Chapter 101

yudhiṣṭhira uvāca |
yathā jayārthinaḥ senāṃ nayanti bharatarṣabha |
īṣaddharmaṃ prapīḍyāpi tanme brūhi pitāmaha || 1 ||
[Analyze grammar]

bhīṣma uvāca |
satyena hi sthitā dharmā upapattyā tathāpare |
sādhvācāratayā kecittathaivaupayikā api |
upāyadharmānvakṣyāmi siddhārthānarthadharmayoḥ || 2 ||
[Analyze grammar]

nirmaryādā dasyavastu bhavanti paripanthinaḥ |
teṣāṃ prativighātārthaṃ pravakṣyāmyatha naigamam |
kāryāṇāṃ saṃprasiddhyarthaṃ tānupāyānnibodha me || 3 ||
[Analyze grammar]

ubhe prajñe veditavye ṛjvī vakrā ca bhārata |
jānanvakrāṃ na seveta pratibādheta cāgatām || 4 ||
[Analyze grammar]

amitrā eva rājānaṃ bhedenopacarantyuta |
tāṃ rājā nikṛtiṃ jānanyathāmitrānprabādhate || 5 ||
[Analyze grammar]

gajānāṃ pārśvacarmāṇi govṛṣājagarāṇi ca |
śalyakaṅkaṭalohāni tanutrāṇi matāni ca || 6 ||
[Analyze grammar]

śitapītāni śastrāṇi saṃnāhāḥ pītalohitāḥ |
nānārañjanaraktāḥ syuḥ patākāḥ ketavaśca te || 7 ||
[Analyze grammar]

ṛṣṭayastomarāḥ khaḍgā niśitāśca paraśvadhāḥ |
phalakānyatha carmāṇi pratikalpyānyanekaśaḥ |
abhinītāni śastrāṇi yodhāśca kṛtaniśramāḥ || 8 ||
[Analyze grammar]

caitryāṃ vā mārgaśīrṣyāṃ vā senāyogaḥ praśasyate |
pakvasasyā hi pṛthivī bhavatyambumatī tathā || 9 ||
[Analyze grammar]

naivātiśīto nātyuṣṇaḥ kālo bhavati bhārata |
tasmāttadā yojayeta pareṣāṃ vyasaneṣu vā |
eteṣu yogāḥ senāyāḥ praśastāḥ parabādhane || 10 ||
[Analyze grammar]

jalavāṃstṛṇavānmārgaḥ samo gamyaḥ praśasyate |
cārairhi vihitābhyāsaḥ kuśalairvanagocaraiḥ || 11 ||
[Analyze grammar]

navyāraṇyairna śakyeta gantuṃ mṛgagaṇairiva |
tasmātsarvāsu senāsu yojayanti jayārthinaḥ || 12 ||
[Analyze grammar]

āvāsastoyavāndurgaḥ paryākāśaḥ praśasyate |
pareṣāmupasarpāṇāṃ pratiṣedhastathā bhavet || 13 ||
[Analyze grammar]

ākāśaṃ tu vanābhyāśe manyante guṇavattaram |
bahubhirguṇajātaistu ye yuddhakuśalā janāḥ || 14 ||
[Analyze grammar]

upanyāso'pasarpāṇāṃ padātīnāṃ ca gūhanam |
atha śatrupratīghātamāpadarthaṃ parāyaṇam || 15 ||
[Analyze grammar]

saptarṣīnpṛṣṭhataḥ kṛtvā yudhyerannacalā iva |
anena vidhinā rājañjigīṣetāpi durjayān || 16 ||
[Analyze grammar]

yato vāyuryataḥ sūryo yataḥ śukrastato jayaḥ |
pūrvaṃ pūrvaṃ jyāya eṣāṃ saṃnipāte yudhiṣṭhira || 17 ||
[Analyze grammar]

akardamāmanudakāmamaryādāmaloṣṭakām |
aśvabhūmiṃ praśaṃsanti ye yuddhakuśalā janāḥ || 18 ||
[Analyze grammar]

samā nirudakākāśā rathabhūmiḥ praśasyate |
nīcadrumā mahākakṣā sodakā hastiyodhinām || 19 ||
[Analyze grammar]

bahudurgā mahāvṛkṣā vetraveṇubhirāstṛtā |
padātīnāṃ kṣamā bhūmiḥ parvatopavanāni ca || 20 ||
[Analyze grammar]

padātibahulā senā dṛḍhā bhavati bhārata |
rathāśvabahulā senā sudineṣu praśasyate || 21 ||
[Analyze grammar]

padātināgabahulā prāvṛṭkāle praśasyate |
guṇānetānprasaṃkhyāya deśakālau prayojayet || 22 ||
[Analyze grammar]

evaṃ saṃcintya yo yāti tithinakṣatrapūjitaḥ |
vijayaṃ labhate nityaṃ senāṃ samyakprayojayan || 23 ||
[Analyze grammar]

prasuptāṃstṛṣitāñśrāntānprakīrṇānnābhighātayet |
mokṣe prayāṇe calane pānabhojanakālayoḥ || 24 ||
[Analyze grammar]

atikṣiptānvyatikṣiptānvihatānpratanūkṛtān |
suvisrambhānkṛtārambhānupanyāsapratāpitān |
bahiścarānupanyāsānkṛtvā veśmānusāriṇaḥ || 25 ||
[Analyze grammar]

pāraṃparyāgate dvāre ye kecidanuvartinaḥ |
paricaryāvaroddhāro ye ca kecana valginaḥ || 26 ||
[Analyze grammar]

anīkaṃ ye prabhindanti bhinnaṃ ye sthagayanti ca |
samānāśanapānāste kāryā dviguṇavetanāḥ || 27 ||
[Analyze grammar]

daśādhipatayaḥ kāryāḥ śatādhipatayastathā |
teṣāṃ sahasrādhipatiṃ kuryācchūramatandritam || 28 ||
[Analyze grammar]

yathāmukhyaṃ saṃnipātya vaktavyāḥ sma śapāmahe |
yathā jayārthaṃ saṃgrāme na jahyāma parasparam || 29 ||
[Analyze grammar]

ihaiva te nivartantāṃ ye naḥ kecana bhīravaḥ |
na ghātayeyuḥ pradaraṃ kurvāṇāstumule sati || 30 ||
[Analyze grammar]

ātmānaṃ ca svapakṣaṃ ca palāyanhanti saṃyuge |
dravyanāśo vadho'kīrtirayaśaśca palāyane || 31 ||
[Analyze grammar]

amanojñāsukhā vācaḥ puruṣasya palāyataḥ |
pratispandauṣṭhadantasya nyastasarvāyudhasya ca || 32 ||
[Analyze grammar]

hitvā palāyamānasya sahāyānprāṇasaṃśaye |
amitrairanubaddhasya dviṣatāmastu nastathā || 33 ||
[Analyze grammar]

manuṣyāpasadā hyete ye bhavanti parāṅmukhāḥ |
rāśivardhanamātrāste naiva te pretya no iha || 34 ||
[Analyze grammar]

amitrā hṛṣṭamanasaḥ pratyudyānti palāyinam |
jayinaṃ suhṛdastāta vandanairmaṅgalena ca || 35 ||
[Analyze grammar]

yasya sma vyasane rājannanumodanti śatravaḥ |
tadasahyataraṃ duḥkhamahaṃ manye vadhādapi || 36 ||
[Analyze grammar]

śriyaṃ jānīta dharmasya mūlaṃ sarvasukhasya ca |
sā bhīrūṇāṃ parānyāti śūrastāmadhigacchati || 37 ||
[Analyze grammar]

te vayaṃ svargamicchantaḥ saṃgrāme tyaktajīvitāḥ |
jayanto vadhyamānā vā prāptumarhāma sadgatim || 38 ||
[Analyze grammar]

evaṃ saṃśaptaśapathāḥ samabhityaktajīvitāḥ |
amitravāhinīṃ vīrāḥ saṃpragāhantyabhīravaḥ || 39 ||
[Analyze grammar]

agrataḥ puruṣānīkamasicarmavatāṃ bhavet |
pṛṣṭhataḥ śakaṭānīkaṃ kalatraṃ madhyatastathā || 40 ||
[Analyze grammar]

pareṣāṃ pratighātārthaṃ padātīnāṃ ca gūhanam |
api hyasminpare gṛddhā bhaveyurye purogamāḥ || 41 ||
[Analyze grammar]

ye purastādabhimatāḥ sattvavanto manasvinaḥ |
te pūrvamabhivarteraṃstānanvagitare janāḥ || 42 ||
[Analyze grammar]

api coddharṣaṇaṃ kāryaṃ bhīrūṇāmapi yatnataḥ |
skandhadarśanamātraṃ tu tiṣṭheyurvā samīpataḥ || 43 ||
[Analyze grammar]

saṃhatānyodhayedalpānkāmaṃ vistārayedbahūn |
sūcīmukhamanīkaṃ syādalpānāṃ bahubhiḥ saha || 44 ||
[Analyze grammar]

saṃprayuddhe prahṛṣṭe vā satyaṃ vā yadi vānṛtam |
pragṛhya bāhūnkrośeta bhagnā bhagnāḥ parā iti || 45 ||
[Analyze grammar]

āgataṃ no mitrabalaṃ praharadhvamabhītavat |
śabdavanto'nudhāveyuḥ kurvanto bhairavaṃ ravam || 46 ||
[Analyze grammar]

kṣveḍāḥ kilakilāḥ śaṅkhāḥ krakacā goviṣāṇikān |
bherīmṛdaṅgapaṇavānnādayeyuśca kuñjarān || 47 ||
[Analyze grammar]