Chapter 86

yudhiṣṭhira uvāca |
kathaṃ svidiha rājendra pālayanpārthivaḥ prajāḥ |
prati dharmaṃ viśeṣeṇa kīrtimāpnoti śāśvatīm || 1 ||
[Analyze grammar]

bhīṣma uvāca |
vyavahāreṇa śuddhena prajāpālanatatparaḥ |
prāpya dharmaṃ ca kīrtiṃ ca lokāvāpnotyubhau śuciḥ || 2 ||
[Analyze grammar]

yudhiṣṭhira uvāca |
kīdṛśaṃ vyavahāraṃ tu kaiśca vyavaharennṛpaḥ |
etatpṛṣṭo mahāprājña yathāvadvaktumarhasi || 3 ||
[Analyze grammar]

ye caite pūrvakathitā guṇāste puruṣaṃ prati |
naikasminpuruṣe hyete vidyanta iti me matiḥ || 4 ||
[Analyze grammar]

bhīṣma uvāca |
evametanmahāprājña yathā vadasi buddhimān |
durlabhaḥ puruṣaḥ kaścidebhirguṇaguṇairyutaḥ || 5 ||
[Analyze grammar]

kiṃ tu saṃkṣepataḥ śīlaṃ prayatne neha durlabham |
vakṣyāmi tu yathāmātyānyādṛśāṃśca kariṣyasi || 6 ||
[Analyze grammar]

caturo brāhmaṇānvaidyānpragalbhānsāttvikāñśucīn |
trīṃśca śūdrānvinītāṃśca śucīnkarmaṇi pūrvake || 7 ||
[Analyze grammar]

aṣṭābhiśca guṇairyuktaṃ sūtaṃ paurāṇikaṃ caret |
pañcāśadvarṣavayasaṃ pragalbhamanasūyakam || 8 ||
[Analyze grammar]

matismṛtisamāyuktaṃ vinītaṃ samadarśanam |
kārye vivadamānānāṃ śaktamartheṣvalolupam || 9 ||
[Analyze grammar]

vivarjitānāṃ vyasanaiḥ sughoraiḥ saptabhirbhṛśam |
aṣṭānāṃ mantriṇāṃ madhye mantraṃ rājopadhārayet || 10 ||
[Analyze grammar]

tataḥ saṃpreṣayedrāṣṭre rāṣṭrāyātha ca darśayet |
anena vyavahāreṇa draṣṭavyāste prajāḥ sadā || 11 ||
[Analyze grammar]

na cāpi gūḍhaṃ kāryaṃ te grāhyaṃ kāryopaghātakam |
kārye khalu vipanne tvāṃ so'dharmastāṃśca pīḍayet || 12 ||
[Analyze grammar]

vidraveccaiva rāṣṭraṃ te śyenātpakṣigaṇā iva |
parisravecca satataṃ naurviśīrṇeva sāgare || 13 ||
[Analyze grammar]

prajāḥ pālayato'samyagadharmeṇeha bhūpateḥ |
hārdaṃ bhayaṃ saṃbhavati svargaścāsya virudhyate || 14 ||
[Analyze grammar]

atha yo'dharmataḥ pāti rājāmātyo'tha vātmajaḥ |
dharmāsane niyuktaḥ sandharmamūlaṃ nararṣabha || 15 ||
[Analyze grammar]

kāryeṣvadhikṛtāḥ samyagakurvanto nṛpānugāḥ |
ātmānaṃ purataḥ kṛtvā yāntyadhaḥ sahapārthivāḥ || 16 ||
[Analyze grammar]

balātkṛtānāṃ balibhiḥ kṛpaṇaṃ bahu jalpatām |
nātho vai bhūmipo nityamanāthānāṃ nṛṇāṃ bhavet || 17 ||
[Analyze grammar]

tataḥ sākṣibalaṃ sādhu dvaidhe vādakṛtaṃ bhavet |
asākṣikamanāthaṃ vā parīkṣyaṃ tadviśeṣataḥ || 18 ||
[Analyze grammar]

aparādhānurūpaṃ ca daṇḍaṃ pāpeṣu pātayet |
udvejayeddhanairṛddhāndaridrānvadhabandhanaiḥ || 19 ||
[Analyze grammar]

vinayairapi durvṛttānprahārairapi pārthivaḥ |
sāntvenopapradānena śiṣṭāṃśca paripālayet || 20 ||
[Analyze grammar]

rājño vadhaṃ cikīrṣedyastasya citro vadho bhavet |
ājīvakasya stenasya varṇasaṃkarakasya ca || 21 ||
[Analyze grammar]

samyakpraṇayato daṇḍaṃ bhūmipasya viśāṃ pate |
yuktasya vā nāstyadharmo dharma eveha śāśvataḥ || 22 ||
[Analyze grammar]

kāmakāreṇa daṇḍaṃ tu yaḥ kuryādavicakṣaṇaḥ |
sa ihākīrtisaṃyukto mṛto narakamāpnuyāt || 23 ||
[Analyze grammar]

na parasya śravādeva pareṣāṃ daṇḍamarpayet |
āgamānugamaṃ kṛtvā badhnīyānmokṣayeta vā || 24 ||
[Analyze grammar]

na tu hanyānnṛpo jātu dūtaṃ kasyāṃcidāpadi |
dūtasya hantā nirayamāviśetsacivaiḥ saha || 25 ||
[Analyze grammar]

yathoktavādinaṃ dūtaṃ kṣatradharmarato nṛpaḥ |
yo hanyātpitarastasya bhrūṇahatyāmavāpnuyuḥ || 26 ||
[Analyze grammar]

kulīnaḥ śīlasaṃpanno vāgmī dakṣaḥ priyaṃvadaḥ |
yathoktavādī smṛtimāndūtaḥ syātsaptabhirguṇaiḥ || 27 ||
[Analyze grammar]

etaireva guṇairyuktaḥ pratīhāro'sya rakṣitā |
śirorakṣaśca bhavati guṇairetaiḥ samanvitaḥ || 28 ||
[Analyze grammar]

dharmārthaśāstratattvajñaḥ saṃdhivigrahako bhavet |
matimāndhṛtimāndhīmānrahasyavinigūhitā || 29 ||
[Analyze grammar]

kulīnaḥ satyasaṃpannaḥ śakto'mātyaḥ praśaṃsitaḥ |
etaireva guṇairyuktastathā senāpatirbhavet || 30 ||
[Analyze grammar]

vyūhayantrāyudhīyānāṃ tattvajño vikramānvitaḥ |
varṣaśītoṣṇavātānāṃ sahiṣṇuḥ pararandhravit || 31 ||
[Analyze grammar]

viśvāsayetparāṃścaiva viśvasenna tu kasyacit |
putreṣvapi hi rājendra viśvāso na praśasyate || 32 ||
[Analyze grammar]

etacchāstrārthatattvaṃ tu tavākhyātaṃ mayānagha |
aviśvāso narendrāṇāṃ guhyaṃ paramamucyate || 33 ||
[Analyze grammar]