Chapter 112

yudhiṣṭhira uvāca |
asaumyāḥ saumyarūpeṇa saumyāścāsaumyadarśinaḥ |
īdṛśānpuruṣāṃstāta kathaṃ vidyāmahe vayam || 1 ||
[Analyze grammar]

bhīṣma uvāca |
atrāpyudāharantīmamitihāsaṃ purātanam |
vyāghragomāyusaṃvādaṃ taṃ nibodha yudhiṣṭhira || 2 ||
[Analyze grammar]

purikāyāṃ puri purā śrīmatyāṃ pauriko nṛpaḥ |
parahiṃsāruciḥ krūro babhūva puruṣādhamaḥ || 3 ||
[Analyze grammar]

sa tvāyuṣi parikṣīṇe jagāmānīpsitāṃ gatim |
gomāyutvaṃ ca saṃprāpto dūṣitaḥ pūrvakarmaṇā || 4 ||
[Analyze grammar]

saṃsmṛtya pūrvajātiṃ sa nirvedaṃ paramaṃ gataḥ |
na bhakṣayati māṃsāni parairupahṛtānyapi || 5 ||
[Analyze grammar]

ahiṃsraḥ sarvabhūteṣu satyavāksudṛḍhavrataḥ |
cakāra ca yathākāmamāhāraṃ patitaiḥ phalaiḥ || 6 ||
[Analyze grammar]

śmaśāne tasya cāvāso gomāyoḥ saṃmato'bhavat |
janmabhūmyanurodhācca nānyadvāsamarocayat || 7 ||
[Analyze grammar]

tasya śaucamamṛṣyantaḥ sarve te sahajātayaḥ |
cālayanti sma tāṃ buddhiṃ vacanaiḥ praśrayottaraiḥ || 8 ||
[Analyze grammar]

vasanpitṛvane raudre śaucaṃ lapsitumicchasi |
iyaṃ vipratipattiste yadā tvaṃ piśitāśanaḥ || 9 ||
[Analyze grammar]

tatsamo vā bhavāsmābhirbhakṣyāndāsyāmahe vayam |
bhuṅkṣva śaucaṃ parityajya yaddhi bhuktaṃ tadasti te || 10 ||
[Analyze grammar]

iti teṣāṃ vacaḥ śrutvā pratyuvāca samāhitaḥ |
madhuraiḥ praśritairvākyairhetumadbhiraniṣṭhuraiḥ || 11 ||
[Analyze grammar]

apramāṇaṃ prasūtirme śīlataḥ kriyate kulam |
prārthayiṣye tu tatkarma yena vistīryate yaśaḥ || 12 ||
[Analyze grammar]

śmaśāne yadi vāso me samādhirme niśāmyatām |
ātmā phalati karmāṇi nāśramo dharmalakṣaṇam || 13 ||
[Analyze grammar]

āśrame yo dvijaṃ hanyādgāṃ vā dadyādanāśrame |
kiṃ nu tatpātakaṃ na syāttadvā dattaṃ vṛthā bhavet || 14 ||
[Analyze grammar]

bhavantaḥ sarvalobhena kevalaṃ bhakṣaṇe ratāḥ |
anubandhe tu ye doṣāstānna paśyanti mohitāḥ || 15 ||
[Analyze grammar]

apratyayakṛtāṃ garhyāmarthāpanayadūṣitām |
iha cāmutra cāniṣṭāṃ tasmādvṛttiṃ na rocaye || 16 ||
[Analyze grammar]

taṃ śuciṃ paṇḍitaṃ matvā śārdūlaḥ khyātavikramaḥ |
kṛtvātmasadṛśāṃ pūjāṃ sācivye'vardhayatsvayam || 17 ||
[Analyze grammar]

saumya vijñātarūpastvaṃ gaccha yātrāṃ mayā saha |
vriyantāmīpsitā bhogāḥ parihāryāśca puṣkalāḥ || 18 ||
[Analyze grammar]

tīkṣṇā vayamiti khyātā bhavato jñāpayāmahe |
mṛdupūrvaṃ ghātinaste śreyaścādhigamiṣyati || 19 ||
[Analyze grammar]

atha saṃpūjya tadvākyaṃ mṛgendrasya mahātmanaḥ |
gomāyuḥ praśritaṃ vākyaṃ babhāṣe kiṃcidānataḥ || 20 ||
[Analyze grammar]

sadṛśaṃ mṛgarājaitattava vākyaṃ madantare |
yatsahāyānmṛgayase dharmārthakuśalāñśucīn || 21 ||
[Analyze grammar]

na śakyamanamātyena mahattvamanuśāsitum |
duṣṭāmātyena vā vīra śarīraparipanthinā || 22 ||
[Analyze grammar]

sahāyānanuraktāṃstu yatetānupasaṃhitān |
parasparamasaṃghuṣṭānvijigīṣūnalolupān || 23 ||
[Analyze grammar]

tānatītopadhānprājñānhite yuktānmanasvinaḥ |
pūjayethā mahābhāgānyathācāryānyathā pitṝn || 24 ||
[Analyze grammar]

na tvevaṃ mama saṃtoṣādrocate'nyanmṛgādhipa |
na kāmaye sukhānbhogānaiśvaryaṃ vā tvadāśrayam || 25 ||
[Analyze grammar]

na yokṣyati hi me śīlaṃ tava bhṛtyaiḥ purātanaiḥ |
te tvāṃ vibhedayiṣyanti duḥkhaśīlā madantare || 26 ||
[Analyze grammar]

saṃśrayaḥ ślāghanīyastvamanyeṣāmapi bhāsvatām |
kṛtātmā sumahābhāgaḥ pāpakeṣvapyadāruṇaḥ || 27 ||
[Analyze grammar]

dīrghadarśī mahotsāhaḥ sthūlalakṣyo mahābalaḥ |
kṛtī cāmoghakartāsi bhāvyaiśca samalaṃkṛtaḥ || 28 ||
[Analyze grammar]

kiṃ tu svenāsmi saṃtuṣṭo duḥkhā vṛttiranuṣṭhitā |
sevāyāścāpi nābhijñaḥ svacchandena vanecaraḥ || 29 ||
[Analyze grammar]

rājopakrośadoṣāśca sarve saṃśrayavāsinām |
vanacaryā ca niḥsaṅgā nirbhayā niravagrahā || 30 ||
[Analyze grammar]

nṛpeṇāhūyamānasya yattiṣṭhati bhayaṃ hṛdi |
na tattiṣṭhati tuṣṭānāṃ vane mūlaphalāśinām || 31 ||
[Analyze grammar]

pānīyaṃ vā nirāyāsaṃ svādvannaṃ vā bhayottaram |
vicārya khalu paśyāmi tatsukhaṃ yatra nirvṛtiḥ || 32 ||
[Analyze grammar]

aparādhairna tāvanto bhṛtyāḥ śiṣṭā narādhipaiḥ |
upaghātairyathā bhṛtyā dūṣitā nidhanaṃ gatāḥ || 33 ||
[Analyze grammar]

yadi tvetanmayā kāryaṃ mṛgendro yadi manyate |
samayaṃ kṛtamicchāmi vartitavyaṃ yathā mayi || 34 ||
[Analyze grammar]

madīyā mānanīyāste śrotavyaṃ ca hitaṃ vacaḥ |
kalpitā yā ca te vṛttiḥ sā bhavettava susthirā || 35 ||
[Analyze grammar]

na mantrayeyamanyaiste sacivaiḥ saha karhicit |
nītimantaḥ parīpsanto vṛthā brūyuḥ pare mayi || 36 ||
[Analyze grammar]

eka ekena saṃgamya raho brūyāṃ hitaṃ tava |
na ca te jñātikāryeṣu praṣṭavyo'haṃ hitāhite || 37 ||
[Analyze grammar]

mayā saṃmantrya paścācca na hiṃsyāḥ sacivāstvayā |
madīyānāṃ ca kupito mā tvaṃ daṇḍaṃ nipātayeḥ || 38 ||
[Analyze grammar]

evamastviti tenāsau mṛgendreṇābhipūjitaḥ |
prāptavānmatisācivyaṃ gomāyurvyāghrayonitaḥ || 39 ||
[Analyze grammar]

taṃ tathā satkṛtaṃ dṛṣṭvā yujyamānaṃ ca karmaṇi |
prādviṣankṛtasaṃghātāḥ pūrvabhṛtyā muhurmuhuḥ || 40 ||
[Analyze grammar]

mitrabuddhyā ca gomāyuṃ sāntvayitvā praveśya ca |
doṣeṣu samatāṃ netumaicchannaśubhabuddhayaḥ || 41 ||
[Analyze grammar]

anyathā hyucitāḥ pūrvaṃ paradravyāpahāriṇaḥ |
aśaktāḥ kiṃcidādātuṃ dravyaṃ gomāyuyantritāḥ || 42 ||
[Analyze grammar]

vyutthānaṃ cātra kāṅkṣadbhiḥ kathābhiḥ pravilobhyate |
dhanena mahatā caiva buddhirasya vilobhyate || 43 ||
[Analyze grammar]

na cāpi sa mahāprājñastasmāddhairyāccacāla ha |
athāsya samayaṃ kṛtvā vināśāya sthitāḥ pare || 44 ||
[Analyze grammar]

īpsitaṃ ca mṛgendrasya māṃsaṃ yattatra saṃskṛtam |
apanīya svayaṃ taddhi tairnyastaṃ tasya veśmani || 45 ||
[Analyze grammar]

yadarthaṃ cāpyapahṛtaṃ yena yaccaiva mantritam |
tasya tadviditaṃ sarvaṃ kāraṇārthaṃ ca marṣitam || 46 ||
[Analyze grammar]

samayo'yaṃ kṛtastena sācivyamupagacchatā |
nopaghātastvayā grāhyo rājanmaitrīmihecchatā || 47 ||
[Analyze grammar]

bhojane copahartavye tanmāṃsaṃ na sma dṛśyate |
mṛgarājena cājñaptaṃ mṛgyatāṃ cora ityuta || 48 ||
[Analyze grammar]

kṛtakaiścāpi tanmāṃsaṃ mṛgendrāyopavarṇitam |
sacivenopanītaṃ te viduṣā prājñamāninā || 49 ||
[Analyze grammar]

saroṣastvatha śārdūlaḥ śrutvā gomāyucāpalam |
babhūvāmarṣito rājā vadhaṃ cāsyābhyarocayat || 50 ||
[Analyze grammar]

chidraṃ tu tasya taddṛṣṭvā procuste pūrvamantriṇaḥ |
sarveṣāmeva so'smākaṃ vṛttibhaṅgeṣu vartate || 51 ||
[Analyze grammar]

idaṃ cāsyedṛśaṃ karma vāllabhyena tu rakṣyate |
śrutaśca svāminā pūrvaṃ yādṛśo naiṣa tādṛśaḥ || 52 ||
[Analyze grammar]

vāṅmātreṇaiva dharmiṣṭhaḥ svabhāvena tu dāruṇaḥ |
dharmacchadmā hyayaṃ pāpo vṛthācāraparigrahaḥ |
kāryārthaṃ bhojanārtheṣu vrateṣu kṛtavāñśramam || 53 ||
[Analyze grammar]

māṃsāpanayanaṃ jñātvā vyāghrasteṣāṃ tu tadvacaḥ |
ājñāpayāmāsa tadā gomāyurvadhyatāmiti || 54 ||
[Analyze grammar]

śārdūlavacanaṃ śrutvā śārdūlajananī tataḥ |
mṛgarājaṃ hitairvākyaiḥ saṃbodhayitumāgamat || 55 ||
[Analyze grammar]

putra naitattvayā grāhyaṃ kapaṭārambhasaṃvṛtam |
karmasaṃgharṣajairdoṣairduṣyatyaśucibhiḥ śuciḥ || 56 ||
[Analyze grammar]

nocchritaṃ sahate kaścitprakriyā vairakārikā |
śucerapi hi yuktasya doṣa eva nipātyate || 57 ||
[Analyze grammar]

lubdhānāṃ śucayo dveṣyāḥ kātarāṇāṃ tarasvinaḥ |
mūrkhāṇāṃ paṇḍitā dveṣyā daridrāṇāṃ mahādhanāḥ |
adhārmikāṇāṃ dharmiṣṭhā virūpāṇāṃ surūpakāḥ || 58 ||
[Analyze grammar]

bahavaḥ paṇḍitā lubdhāḥ sarve māyopajīvinaḥ |
kuryurdoṣamadoṣasya bṛhaspatimaterapi || 59 ||
[Analyze grammar]

śūnyāttacca gṛhānmāṃsaṃ yadadyāpahṛtaṃ tava |
necchate dīyamānaṃ ca sādhu tāvadvimṛśyatām || 60 ||
[Analyze grammar]

asatyāḥ satyasaṃkāśāḥ satyāścāsatyadarśinaḥ |
dṛśyante vividhā bhāvāsteṣu yuktaṃ parīkṣaṇam || 61 ||
[Analyze grammar]

talavaddṛśyate vyoma khadyoto havyavāḍiva |
na caivāsti talaṃ vyomni na khadyote hutāśanaḥ || 62 ||
[Analyze grammar]

tasmātpratyakṣadṛṣṭo'pi yuktamarthaḥ parīkṣitum |
parīkṣya jñāpayanhyarthānna paścātparitapyate || 63 ||
[Analyze grammar]

na duṣkaramidaṃ putra yatprabhurghātayetparam |
ślāghanīyā ca varyā ca loke prabhavatāṃ kṣamā || 64 ||
[Analyze grammar]

sthāpito'yaṃ putra tvayā sāmanteṣvadhi viśrutaḥ |
duḥkhenāsādyate pātraṃ dhāryatāmeṣa te suhṛt || 65 ||
[Analyze grammar]

dūṣitaṃ paradoṣairhi gṛhṇīte yo'nyathā śucim |
svayaṃ saṃdūṣitāmātyaḥ kṣiprameva vinaśyati || 66 ||
[Analyze grammar]

tasmādathārisaṃghātādgomāyoḥ kaścidāgataḥ |
dharmātmā tena cākhyātaṃ yathaitatkapaṭaṃ kṛtam || 67 ||
[Analyze grammar]

tato vijñātacāritraḥ satkṛtya sa vimokṣitaḥ |
pariṣvaktaśca sasnehaṃ mṛgendreṇa punaḥ punaḥ || 68 ||
[Analyze grammar]

anujñāpya mṛgendraṃ tu gomāyurnītiśāstravit |
tenāmarṣeṇa saṃtaptaḥ prāyamāsitumaicchata || 69 ||
[Analyze grammar]

śārdūlastatra gomāyuṃ snehātprasrutalocanaḥ |
avārayatsa dharmiṣṭhaṃ pūjayā pratipūjayan || 70 ||
[Analyze grammar]

taṃ sa gomāyurālokya snehādāgatasaṃbhramam |
babhāṣe praṇato vākyaṃ bāṣpagadgadayā girā || 71 ||
[Analyze grammar]

pūjito'haṃ tvayā pūrvaṃ paścāccaiva vimānitaḥ |
pareṣāmāspadaṃ nīto vastuṃ nārhāmyahaṃ tvayi || 72 ||
[Analyze grammar]

svasaṃtuṣṭāścyutāḥ sthānānmānātpratyavaropitāḥ |
svayaṃ copahṛtā bhṛtyā ye cāpyupahṛtāḥ paraiḥ || 73 ||
[Analyze grammar]

parikṣīṇāśca lubdhāśca krūrāḥ kārābhitāpitāḥ |
hṛtasvā mānino ye ca tyaktopāttā mahepsavaḥ || 74 ||
[Analyze grammar]

saṃtāpitāśca ye kecidvyasanaughapratīkṣiṇaḥ |
antarhitāḥ sopahitāḥ sarve te parasādhanāḥ || 75 ||
[Analyze grammar]

avamānena yuktasya sthāpitasya ca me punaḥ |
kathaṃ yāsyasi viśvāsamahameṣyāmi vā punaḥ || 76 ||
[Analyze grammar]

samartha iti saṃgṛhya sthāpayitvā parīkṣya ca |
kṛtaṃ ca samayaṃ bhittvā tvayāhamavamānitaḥ || 77 ||
[Analyze grammar]

prathamaṃ yaḥ samākhyātaḥ śīlavāniti saṃsadi |
na vācyaṃ tasya vaiguṇyaṃ pratijñāṃ parirakṣatā || 78 ||
[Analyze grammar]

evaṃ cāvamatasyeha viśvāsaṃ kiṃ prayāsyasi |
tvayi caiva hyaviśvāse mamodvego bhaviṣyati || 79 ||
[Analyze grammar]

śaṅkitastvamahaṃ bhītaḥ pare chidrānudarśinaḥ |
asnigdhāścaiva dustoṣāḥ karma caitadbahucchalam || 80 ||
[Analyze grammar]

duḥkhena śleṣyate bhinnaṃ śliṣṭaṃ duḥkhena bhidyate |
bhinnaśliṣṭā tu yā prītirna sā snehena vartate || 81 ||
[Analyze grammar]

kaścideva hi bhītastu dṛśyate na parātmanoḥ |
kāryāpekṣā hi vartante bhāvāḥ snigdhāstu durlabhāḥ || 82 ||
[Analyze grammar]

suduḥkhaṃ puruṣajñānaṃ cittaṃ hyeṣāṃ calācalam |
samartho vāpyaśakto vā śateṣveko'dhigamyate || 83 ||
[Analyze grammar]

akasmātprakriyā nṝṇāmakasmāccāpakarṣaṇam |
śubhāśubhe mahattvaṃ ca prakartuṃ buddhilāghavāt || 84 ||
[Analyze grammar]

evaṃ bahuvidhaṃ sāntvamuktvā dharmārthahetumat |
prasādayitvā rājānaṃ gomāyurvanamabhyagāt || 85 ||
[Analyze grammar]

agṛhyānunayaṃ tasya mṛgendrasya sa buddhimān |
gomāyuḥ prāyamāsīnastyaktvā dehaṃ divaṃ yayau || 86 ||
[Analyze grammar]