥ |
deśakālābhyatīto hi vikramo niṣphalo bhavet || 28 ||
[Analyze grammar]

kālākālau saṃpradhārya balābalamathātmanaḥ |
parasparabalaṃ jñātvā tathātmānaṃ niyojayet || 29 ||
[Analyze grammar]

daṇḍenopanataṃ śatruṃ yo rājā na niyacchati |
sa mṛtyumupagūhyāste garbhamaśvatarī yathā || 30 ||
[Analyze grammar]

supuṣpitaḥ syādaphalaḥ phalavānsyāddurāruhaḥ |
āmaḥ syātpakvasaṃkāśo na ca śīryeta kasyacit || 31 ||
[Analyze grammar]

āśāṃ kālavatīṃ kuryāttāṃ ca vighnena yojayet |
vighnaṃ nimittato brūyānnimittaṃ cāpi hetutaḥ || 32 ||
[Analyze grammar]

bhītavatsaṃvidhātavyaṃ yāvadbhayamanāgatam |
āgataṃ tu bhayaṃ dṛṣṭvā prahartavyamabhītavat || 33 ||
[Analyze grammar]

na saṃśayamanāruhya naro bhadrāṇi paśyati |
saṃśayaṃ punarāruhya yadi jīvati paśyati || 34 ||
[Analyze grammar]

anāgataṃ vijānīyādyacchedbhayamupasthitam |
punarvṛddhikṣayātkiṃcidabhivṛttaṃ niśāmayet || 35 ||
[Analyze grammar]

pratyupasthitakālasya sukhasya parivarjanam |
anāgatasukhāśā ca naiṣa buddhimatāṃ nayaḥ || 36 ||
[Analyze grammar]

yo'riṇā saha saṃdhāya sukhaṃ svapiti viśvasan |
sa vṛkṣāgraprasupto vā patitaḥ pratibudhyate || 37 ||
[Analyze grammar]

karmaṇā yena teneha mṛdunā dāruṇena vā |
uddhareddīnamātmānaṃ samartho dharmamācaret || 38 ||
[Analyze grammar]

ye sapatnāḥ sapatnānāṃ sarvāṃstānapavatsayet |
ātmanaścāpi boddhavyāścārāḥ praṇihitāḥ paraiḥ || 39 ||
[Analyze grammar]

cāraḥ suvihitaḥ kārya ātmano'tha parasya ca |
pāṣaṇḍāṃstāpasādīṃśca pararāṣṭraṃ praveśayet || 40 ||
[Analyze grammar]

udyāneṣu vihāreṣu prapāsvāvasatheṣu ca |
pānāgāreṣu veśeṣu tīrtheṣu ca sabhāsu ca || 41 ||
[Analyze grammar]

dharmābhicāriṇaḥ pāpāścārā lokasya kaṇṭakāḥ |
samāgacchanti tānbuddhvā niyacchecchamayedapi || 42 ||
[Analyze grammar]

na viśvasedaviśvaste viśvaste nāpi viśvaset |
viśvastaṃ bhayamanveti nāparīkṣya ca viśvaset || 43 ||
[Analyze grammar]

viśvāsayitvā tu paraṃ tattvabhūtena hetunā |
athāsya praharetkāle kiṃcidvicalite pade || 44 ||
[Analyze grammar]

aśaṅkyamapi śaṅketa nityaṃ śaṅketa śaṅkitāt |
bhayaṃ hi śaṅkitājjātaṃ samūlamapi kṛntati || 45 ||
[Analyze grammar]

avadhānena maunena kāṣāyeṇa jaṭājinaiḥ |
viśvāsayitvā dveṣṭāramavalumpedyathā vṛkaḥ || 46 ||
[Analyze grammar]

putro vā yadi vā bhrātā pitā vā yadi vā suhṛt |
arthasya vighnaṃ kurvāṇā hantavyā bhūtivardhanāḥ || 47 ||
[Analyze grammar]

gurorapyavaliptasya kāryākāryamajānataḥ |
utpathapratipannasya daṇḍo bhavati śāsanam || 48 ||
[Analyze grammar]

pratyutthānābhivādābhyāṃ saṃpradānena kasyacit |
pratipuṣkalaghātī syāttīkṣṇatuṇḍa iva dvijaḥ || 49 ||
[Analyze grammar]

nācchittvā paramarmāṇi nākṛtvā karma dāruṇam |
nāhatvā matsyaghātīva prāpnoti paramāṃ śriyam || 50 ||
[Analyze grammar]

nāsti jātyā ripurnāma mitraṃ nāma na vidyate |
sāmarthyayogājjāyante mitrāṇi ripavastathā || 51 ||
[Analyze grammar]

amitraṃ naiva muñceta bruvantaṃ karuṇānyapi |
duḥkhaṃ tatra na kurvīta hanyātpūrvāpakāriṇam || 52 ||
[Analyze grammar]

saṃgrahānugrahe yatnaḥ sadā kāryo'nasūyatā |
nigrahaścāpi yatnena kartavyo bhūtimicchatā || 53 ||
[Analyze grammar]

prahariṣyanpriyaṃ brūyātprahṛtyāpi priyottaram |
api cāsya śiraśchittvā rudyācchocedathāpi vā || 54 ||
[Analyze grammar]

nimantrayeta sāntvena saṃmānena titikṣayā |
āśākāraṇamityetatkartavyaṃ bhūtimicchatā || 55 ||
[Analyze grammar]

na śuṣkavairaṃ kurvīta na bāhubhyāṃ nadīṃ taret |
apārthakamanāyuṣyaṃ goviṣāṇasya bhakṣaṇam |
dantāśca parighṛṣyante rasaścāpi na labhyate || 56 ||
[Analyze grammar]

trivarge trividhā pīḍānubandhāstraya eva ca |
anubandhavadhau jñātvā pīḍāṃ hi parivarjayet || 57 ||
[Analyze grammar]

ṛṇaśeṣo'gniśeṣaśca śatruśeṣastathaiva ca |
punaḥ punarvivardheta svalpo'pyanivāritaḥ || 58 ||
[Analyze grammar]

vardhamānamṛṇaṃ tiṣṭhatparibhūtāśca śatravaḥ |
āvahantyanayaṃ tīvraṃ vyādhayaścāpyupekṣitāḥ || 59 ||
[Analyze grammar]

nāsamyakkṛtakārī syādapramattaḥ sadā bhavet |
kaṇṭako'pi hi duśchinno vikāraṃ kurute ciram || 60 ||
[Analyze grammar]

vadhena ca manuṣyāṇāṃ mārgāṇāṃ dūṣaṇena ca |
ākarāṇāṃ vināśaiśca pararāṣṭraṃ vināśayet || 61 ||
[Analyze grammar]

gṛdhradṛṣṭirbakālīnaḥ śvaceṣṭaḥ siṃhavikramaḥ |
anudvignaḥ kākaśaṅkī bhujaṃgacaritaṃ caret || 62 ||
[Analyze grammar]

śreṇimukhyopajāpeṣu vallabhānunayeṣu ca |
amātyānparirakṣeta bhedasaṃghātayorapi || 63 ||
[Analyze grammar]

mṛdurityavamanyante tīkṣṇa ityudvijanti ca |
tīkṣṇakāle ca tīkṣṇaḥ syānmṛdukāle mṛdurbhavet || 64 ||
[Analyze grammar]

mṛdunā sumṛduṃ hanti mṛdunā hanti dāruṇam |
nāsādhyaṃ mṛdunā kiṃcittasmāttīkṣṇataraṃ mṛdu || 65 ||
[Analyze grammar]

kāle mṛduryo bhavati kāle bhavati dāruṇaḥ |
sa sādhayati kṛtyāni śatrūṃścaivādhitiṣṭhati || 66 ||
[Analyze grammar]

paṇḍitena viruddhaḥ sandūre'smīti na viśvaset |
dīrghau buddhimato bāhū yābhyāṃ hiṃsati hiṃsitaḥ || 67 ||
[Analyze grammar]

na tattaredyasya na pāramuttarenna taddharedyatpunarāharetparaḥ |
na tatkhanedyasya na mūlamutkhanenna taṃ hanyādyasya śiro na pātayet || 68 ||
[Analyze grammar]

itīdamuktaṃ vṛjinābhisaṃhitaṃ na caitadevaṃ puruṣaḥ samācaret |
paraprayuktaṃ tu kathaṃ niśāmayedato mayoktaṃ bhavato hitārthinā || 69 ||
[Analyze grammar]

yathāvaduktaṃ vacanaṃ hitaṃ tadā niśamya vipreṇa suvīrarāṣṭriyaḥ |
tathākarodvākyamadīnacetanaḥ śriyaṃ ca dīptāṃ bubhuje sabāndhavaḥ || 70 ||
[Analyze grammar]