Chapter 99

yudhiṣṭhira uvāca |
ke lokā yudhyamānānāṃ śūrāṇāmanivartinām |
bhavanti nidhanaṃ prāpya tanme brūhi pitāmaha || 1 ||
[Analyze grammar]

bhīṣma uvāca |
atrāpyudāharantīmamitihāsaṃ purātanam |
ambarīṣasya saṃvādamindrasya ca yudhiṣṭhira || 2 ||
[Analyze grammar]

ambarīṣo hi nābhāgaḥ svargaṃ gatvā sudurlabham |
dadarśa suralokasthaṃ śakreṇa sacivaṃ saha || 3 ||
[Analyze grammar]

sarvatejomayaṃ divyaṃ vimānavaramāsthitam |
uparyupari gacchantaṃ svaṃ vai senāpatiṃ prabhum || 4 ||
[Analyze grammar]

sa dṛṣṭvopari gacchantaṃ senāpatimudāradhīḥ |
ṛddhiṃ dṛṣṭvā sudevasya vismitaḥ prāha vāsavam || 5 ||
[Analyze grammar]

sāgarāntāṃ mahīṃ kṛtsnāmanuśiṣya yathāvidhi |
cāturvarṇye yathāśāstraṃ pravṛtto dharmakāmyayā || 6 ||
[Analyze grammar]

brahmacaryeṇa ghoreṇa ācāryakulasevayā |
vedānadhītya dharmeṇa rājaśāstraṃ ca kevalam || 7 ||
[Analyze grammar]

atithīnannapānena pitṝṃśca svadhayā tathā |
ṛṣīnsvādhyāyadīkṣābhirdevānyajñairanuttamaiḥ || 8 ||
[Analyze grammar]

kṣatradharme sthito bhūtvā yathāśāstraṃ yathāvidhi |
udīkṣamāṇaḥ pṛtanāṃ jayāmi yudhi vāsava || 9 ||
[Analyze grammar]

devarāja sudevo'yaṃ mama senāpatiḥ purā |
āsīdyodhaḥ praśāntātmā so'yaṃ kasmādatīva mām || 10 ||
[Analyze grammar]

nānena kratubhirmukhyairiṣṭaṃ naiva dvijātayaḥ |
tarpitā vidhivacchakra so'yaṃ kasmādatīva mām || 11 ||
[Analyze grammar]

indra uvāca |
etasya vitatastāta sudevasya babhūva ha |
saṃgrāmayajñaḥ sumahānyaścānyo yudhyate naraḥ || 12 ||
[Analyze grammar]

saṃnaddho dīkṣitaḥ sarvo yodhaḥ prāpya camūmukham |
yuddhayajñādhikārastho bhavatīti viniścayaḥ || 13 ||
[Analyze grammar]

ambarīṣa uvāca |
kāni yajñe havīṃṣyatra kimājyaṃ kā ca dakṣiṇā |
ṛtvijaścātra ke proktāstanme brūhi śatakrato || 14 ||
[Analyze grammar]

indra uvāca |
ṛtvijaḥ kuñjarāstatra vājino'dhvaryavastathā |
havīṃṣi paramāṃsāni rudhiraṃ tvājyameva ca || 15 ||
[Analyze grammar]

sṛgālagṛdhrakākolāḥ sadasyāstatra satriṇaḥ |
ājyaśeṣaṃ pibantyete haviḥ prāśnanti cādhvare || 16 ||
[Analyze grammar]

prāsatomarasaṃghātāḥ khaḍgaśaktiparaśvadhāḥ |
jvalanto niśitāḥ pītāḥ srucastasyātha satriṇaḥ || 17 ||
[Analyze grammar]

cāpavegāyatastīkṣṇaḥ parakāyāvadāraṇaḥ |
ṛjuḥ suniśitaḥ pītaḥ sāyako'sya sruvo mahān || 18 ||
[Analyze grammar]

dvīpicarmāvanaddhaśca nāgadantakṛtatsaruḥ |
hastihastagataḥ khaḍgaḥ sphyo bhavettasya saṃyuge || 19 ||
[Analyze grammar]

jvalitairniśitaiḥ pītaiḥ prāsaśaktiparaśvadhaiḥ |
śaikyāyasamayaistīkṣṇairabhighāto bhavedvasu || 20 ||
[Analyze grammar]

āvegādyattu rudhiraṃ saṃgrāme syandate bhuvi |
sāsya pūrṇāhutirhotre samṛddhā sarvakāmadhuk || 21 ||
[Analyze grammar]

chindhi bhindhīti yasyaitacchrūyate vāhinīmukhe |
sāmāni sāmagāstasya gāyanti yamasādane || 22 ||
[Analyze grammar]

havirdhānaṃ tu tasyāhuḥ pareṣāṃ vāhinīmukham |
kuñjarāṇāṃ hayānāṃ ca varmiṇāṃ ca samuccayaḥ |
agniḥ śyenacito nāma tasya yajñe vidhīyate || 23 ||
[Analyze grammar]

uttiṣṭhati kabandho'tra sahasre nihate tu yaḥ |
sa yūpastasya śūrasya khādiro'ṣṭāśrirucyate || 24 ||
[Analyze grammar]

iḍopahūtaṃ krośanti kuñjarā aṅkuśeritāḥ |
vyāghuṣṭatalanādena vaṣaṭkāreṇa pārthiva |
udgātā tatra saṃgrāme trisāmā dundubhiḥ smṛtaḥ || 25 ||
[Analyze grammar]

brahmasve hriyamāṇe yaḥ priyāṃ yuddhe tanuṃ tyajet |
ātmānaṃ yūpamucchritya sa yajño'nantadakṣiṇaḥ || 26 ||
[Analyze grammar]

bharturarthe tu yaḥ śūro vikramedvāhinīmukhe |
bhayānna ca nivarteta tasya lokā yathā mama || 27 ||
[Analyze grammar]

nīlacandrākṛtaiḥ khaḍgairbāhubhiḥ parighopamaiḥ |
yasya vedirupastīrṇā tasya lokā yathā mama || 28 ||
[Analyze grammar]

yastu nāvekṣate kaṃcitsahāyaṃ vijaye sthitaḥ |
vigāhya vāhinīmadhyaṃ tasya lokā yathā mama || 29 ||
[Analyze grammar]

yasya tomarasaṃghāṭā bherīmaṇḍūkakacchapā |
vīrāsthiśarkarā durgā māṃsaśoṇitakardamā || 30 ||
[Analyze grammar]

asicarmaplavā sindhuḥ keśaśaivalaśādvalā |
aśvanāgarathaiścaiva saṃbhinnaiḥ kṛtasaṃkramā || 31 ||
[Analyze grammar]

patākādhvajavānīrā hatavāhanavāhinī |
śoṇitodā susaṃpūrṇā dustarā pāragairnaraiḥ || 32 ||
[Analyze grammar]

hatanāgamahānakrā paralokavahāśivā |
ṛṣṭikhaḍgadhvajānūkā gṛdhrakaṅkavaḍaplavā || 33 ||
[Analyze grammar]

puruṣādānucaritā bhīrūṇāṃ kaśmalāvahā |
nadī yodhamahāyajñe tadasyāvabhṛthaṃ smṛtam || 34 ||
[Analyze grammar]

vedī yasya tvamitrāṇāṃ śirobhiravakīryate |
aśvaskandhairgajaskandhaistasya lokā yathā mama || 35 ||
[Analyze grammar]

patnīśālā kṛtā yasya pareṣāṃ vāhinīmukham |
havirdhānaṃ svavāhinyastadasyāhurmanīṣiṇaḥ || 36 ||
[Analyze grammar]

sadaścāntarayodhāgnirāgnīdhraścottarāṃ diśam |
śatrusenākalatrasya sarvalokānadūrataḥ || 37 ||
[Analyze grammar]

yadā tūbhayato vyūho bhavatyākāśamagrataḥ |
sāsya vedī tathā yajñe nityaṃ vedāstrayo'gnayaḥ || 38 ||
[Analyze grammar]

yastu yodhaḥ parāvṛttaḥ saṃtrasto hanyate paraiḥ |
apratiṣṭhaṃ sa narakaṃ yāti nāstyatra saṃśayaḥ || 39 ||
[Analyze grammar]

yasya śoṇitavegena nadī syātsamabhiplutā |
keśamāṃsāsthisaṃkīrṇā sa gacchetparamāṃ gatim || 40 ||
[Analyze grammar]

yastu senāpatiṃ hatvā tadyānamadhirohati |
sa viṣṇuvikramakrāmī bṛhaspatisamaḥ kratuḥ || 41 ||
[Analyze grammar]

nāyakaṃ vā pramāṇaṃ vā yo vā syāttatra pūjitaḥ |
jīvagrāhaṃ nigṛhṇāti tasya lokā yathā mama || 42 ||
[Analyze grammar]

āhave nihataṃ śūraṃ na śoceta kadācana |
aśocyo hi hataḥ śūraḥ svargaloke mahīyate || 43 ||
[Analyze grammar]

na hyannaṃ nodakaṃ tasya na snānaṃ nāpyaśaucakam |
hatasya kartumicchanti tasya lokāñśṛṇuṣva me || 44 ||
[Analyze grammar]

varāpsaraḥsahasrāṇi śūramāyodhane hatam |
tvaramāṇā hi dhāvanti mama bhartā bhavediti || 45 ||
[Analyze grammar]

etattapaśca puṇyaṃ ca dharmaścaiva sanātanaḥ |
catvāraścāśramāstasya yo yuddhe na palāyate || 46 ||
[Analyze grammar]

vṛddhaṃ balaṃ na hantavyaṃ naiva strī na ca vai dvijaḥ |
tṛṇapūrṇamukhaścaiva tavāsmīti ca yo vadet || 47 ||
[Analyze grammar]

ahaṃ vṛtraṃ balaṃ pākaṃ śatamāyaṃ virocanam |
durāvāryaṃ ca namuciṃ naikamāyaṃ ca śambaram || 48 ||
[Analyze grammar]

vipracittiṃ ca daiteyaṃ danoḥ putrāṃśca sarvaśaḥ |
prahrādaṃ ca nihatyājau tato devādhipo'bhavam || 49 ||
[Analyze grammar]

bhīṣma uvāca |
ityetacchakravacanaṃ niśamya pratigṛhya ca |
yodhānāmātmanaḥ siddhimambarīṣo'bhipannavān || 50 ||
[Analyze grammar]